2 Samiyɛlə 17

Uswayi tʋ́tʋ̀nɩ́ Ahitofɛlə kwìə̀ duən

1 Yìə̀n təntə kwa nə, Ahitofɛlə kʋ́ʋ̀ swɩ̀n Abəsalomə con, ʋ wʋ́: «Pa nə nii, sə à kúrí bara mʋ̀rʋ̀ fugə də bələ, à ma dɩŋa Davidə kwa, tɩtɩn kʋ tə, tətə nə. 2 À wá dɩŋa wá, à ja, də ʋ gwàrɩ̀, ʋ pùə́ mama ga cʋ̀gʋ̀. À wá pa fən zʋ wá zənzən, yá ʋ kwa lɩ̀à tə mama wá dəri, ba yá wá. À dàń wá gʋ ʋ cɩcɩ. 3 Yá à dàń wá ja lalʋʋ tə mama, à pìí, à bà n con. Cɩ́gá, à nə gʋa bɛɛ tə, n nə pɩ̀à ʋ gʋrɩ tə, lalʋʋ tə mama wá pìí, ba bà n con, də bɩcan sìə́.»

4 Ahitofɛlə sʋgʋ təntə yɩn ywánɩ́, kʋ pa Abəsalomə, də Yɩzərayɛlə nəkwɩna tə mama nə. 5 Yá də kʋ nətʋ mɛ, Abəsalomə tə swɩ̀n, ʋ wʋ́: «Bon Uswayi də, ʋ nə yɩ Arəka tíú, sə nə cʋgʋ kʋ tə, ʋ də nə wá swɩ̀n.» 6 Uswayi twi Abəsalomə con, yá Abəsalomə man kʋ tə, Ahitofɛlə nə swɩ̀n ʋ con, ʋ bɩrɩ Uswayi nə. Kʋ kwa nə, Abəsalomə bwe Uswayi, ʋ wʋ́: «Kʋ mɛ, sə nə tʋn kʋ naaa? Kʋ nə wà mɛ, sə n swɩ̀n.» 7 Uswayi ma le wá, ʋ wʋ́: «Naa ka tə mʋ̀ nə, Ahitofɛlə pɩn kwìə̀, tə nə ba ziən.» 8 Yá Uswayi dàń swɩ̀n, ʋ wʋ́: «N tətə yə̀ə́ n nyɩna tə, də ʋ kwatara tə! N yə̀ə́ də, ba yɩ kwatara babɩran! Yá sɩ́ʋ́n nə, ba yɩ ba fʋrɩ ndə kənyenkuru nə, kʋ bɩ̀á nə jɛ́n gaʋ tə wa. N nyɩna tə yɩ kwatarʋ. Ʋ də lalʋʋ tə bá jʋ bwálɩ́ nədʋ wa. 9 Sɩ́ʋ́n nə, kʋ wàá də, ʋ səgə bʋʋ wa, nə à yə̀ə́, bwálɩ́ don nə. Yá kʋ̀ʋ̀ tə də̀ń laŋʋ wa, ba nə gʋa nə wa lɩ̀à, lɩ̀à wá nì kʋ, ba ga swɩ̀n də, ba ta Abəsalomə kwa lɩ̀à tə, ba də́! 10 Yá kwatarʋ babɩa də tətə, ʋ waa nə swə, ka dà, ndə gəru nə, ʋ jɩ̀àn tə wá gwàrɩ̀. Cɩ́gá, Yɩzərayɛlə lɩ̀à tə mama yə̀ə́ də, n nyɩna tə yɩ babɩa, ʋ kwa lɩ̀à tə ga yɩ kwatara babɩran. 11 N dàń nə̀ń kʋ tə, à mʋ̀ nə nɩ. Pa Yɩzərayɛlə kwatara tə mama, kʋ nə zɩgɩ Dan, kʋ va kʋ yí Bɛrəsweba, bà duən yáá, n con. Ba wá ya dánɩ́, ndə mʋʋ nii kasɩlʋ nə. Yá n tətə dàń wá ya ba yáá, n ja va kʋ̀ʋ̀ tə. 12 Bwálɩ́ tə mama, Davidə nə wulə, nə wá va nə tʋ ʋ nə. Yá nə dàń wá pú ʋ yuu nə, ndə nyʋ̀nʋ̀ nə vwe tɩa yuu nətʋ. Nə wá gʋ ʋ də ʋ kwa lɩ̀à tə mama. Ba lìù nədʋ tətə bá jɛ́n, nə yáá nə. 13 Yá ʋ nə səgə tɩʋ wa, Yɩzərayɛlə lɩ̀à tə mama wá ja ŋoni, ba va, ba ma van tɩʋ təntə, ba gwɛrɩ, ba ja va, ba lwá nacoru wa. Yá kapan nədʋ tətə bá ga tɩʋ tə wa.» 14 Abəsalomə də Yɩzərayɛlə lɩ̀à tə mama dàń swɩ̀n, ba wʋ́: «Uswayi, ʋ nə yɩ Arəka tíú, kwìə̀ tə ziən, tə doni Ahitofɛlə kwìə̀ tə.» Yá kʋ nətʋ tə yɩ Ba-Yígúrə́-Jə-Tiu nə pɩn, Ahitofɛlə kwìə̀ nəzəŋə tə nii dàń ká sú. Ba-Yígúrə́-Jə-Tiu fwa kʋ nətʋ, sə ʋ ma pa, lɛɛ yí Abəsalomə.

