Natan swɩ̀n Davidə con, də Yɩɩ wá fɩrɩ wá
12
1 Ba-Yígúrə́-Jə-Tiu dàń tʋn ʋ nii sʋ̀sʋ̀nʋ̀ Natan, Davidə con. Natan vəli, ʋ yí wá, ʋ swɩ̀n ʋ con, ʋ wʋ́: «Bara bələ yà nə wulə tɩʋ nədʋ nə. Ʋ don yà yɩ jɩjə tíú, ʋ don tə ga yɩ zʋrʋ. 2 Jɩjə tíú tə yà jə vanmɩnɩ, də vanfaran zənzən. 3 Zʋrʋ tə mʋ̀ yà ba won mama jə, də kʋ nə tà pacɩbiə nədʋ, ʋ nə yə̀. Ka yɩn ʋ də ʋ bɩ̀á con, ʋ kʋna ka, ka bori. Ka yà də́ kʋ tə, ʋ nə də́, ka ga nywɩn kʋ tə, ʋ nə nywɩn. Ka yà pə̀ní ʋ səpuni nə, ka dwɛ̀. Ka yà yɩ ndə ʋ bʋ̀á nə. 4 Dɩɩn don nə, vee twi, ʋ zʋrɩ jɩjə tíú tə dìə̀. Yá jɩjə tíú tə vɩga, sə ʋ ja vànɩ́ ʋ vanmɩnɩ tə, nə à yə̀ə́, ʋ vanfaran tə wa, ʋ ma fwa wodiu, ʋ pa vee tə nə. Ʋ pìí ʋ jon zʋrʋ tə pacɩɩn tə mʋ̀ʋ́, ʋ ma fwa wodiu, ʋ pa ʋ dìə̀ vee tə nə.»5 Davidə nə nì kʋ yoo tə, ʋ lɩŋa nyɩ́n tə zàn, jɩjə tíú təntə yuu wa, ʋ ga swɩ̀n Natan con, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə! Bɛɛ tə, ʋ nə tʋn yoo təntə, mɛ sə ba gʋ wá. 6 Jɩjə tíú tə nə wà zʋrʋ tə yinəgə dəri, ʋ ga tʋn yoo təntə, ʋ yɩra yɩrɩ, ʋ mɛ, sə ʋ ŋwɩ́n zʋrʋ tə piə tə, də pee banɩa.» 7 Yá Natan pìí ʋ swɩ̀n Davidə con, ʋ wʋ́: «N mʋ̀ tətə nə yɩ kʋ bɛɛ təntə! N dàń nə̀ń kʋ tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, nə swɩ̀n n con. Ʋ swɩ̀n də, ʋ mʋ̀ nə twɛ́n dun nʋga* n yuu wa, ʋ ma tún mʋ́, sə n ya Yɩzərayɛlə pɩ̀ʋ́. Yá ʋ mʋ̀ nə jon mʋ́ Sayulə jɩɩn wa. 8 Ʋ pɩn, n də́ dɩ̀àn, n yuu-tiu Sayulə dìə̀ tə yuu wa, ʋ ga pa, n tì ʋ kana tə, n ma fwa n kana. Ʋ tún mʋ́, sə n də́ pàrɩ̀ Yɩzərayɛlə lɩ̀à tə, də Zwida dwíí tə yuu wa. Yá tə yà nə wà n fɩra yí, ʋ yà tə wàá tə duən lá, ʋ súrí. 9 Bɛ̀ɛ̀ dàń nə pɩn, n ma gwìə̀n Ba-Yígúrə́-Jə-Tiu sʋgʋ tə, n ga tʋn kʋ tə nə lwara, ʋ yáá con? N mʋ̀ nə gʋa Uri, ʋ nə yɩ Ɛtə dwíí, də kwatara sɩ̀ʋ́. Cɩ́gá, n fwa kʋ tə mama, n nə wàá, n pa Amon dwíí tə gʋ wá, də kwatara sɩ̀ʋ́, n ga tì ʋ kan tə, n ma fwa n kan. 10 Sɩ́ʋ́n nə, lagʋrɩ kʋ́ʋ̀ bá zwɛ̀ n dìə̀ tə wa mɩ́ámɩ́án, n nə gwìə̀n Ba-Yígúrə́-Jə-Tiu, n ga tì Uri, ʋ nə yɩ Ɛtə dwíí kan tə, n ma fwa n kan tə yɩrɩ. 11 Nə̀ń kʋ tə Ba-Yígúrə́-Jə-Tiu nə swɩ̀n. Ʋ swɩ̀n də, ʋ wá pa lɛɛ nan n nə, n tətə dìə̀ tə wa. Ʋ wá jon n kana tə, n yɩ́á yuu, ʋ pa n dìə̀ tə wa bɛɛ don nə. Kʋ bɛɛ təntə wá pə̀ń ba yɩcakʋrʋ wa. 12 Cɩ́gá, n mʋ̀ yɩ n səgə, n tʋn kʋ yoo təntə, yá Ba-Yígúrə́-Jə-Tiu mʋ̀ yɩ, ʋ wá pa kʋ tʋn yɩcakʋrʋ wa, Yɩzərayɛlə lɩ̀à tə mama yɩ́á yuu.»
