2 Samiyɛlə 15

Abəsalomə dədəŋə, sə ʋ jon pàrɩ̀ tə

1 Kʋ kwa nə, Abəsalomə pɩ̀à səsen, də səsen kòrù, də kwatara finu, ba nə wulə ʋ səsen kòrù tə yáá, ba dəri. 2 Abəsalomə yàá zàn jɩjʋ fuən fuən, ʋ nan ʋ zɩga cwəŋə tə vàn nə, ka nə zwɩ tɩʋ tə mimii tə wa. Yá máŋá mama, lìù nə ja ʋ yoo, ʋ bɩ̀àn pɩ̀ʋ́ sàń, sə pɩ̀ʋ́ tə bʋ̀rɩ̀ kʋ bʋra, Abəsalomə yàá bon kʋ tíú, ʋ bwe, ʋ wʋ́: «N yɩ n nan tɩʋ kwà?» Yá kʋ tíú tə nə le, ʋ wʋ́: «À mʋ̀ n tʋtʋnʋ tə yɩ Yɩzərayɛlə dwíí kʋ tə, nə à yə̀ə́ kʋ tə wa lìù,» 3 Abəsalomə dàń yàá swɩ̀n, ʋ wʋ́: «N yoo tə ziən, n ga jə cɩ́gá! Yá lìù mama dàń nə bá tan n con, pɩ̀ʋ́ sàń tə wa.» 4 Abəsalomə yàá swɩ̀n, ʋ súrí lá, ʋ wʋ́: «Ba yà nə tún nə, sə à bʋ̀rɩ̀ bʋra lʋʋ nii kʋ tə wa, à mʋ̀ con nə, lɩ̀à tə mama yà wá ja ba yìə̀n, ba bà, sə à bʋ̀rɩ̀ tə bʋra. Yá à yà wá bʋ̀rɩ̀ tə bʋra, kʋ twá cɩ́gá nə, ndə kʋ nə mɛ nətʋ.» 5 Yá lìù nə twi, ʋ yí Abəsalomə yɩra, sə ʋ tʋ ʋ nadwana yuu, ʋ yáá con, ʋ pa wá dun*, Abəsalomə yàá ja ʋ jɩɩn nə, ʋ ga pùrì wá, ʋ kə ʋ nyʋnɩ nə. 6 Mə nətʋ nə, Abəsalomə yà tʋŋa Yɩzərayɛlə lɩ̀à tə mama yɩra, ba nə yàá ja ba yìə̀n, ba twi pɩ̀ʋ́ con, sə ʋ bʋ̀rɩ̀ tə bʋra. Yá Abəsalomə dàń yà fwa nətʋ, ʋ ma viviri Yɩzərayɛlə lɩ̀à tə bɩcan, ʋ kəni ʋ con.

7 Kʋ bɩna banɩa nii nə, Abəsalomə swɩ̀n pɩ̀ʋ́ Davidə con, ʋ wʋ́: «À lòrì cwəŋə, sə à pìí à va Ebəron, à tʋn nipoli tə, à nə poli də Ba-Yígúrə́-Jə-Tiu, à pa kʋ nii sú. 8 Cɩ́gá, máŋá tə wa, à nə yɩn Geswurə nə, Siiri lʋʋ nii tə wa, à mʋ̀ n tʋtʋnʋ tə poli nii. À swɩ̀n də, Ba-Yígúrə́-Jə-Tiu nə ja nə, ʋ pìí ʋ bà Zwerizalɛmə, à wá tʋn, à pa wá.» 9 Pɩ̀ʋ́ Davidə le, ʋ wʋ́: «Vəli də yazurə.» Yá Abəsalomə dàń zàn ʋ va Ebəron.

10 Abəsalomə zɩgɩ Ebəron nə, ʋ tʋn lɩ̀à Yɩzərayɛlə dwíə́ tə mama con, ʋ wʋ́: «Máŋá tə, á nə nì nabwanʋ kori, sə á cə̀rí, á swɩ̀n də, Abəsalomə jìgə̀ pɩ̀ʋ́, Ebəron nə.» 11 Abəsalomə yà bon bara biələ, Zwerizalɛmə wa, ʋ pa ba kwé wá, ba ja va Ebəron. Bara təntə mʋ̀ yà yɩ, ba kwé wá mʋ̀ʋ́. Ba yà yəri yoo təntə nii nə, mɩ́ámɩ́án. 12 Abəsalomə nə wulə jwəŋə tə ʋ fwa, ʋ pɩn Yɩɩ nə, máŋá tə wa, ʋ tʋn ʋ pa ba ja Ahitofɛlə, ba nan ʋ tɩʋ Gilo, ba bà. Ahitofɛlə yà yɩ Davidə kwenu. Kʋ nətʋ tə pɩn yoo tə kwɛn, kʋ na dɩ̀àn. Yá lɩ̀à tə, ba nii nə wulə Abəsalomə kwa, dàń kwɛn, ba pùlì, ba súrí lá.

