1 Samiyɛlə 14

1 Dɩɩn don nə, Sayulə bìú Zonatan swɩ̀n balandʋrʋ tə con, ʋ nə zɩŋa ʋ kwatarɩ zɩla tə, ʋ wʋ́: «Bà nə galɩ, nə va Filisi tɩ̀án kwatara púlí tə con, kʋ nə cɩ̀gà kʋ zɩga nacoru tə vàn tə don tə nə.» Yá Zonatan wà yoo mama ʋ nyɩna Sayulə con swɩ̀n. 2 Kʋ máŋá tə wa, də Sayulə yà wulə Migəron nə, Gibeya nii nə, gərenadə tɩ̀ʋ́ də̀ń. Yá kwatara tə, ba yà nə wulə də wá, yà yɩ ndə lɩ̀à biəyardʋ nə. 3 Yá Ahɩya, ʋ nə yɩ Ahitubə bìú, yà zʋa Yɩɩ joŋwana gànʋ̀*, ʋ ja wulə lá. Ahitubə yɩ Yɩkabɔdə nubiu. Yɩkabɔdə yɩ Fineyasə bìú. Fineyasə yɩ Eli bìú. Eli yà yɩ Ba-Yígúrə́-Jə-Tiu joŋwanʋ, Silo nə. Yɩzərayɛlə lɩ̀à tə yà yəri də, Zonatan vìí.

4 Cwəŋə tə Zonatan nə pɩ̀à, sə ʋ twá, ʋ ma va Filisi tɩ̀án kwatara púlí tə con, kʋ nə cɩ̀gà kʋ zɩga, yà wulə pɩ̀ràn cʋcwaran bələ pwə́rə́ wa. Kʋ don yɩrɩ nə Bɔtəsɛtəsə, kʋ don yɩrɩ nə Sene. 5 Pɩ̀ʋ̀ təntə don, yà zɩga jɩzən saparʋ yuu, kʋ pìí kʋ daa Mikəmaswə con. Kʋ don də ga zɩga jɩgwiə saparʋ yuu, kʋ pìí kʋ daa Geba con.

6 Zonatan dàń swɩ̀n balandʋrʋ tə con, ʋ nə zɩŋa ʋ kwatarɩ zɩla tə, ʋ wʋ́: «Bà nə va nə yí lɩ̀à ba tə nə yəri Yɩɩ, ba púlí tə nə cɩ̀gà kʋ zɩga. Dɩɩn don, Ba-Yígúrə́-Jə-Tiu wá san nəba, ʋ pa nə ta ba nə də́. Cɩ́gá, də nə nə dáá, nə à yə̀ə́ nə nə ba dáá, won tə̀lə́ kʋ cɩ̀ Ba-Yígúrə́-Jə-Tiu nə, sə ʋ pa nə də́ dɩ̀àn.» 7 Lìù tə, ʋ nə zɩŋa ʋ kwatarɩ zɩla tə, le wá, ʋ wʋ́: «Tʋn kʋ tə mama, kʋ nə wulə n bɩcan wa, dàn ká bɛ̀ɛ́. À zɩga n kwa də à waa mama.» 8 Zonatan ma swɩ̀n, ʋ wʋ́: «Kʋ ziən! Nə vələ nə nan ba yɩ́á yuu, sə ba na nəba. 9 Ba nə swɩ̀n nə con, ba wʋ́, nə zɩga də ba bɩ̀àn, sə ba yí nəba, nə wá zɩgɩ kʋ bwálɩ́ tə wa, nə bá dɩ̀ ba con. 10 Yá ba dàń nə wʋ́, nə dɩa ba con, nə wá dɩ̀. Cɩ́gá, mə kʋ mʋ̀ nə wá ya mɩmɩnʋ, kʋ bɩrɩ nəba, də Ba-Yígúrə́-Jə-Tiu ken ba nə jɩɩn wa.»