13 Yá Davidə dàń swɩ̀n Natan con, ʋ wʋ́: «À cʋ̀gʋ̀ Ba-Yígúrə́-Jə-Tiu nə!» Natan ma pìí, ʋ swɩ̀n Davidə con, ʋ wʋ́: «Kʋ nə yɩ nətʋ, Ba-Yígúrə́-Jə-Tiu kwɛn n cʋna tə, ʋ lɩ n də wá pwə́rə́ wa. N kʋ́ʋ̀ bá tɩ. 14 Yá kʋ yoo təntə dàń nə yɩ cʋna nəfarʋ, n tʋn, n zɩgɩ Ba-Yígúrə́-Jə-Tiu nə. Kʋ mʋ̀ yɩrɩ, bìú tə, kan tə nə lɩrɩ, ʋ pa mʋ́, wá tɩ.» 15 Kʋ kwa nə, Natan pìí ʋ va ʋ sàń.
Batəsweba bisɩmaa tə tɩga
Ba-Yígúrə́-Jə-Tiu dɩga yayɩgʋ bisɩmaa tə nə, Uri kan Batəsweba nə lɩrɩ, də Davidə. 16 Davidə vwə ʋ nii, ʋ ga lòrì Yɩɩ bisɩmaa tə yɩrɩ. Yá ʋ nə zʋa dìə̀ tɩtɩn nə, ʋ yɩ ʋ yàá pə̀ní tɩpɩrɩ wa. 17 Ʋ dìə̀ nəkwɩna tə lòrì wá, sə ʋ zàn tɩpɩrɩ tə wa, yá ʋ wà sɛ̀. Ʋ vɩga, sə ʋ də́ wodiu yiri mama, də ba. 18 Yá dɩan barpɛ nii nə, bisɩmaa tə tɩga. Fən dàń yà jə Davidə tʋ̀tʋ̀nà tə, sə ba swɩ̀n ʋ con, də bisɩmaa tə tɩga. Cɩ́gá, ba yà swɩ̀n duən pwə́rə́ wa, ba wʋ́: «Máŋá tə bisɩmaa tə mɩɩ yà nə wulə lʋʋ, nə swɩ̀n ʋ con, yá ʋ wà nə con tan. Sɩ́ʋ́n nə, nə dàń wá twá nətə, nə ma swɩ̀n ʋ con, də bisɩmaa tə tɩga? Kʋ wàá kʋ pɩn, ʋ cʋ̀gà ʋ tɩ̀àn! 19 Davidə nɩ də, ʋ tʋ̀tʋ̀nà tə sʋsʋnɩ yoo ba pwə́rə́ wa. Yá ʋ dàń lwarɩ də, bisɩmaa tə tɩga. Ʋ bwe ʋ tʋ̀tʋ̀nà tə, ʋ wʋ́: «Bisɩmaa tə mɩɩ zwɛ̀ naaa?» Ba le, ba wʋ́: «Awo, ʋ mɩɩ zwɛ̀.» 20 Davidə dàń zàn tɩpɩrɩ tə wa, ʋ swɛ ʋ yɩra, ʋ mà tɩralɩ, ʋ ga lwàń ʋ gànàn. Kʋ kwa nə, ʋ vəli Ba-Yígúrə́-Jə-Tiu dìə̀ tə wa, ʋ tʋ ʋ nadwana yuu, ʋ pa dun* Yɩɩ nə. Kʋ kwa nə, ʋ pìí ʋ va ʋ sàń, ʋ pa ba fwa wodiu, ba pa wá, ʋ də́. 21 Davidə tʋ̀tʋ̀nà tə bwe wá, ba wʋ́: «Kʋ tə n nə tʋn tə, də̀ń nə yɩ bɛ̀ɛ̀? Máŋá tə, bisɩmaa tə mɩɩ yà nə wulə lʋʋ, n yà vwe n nii, n ga kwi, ʋ yɩrɩ. Yá sɩ́ʋ́n nə, bisɩmaa tə nə tɩga, n dàń zàn, n də́ wodirən!» 