Sayulə ta kʋ̀ʋ̀ də Amalɛkə dwíí tə
15
1 Dɩɩn don nə, Samiyɛlə swɩ̀n Sayulə con, ʋ wʋ́: «Kʋ yɩ à mʋ̀ nə, Ba-Yígúrə́-Jə-Tiu tʋn, sə à twɛ́n dun nʋga* n yuu wa, sə n ya ʋ lɩ̀à tə pɩ̀ʋ́, n də́ pàrɩ̀ Yɩzərayɛlə lɩ̀à tə yuu wa. Sɩ́ʋ́n nə, n dàń cʋgʋ kori tə, Ba-Yígúrə́-Jə-Tiu nə pɩn nə, sə à swɩ̀n n con. 2 Ba-Yígúrə́-Jə-Tiu tə, ʋ nə yɩ kwatara Yɩɩ wʋ́, máŋá tə, Yɩzərayɛlə lɩ̀à nə nan Ezwipətə lʋʋ nii tə wa, ba vìrí, Amalɛkə dwíí tə nan ba cɩ̀ ba yáá nə. Kʋ mʋ̀ yɩrɩ, ʋ wá bʋ̀rɩ̀ Amalɛkə dwíí tə bʋra, sə ʋ cʋ̀gʋ̀ ba. 3 Ʋ wʋ́ sɩ́ʋ́n nə, n dàń vəli n ta Amalɛkə dwíí tə. Gʋ ba lɩ̀à tə mama mɩ́ámɩ́án*, n ga cʋ̀gʋ̀ wiən tə mama, tə nə yɩ ba mʋ̀ nə tɩ. N wà mɛ, sə n lɩ ba ladʋa tətə, n dʋgʋ. N wá gʋ bara tə də kana tə, bìsɩ́ná tə də bìsɩ̀nɩ́ tə, nɩan tə də pee tə, nyʋgʋmɛ tə də bɩnɛ tə.» 4 Sayulə dàń bon lalʋʋ tə, ʋ kun duən nə, ʋ ga gàlɩ̀ ba Telayimə nə. Ba yà yɩ kwatara mʋ̀rʋ̀ biələ, ba nə vəli də nɛɛ, kʋ súrí Zwida dwíí tə wa bara mʋ̀rʋ̀ fugə nə. 5 Yá Sayulə də ʋ kwatara tə nə vəli, ba yí Amalɛkə dwíí tə tɩʋ tə, ba səgə vara tə wa, sə ba ta ba, kʋ dɩ̀ ba yuu. 6 Yá Sayulə dàń swɩ̀n yàrá dwíí tə con, ʋ wʋ́: «Á naŋa! Á vìrə́! Á naŋa á ga yá Amalɛkə dwíí tə, sə à dàn ká gʋ á də, ndə ba nə. Cɩ́gá, á mʋ̀ tʋn wʋywaŋʋ* Yɩzərayɛlə lɩ̀à tə mama yɩra, máŋá tə, ba nə nan Ezwipətə lʋʋ nii tə wa, ba vìrí.» Yàrá dwíí tə dàń ma nan, ba ga yá Amalɛkə dwíí tə.Sayulə vɩga Yɩɩ nii, Yɩɩ də ma vɩ wá ʋ dʋgʋ
7 Sayulə zɩgɩ Havɩla, ʋ gʋ Amalɛkə dwíí tə, ʋ ja va ʋ yí Surə, kʋ nə wulə Ezwipətə yɩɩ yipɩan con. 8 Sayulə jɩn Amalɛkə dwíí tə pɩ̀ʋ́ Agagə, ʋ wà wá gwɩ. Ʋ ga gʋ Amalɛkə dwíí tə lalʋʋ tə mʋ̀ mama mɩ́ámɩ́án*, də kwatara sɩ̀ʋ́. 9 Sayulə də ʋ kwatara tə wà Agagə mʋ́ gwɩ. Ba kúrí pee tə də nɩan tə wa, vàná tə nə ziən, də tə bɩ̀á tə nə ziən, də pebii tə nə jə nʋga, də wiən tə mama, tə nə ziən, ba yá vàn nə. Ba wà sɛ, ba gʋ tə mʋ̀. Yá vàná tə nə kwarɩ, tə ga ba fɩra jə cɩcɩ nə, ba gʋa.
