Abəsalomə pìí ʋ bà Zwerizalɛmə
14
1 Seruya bìú Zʋabə lwarɩ də, Abəsalomə yoo pìí kʋ jə pɩ̀ʋ́ Davidə. 2 Zʋabə dàń tʋn, ʋ pa kan don, ʋ nə jə swɩan, nan Tekʋa, ʋ bà. Ʋ swɩ̀n kan tə con, ʋ wʋ́: «Fwa ndə lúə́ pucʋnɩ nə yí mʋ́, n ga zʋ pucʋnɩ gànàn. Dàn ká tùrì nʋga. Ya ndə kan nə, ʋ nə wulə lúə́ pucʋnɩ wa, kʋ dán zənzən. 3 N dàń wá va pɩ̀ʋ́ Davidə con, n swɩ̀n sʋ̀ràn tə tə, à nə wá swɩ̀n, à bɩrɩ mʋ́.» Yá Zʋabə dàń ken sʋ̀ràn tə, kan tə nə mɛ, sə ʋ swɩ̀n, ʋ nii wa. 4 Tekʋa tɩ̀án kan tə vəli, ʋ yí pɩ̀ʋ́ Davidə. Ʋ tʋa ʋ nadwana yuu, ʋ pú ʋ yáá tɩa, ʋ pa wá dun*, ʋ ga swɩ̀n, ʋ wʋ́: «À nyɩna pɩ̀ʋ́, jon nə.» 5 Pɩ̀ʋ́ Davidə ma bwe wá, ʋ wʋ́: «Bɛ̀ɛ̀ nə jə mʋ́?» Kan tə ma le, ʋ wʋ́: «Haya! À barɩ tɩga, ʋ yá nə, kadənu. 6 À mʋ̀ n tʋtʋnbʋa tə yà jə bibara bələ. Ba bələ tə dɩga jara kasɔɔ con, yá lìù yà tə̀lə́ lá, sə ʋ kwɛ̀ ba. Nubiu tə don dàń mà ʋ don tə, ʋ gʋ. 7 Yá à dwíí tɩ̀án tə dàń zàn, ba zɩga à mʋ̀ n tʋtʋnbʋa tə nə. Ba kalɩ nə, sə à pa ba, à bìú tə, ʋ nə gʋa ʋ nubiu tə, sə ba gʋ, ba ma ŋwɩ́n ʋ nubiu tə mɩɩ tə, ʋ nə lɩ. Ba pɩ̀à, sə ba gʋ ʋ mʋ̀ lìù tə, ʋ nə wá də́ ba nyɩna tə tɩan kwa wiən tə. Kʋ yà nə yɩn nətʋ, à dwíí tɩ̀án tə yà wá zwɛ̀ yala tə, tə yà nə ga, à con. Yá à barɩ tə yà kʋ́ʋ̀ bá ja dwíí, kʋ bon ʋ yɩrɩ, lʋʋ wa.»8 Pɩ̀ʋ́ Davidə swɩ̀n, kan tə con, ʋ wʋ́: «Zàn n va n sàń. À wá pa nii, n yoo tə yɩrɩ.» 9 Yá Tekʋa tɩ̀án kan tə pìí ʋ swɩ̀n, ʋ wʋ́: «À nyɩna pɩ̀ʋ́, kʋ wa nə jə yoo, sə n yá, sə kʋ ya à mʋ̀, də à nyɩna dìə̀ tə yuu yoo. Dàn ká pa, sə kʋ pìí kʋ ja n mʋ̀ pɩ̀ʋ́, də n pàrɩ̀ tə bɩan nə.» 10 Pɩ̀ʋ́ Davidə swɩ̀n, ʋ wʋ́: «Lìù nə ken n con, sə n ja wá, n bà à con. Jwɩan mama, ʋ kʋ́ʋ̀ bá pìí, ʋ kə n con.» 11 Yá kan tə kʋ́ʋ̀ swɩ̀n, ʋ wʋ́: «À nyɩna pɩ̀ʋ́, à lòrì mʋ́, sə n bon, n kə Ba-Yígúrə́-Jə-Tiu nə, ʋ nə yɩ n Yɩɩ, sə lìù tə nə fwi lɩŋa, lagʋrɩ yɩrɩ tə, dàn ká cʋ̀gʋ̀ cʋcʋran, ʋ súrí lá. Ʋ dàn ká gʋ à bìú tə!» Yá pɩ̀ʋ́ Davidə dàń swɩ̀n, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə! N bìú tə yuu kʋʋ nədʋ tətə, bá tʋ tɩa.»