11 Ba bələ tə mɛ dàń vəli ba nan Filisi tɩ̀án kwatara púlí tə nə, kʋ nə cɩ̀gà kʋ zɩga, ba pa ba na ba. Yá Filisi tɩ̀án tə dàń swɩ̀n duən con, ba wʋ́: «Á nəŋə Ebərə-ba nə, ba naŋa bʋran tə wa, ba yà nə səgə lá. 12 Yá Filisi tɩ̀án kwatara púlí tə, kʋ nə cɩ̀gà kʋ zɩga tə lɩ̀à dàń swɩ̀n Zonatan də lìù tə, ʋ nə zɩŋa ʋ kwatarɩ zɩla tə con, ba wʋ́: «Á dɩa nə con, nə wá bɩrɩ aba yoo tə nə wulə!» Zonatan ma swɩ̀n lìù tə con, ʋ nə zɩŋa ʋ kʋtara zɩla tə, ʋ wʋ́: «Pú à kwa, n dɩ̀. Cɩ́gá, Ba-Yígúrə́-Jə-Tiu ken ba, Yɩzərayɛlə lɩ̀à jɩɩn wa. 13 Zonatan dàń ciŋi ʋ jɩ̀àn də ʋ nɛɛ, pɩ̀ʋ̀ tə yɩra, ʋ ma dɩ̀. Lìù tə, ʋ nə zɩŋa ʋ kwatarɩ zɩla tə, də púə́ ʋ kwa, ʋ dɩ̀. Zonatan yà wulə yáá, ʋ mà Filisi tɩ̀án tə, ʋ dɩ tɩa, yá lìù tə, ʋ nə zɩŋa ʋ kwatarɩ zɩla tə, ga wulə ʋ kwa, ʋ gwɩ ba. 14 Təntən mà təntə, Zonatan də lìù tə, ʋ nə zɩŋa ʋ kwatarɩ zɩla tə, nə mà Filisi tɩ̀án tə, ba gʋa ba wa lɩ̀à, ba yí lɩ̀à sapʋa, kʋ bwálɩ́ nəmaa təntə wa. 15 Fən dàń zʋa Filisi tɩ̀án kwatara sàń tə, də nagwanaa tə, də ba lalʋʋ tə mama. Fən zʋa ba kwatara tə, ba yà nə cɩ̀gà ba zɩga, də ba tə, ba yà nə pàrɩ̀ səsen, ba ja kɩkarɩ tə, mama. Kʋ tə nə súrí lá, tɩa tə vuvugu, yá kʋ dàń ken fən nəfarʋ.

16 Sayulə lɩ̀à tə, ba nə cɩ̀ Gibeya tɩʋ tə nə, Bɛnzwamɛn nagwanaa tə wa, nɩ də Filisi tɩ̀án tə dəri, ba laga duən yáá nə, tɩa mama. 17 Sayulə ma swɩ̀n kwatara tə con, ba yà nə wulə də wá, ʋ wʋ́: «Á gala lɩ̀à tə, á jə́n wàà nə nan, nə titəŋi wa.» Ba ma gàlà lɩ̀à tə, ba na də Zonatan də lìù tə, ʋ nə zɩŋa ʋ kwatarɩ zɩla tə, nə tə̀lə́. 18 Sayulə dàń swɩ̀n Ahɩya con, ʋ wʋ́: «Ja Yɩɩ joŋwana gànʋ̀ tə, n bà yəbə.» Cɩ́gá, kʋ máŋá təntə wa, də Ahɩya yà zʋa Yɩɩ joŋwana gànʋ̀ tə, ʋ ja wulə Yɩzərayɛlə lɩ̀à tə yáá. 19 Yá máŋá tə Sayulə nə wulə ʋ swɩ̀n Yɩɩ joŋwanʋ tə con, zizigu yà yɩ kʋ kwɛn kʋ súrí Filisi tɩ̀án kwatara púlí tə wa. Sayulə dàń ma swɩ̀n Yɩɩ joŋwanʋ tə con, ʋ wʋ́: «Pìí n lɩ n jɩɩn!»

