Davidə tʋn cʋna
11
1 Bɩnɩ tə wa kʋ nə danɩ lá, máŋá tə pɛ̀gá nə vəli ba tɛ kʋ̀ʋ̀ nə yí, Davidə tʋn Zʋabə də ʋ tʋ̀tʋ̀nà tə, də Yɩzərayɛlə kwatara tə mama, ʋ pa ba va ba gʋ Amon dwíí tə, ba larɩ, ba ga pú Raba tɩʋ tə ba kə. Yá Davidə mʋ̀ ga mɛn Zwerizalɛmə nə.2 Dɩɩn don nə, Davidə pə̀ń ʋ sìí, ʋ bà ʋ zàn didəni nii nə, ʋ twá ʋ dəyuu tə wa, ʋ kɩkarɩ. Ʋ zɩgɩ dəyuu tə wa, ʋ na kan don, də ʋ wulə ʋ swɛ ʋ yɩra. Kan tə yà ziən zənzən. 3 Yá Davidə dàń tʋn, ʋ pa ba bwe kan təntə nɛɛ nə. Kʋ kwa nə, ba twi ba swɩ̀n Davidə con, ba wʋ́: «Kʋ yɩ Eliyamə bʋ̀á Batəsweba. Ʋ yɩ Uri, ʋ nə yɩ Ɛtə dwíí, kan.» 4 Davidə ma tʋn lɩ̀à, ʋ pa ba bon Batəsweba, ba pa wá. Ʋ twi Davidə con, yá Davidə pə̀ń wá. Kʋ dɩɩn tə nə ga nə, Batəsweba sɩ̀n ʋ tàŋá, ʋ zwɛ̀. Kʋ kwa nə, Batəsweba pìí ʋ va ʋ sàń. 5 Batəsweba zʋa pùə́, yá ʋ dàń tʋn, ʋ swɩ̀n Davidə con, ʋ wʋ́: «À jə pùə́!» 6 Davidə ma tʋn, ʋ swɩ̀n Zʋabə con, ʋ wʋ́: «Pa Uri, ʋ nə yɩ Ɛtə dwíí, bà à con.» Zʋabə ma pa Uri va Davidə con. 7 Uri nə twi ʋ yí Davidə, Davidə bwe wá, Zʋabə də kwatara tə yazurə yoo, də kʋ̀ʋ̀ tə yoo nə yɩ nətʋ. 8 Kʋ kwa nə, Davidə swɩ̀n Uri con, ʋ wʋ́: «Zʋ n dìə̀, n sɩ̀n n nɛɛ.» Uri zàn pɩ̀ʋ́ sàń tə wa, ʋ nan, ba ga ja pɩ̀ʋ́ zìlə́ won, ba san ʋ də̀ń. 9 Yá Uri wà ʋ dìə̀ zwɩ. Ʋ pìí ʋ mɛ ʋ yuu-tiu tə tʋ̀tʋ̀nà tə con, pɩ̀ʋ́ sàń mimii tə nii nə, ʋ tígə́. 10 Ba swɩ̀n kʋ Davidə con, ba wʋ́: «Uri wà ʋ dìə̀ zwɩ.» Yá Davidə dàń bwe Uri, ʋ wʋ́: «Kʋ tà cwəŋə n nan, n bà naaa? Bɛ̀ɛ̀ nə pɩn, n ma wà n dìə̀ zwɩ?» 11 Uri ma le wá, ʋ wʋ́: «Yɩɩ nimarʋ culu daka tə, də Yɩzərayɛlə lɩ̀à tə, də Zwida dwíí tə yɩ sìlə́ wa, ba wulə. À yuu-tiu Zʋabə, də n mʋ̀ à yuu-tiu tʋ̀tʋ̀nà tə yɩ tɩpɩrɩ wa, ba pə̀ní, kasɔɔ tə wa. Yá à mʋ̀ dàń wá zʋ à dìə̀, à də́, à nyʋn, à ga pə̀ń də à kan! N nə na kʋ, kʋ mɛ? Kʋ yɩ cɩ́gá, n wulə! À dùə̀ də, à bá tʋn kʋ yoo təntə yiri!» 12 Yá Davidə swɩ̀n Uri con, ʋ wʋ́: «N tə ya yəbə, zə̀n kʋ tə. Jwɩan nə nə à wá pa, n pìí n vìí.» Uri yɩn Zwerizalɛmə nə kʋ dɩɩn tə nə, kʋ va kʋ yí kʋ tɩpʋrɩ don. 13 Kʋ tɩpʋrɩ tə nə, Davidə bon Uri, ʋ pa ʋ də wá də́ wodiu, ba ga nyʋn sana. Yá Davidə dàń pɩn Uri nyʋn sana, ʋ bʋbʋnɩ. Yá də kʋ mɛ, tɩa nə yì, Uri nan ʋ pə̀ń ʋ yipaa tə nə, ʋ yuu-tiu tə tʋ̀tʋ̀nà tə con. Ʋ wà ʋ dìə̀ zwɩ.