10 Yá Ba-Yígúrə́-Jə-Tiu dàń swɩ̀n Samiyɛlə con, ʋ wʋ́: 11 «À kʋ́ʋ̀ ba swə, à nə lɩ Sayulə à tún, sə ʋ ya pɩ̀ʋ́ tə. Cɩ́gá, ʋ vərəri ʋ kwa, ʋ ma sà nə, yá ʋ ba à nii zìlí, yìə̀n tə wa, à nə bɩrɩ wá, sə ʋ tʋn.» Samiyɛlə nə nì kʋ, ʋ lɩŋa zàn, ʋ ga bubwi, ʋ kə Ba-Yígúrə́-Jə-Tiu nə, tɩtɩn tə mama. 12 Kʋ tɩpʋrɩ nə, Samiyɛlə zàn jɩjʋ fuən fuən, ʋ va, sə ʋ jəri Sayulə. Yá lɩ̀à duən dàń swɩ̀n ʋ con, də Sayulə vəli, ʋ lwà ʋ dɩ̀àn mɩmɩnʋ biripuŋi*, ʋ zɩgɩ Karəmɛlə nə, ʋ ga pìí ʋ twá gugolu, ʋ ma va Giləgalə. 13 Samiyɛlə ma va ʋ yí Sayulə. Yá Sayulə dàń swɩ̀n ʋ con, ʋ wʋ́: «Ba-Yígúrə́-Jə-Tiu wá fwa zəni n yɩra! Kʋ tə, Ba-Yígúrə́-Jə-Tiu nə pɩn nii, sə à tʋn, à tʋn kʋ, à pa kʋ nii sú.» 14 Samiyɛlə ma bwe wá, ʋ wʋ́: «Sə kʋ twá nətə, à ma nə̀ń pee də nɩan kwirə, à zɩan wa?» 15 Sayulə le, ʋ wʋ́: «Tə yɩ vàná tə nə ziən, kwatara tə nə kúrí, Amalɛkə dwíí tə pee tə də ba nɩan tə wa, ba kə vàn nə. Ba ja tə ba bà, sə ba ma fwa joŋi, ba pa Ba-Yígúrə́-Jə-Tiu nə, ʋ nə yɩ n Yɩɩ. Yá nə gʋa tə gɩganɩ tə mʋ̀ mama mɩ́ámɩ́án.»
16 Yá Samiyɛlə swɩ̀n Sayulə con, ʋ wʋ́: «Yá nətʋ! À wá swɩ̀n kʋ tə, Ba-Yígúrə́-Jə-Tiu nə swɩ̀n à con, dɩan tɩtɩn nə, à bɩrɩ mʋ́.» Sayulə ma le wá, ʋ wʋ́: «Swɩ̀n!» 17 Yá Samiyɛlə dàń swɩ̀n Sayulə con, ʋ wʋ́: «Dí yáá nə, n yà jələ n tɩ̀án, də n yɩ jɩmurinyʋa. Yá də kʋ mɛ, n jìgə̀ Yɩzərayɛlə dwíə́ tə pɩ̀ʋ́. Ba-Yígúrə́-Jə-Tiu nə twɛ́n dun nʋga* n yuu wa, sə n ya Yɩzərayɛlə pɩ̀ʋ́. 18 Ba-Yígúrə́-Jə-Tiu tʋn mʋ́, sə ʋ n va, n gʋ Amalɛkə dwíí tə mama mɩ́ámɩ́án, ba nə yɩ cʋna lɩ̀à tə yɩrɩ. Ʋ swɩ̀n, sə n ta ba, n gʋ ba mama, n zwɛ̀, mɩ́ámɩ́án. 19 Bɛ̀ɛ̀ dàń nə pɩn, n ma wà Ba-Yígúrə́-Jə-Tiu nii zìlí? Bɛ̀ɛ̀ nə pɩn, n ma pɛ̀ wiən tə, n nə ta n jon* Amalɛkə dwíí tə con? Kʋ nətʋ tə yɩ yolwan, n tʋn, Ba-Yígúrə́-Jə-Tiu yáá con.» 20 Sayulə le wá, ʋ wʋ́: «À zìlí Ba-Yígúrə́-Jə-Tiu nii zəni. À tʋn kʋ tə, ʋ nə bɩrɩ nə, sə à tʋn. À gʋa Amalɛkə dwíí tə mama mɩ́ámɩ́án. Ba pɩ̀ʋ́ Agagə cɩcɩ nə à jɩn, à ja bà. 21 Yá kʋ nə yɩ pee tə də nɩan tə də, kʋ yɩ tə tə nə jə nʋga tə nə, kwatara tə kúrí wiən tə wa, nə ta nə jon. Tə yɩ ba yà ja bà, sə ba ma fwa joŋi Giləgalə nə, ba pa Ba-Yígúrə́-Jə-Tiu nə, ʋ nə yɩ n Yɩɩ.» 22 Yá Samiyɛlə kʋ́ʋ̀ swɩ̀n, ʋ wʋ́:
«Vàná tə, ba nə gwɩ ba sʋ̀rɩ́*, ba pɩn Yɩɩ nə,
də jwəŋə poli Ba-Yígúrə́-Jə-Tiu pùə́,
kʋ doni ba nə zìlí ʋ nii naaa?
Nə̀ń, ka zìlí nii jə funə,
kʋ doni jwəŋə fwaŋʋ.