12 Kan tə kʋ́ʋ̀ swɩ̀n pɩ̀ʋ́ Davidə con, ʋ wʋ́: «À nyɩna pɩ̀ʋ́, à lòrì, sə n pa cwəŋə à mʋ̀ n tʋtʋnbʋa tə nə, sə à tə swɩ̀n yoo nədʋ, n con.» Pɩ̀ʋ́ Davidə swɩ̀n, ʋ wʋ́: «Swɩ̀n!» 13 Kan tə ma swɩ̀n, ʋ wʋ́: «Kʋ yɩ nətə, n ma tanɩ yoo kʋ tə yiri, n zɩgɩ Yɩɩ lɩ̀à tə nə? Sʋ̀ràn tə, n nə swɩ̀n sɩ́ʋ́n sɩ́ʋ́n, bɩrɩ də n mʋ̀ pɩ̀ʋ́ tətə cʋgʋ yoo, n nə ba pɩn lìù tə, n nə dɩŋɩ, n lɩ, pìí ʋ twi sàń yɩrɩ. 14 Nə yɩ ndə nɩ́á nə, ba nə lwá tɩa, tə ga kʋ́ʋ̀ wàrɩ̀, tə pìí tə pɛ̀. Kʋ ba tʋ́tʋ̀ná jə, nə lìù mama dɩɩn nə yí, ʋ wá tɩ. Yá Yɩɩ dàń nə ba mɩɩ lɩ. Ʋ tún coŋi, sə lìù tə, ba nə dɩŋɩ, ba lɩ, wànɩ́, ʋ pìí ʋ bà ʋ con. 15 Sɩ́ʋ́n nə, də à nə twi, à swɩ̀n sʋ̀ràn tə tə, n mʋ̀ à nyɩna pɩ̀ʋ́ con, yəni də kʋ yɩ lalʋʋ tə nə ken fən à wa. Kʋ mʋ̀ nə pɩn, à mʋ̀ n tʋtʋnbʋa tə ma bʋ́n à waa con, də à nə swɩ̀n kʋ, n mʋ̀ pɩ̀ʋ́ con, dɩɩn don, n wá sɛ̀, n tʋn kʋ tə, à mʋ̀ n tʋtʋnbʋa tə nə wá lòrì mʋ́, sə n tʋn. 16 Cɩ́gá, à yà yə̀ə́ də, n mʋ̀ à nyɩna pɩ̀ʋ́ wá sɛ̀, n jon à mʋ̀ n tʋtʋnbʋa tə, bɛɛ tə jɩɩn wa, ʋ yà nə pɩ̀à, sə à də à bìú tə dwíí jɛ́n mɩ́ámɩ́án, lɩ̀à tə wa, Yɩɩ nə kúrí. 17 Yá à mʋ̀ n tʋtʋnbʋa tə dàń bʋ́n à waa con də, sʋgʋ tə, n mʋ̀ à nyɩna pɩ̀ʋ́ nə wá swɩ̀n, wá pa nə bɩcan sìə́. Cɩ́gá, n mʋ̀ à nyɩna pɩ̀ʋ́ yɩ ndə Yɩɩ malɩka nə. N yə̀ə́ zəni, də lwanɩ swɩ́án, duən wa. Ba-Yígúrə́-Jə-Tiu, ʋ nə yɩ n Yɩɩ, wá ya də mʋ́!»
18 Pɩ̀ʋ́ Davidə le kan tə, ʋ wʋ́: «Dàn ká səgə nə yoo mama, bwiə tə wa, à nə wá bwe mʋ́.» Yá kan tə swɩ̀n, ʋ wʋ́: «À nyɩna pɩ̀ʋ́, swɩ̀n!» 19 Pɩ̀ʋ́ Davidə dàń bwe, ʋ wʋ́: «Kʋ tà n də Zʋabə nə vʋrɩ yoo kʋ tə naaa?» Kan tə le, ʋ wʋ́: «À nyɩna pɩ̀ʋ́, kʋ yɩ cɩ́gá, n wulə! Kʋ tə, n nə swɩ̀n tə yɩ cɩ́gá cɩcɩ. Kʋ ba jə, kʋ nan yə, kʋ zʋ yə. N tʋtʋnʋ Zʋabə cɩ́gá nə pɩn nə nii. Yá ʋ mʋ̀ ga nə ken sʋ̀ràn tə tə mama, à mʋ̀ n tʋtʋnbʋa tə nii wa. 20 N tʋtʋnʋ Zʋabə tʋn kʋ nətʋ, sə ʋ ma lwàń n pubʋŋa, yoo tə yuu wa. Yá n mʋ̀ à yuu-tiu yɩ yənu tíú, ndə Yɩɩ malɩka nə. N yə̀ə́ yoo tə mama, kʋ nə tʋŋa tɩa yuu wa.»
