2 Samiyɛlə 13

Amənon də Tamarə yoo

1 Tə mʋ̀ yìə̀n təntə kwa nə, nə̀ń yoo tə nə tʋn. Davidə bìú Abəsalomə yà jə nakʋa, ʋ nə ziən zənzən. Ʋ yɩrɩ nə yɩ Tamarə. Yá Amənon, ʋ də nə yɩ Davidə bìú don, dàń yà swə Tamarə zənzən. 2 Tamarə fɩra zʋa ʋ nuu kadon bìú Amənon zənzən, kʋ pa ʋ fwa ndə ʋ yɩ̀. Cɩ́gá, Tamarə yà tə yəri bɛɛ. Yá kʋ nətʋ tə dàń pɩn, kʋ yɩ càn kʋ pa Amənon nə, sə ʋ yí ʋ yɩra. 3 Amənon yà jə dabɛɛ, ʋ yɩrɩ nə yɩ Yonadabə. Ʋ yɩ Davidə nubiu Swimeya bìú. Yonadabə yɩ lìù tə, ʋ nə jə swɩan zənzən. 4 Ʋ swɩ̀n Amənon con ʋ wʋ́: «Bɛ̀ɛ̀ nə pɩn, n ma wulə pucʋnɩ wa, jɩjʋ mama, n mʋ̀ pɩ̀ʋ́ bìú? N ba pɩ̀à, sə n swɩ̀n kʋ, n bɩrɩ nə naaa?» Amənon le wá, ʋ wʋ́: «À nuu kadon bìú Abəsalomə nakʋa Tamarə, fɩra nə jə nə, zənzən.» 5 Yonadabə ma swɩ̀n Amənon con, ʋ wʋ́: «Pə̀ń n gədo tə yuu, n fwa ndə n yɩ̀. Máŋá tə, n nyɩna nə twi, sə ʋ na mʋ́, sə n swɩ̀n ʋ con, sə ʋ pa n nakʋa Tamarə bà, ʋ fwa wodiu, ʋ pa mʋ́, sə n də́. N wá swɩ̀n, sə n nyɩna tə pa ʋ bà, ʋ fwa wodiu tə, n yɩ́á yuu, sə n wànɩ́ n na wá. Ʋ tətə nə wá pa mʋ́ wodiu tə, də ʋ jɩɩn, sə n də́.» 6 Amənon dàń zʋa, ʋ tígə́, ʋ fwa ndə ʋ yɩ̀. Pɩ̀ʋ́ Davidə twi, ʋ na wá, yá Amənon dàń swɩ̀n ʋ con, ʋ wʋ́: «À lòrì, sə n pa à nakʋa Tamarə bà, ʋ fwa cakʋla mancɩn, à yɩ́á yuu, ʋ tətə pa nə, sə à də́.» 7 Davidə tʋn, ʋ swɩ̀n Tamarə con, pɩ̀ʋ́ sàń tə wa, ʋ wʋ́: «Vəli n nabʋa Amənon sàń, n fwa wodiu, n pa wá.» 8 Tamarə vəli, ʋ zʋ ʋ nabʋa Amənon dìə̀, də ʋ tígə́. Tamarə fwa mun, ʋ bù, ʋ ma fwa cakʋla, Amənon yáá con, ʋ pʋ̀rɩ̀. 9 Kʋ kwa nə, ʋ kòrí cakʋla tə nagwalʋ tə wa, ʋ tún Amənon yáá. Yá Amənon vɩga, sə ʋ də́ tə. Ʋ swɩ̀n, ʋ wʋ́: «Á pɩan lɩ̀à tə mama nan, ba ga yá nə.» Lɩ̀à tə mama ma nan, ba ga yá wá. 10 Kʋ kwa nə, Amənon dàń swɩ̀n Tamarə con, ʋ wʋ́: «Tì wodiu tə, n ja bà, à yipaa tə bwálɩ́ nə, n pa nə, sə à də́.» Tamarə tì cakʋla tə, ʋ nə pʋ̀rɩ̀, ʋ ja zʋ ʋ nabʋa Amənon yipaa tə bwálɩ́ nə, sə ʋ pa wá. 11 Máŋá tə, ʋ nə larɩ tə Amənon nə, sə ʋ də́, Amənon pùrì wá, ʋ ga swɩ̀n ʋ con, ʋ wʋ́: «À nakʋa, bà nə pə̀ń!» 12 Tamarə le wá, ʋ wʋ́: «Ɔn ɔn, à nabʋa, dàn ká ja nə, də dɩ̀àn. Cɩ́gá, Yoo təntə yiri ba Yɩzərayɛlə wa tʋŋa. Dàn ká tʋn yutəlu yoo təntə! 13 Yə̀n nə, à wá ja cavɩra təntə, à va? Yá n mʋ̀ wá jì ndə nyɩnyaŋʋ nə, Yɩzərayɛlə wa. Sɩ́ʋ́n nə, à lòrì mʋ́, sə n swɩ̀n pɩ̀ʋ́ tə con. Ʋ bá vɩ, sə ʋ tì nə, ʋ pa mʋ́. 14 Yá Amənon wà sɛ̀, ʋ cʋgʋ ʋ sʋgʋ tə. Ʋ pùrì wá, ʋ pə̀ń də dɩ̀àn. 15 Kʋ kwa nə, Amənon waa nan Tamarə mɩ́ámɩ́án. Yá kʋ wʋnaŋʋ təntə dàń yà dwə sonu tə, ʋ yà nə swə wá. Yá ʋ dàń swɩ̀n Tamarə con, ʋ wʋ́: «Zàn n jɛ́n à yáá nə!» 16 Tamarə pìí ʋ swɩ̀n Amənon con, ʋ wʋ́: «Ɔn ɔn! N nə dɩŋɩ nə, kʋ də lwanɩ tə kʋ́ʋ̀ dwə kʋ tə, n nə tʋn à yɩra sɩ́ʋ́n nətən!» Yá Amənon wà sɛ̀, ʋ cʋgʋ ʋ sʋgʋ tə. 17 Amənon bon ʋ tʋtʋnbiu, ʋ swɩ̀n ʋ con, ʋ wʋ́: «Dɩŋa bʋ̀á wà tə, n lɩ, à dìə̀ tə wa, n ga tagʋ mimii tə.» 18 Ʋ tʋtʋnbiu tə ma dɩŋa Tamarə, ʋ lɩ, ʋ ga tagʋ mimii tə. Tamarə yà zʋa ganzwɩdarʋ, kʋ vàná nədaran. Cɩ́gá, mə tə mʋ̀ gànyirə təntə nə, pabwɩɩ tə, ba tə nə yəri bɛɛ, yà zwɩ, kʋ máŋá tə wa. 19 Yá Tamarə dàń pɛ̀ tʋnan, ʋ lwá ʋ tətə yuu wa, ʋ ga cɩrɩ ganzwɩdarʋ tə, ʋ yà nə zʋa. Ʋ zɩn ʋ jɩ̀àn ʋ yuu wa, ʋ ga mà bubwiə, ʋ vìrí. 20 Ʋ nabʋa Abəsalomə bwe wá, ʋ wʋ́: «N nabʋa Amənon pə̀ń mʋ́ də dɩ̀àn, naaa? Sɩ́ʋ́n nə, à nakʋa, n dàń pú n nii, n yá kʋ, sə kʋ zwɛ̀. Ʋ yɩ n nabʋa. Dàn ká ja kʋ yoo tə, n bɩcan wa. Kʋ nə zɩgɩ máŋá təntə wa, Tamarə dàń yà yɩ ʋ wulə ʋ nabʋa Abəsalomə dìə̀, də pucʋnɩ, ndə kan nə, ba nə vɩga, ba dʋgʋ.

