Davidə də Siba yoo
16
1 Máŋá tə, Davidə nə zìə́n paan tə mancɩn, də nə̀ń Mefiboswɛtə tʋtʋnʋ Siba nə, ʋ twi ʋ jəri wá, də bɩnɛ bələ, ʋ nə ken zɩla tə yuu wa. Bɩnɛ tə yà zɩŋa dipɛn dàlá biələ, də divɛn tɩ̀án bɩ̀á, ba nə cili, ba kə duən nə, tə kʋ̀, kúkúlə́ bíí, də kapɩra, ba nə cili, ba kə duən nə, tə kʋ̀, kúkúlə́ bíí, də divɛn púrí. 2 Pɩ̀ʋ́ Davidə bwe Siba, ʋ wʋ́: «Bɛ̀ɛ̀ nə n pɩ̀à n fwa, də zɩla tə tə?» Siba le, ʋ wʋ́: «À nyɩna pɩ̀ʋ́, n dìə̀ lɩ̀à tə wá dɩ̀ bɩnɛ tə ban. Dipɛn tə, də tɩ̀án lənə tə wá yà n kwa lɩ̀à tə nii wodiu. Yá divɛn tə wá zuri lɩ̀à tə nanyʋnɩ, ba nə wá gwàrɩ̀ kasɔɔ lanworu tə wa.» 3 Pɩ̀ʋ́ Davidə kʋ́ʋ̀ bwe, ʋ wʋ́: «N yuu-tiu tə nàʋ́ Mefiboswɛtə wulə yə̀n nə?» Siba le pɩ̀ʋ́ Davidə, ʋ wʋ́: «Ʋ mɛn Zwerizalɛmə nə. Cɩ́gá, ʋ swɩ̀n də zə̀n kʋ tə, Yɩzərayɛlə lɩ̀à tə wá pa wá, ʋ nɩbɛɛ pàrɩ̀ tə.» 4 Yá pɩ̀ʋ́ Davidə dàń swɩ̀n Siba con, ʋ wʋ́: «Kʋ nə yɩ nətʋ, won tə mama Mefiboswɛtə yà nə tɩ, dàń yɩ n mʋ̀ nyiən.» Siba tʋa ʋ nadwana yuu, ʋ ga swɩ̀n, ʋ wʋ́: «Də n lɛ̀ɛ̀, à nyɩna pɩ̀ʋ́. À dàń lòrì mʋ́, sə n tə fwa pubwanʋ à yɩra wuuu.»Swimeyi zɩrɩ ʋ kə Davidə nə
5 Máŋá tə, pɩ̀ʋ́ Davidə nə yí Bahurimə, bɛɛ don nan tɩʋ təntə wa, ʋ zɩrɩ ʋ kəni ʋ nə. Bɛɛ təntə yɩ Sayulə dwíí tíú. Ʋ yɩrɩ nə yɩ Swimeyi. Ʋ yɩ Gera bìú. 6 Ʋ pɛ̀ kapana ʋ ma dɩlɩ Davidə, də ʋ kwa lɩ̀à tə mama. Yá lalʋʋ tə, də kwatara babɩran tə mama dàń yà ken pɩ̀ʋ́ Davidə titəŋi wa, ba wulə ʋ jɩzən də ʋ jɩgwiə nə, ba vəli. 7 Swimeyi yà zɩrɩ ʋ kəni pɩ̀ʋ́ Davidə nə, ʋ ga swɩ̀n, ʋ wʋ́: «Jɛ́n lá nə! Jɛ́n lá nə! N mʋ̀ lagʋrʋ! Bakʋkwanyiən! 8 Ba-Yígúrə́-Jə-Tiu yɩ ʋ wulə, ʋ kəni mʋ́ càn wa, Sayulə də ʋ dìə̀ tə mama yɩrɩ, n nə gʋa, n ga jon ʋ pàrɩ̀ tə, n də́. Kʋ mʋ̀ nə pɩn, Ba-Yígúrə́-Jə-Tiu jon pàrɩ̀ tə n con, ʋ pa n bìú Abəsalomə nə. Yá n dàń nə̀ń mʋ́ nə, n wulə yinəgə wa, n nə yɩ lagʋrʋ tə yɩrɩ!» 9 Seruya bìú Abiswayi dàń swɩ̀n pɩ̀ʋ́ Davidə con, ʋ wʋ́: «Kʋ yɩ nətə, kukurətɩgʋ kʋ tə ma zɩrɩ, ʋ kəni à nyɩna pɩ̀ʋ́ nə? Yá, sə à va, à goŋə ʋ yuu.» 10 Yá pɩ̀ʋ́ Davidə swɩ̀n, ʋ wʋ́: «Kʋ ba á mʋ̀ Seruya bɩ̀á tə ywàŋá. Ba-Yígúrə́-Jə-Tiu nə tʋn wá, sə ʋ zɩrɩ, ʋ kə à nə, lìù mama wàrɩ̀ kʋ yáá nə ʋ cɩ̀.» 