22 Davidə le, ʋ wʋ́: «Kʋ yɩ cɩ́gá! Máŋá tə bisɩmaa tə mɩɩ yà tə nə wulə lʋʋ, à yà vwe à nii, à ga kwi. À yà swɩ̀n à waa con, à wʋ́: “Kʋ wàá də, Ba-Yígúrə́-Jə-Tiu wá fwa pubwanʋ à yɩra, ʋ ga yá, sə bisɩmaa tə mɩɩ ya lʋʋ wa!” 23 Yá sɩ́ʋ́n nə, ʋ dàń nə tɩga, bɛ̀ɛ̀ yɩrɩ nə, à kʋ́ʋ̀ wá vwa à nii? À wàá à pɩn, ʋ pìí ʋ bwin naaa? À mʋ̀ dàń nə wá va, ʋ con. Ʋ mʋ̀ kʋ́ʋ̀ ba pìí, ʋ bɩ̀àn, à con.»
Salʋmʋn lɩrʋ yoo
24 Kʋ kwa nə, Davidə kòrì ʋ kan Batəsweba. Ʋ pə̀ń wá, yá ʋ jɩn pùə́, ʋ lɩra bìú don, ʋ dɩ ʋ yɩrɩ Salʋmʋn. Ba-Yígúrə́-Jə-Tiu sóní bìú təntə. 25 Yá ʋ dàń twá də ʋ nii sʋ̀sʋ̀nʋ̀ Natan, ʋ swɩ̀n kʋ Davidə con. Kʋ mʋ̀ nə pɩn, ba dɩ bisɩmaa tə yɩrɩ don, Yedidiya. Kʋ də̀ń nə yɩ “lìù tə, Ba-Yígúrə́-Jə-Tiu nə swə!”
Davidə dí dɩ̀àn Amon dwíí tə yuu wa
26 Kʋ máŋá tə wa, də Zʋabə ta Raba, kʋ nə yɩ Amon dwíí tə tɩʋ, ʋ jon ba pɩ̀ʋ́ sàń tə. 27 Ʋ dàń tʋn lɩ̀à, sə ba swɩ̀n Davidə con, ba wʋ́: «À ta Raba tɩ̀án à də́. À jon ba sanii tə tətə, ba nɩ́á nə wulə lá. 28 Sɩ́ʋ́n nə, n dàń kə kwatara tə gɩganɩ tə duən yáá, n ja bà, n ma də́ dɩ̀àn tɩʋ tə yuu wa. Kʋ nə tà kʋ mʋ̀, à nə dí dɩ̀àn kʋ yuu wa mɩ́ámɩ́án, à mʋ̀ nə wá na yɩrɩ kʋ wa.» 29 Yá Davidə dàń ken kwatara tə gɩganɩ tə duən yáá, ʋ ja va, ʋ ma dí dɩ̀àn Raba yuu wa. 30 Ʋ súrí Raba tɩ̀án woŋwanʋ sɩ́án payupuu tə, kʋ yuu nə. Payupuu təntə dun yà dwə kilo fɩtwa, kʋ yɩra ga jə kapan yiri don, kʋ nə jə funə. Ba lɩ kapan tə, ba kə Davidə payupuu tə yɩra. Davidə tə pɛ̀ wiən kapʋpʋ, ba nə ta ba jon tɩʋ tə wa, ʋ ja vìí. 31 Davidə lɩ Raba tɩ̀án, ʋ ja va ʋ kə dɩ̀àn tʋ̀tʋ̀nán wa. Ʋ pɩn ba duən goŋi dɛɛ, ba duən sə̀ kapana, ba duən goŋi tɩ̀án, ba duən də ga mà wárá. Mə nətʋ nə Davidə fwa Amon dwíí tə tɩan tə mama wa. Yá kʋ kwa nə, ʋ də ʋ kwatara tə mama pìí ba va Zwerizalɛmə.