21 Pɩ̀ʋ́ Davidə nə nì yìə̀n təntə mama, ʋ lɩŋa zàn zənzən. 22 Abəsalomə wà yoo mama swɩ̀n Amənon con. Yá ʋ dàń tì dʋŋɩ də Amənon, ʋ nə pə̀ń ʋ nakʋa Tamarə də dɩ̀àn, tə yɩrɩ.

Abəsalomə pɩn ba gʋ Amənon, ʋ ga dəri ʋ jɛ́n

23 Bɩna bələ nə kɛ̀ń, kwa nə, dɩɩn don nə, Abəsalomə tì lɩ̀à, ba nə fɩnɩ pee kʋran, sə ba fɩna ʋ pee, Baalə-Hasɔrə nə, Efərayimə nii nə. Yá ʋ dàń bon pàbɩ̀á tə mama, kʋ bwálɩ́ tə wa. 24 Abəsalomə vəli pɩ̀ʋ́ Davidə con, ʋ swɩ̀n, ʋ wʋ́: «À mʋ̀, n tʋtʋnʋ tə nɩ lɩ̀à, ba nə fɩnɩ pee kʋran, sə ba fɩna à pee. À nyɩna pɩ̀ʋ́, à dàń lòrì mʋ́, sə n də n tʋ̀tʋ̀nà tə bà, sə nə də́ kʋ cànà təntə.» 25 Pɩ̀ʋ́ Davidə ma swɩ̀n Abəsalomə con, ʋ wʋ́: «Ɔn ɔn, à bìú! Nə mama nə twi lá, kʋ wá ya zɩlɩ nəfarʋ, n yuu wa.» Abəsalomə tə lòrì Davidə wuuu, yá ʋ wà sɛ̀, sə ʋ va lá. Yá Davidə dàń lòrì, sə Yɩɩ fwa zəni, Abəsalomə yɩra. 26 Abəsalomə ma swɩ̀n, ʋ wʋ́: «Kʋ nə yɩ nətʋ, sə n pa cwəŋə à nubiu Amənon mʋ̀ nə, sə ʋ kwé nəba.» Pɩ̀ʋ́ Davidə bwe Abəsalomə, ʋ wʋ́: «Bɛ̀ɛ̀ yɩrɩ, ʋ ma kwé aba?» 27 Abəsalomə tə lòrì wá wuuu, kʋ pa, pɩ̀ʋ́ Davidə ga ʋ yá, ʋ pa Amənon, də pàbɩ̀á tə duən tə mama, twá Abəsalomə nə, ba vìí.

