1 Samiyɛlə 16

Yɩɩ kúrí Davidə sə ʋ ya pɩ̀ʋ́

1 Dɩɩn don nə, Ba-Yígúrə́-Jə-Tiu, swɩ̀n Samiyɛlə con, ʋ wʋ́: «Máŋá kwà wa nə, n pucʋnɩ tə wá zwɛ̀, Sayulə yuu wa? À mʋ̀ vɩga wá à dʋgʋ. Ʋ kʋ́ʋ̀ tà Yɩzərayɛlə pɩ̀ʋ́. Kə nʋga, n sú n nanyʋgʋ tə nii, sə à tʋn mʋ́ Yɩzayi con, Bɛtəleyɛmə nə. Cɩ́gá, à kúrí ʋ bɩ̀á tə wa lìù don, sə ʋ ya pɩ̀ʋ́. 2 Yá Samiyɛlə swɩ̀n, ʋ wʋ́: «Nətə nə, à wá fwa, à ma va lá? Sayulə nə nì kʋ, ʋ wá gʋ nə.» Ba-Yígúrə́-Jə-Tiu ma swɩ̀n, ʋ wʋ́: «N wá ja nacɩn, n kə lá, n va. Yá n wá swɩ̀n də, kʋ yɩ n twi, sə n fwa joŋi, n pa Ba-Yígúrə́-Jə-Tiu nə. 3 N wá bon Yɩzayi, sə ʋ twá ʋ ya joŋi tə fwaŋʋ wa. Yá à tətə dàń wá bɩrɩ mʋ́, kʋ tə, n nə mɛ, sə n fwa. Yá à dàń wá bɩrɩ mʋ́ lìù tə, à nə pɩ̀à, sə n twɛ́n dun nʋga* ʋ yuu wa, n pa nə.» 4 Samiyɛlə tʋn kʋ tə, Ba-Yígúrə́-Jə-Tiu nə swɩ̀n, ʋ con. Ʋ zàn ʋ va Bɛtəleyɛmə. Yá Bɛtəleyɛmə tɩ̀án nəkwɩna tə nə nɩ Samiyɛlə, ba twi ba jəri wá, ba ga vɩvaga. Ba bwe wá, ba wʋ́: «Kʋ yɩ yazurə nə ja mʋ́ kʋ bà?» 5 Ʋ le ba, ʋ wʋ́: «Awo! À yɩ à twi, sə à fwa joŋi, à pa Ba-Yígúrə́-Jə-Tiu nə. Á kwɩan á tɩ̀àn, á lɩ durən yìə̀n wa, á ga bà à con, joŋi tə bwálɩ́ nə. Samiyɛlə pɩn Yɩzayi də ʋ bɩ̀á tə də kwɛn ba tɩ̀àn, ba lɩ durən yìə̀n wa, ʋ ga bon ba, sə ba bà joŋi tə bwálɩ́ nə.

6 Máŋá tə Yɩzayi bɩ̀á tə nə twi ba yí joŋi tə bwálɩ́ nə, Samiyɛlə nɩ Yɩzayi bikwɩa Eliyabə, ʋ ga swɩ̀n ʋ waa con, ʋ wʋ́: «Kʋ ba tʋ́tʋ̀ná jə, pɩ̀ʋ́ tə, Ba-Yígúrə́-Jə-Tiu nə kúrí*, sə ʋ ya jonu tə, wulə yəbə, Ba-Yígúrə́-Jə-Tiu yáá con.» 7 Yá Ba-Yígúrə́-Jə-Tiu swɩ̀n Samiyɛlə con, ʋ wʋ́: «Dàn ká taa ʋ nə ziən, n yɩ́á wa, də ʋ danɩ tə yɩrɩ, n bʋ́n də ʋ mʋ̀ nə, à kúrí, sə ʋ ya jonu. Cɩ́gá, à wà wá kúrí. Kʋ tà kʋ tə ləzwənə nə na nə, à jələ. Ləzwənə yɩ yɩ́á yuu zəni nə, ʋ jələ. Yá à mʋ̀ Ba-Yígúrə́-Jə-Tiu yɩ bɩcan zəni nə, à jələ. 8 Yɩzayi ma bon Abinadabə, ʋ pa ʋ twá Samiyɛlə yáá con. Yá Samiyɛlə swɩ̀n, ʋ wʋ́: «Ba-Yígúrə́-Jə-Tiu wà ʋ də kúrí.» 9 Yɩzayi ma pa Swama bà ʋ twá Samiyɛlə yáá con. Yá Samiyɛlə swɩ̀n, ʋ wʋ́: «Ba-Yígúrə́-Jə-Tiu wà ʋ də kúrí.» 10 Yɩzayi pɩn, ʋ bɩ̀á barpɛ tə, ba nə twi joŋi tə bwálɩ́ nə, twá Samiyɛlə yáá con, nədʋ nədʋ nətʋ. Yá Samiyɛlə swɩ̀n Yɩzayi con, ʋ wʋ́: «Ba-Yígúrə́-Jə-Tiu wà ba lìù mama kúrí.» 11 Samiyɛlə bwe Yɩzayi, ʋ wʋ́: «Mə n bɩ̀á tə mɛ nə naaa?» Yɩzayi le, ʋ wʋ́: «Kʋ ga Davidə, ba wa nəmaa tíú tə. Ʋ yɩ payɩrʋ, ʋ wulə pee kwa.» Samiyɛlə ma swɩ̀n, ʋ wʋ́: «Pa ba va, ba twarɩ wá, ba ja bà. Cɩ́gá, nə bá jə̀ń, nə də́ joŋi tə wodiu tə, də ʋ nə wà yəbə twi.»