Yá ka sɛ̀ nii jə funə,
kʋ doni, pebɩran nʋga.
23 Cɩ́gá, n nə yə̀ə́ ka va vʋrʋ sàń,
ka mà kapan nə yɩ yolwan nətʋ,
mə ka vɩ nii də yɩ nətʋ.
Yá cɩrɩ də zɩbaniu mɛ yɩ won nədʋ.
Kʋ mʋ̀ yɩrɩ nə,
n nə vɩga Ba-Yígúrə́-Jə-Tiu sʋgʋ tə,
ʋ də vɩga mʋ́, ʋ dʋgʋ,
n kʋ́ʋ̀ tà pɩ̀ʋ́.»
24 Sayulə dàń swìn Samiyɛlə con, ʋ wʋ́: «Kʋ yɩ cɩ́gá, à tʋn lwanɩ. À vɩga, sə à zìlí Ba-Yígúrə́-Jə-Tiu nii, à ga vɩ n də tətə kwìə̀ tə. Kwatara tə fən nə, à yà dəri, kʋ mʋ̀ nə pɩn, à ma zìlí ba nii. 25 Sɩ́ʋ́n nə, à dàń lwɛ̀ n nə, à cʋna tə yɩrɩ. À lòrì mʋ́, sə n pìí n kwə́ nə, n ja va, sə à tʋ à nadwana yuu, Ba-Yígúrə́-Jə-Tiu yáá con, à pa wá dun*.» 26 Yá Samiyɛlə le wá, ʋ wʋ́: «À mʋ̀ bá pìí à kwə́ mʋ́, à ja va lá. Cɩ́gá, n vɩga Ba-Yígúrə́-Jə-Tiu sʋgʋ tə. Kʋ mʋ̀ yɩrɩ, Ba-Yígúrə́-Jə-Tiu də vɩga mʋ́, ʋ dʋgʋ. N kʋ́ʋ̀ tà Yɩzərayɛlə pɩ̀ʋ́.»
27 Yá Samiyɛlə nə vərəri, sə ʋ vìí, Sayulə pùrì ʋ gànʋ̀ nii nə, gànʋ̀ tə ma cɩrɩ. 28 Samiyɛlə ma swɩ̀n Sayulə con, ʋ wʋ́: «Mə nətʋ nə, Ba-Yígúrə́-Jə-Tiu van Yɩzərayɛlə pàrɩ̀ tə, ʋ cɩrɩ, ʋ jon n con, zə̀n kʋ tə, ʋ pa n jəndon nə, ʋ nə kʋ́kwà mʋ́. 29 Yɩɩ tə, ʋ nə yɩ Yɩzərayɛlə lɩ̀à dun tíú, ba kʋ̀nkʋ̀n kʋ̀nɩ̀, ʋ ga ba swɩ̀n də, ʋ yà nə yə̀ə́. Cɩ́gá, ʋ tà ləzwənə, ʋ ma swɩ̀n də, ʋ yà nə yə̀ə́.» 30 Yá Sayulə kʋ́ʋ̀ swɩ̀n, ʋ wʋ́: «À yə̀ə́ də à tʋn lwanɩ! Yá à dàń nə lòrì mʋ́, sə n zìlí nə, à lɩ̀à tə nəkwɩna tə, də Yɩzərayɛlə lɩ̀à tə yáá con. Pìí n kwə́ nə, n ja va, sə à tʋ à nadwana yuu, Ba-Yígúrə́-Jə-Tiu yáá con, ʋ nə yɩ n Yɩɩ, à pa wá dun.» 31 Samiyɛlə dàń ma sɛ̀, ʋ pìí ʋ pú Sayulə kwa. Yá Sayulə dàń vəli, ʋ tʋ ʋ nadwana yuu, Ba-Yígúrə́-Jə-Tiu yáá con, ʋ pa wá dun.
32 Kʋ kwa nə, Samiyɛlə swɩ̀n, ʋ wʋ́: «Á jana Amalɛkə dwíí tə pɩ̀ʋ́ Agagə, á ja bà, á pa nə.» Yá Agagə dàń vəli, ʋ bɩ̀àn Samiyɛlə con, də yala. Ʋ yà swɩ̀n ʋ waa con, də cɩ́gá mama, tɩan fən kʋ́ʋ̀ tə̀lə́. 33 Yá Samiyɛlə dàń swɩ̀n ʋ con, ʋ wʋ́: «Nətʋ tə, n kwatara sɩ̀ʋ́ tə nə pɩn, kana kwɩ̀n ba bɩ̀á nə, mə nətʋ nə, n də nuu wá kwɩ̀n bìú nə, ʋ duən kana wa.» Yá Samiyɛlə dàń gʋa Agagə, ʋ ca ʋ tún Ba-Yígúrə́-Jə-Tiu yáá con, Giləgalə nə.