20 Kʋ kwa nə, Sayulə də kwatara tə mama, ba yà nə wulə də wá, dàń ken duən, ba va ba yí kʋ̀ʋ̀ tə bwálɩ́. Ba nə yí lá, ba nɩ də Filisi tɩ̀án tə yà viviə zənzən, kʋ pa ba tətə pìí ba tɛ duən. Yá kʋ dàń yɩn yogwarʋ nəfarʋ. 21 Də kʋ̀ʋ̀ tə tə yà wà zàn, Ebərə-ba duən yà sɛ̀ Filisi tɩ̀án tə nii, ba tʋŋa ba pɩn ba. Yá ba dàń yà twá Filisi tɩ̀án tə nə, ba va Filisi tɩ̀án kwatara sàń tə wa. Ebərə-ba təntə dàń nan ba yá Filisi tɩ̀án tə, ba ga va ba san ba nubɩa Yɩzərayɛlə lɩ̀à tə nə, ba yà nə wulə də Sayulə də Zonatan. 22 Yɩzərayɛlə lɩ̀à tə mama, ba yà nə səgə Efərayimə pɛɛn tə wa, nì də Filisi tɩ̀án tə wulə ba dəri, sə ba jɛ́n, Yɩzərayɛlə lɩ̀à tə yáá nə. Ba də dàń nan, ba dɩŋa Filisi tɩ̀án tə kwa, ba tɛ ba. 23 Kʋ dɩɩn tə nə, Ba-Yígúrə́-Jə-Tiu pɩn Yɩzərayɛlə lɩ̀à də́ dɩ̀àn Filisi tɩ̀án tə yuu wa. Ba ta Filisi tɩ̀án tə wuuu, ba ja va ba kɛ̀ń Bɛtə-Avɛnə.

Sayulə dùə̀ durə, ka ja ʋ bìú Zonatan

24 Yɩzərayɛlə lɩ̀à tə dí càn, kʋ dɩɩn təntə nə. Cɩ́gá, Sayulə yà dùə̀ durə, ʋ kə Yɩzərayɛlə lɩ̀à tə yuu wa, ʋ wʋ́: «Lìù tə mama, ʋ nə dí wodiu, də à tə wà à dʋŋa tə tɛ, à də́, sə Yɩɩ yàlà kʋ tíú! ʋ nə wá də́ wodiu, də yɩɩ tə wà zwɩ!» Kʋ nətʋ tə dàń pɩn, Yɩzərayɛlə lɩ̀à tə wa, lìù mama cɩ́gá wà wodiu ʋ nii ken.

25-26 Yɩzərayɛlə lɩ̀à tə mama zʋa kasɔɔ tə wa, ba na tʋ̀ràn, də tə súə́ tɩa mama. Yá lìù mama wà tə lan, ʋ kə ʋ nii, lalʋʋ tə yà nə zìlí durə tə nii yɩrɩ. 27 Yá Zonatan mʋ̀ yà wà nì, də ʋ nyɩna dùə̀ durə, ʋ kə Yɩzərayɛlə lɩ̀à tə yuu wa. Ʋ tɩ dàʋ̀ tə, ʋ yà nə jə ʋ jɩɩn wa, ʋ tɩrɩ tʋnyɩnɩ tə wa, ʋ lan, ʋ kə ʋ nii. Yá ʋ yɩ́á pori. 28 Lalʋʋ tə wa lìù don ma swɩ̀n Zonatan con, ʋ wʋ́: «N nyɩna dùə̀ durə, ʋ kə Yɩzərayɛlə lɩ̀à tə yuu wa, sə Yɩɩ yàlà lìù tə, ʋ nə wá kə wodiu ʋ nii, zə̀n kʋ tə! Kʋ mʋ̀ nə pɩn, lalʋʋ tə mama ma gwarɩ.» 29 Zonatan ma swɩ̀n, ʋ wʋ́: «À nyɩna yɩ càn nə ʋ ken lalʋʋ tə nə. Á ywàŋá, à nə ken tʋ̀ràn tə mancɩn à nii, à yɩ́á dàń tə pori! 30 Cɩ́gá mama, Yɩzərayɛlə kwatara tə yà nə yɩ ba dí wiən tə, ba nə ta ba jon ba dʋŋa tə con, zə̀n kʋ tə, ba yà bá də́ dɩ̀àn Filisi tɩ̀án tə yuu wa, ba doni nətən naaa?