Pɩ̀ʋ́ Davidə dəri, ʋ yá Zwerizalɛmə

13 Lìù don dàń twi, ʋ tún yoo tə, ʋ bɩrɩ Davidə nə, ʋ wʋ́: «Yɩzərayɛlə lɩ̀à tə bɩcan viviri, kʋ kə Abəsalomə con.» 14 Yá Davidə dàń swɩ̀n ʋ tʋ̀tʋ̀nà tə mama con, ba yà nə wulə də wá, Zwerizalɛmə nə, ʋ wʋ́: «Á zaŋa nə dəri nə jɛ́n. Kʋ nə tà nətʋ, cwəŋə don tə̀lə́, nə nə wá tì, nə ma jɛ́n Abəsalomə yáá nə. Á naŋa lala. Kʋ nə tà nətʋ, ʋ wá bà, ʋ pú nəba, ʋ kə yəbə. Yá ʋ nə yí nəba yəbə, ʋ wá gʋ nə də tɩʋ tə wa lɩ̀à tə mama, ʋ ma kə pucʋnɩ tɩʋ tə wa. 15 Pɩ̀ʋ́ Davidə tʋ̀tʋ̀nà tə le wá, ba wʋ́: «Yoo tə mama n mʋ̀ pɩ̀ʋ́ nə swɩ̀n, nə mʋ̀ n tʋ̀tʋ̀nà tə yɩ, nə wulə n kwa!» 16 Pɩ̀ʋ́ Davidə dàń nan də nɛɛ, yá ʋ dìə̀ lɩ̀à tə mama púə́ ʋ kwa. Ʋ lɩ ʋ kabii fugə, ʋ yá Zwerizalɛmə nə, sə ba ywàń ʋ sàń tə yuu.

17 Pɩ̀ʋ́ Davidə nan, lalʋʋ tə də mama ga nan, ba pú ʋ kwa. Ba nə vəli, ba yí talɩkwa dìə̀ tə, tɩʋ tə nii nə, ba cən ba zɩgɩ. 18 Yá pɩ̀ʋ́ Davidə tʋ̀tʋ̀nà tə mama, dàń twi, ba twá ʋ yáá con. Kərɛtə tɩ̀án tə mama, də Pelɛtə tɩ̀án tə mama, də Gatə tɩ̀án tə mama, twi ba twá ʋ yáá con. Gatə tɩ̀án tə yɩn bara biəyardʋ, ba nə twi, sə ba ya pɩ̀ʋ́ Davidə kwa. 19 Pɩ̀ʋ́ Davidə bwe Yitayi, ʋ nə yɩ Gatə kwatara tə yáá tíú, ʋ wʋ́: «Bɛ̀ɛ̀ nə pɩn, n də ma pɩ̀à, sə n twá nə nə? Pìí n va, n ya də pɩ̀ʋ́ tə don tə. Cɩ́gá, n yɩ vee, n ga yɩ ba dɩŋɩ, ba lɩ, n lʋʋ nii wa. 20 N nə twi à con, kʋ tə wà dɩ́án. Kʋ wà mɛ, sə à pa, n twá nə nə, n ywan. À tətə yəri bwálɩ́ tə, à nə vələ! Pìí, n ja n nubɩa tə, n vìí. Ba-Yígúrə́-Jə-Tiu wá fwa wʋywaŋʋ*, n yɩra, kʋ twá cɩ́gá nə, ndə kʋ nə mɛ nətʋ!» 21 Yá Yitayi le pɩ̀ʋ́ Davidə, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə, n mʋ̀ à nyɩna pɩ̀ʋ́ də ma wulə! Bwálɩ́ tə, n mʋ̀ à nyɩna pɩ̀ʋ́ nə wá ya, kʋ nə yɩ tɩan, nə à yə̀ə́ mɩɩ, mə lá nə, à mʋ̀ n tʋtʋnʋ tə də wá ya.» 22 Yá Davidə dàń swɩ̀n Yitayi con, ʋ wʋ́: «Kʋ ziən! Bà kɛ̀ń!» Yá Yitayi də ʋ kwatara tə, də ba dìə̀ lɩ̀à dàń twi, ba kɛ̀ń. 23 Lɩ̀à tə mama lʋʋ nii tə wa, yà lwə kori, ba wulə ba kwi, kwatara tə ga twi, ba kɛ̀ń. Pɩ̀ʋ́ Davidə də ʋ kwa lɩ̀à tə mama dàń twá Sedəron vara tə wa, ba nan ba jɩrɩ kasɔɔ lanworu cwəŋə tə nə. 24 Yɩɩ joŋwanʋ Sadɔkə də yà wulə lá. Levi dwíí tə mama yà wulə də wá. Ba yà zɩŋa Yɩɩ nimarʋ culu daka tə. Ba zʋrɩ Yɩɩ nimarʋ culu daka tə, ba tún, yá Yɩɩ joŋwanʋ Abɩyatarə dàń zɩgɩ lá, lalʋʋ tə mama kori, ba nan tɩʋ tə wa, ba zwɛ̀. 25 Pɩ̀ʋ́ Davidə swɩ̀n Sadɔkə con, ʋ wʋ́: «Pìí, n ja Yɩɩ nimarʋ daka tə, n va tɩʋ tə wa. Ba-Yígúrə́-Jə-Tiu nə pɩn, à na yuywaŋʋ, ʋ yáá con, ʋ wá ja nə, ʋ pìí ʋ bà. Yá ʋ wá pa, à pìí à na ka də ka yipaa bwálɩ́ tə. 26 Yá ʋ dàń nə kʋ́ʋ̀ vɩga, sə à na yuywaŋʋ ʋ yáá con də, à tə wulə ʋ jɩɩn wa, sə ʋ ja nə ʋ ma fwa kʋ tə nə ywán də wá!» 27 Pɩ̀ʋ́ Davidə tə swɩ̀n Yɩɩ joŋwanʋ Sadɔkə con, ʋ wʋ́: «N tətə na yoo tə nə yɩ nətʋ! Ja n bìú Ahimasə, sə Abɩyatarə də ja ʋ bìú Zonatan, sə á mʋ̀ də á bɩ̀á bələ tə pìí, á va tɩʋ tə wa, də yazurə. 28 Á nəŋə, à wá va à dàn mʋnaa tə nii nə, kasɔɔ lanworu tə wa, də á pɩn kori bɩ̀àn, sə kʋ pa nə.» 29 Mə kʋ zɩgɩ nətʋ, Sadɔkə də Abɩyatarə ma pìí, ba ja Yɩɩ nimarʋ culu daka tə, ba va, ba wulə Zwerizalɛmə nə.