Uswayi tʋn, ʋ kə Davidə nə, sə ʋ bɩn Zʋrədɛn mʋnaa tə

15 Uswayi vəli ʋ swɩ̀n Ahitofɛlə kwìə̀ tə, də ʋ tətə kwìə̀ tə, ba nə pɩn Abəsalomə də Yɩzərayɛlə lɩ̀à tə nə, ʋ bɩrɩ Sadɔkə də Abɩyatarə nə. 16 Yá ʋ tə swɩ̀n, ʋ súrí lá, ʋ wʋ́: «Sɩ́ʋ́n nə, á tʋŋa lìù Davidə con lala. Á tʋŋa, á swɩ̀n ʋ con, sə ʋ dàn ká jʋ Zʋrədɛn mʋnaa tə nii nə, zə̀n tɩtɩn kʋ tə nə. Ʋ mɛ, sə ʋ bɩn mʋnaa tə. Kʋ nə tà kʋ mʋ̀, ba wá gʋ ʋ də ʋ kwa lɩ̀à tə mama.» 17 Zonatan də Ahimasə yà səgə Eyin-Rogɛlə nə. Ba yà wà mɛ, sə ba zʋ tɩʋ tə wa, sə lìù na ba. Tʋtʋnbʋa don nə yàá ja yìə̀n tə, ʋ twi, ʋ swɩ̀n, ʋ bɩrɩ ba, ba də dàń ja vəli, ba swɩ̀n, ba bɩrɩ pɩ̀ʋ́ Davidə nə. 18 Yá balandʋrʋ don nɩ Zonatan də Ahimasə, ʋ ga va, ʋ swɩ̀n kʋ Abəsalomə con. Ba lɩ̀à bələ təntə dàń dəri lala, ba va, ba zʋ bɛɛ don dìə̀, Bahurimə nə. Bɛɛ təntə yà jə vɩlɩ, ʋ kàrá wa. Yá ba dàń zʋa, ba səgə vɩlɩ tə wa. 19 Bɛɛ tə kan tì won, ʋ ma pú vɩlɩ tə nii nə, ʋ larɩ wobɩa kʋ wa, sə lìù dàn ká lwarɩ. 20 Abəsalomə tʋ̀tʋ̀nà tə twi, ba zʋ kan tə con, dìə̀ tə wa, ba bwe wá, ba wʋ́: «Ahimasə də Zonatan wulə yə̀n nə?» Kan tə le ba, ʋ wʋ́: «Ba bɩn nacwəŋə tə.» Abəsalomə tʋ̀tʋ̀nà tə pɩ̀à ba, ba wà ba nɩ. Yá ba dàń pìí, ba va Zwerizalɛmə. 21 Ba viru tə kwa nə, Ahimasə də Zonatan nan vɩlɩ tə wa, ba va ba swɩ̀n kʋ tə mama, kʋ nə tʋn, ba bɩrɩ pɩ̀ʋ́ Davidə nə. Ba swɩ̀n ʋ con, ba wʋ́: «Á zaŋa á bɩn nɩ́á tə lala. Cɩ́gá, Ahitofɛlə pɩn kwìə̀, ʋ zɩgɩ á nə.» 22 Pɩ̀ʋ́ Davidə də lalʋʋ tə mama, kʋ yà nə wulə də wá, dàń zàn, ba bɩn Zʋrədɛn mʋnaa tə. Tɩbɩlakʋnʋ yí, də ba mama bɩn mʋnaa tə, ba lìù mama wà gɛ. 23 Ahitofɛlə nə nɩ də, ba wà ʋ kwìə̀ tə nii nə twá, ʋ ken ganpurə ʋ bɩ̀nà yuu, ʋ nan, ʋ va ʋ tɩʋ. Ʋ vəli, ʋ lɩ ʋ dìə̀ yìə̀n yáá, ʋ pa ʋ dìə̀ lɩ̀à nə, ʋ ga kùrí ʋ tɩ̀àn. Mə nətʋ nə, ʋ tɩga, yá ba tì wá, ba gùrì ʋ nyɩna libəri wa.