31 Kʋ dɩɩn tə nə, ba zɩgɩ Mikəmasə, ba ta Filisi tɩ̀án tə, ba ja va ba yí Ayalon. Yá Yɩzərayɛlə lɩ̀à tə dàń yà gwàrɩ̀ zənzən. 32 Yá ba dàń kun wiən tə yuu nə, ba nə ta ba jon. Ba jɩn vanmɩnɩ, də nɩan, də nabii. Ba gʋa tə bwálɩ́ təntə wa, yá lalʋʋ tə dàń dí nàŋʋ́ tə, də kʋ jana tə mɛ. 33 Lɩ̀à twi ba swɩ̀n kʋ, Sayulə con, ba wʋ́: «Nə̀ń, Yɩzərayɛlə lɩ̀à tʋn cʋna Ba-Yígúrə́-Jə-Tiu yáá con, ba nə dí nàŋʋ́ tə, də kʋ jana tə yɩrɩ.» Yá Sayulə le, ʋ wʋ́: «Á yɩ cʋna lɩ̀à! Á bəbələ kapan nəfarʋ, á ja bà à con, sɩ́ʋ́n sɩ́ʋ́n.» 34 Sayulə tə swɩ̀n ʋ súrí lá, ʋ wʋ́: «Á vələ á swɩ̀n Yɩzərayɛlə lɩ̀à tə con, sə ba lìù mama ja ʋ naʋ, nə à yə̀ə́ ʋ piə, ʋ bà à con. Yəbə nə á mɛ, sə á gʋ tə. Yá á dàń nə dí nàŋʋ́ tə, kʋ kʋ́ʋ̀ bá yà də kʋ jana tə mɛ, sə kʋ ma ya cʋna Ba-Yígúrə́-Jə-Tiu yáá con.» Kʋ didəni nə, Yɩzərayɛlə lɩ̀à tə lìù mama, van ʋ vànɩ́, ʋ ja bà, sə ba gʋ bwálɩ́ təntə wa. 35 Sayulə lwə̀ Yɩɩ joŋi bwálɩ́ lá nə, ʋ pa Ba-Yígúrə́-Jə-Tiu nə. Mə ʋ təntən Yɩɩ joŋi bwálɩ́ nə, ʋ nə lwə̀, ʋ pa Ba-Yígúrə́-Jə-Tiu nə.

36 Kʋ kwa nə, Sayulə swɩ̀n, ʋ wʋ́: «Nə yana Filisi tɩ̀án tə kwa, tɩtɩn kʋ tə nə, nə dɩŋa ba, nə mà, nə jon ba wiən, kʋ jə vələ tɩpʋrɩ. Nə dàn ká yá ba lìù mama, nə pa ʋ jɛ́n.» Yɩzərayɛlə lɩ̀à tə ma le, ba wʋ́: «Tʋn kʋ tə mama, kʋ nə ywán də mʋ́.» Yá Yɩɩ joŋwanʋ tə swɩ̀n, ʋ wʋ́: «Á bɩ̀án nə bólí Yɩɩ yɩra, bwálɩ́ kʋ tə wa.» 37 Sayulə dàń bwe Yɩɩ, ʋ wʋ́: «Kʋ mɛ, sə à dɩŋa Filisi tɩ̀án tə kwa naaa? N wá kə ba, Yɩzərayɛlə lɩ̀à tə jɩɩn wa?» Yá Yɩɩ wà wá le, kʋ dɩɩn tə nə. 38 Sayulə dàń ma swɩ̀n, ʋ wʋ́: «Á mʋ̀, lalʋʋ tə yáá tɩ̀án tə mama bɩ̀án yəbə! Á twara zəni, á jə́n bɛ̀ɛ̀ cʋna nə, nə tʋn zə̀n kʋ tə. 39 Kʋ yɩ cɩ́gá, Ba-Yígúrə́-Jə-Tiu wulə! Ʋ mʋ̀ ga nə yɩ Yɩzərayɛlə lɩ̀à jonu! À dùə̀ də, kʋ nə swə kʋ yɩ à bìú Zonatan nə tʋn cʋna təntə, ba wá gʋ wá kʋ yɩrɩ.» Yá Yɩzərayɛlə lɩ̀à tə wa, lìù mama wà Sayulə le. 40 Sayulə kʋ́ʋ̀ swɩ̀n Yɩzərayɛlə lɩ̀à tə mama con, ʋ wʋ́: «Á mama vələ vàn nədʋ, yá à də à bìú Zonatan də wá zɩgɩ, vàn nədʋ.» Yá lalʋʋ tə le wa, ba wʋ́: «Tʋn kʋ tə, nə ywán də mʋ́.» 41 Sayulə dàń swɩ̀n Ba-Yígúrə́-Jə-Tiu con, ʋ wʋ́: «Yɩzərayɛlə lɩ̀à Yɩɩ, à lòrì mʋ́, sə n pa nə lwarɩ cɩ́gá tə yuu.» Yá pwárʋ́ tə dàń jɩn Zonatan də Sayulə. Lalʋʋ tə yoo kʋ́ʋ̀ twá, kʋ tə̀lə́ lá. 42 Sayulə kʋ́ʋ̀ swɩ̀n, ʋ wʋ́: «Á pwárá à mʋ̀ də à bìú Zonatan pwə́rə́ wa.» Yá pwárʋ́ tə jɩn Zonatan. 43 Sayulə swɩ̀n Zonatan con, ʋ wʋ́: «Swɩ̀n yoo tə, n nə fwa, n bɩrɩ nə.» Zonatan ma le wá, ʋ wʋ́: «Dàʋ̀ tə nə wulə à jɩɩn wa nii nə, à ma lan tʋ̀ràn mancɩn, à də́. Nə̀ń à nə, à sɛ̀, sə à tɩ.» 44 Yá Sayulə dàń swɩ̀n, ʋ wʋ́: «À nə wà pɩn ba gʋ n mʋ̀ Zonatan, sə Yɩɩ cʋ̀gʋ̀ à yáá də à kwa*!» 45 Yá Lalʋʋ tə dàń swɩ̀n Sayulə con, ba wʋ́: «N wʋ́ bɛ̀? Zonatan wá tɩ? Ʋ mʋ̀ lìù tə, ʋ nə pɩn, Yɩzərayɛlə lɩ̀à də́ dɩ̀àn zənzən nətən! Kʋ nətʋ tə wàrɩ̀ mɩ́ámɩ́án! Kʋ yɩ cɩ́gá, Ba-Yígúrə́-Jə-Tiu wulə! Nə dùə̀ də, Zonatan yuu kʋʋ nədʋ tətə, ba tɩa twɩ. Cɩ́gá, kʋ yɩ Yɩɩ sáŋʋ́ nə, ʋ ma tʋn zə̀n dɩɩn kʋ tə nə.» Yá mə kʋ twá nətʋ, lalʋʋ tə ma jon Zonatan mɩɩ, ba kə lʋʋ. 46 Sayulə dàń pìí ʋ yá Filisi tɩ̀án tə, yá ba dəri ba va ba lʋʋ nii wa.