21 Pɩ̀ʋ́ Davidə dàń bon Zʋabə, ʋ swɩ̀n ʋ con, ʋ wʋ́: «À sɛ̀, sə à tʋn yoo tə. Vəli n ja à bìú Abəsalomə, n ja bà sàń.» 22 Zʋabə tʋa ʋ nadwana yuu, ʋ pú ʋ yáá tɩa, ʋ pa dun pɩ̀ʋ́ Davidə nə, ʋ ga swɩ̀n, ʋ wʋ́: «À nyɩna pɩ̀ʋ́, zə̀n kʋ tə, à dàń yə̀ə́ də, à mʋ̀ n tʋtʋnʋ tə nɩ yuywaŋʋ, n yáá con. Cɩ́gá, n sɛ̀, sə n tʋn kʋ tə, à mʋ̀ n tʋtʋnʋ tə nə lòrì n con.» 23 Zʋabə dàń zàn, ʋ va Geswurə, ʋ ja Abəsalomə, ʋ ja pìí ʋ bà Zwerizalɛmə. 24 Yá pɩ̀ʋ́ Davidə dàń swɩ̀n, ʋ wʋ́: «Abəsalomə vəli, ʋ ya ʋ dìə̀ wa. Ʋ dàn ká bà à yáá con.» Abəsalomə dàń vəli, ʋ wulə ʋ dìə̀ wa. Ʋ wà pɩ̀ʋ́ Davidə yáá con vəli.
Pɩ̀ʋ́ Davidə də Abəsalomə ken duən yuu
25 Bɛɛ yà tə̀lə́ Yɩzərayɛlə mama wa, ʋ nə yɩ nanʋnbɛɛ, ndə Abəsalomə nə. Yá kʋ nətʋ tə dàń yà pɩn, ba bwɩ ʋ nə, zənzən. Kʋ nə zɩgɩ ʋ napɩra nə, kʋ dɩ̀ kʋ yí ʋ yupara, won mama yà tə̀lə́ ʋ yɩra, kʋ nə ba ziən. 26 Bɩnɩ mama yígúrə́ wa, ʋ yàá gɩan ʋ yukʋran tə, tə nə du zənzən yɩrɩ. Ʋ nə gɩan ʋ yukʋran tə, ʋ yàá kəri tə də pɩ̀ʋ́ səkəri, yá tə dun yàá doni kilo bələ. 27 Abəsalomə bɩ̀á yɩn bibara batwa, də bikan nədʋ, ʋ yɩrɩ nə yɩ Tamarə. Tamarə yà yɩ kabwaŋʋ zənzən.
28 Abəsalomə fwa bɩna bələ Zwerizalɛmə nə, də ʋ wà pɩ̀ʋ́ Davidə yáá con vəli. 29 Dɩɩn don nə, ʋ pɩn ba bon Zʋabə, sə ʋ tʋn wá, pɩ̀ʋ́ Davidə con. Yá Zʋabə vɩga, sə ʋ bà Abəsalomə con. Abəsalomə tə pɩn ba bon wá, nɛɛ bələ nii nə, yá Zʋabə tə vɩga, sə ʋ bà. 30 Abəsalomə ma swɩ̀n ʋ tʋ̀tʋ̀nà tə con, ʋ wʋ́: «Á vələ, á kə mən Zʋabə dipɛn mɩna yiri don tə nə, ʋ kárá tə wa, ka nə wulə à kárá tə səpuni nə.» Yá Abəsalomə tʋ̀tʋ̀nà tə dàń vəli, ba kə mən, kárá tə nə. 31 Zʋabə ma zàn, ʋ va ʋ yí Abəsalomə ʋ dìə̀ wa, ʋ bwe wá, ʋ wʋ́: «Kʋ yɩ nətə, n tʋ̀tʋ̀nà tə ma kə mən, à kárá tə nə?» 32 Abəsalomə le Zʋabə, ʋ wʋ́: «Kʋ yɩ à nə bon mʋ́, sə à tʋn à nyɩna pɩ̀ʋ́ con, n ga vɩ, sə n bà tə yɩrɩ. À yà pɩ̀à, sə n bwe à nyɩna pɩ̀ʋ́, n jə́n, bɛ̀ɛ̀ yɩrɩ nə, ʋ pɩn, à pìí à nan Geswurə, à bà yəbə? À yà tə nə wulə Geswurə nə, kʋ yà kʋkwa. Sɩ́ʋ́n nə, à pɩ̀à, sə à va à nyɩna pɩ̀ʋ́ yáá con. Yá à nə cʋ̀gʋ̀ yoo, sə ʋ pa, ba gʋ nə!» 33 Zʋabə vəli, ʋ tún Abəsalomə nii tə, ʋ bɩrɩ pɩ̀ʋ́ Davidə nə. Pɩ̀ʋ́ Davidə ma pa, ba bon Abəsalomə. Abəsalomə dəri ʋ bà, ʋ tʋ ʋ nadwana yuu, ʋ pú ʋ yáá tɩa, pɩ̀ʋ́ Davidə yáá con, ʋ pa wá dun. Yá Pɩ̀ʋ́ Davidə dàń pùrì Abəsalomə, ʋ kə ʋ nyʋnɩ nə.