11 Davidə swɩ̀n Abiswayi, də ʋ tʋ̀tʋ̀nà tə mama con, ʋ wʋ́: «À tətə kwíə́ də̀ń bìú tə, à nə lɩrɩ, dàń nə pɩ̀à à gʋrɩ, mə Bɛnzwamɛn dwíí lìù wà tə! Á yágá wá, sə ʋ zɩrɩ ʋ kə à nə! Kʋ yɩ Ba-Yígúrə́-Jə-Tiu nə pɩn wá nii, sə ʋ tʋn kʋ. 12 Dɩɩn don, Ba-Yígúrə́-Jə-Tiu wá ywàń à yinəgə tə, ʋ ga lwàń, ʋ fwa zəni à yɩra, ʋ ga yá zɩra tə, bɛɛ wà tə nə zɩrɩ, ʋ kəni à nə, zə̀n kʋ tə.» 13 Davidə də ʋ kwa lɩ̀à tə tì ba cwəŋə, ba vìrí, yá Swimeyi də wulə Davidə nii nə, paan tə yáá tə don nə. Ʋ yà vəli, də ʋ zɩrɩ, ʋ kəni Davidə nə, də ʋ pɛ̀ kapana, ʋ ma dɩlɩ wá, də ʋ pɛ̀ pùrə́n, ʋ ma mɩ́n wá. 14 Pɩ̀ʋ́ Davidə də ʋ kwa lɩ̀à tə mama vəli, ba yí Zʋrədɛn mʋnaa tə nii nə, də ba gwàrɩ̀ mɩ́ámɩ́án. Yá ba dàń pə̀ń lá nə, ba sìí.
Uswayi vəli Abəsalomə con
15 Abəsalomə yà zʋa Zwerizalɛmə wa, də Yɩzərayɛlə lalʋʋ tə gɩganɩ tə mama. Ahitofɛlə də yà wulə də wá. 16 Máŋá tə, Davidə kwenu Uswayi, ʋ nə yɩ Arəka tíú, nə twi ʋ yí Abəsalomə con, ʋ swɩ̀n Abəsalomə con, ʋ wʋ́: «Yɩɩ wá pa mʋ́ mɩdarɩ, à nyɩna pɩ̀ʋ́! Yɩɩ wá pa mʋ́ mɩdarɩ, à nyɩna pɩ̀ʋ́!» 17 Yá Abəsalomə bwe Uswayi, ʋ wʋ́: «Mə n də n dabɛɛ tə fààn tə mama nə, nətən naaa? Bɛ̀ɛ̀ nə pɩn, n ma wà ʋ nə twá, n vìí?» 18 Uswayi le Abəsalomə, ʋ wʋ́: «Ɔn ɔn! N mʋ̀ kwa nə, à wá ya. N mʋ̀ nə, Ba-Yígúrə́-Jə-Tiu, də Yɩzərayɛlə lɩ̀à tə mama kúrí, ba tún, sə n ya pɩ̀ʋ́. Kʋ mʋ̀ yɩrɩ, n mʋ̀ con nə, à pɩ̀à, sə à ya. 19 Kʋ tə nə súrí lá, wàà nə nə, à mɛ, sə à tʋn, à pa, də kʋ nə tà n mʋ̀, à dabɛɛ bìú tə? Sɩ́ʋ́n nə, à wá tʋn, à pa mʋ́, ndə à nə dí yáá, à tʋn, à pa n nyɩna nə, nətʋ.»
Abəsalomə də ʋ nyɩna kabii tə yoo
20 Abəsalomə swɩ̀n Ahitofɛlə con, ʋ wʋ́: «Á kənə á pubʋŋɩ duən nə, sə nə na yoo tə, nə nə wá tʋn.» 21 Yá Ahitofɛlə dàń swɩ̀n Abəsalomə con, ʋ wʋ́: «Vəli n pə̀ń n nyɩna kabii tə, ʋ nə yá, sə ba ywàń pɩ̀ʋ́ sàń tə yuu. Kʋ nətʋ wá pa, Yɩzərayɛlə lɩ̀à tə mama lwarɩ də, n jìgə̀ n nyɩna tə dʋŋʋ. Yá n kwa lɩ̀à tə mama jɩɩn dàń wá ja dɩ̀àn.» 22 Ba dàń púə́ gansili pɩ̀ʋ́ sàń dəyuu tə wa, ba pa Abəsalomə nə. Yá Abəsalomə dɩ̀gà, ʋ pə̀ń ʋ nyɩna kabii tə, Yɩzərayɛlə lɩ̀à tə mama yɩ́á yuu. 23 Kʋ máŋá təntə wa, Ahitofɛlə kwìə̀ yà jə dun, ndə Yɩɩ nii sʋgʋ nə. Yá Davidə də Abəsalomə mɛ dàń yà twá Ahitofɛlə kwìə̀ tə mama nii nə zəni.