Kʋ̀ràn tə duən Sayulə nə ta ʋ də́

47 Sayulə nə jon pàrɩ̀ tə, Yɩzərayɛlə lʋʋ nii tə wa, kwa nə, ʋ ta kʋ̀ʋ̀ də ʋ dʋŋa tə mama, ba nə kɩkarɩ wa. Ʋ ta kʋ̀ʋ̀ də Mʋabə tɩ̀án, də Amon dwíí tə, də Edomə tɩ̀án, də Soba pɛ̀gá tə, də Filisi tɩ̀án. Yá bwálɩ́ tə mama, ʋ nə viviri ʋ yáá ʋ kə, ʋ yàá ta, ʋ də́. 48 Dɩɩn don nə, Sayulə ta Amalɛkə dwíí tə ʋ də́, ʋ ma bɩrɩ ʋ dɩ̀àn nə mɛ nətʋ. Kʋ twá nətʋ, ʋ ma jon Yɩzərayɛlə lɩ̀à, Amalɛkə dwíí tə jɩɩn wa, ba yà nə vɩrɩ Yɩzərayɛlə lɩ̀à tə wiən.

Sayulə də ʋ dìə̀ lɩ̀à

49 Sayulə bɩ̀á yà nə yɩ Zonatan, də Yiswəvi, də Maləkisʋa. Ʋ yà jə bwɩ̀ɩ́ bələ. Nəkwɩa tíú tə yɩrɩ nə yɩ Merabə. Nəmaa tíú tə yɩrɩ nə yɩ Mikalə. 50 Sayulə kan yɩrɩ nə yɩ Ahinowamə. Ahinowamə yà yɩ Ahimasə bʋ̀á. Sayulə kwatara yuu tíú tə yɩrɩ nə yɩ Abənɛrə. Ʋ yɩ Sayulə nyɩna nubidon Nɛrə bìú. 51 Kiswə, ʋ nə yɩ Sayulə nyɩna, də Nɛrə, ʋ nə yɩ Abənɛrə nyɩna, yà yɩ Abɩyɛlə bɩ̀á.

52 Babarɩ kʋ̀ʋ̀ yɩn Yɩzərayɛlə lɩ̀à də Filisi tɩ̀án tə pwə́rə́ wa, máŋá tə mama, Sayulə nə yɩn lʋʋ wa. Yá Sayulə nə nɩ babɩa mama Yɩzərayɛlə lɩ̀à tə wa, ʋ yàá ja wá, ʋ kə ʋ kwatara tə wa.