14 Kʋ jɩjʋ nə, Davidə pʋ́pʋ́nɩ́ sagɩ, ʋ pa Uri nə, sə ʋ ja va, ʋ pa Zʋabə nə. 15 Davidə pʋ́pʋ́nɩ́ sagɩ tə wa, ʋ wʋ́: «Á kənə Uri kʋ̀ʋ̀ tə càn bwálɩ́ nə, á ga pìí á yá wá, sə dʋŋa tə gʋ wá.»
16 Zʋabə nə ywàń tɩʋ tə, ʋ yà yə̀ə́ bwálɩ́ tə, tɩʋ tə tɩ̀án kwatara babɩran nə wulə. Yá ʋ dàń ken Uri, kʋ bwálɩ́ təntə wa. 17 Tɩʋ tə tɩ̀án nyɩ́n ba nan, ba ta Zʋabə də ʋ lɩ̀à tə. Dʋŋa tə gʋa Davidə tʋ̀tʋ̀nà tə duən, lalʋʋ tə wa. Yá Uri, ʋ nə yɩ Ɛtə dwíí, də yɩn lɩ̀à təntə wa, ba nə gʋa. 18 Zʋabə tʋn lìù, ʋ pa ʋ va, ʋ swɩ̀n yoo tə mama, kʋ nə tʋn kʋ̀ʋ̀ tə wa, ʋ bɩrɩ Davidə nə. 19 Zʋabə swɩ̀n tʋntʋnʋ tə con, ʋ wʋ́: «Máŋá tə, n nə tún kʋ̀ʋ̀ tə nii, n zwɛ̀, 20 dɩɩn don, pɩ̀ʋ́ Davidə lɩŋa wàá tə zaŋa, ʋ ga swɩ̀n n con də, bɛ̀ɛ̀ nə pɩn, nə ma yí tɩʋ tə yɩra zənzən, sə nə ma ta kʋ̀ʋ̀ tə? Nə yəri də dʋŋa tə yàá zɩgɩ bírə́ tə yuu, ba ga tɛ tɩa naaa? 21 Wàà nə gʋa Yerubeswɛtə bìú Abimelɛkə, Tebɛsə nə? Kʋ tà kan nə zɩgɩ bírə́ tə yuu, ʋ dɩ nʋŋʋ kapan ʋ yuu wa, ʋ gʋ naaa? Bɛ̀ɛ̀ nə pɩn, nə ma yí bírə́ tə yɩra, zənzən nətʋ? N dàń wá swɩ̀n ʋ con də, ʋ tʋtʋnʋ Uri də, ʋ nə yɩ Ɛtə dwíí, tɩga.»
22 Tʋntʋnʋ tə vəli, ʋ tún kʋ tə mama, Zʋabə nə tʋn wá, sə ʋ swɩ̀n, ʋ bɩrɩ Davidə nə. 23 Tʋntʋnʋ tə swɩ̀n Davidə con, ʋ wʋ́: «Dʋŋa tə dɩ̀àn doni nəba. Ba nyɩ́n ba nan nə nə, kasɔɔ nii nə. Yá nə pìí nə ta ba, nə ja va nə yí tɩʋ tə mimii. 24 Dʋŋa tə zɩgɩ tɩʋ tə bírə́ tə yuu wa, ba ta n tʋ̀tʋ̀nà tə. Yá n tʋ̀tʋ̀nà tə wa lɩ̀à duən tɩga. N tʋtʋnʋ Uri, ʋ nə yɩ Ɛtə dwíí, də tɩga.» 25 Davidə swɩ̀n tʋntʋnʋ tə con, ʋ wʋ́: «Pìí n va n dàn Zʋabə jɩɩn. Swɩ̀n ʋ con də, ʋ dàn ká pa kʋ yoo tə yɩ̀ wá, zənzən. Kʋ̀ʋ̀ wa, sɩ̀ʋ́ wàá lìù mama kʋ gwɩ. Ʋ kə dɩ̀àn, ʋ ta tɩʋ tə, ʋ də́ dɩ̀àn kʋ yuu wa.»