Davidə tʋn Uswayi, sə ʋ mɩ̀àn Abəsalomə

30 Davidə vəli, ʋ twá Olivə* tɩ̀án paan cwəŋə dədolu tə, ʋ dɩ̀, də ʋ kwi. Ʋ yà púə́ gànʋ̀ ʋ yuu nə, ʋ ga vəli napɩrɩ sòlí. Ʋ kwa lɩ̀à tə də mama yà púə́ gànàn ba yuu nə, ba ga dɩ̀, də ba kwi. 31 Ba twi, ba swɩ̀n Davidə con, də Ahitofɛlə də wulə Abəsalomə kwa lɩ̀à tə wa. Yá Davidə dàń swɩ̀n, ʋ wʋ́: «Ba-Yígúrə́-Jə-Tiu, à lòrì, sə n pa, Ahitofɛlə kwìə̀ tə ya tʋtʋ!» 32 Máŋá tə, Davidə nə dɩga, ʋ yí paan tə yuu, bwálɩ́ tə nə, ba nə bwɩ Yɩɩ nə, də nə̀ń Uswayi, ʋ nə yɩ Arəka tíú nə, ʋ twi, sə ʋ jəri wá. Uswayi gànʋ̀ yà kàrɩ́, ʋ yuu ga sú də pùrə́n. 33 Davidə swɩ̀n ʋ con, ʋ wʋ́: «N nə twá à nə, n wá ya à yuu zɩlɩ.» 34 Yá n dàń pìí n va tɩʋ tə wa, n swɩ̀n Abəsalomə con, də n twi, sə n tʋn, n pa wá. Swɩ̀n də fuən nə, n yà yɩ ʋ nyɩna tʋtʋnʋ. Yá sɩ́ʋ́n nə, n dàń yɩ ʋ mʋ̀ tʋtʋnʋ. N nə tʋn kʋ nətʋ, n wá cʋ̀gʋ̀ Ahitofɛlə kwìə̀ tə, yá kʋ jə sáŋʋ́, kʋ pa nə. 35 N wá ya də Yɩɩ joŋwana Sadɔkə də Abɩyatarə. N nə nì yoo mama pɩ̀ʋ́ sàń tə wa, sə n swɩ̀n kʋ, n bɩrɩ Sadɔkə də Abɩyatarə nə. 36 Sadɔkə bìú Ahimasə, də Abɩyatarə bìú Zonatan də wulə lá. Mə ba bɩ̀á bələ təntə nə, á wá tʋn à con, sə ba swɩ̀n yoo tə mama, á nə nì, ba bɩrɩ nə.» 37 Davidə kwenu Uswayi dàń pìí, ʋ va tɩʋ tə wa. Kʋ máŋá tə wa, də Abəsalomə də ma zwɩ Zwerizalɛmə wa.