Davidə yí Mahanayimə

24 Davidə vəli ʋ yí Mahanayimə, Abəsalomə də ga ja Yɩzərayɛlə kwatara tə duən tə mama, ʋ va, ʋ bɩn Zʋrədɛn mʋnaa tə. 25 Abəsalomə tún Amasa, sə ʋ ya kwatara tə yáá tíú, Zʋabə bʋʋ wa. Amasa yà yɩ Yɩzərayɛlə bɛɛ don bìú, ʋ yɩrɩ nə yɩ Yɩtəra. Yɩtəra yà swe Nahaswə bʋ̀á Abigalə, ʋ nə yɩ Zʋabə nuu Seruya nubʋa. 26 Abəsalomə də Yɩzərayɛlə lɩ̀à tə duən tə vəli, ba kə ba dəkuu Galadə lʋʋ nii tə wa.

27 Máŋá tə Davidə nə yí Mahanayimə, Sobi, də Makirə, də Barəzilayi twi, ba jəri wá. Sobi nan Raba, Amon lʋʋ nii tə wa. Ʋ nyɩna yɩrɩ nə Nahaswə. Makirə nan Lodebarə. Ʋ nyɩna yɩrɩ nə Amɩyɛlə. Yá Barəzilayi nan Rogelimə, Galadə lʋʋ nii tə wa. 28 Ba ja sàrɩ́, də kwara, də nəvwii, də dipɛn mɩna, də dipɛn mɩna yiri don, də mun, də mɩna dala, ba nə wùə̀, də swə̀nə̀, də sɩnʋna, 29 də tʋ̀ràn, də nayɩlɩ nʋga, də pee, də nayɩlɩ cilə, ba bà, ba pa Davidə də lalʋʋ tə nə, ba yà nə wulə ʋ kwa, sə ba də́. Cɩ́gá, ba mʋ̀ lɩ̀à təntə yà swɩ̀n, ba wʋ́: «Kʋ wàá də, niən, də nanyʋnɩ, də gwarʋ pɩn, lalʋʋ tə də́ càn zənzən, kasɔɔ lanworu tə wa.»