12 Yɩzayi dàń ma pa ba va, ba bon Davidə, ba ja bà. Davidə yà yɩ sɩsɩnʋ, ʋ ga yɩ nanʋn, də ʋ zəni. Yá Ba-Yígúrə́-Jə-Tiu swɩ̀n Samiyɛlə con, ʋ wʋ́: «Zàn n twɛ́n dun nʋga tə, ʋ yuu wa. Cɩ́gá, mə ʋ nə, à kúrí!» 13 Samiyɛlə dàń tì nʋga tə, nanyʋgʋ tə wa, ʋ twɛ́n Davidə yuu wa, ʋ nubɩa tə titəŋi wa. Kʋ nə zɩgɩ kʋ dɩɩn tə nə, Ba-Yígúrə́-Jə-Tiu Siŋu* tə cúə́ Davidə yuu wa. Yá kʋ kwa nə, Samiyɛlə zàn ʋ va Rama.

Jə̀rə́ kʋkwɩʋn zʋa Sayulə

14 Ba-Yígúrə́-Jə-Tiu Siŋu* tə nan, kʋ yá Sayulə, yá Ba-Yígúrə́-Jə-Tiu ga tʋn jə̀rə́ kʋkwɩʋn don, ʋ pa ka bà, ka wuwalɩ Sayulə. 15 Sayulə tʋ̀tʋ̀nà tə swɩ̀n ʋ con, ba wʋ́: «Nə̀ń, Yɩɩ nə tʋn jə̀rə́ kʋkwɩʋn, ʋ pa ka bà, ka wuwalɩ mʋ́. 16 Yuu-tiu, nə mʋ̀, n tʋ̀tʋ̀nà tə yɩ, nə wulə n mʋ̀ yɩrɩ. N dàń pa nəba nii, sə nə pɩ̀à lìù, ʋ nə yɩ kúnkólú gwagʋ, nə ja bà. Máŋá tə Yɩɩ nə tʋn jə̀rə́ kʋkwɩʋn tə, ʋ pa ka bà, ka wulə mʋ́ ka wuwalɩ, kúnkólú gwagʋ tə wá dú bànʋ́ tə, yá kʋ wá kʋkwanɩ n yɩra.» 17 Sayulə le ʋ tʋ̀tʋ̀nà tə, ʋ wʋ́: «Á vələ á pɩ̀à kúnkólú gwagʋ nəzəŋu, á ja bà, á pa nə.» 18 Sayulə tʋ̀tʋ̀nà tə wa lìù don ma swɩ̀n, ʋ wʋ́: «À yə̀ə́ Yɩzayi bìú Bɛtəleyɛmə nə, ʋ nə yɩ kúnkólú gwagʋ nəzəŋu, ʋ ga yɩ kwatarʋ babɩa də. Ʋ yə̀ə́ yoo də̀ń, ʋ ga yɩ nanʋnbɛɛ də. Yá Ba-Yígúrə́-Jə-Tiu də ga wulə də wá.

19 Sayulə dàń ma tʋn lɩ̀à, ʋ pa ba swɩ̀n Yɩzayi con, sə Yɩzayi pa ʋ bìú Davidə, ʋ nə yɩ̀rɩ̀ pee tə, bà ʋ pa wá. 20 Yɩzayi Zìlí Sayulə nii. Yá ʋ dàń lɩ bɩna, ʋ zɩn ka də dipɛn, də divɛn púrí, də bʋbiə, ʋ tì ʋ pa ʋ bìú Davidə nə, sə ʋ ja kə lá ʋ va, ʋ pa Sayulə nə. 21 Davidə nə twi ʋ yí Sayulə con, Sayulə sóní wá zənzən, ʋ ga lɩ wá ʋ tún, sə ʋ zɩn ʋ kwatarɩ zɩla. 22 Sayulə tʋn, ʋ pa ba swɩ̀n Yɩzayi con, də ʋ lòrì, sə Yɩzayi yá Davidə, ʋ pa wá. Cɩ́gá, Davidə yà poli Sayulə púə́. 23 Kʋ nə zɩgɩ kʋ máŋá təntə wa, Yɩɩ nə tʋn jə̀rə́ kʋkwɩʋn tə, ʋ pa ka bà Sayulə yuu wa, Davidə yàá tì ʋ bànʋ́ tə, ʋ dú. Kʋ nətʋ dàń yàá pa, kʋ kʋkwanɩ Sayulə yɩra. Yá jə̀rə́ kʋkwɩʋn tə dàń yàá nan, ka yá wá.