28 Abəsalomə pɩn nii kʋ tə, ʋ tʋ̀tʋ̀nà nə, ʋ wʋ́: «Á mɩna Amənon! Máŋá tə, ʋ nə nyʋan sana tə ʋ sú, à wá swɩ̀n á con, à wʋ́: “Á maga Amənon!” Kʋ máŋá tə wa, á gwɩa wá, á dànà ká dəri fən. À mʋ̀ nə pɩn aba, kʋ nii təntə. Á jana wʋdɩʋ, á ga ya babɩran.» 29 Yá Abəsalomə tʋ̀tʋ̀nà tə gʋa Amənon, ndə ʋ nə pɩn ba nii, sə ba tʋn kʋ nətʋ. Pabɩa tə duən tə mama dàń zàn, ba dɩ̀ ba bɩnasəsen yuu, ba dəri ba jɛ́n. 30 Davidə nì ŋwɛn, də pàbɩ̀á tə duən tə tə wulə cwəŋə wa. Lìù don twi, ʋ swɩ̀n ʋ con, ʋ wʋ́: «Abəsalomə gʋa pàbɩ̀á tə mama, ladʋa tətə wà gɛ. 31 Pɩ̀ʋ́ Davidə dàń zàn, ʋ cɩrɩ ʋ gànàn, ʋ ga tígə́ tɩpɩrɩ wa. Ʋ tʋ̀tʋ̀nà tə də mama cɩrɩ ba gànàn, ba ga kɩkarɩ wá, ba zɩga. 32 Davidə nubiu Swimeya bìú Yonadabə, swɩ̀n, ʋ wʋ́: «À yuu-tiu, dàn ká bʋ́n də, ba cɩ́gá gʋa pàbɩ̀á tə mama. Cɩ́gá, Amənon cɩcɩ nə tɩga. Kʋ yɩ yoo tə, Abəsalomə nə ken kʋ sírí, kʋ nə zɩgɩ dɩɩn tə nə, Amənon nə pə̀ń ʋ nakʋa Tamarə də dɩ̀àn. 33 Sɩ́ʋ́n nə, à nyɩna pɩ̀ʋ́, dàn ká kə n pubʋŋa wa, də pàbɩ̀á tə mama cɩ́gá tɩga. Cɩ́gá, Amənon cɩcɩ nə tɩga.»

34 Abəsalomə dəri ʋ jɛ́n. Balandʋrʋ tə, ʋ nə ywàŋá tɩʋ tə nə, kʋ dɩɩn tə nə, zɩ̀n ʋ yáá, də nə̀ń lɩ̀à kapʋpʋ, ba twá ʋ kwa con cwəŋə tə, paan tə də̀ń con, ba bɩ̀àn. 35 Yá Yonadabə dàń swɩ̀n pɩ̀ʋ́ Davidə con, ʋ wʋ́: «Nə̀ń pàbɩ̀á tə nə, ba bɩ̀àn, ndə à nə swɩ̀n kʋ nətʋ.» 36 Ʋ nə zə́n ʋ swɩ̀n ʋ zwɛ̀, də pàbɩ̀á tə yí. Ba lwə kori, ba wulə, ba bubwi. Yá pɩ̀ʋ́ Davidə də tətə, də ʋ tʋ̀tʋ̀nà tə kwi zənzən. 37-38 Abəsalomə yà dəri, ʋ va Amihudə bìú Taləmayi con, ʋ nə yɩ Geswurə pɩ̀ʋ́. Ʋ fwa bɩna batwa lá. Yá kʋ máŋá təntə mama, Davidə yà wulə pucʋnɩ wa, ʋ bìú Amənon tɩan tə yɩrɩ. 39 Yá máŋá tə pɩ̀ʋ́ Davidə bɩcan nə zuri, Amənon tɩan tə yoo wa, ʋ yá kʋ, ʋ pa kʋ zwɛ̀, ʋ də Abəsalomə pwə́rə́ wa.