Amon dwíí tə ken cavɩra pɩ̀ʋ́ Davidə tʋntʋna nə
10
1 Yìə̀n təntə kwa nə, Nahaswə, ʋ nə yɩ Amon dwíí tə pɩ̀ʋ́ tɩga, yá ʋ bìú Hanunə dàń jìgə̀ pɩ̀ʋ́, ʋ yuu nə. 2 Davidə ma swɩ̀n, ʋ wʋ́: «À wá tʋn wʋywaŋʋ* Nahaswə bìú Hanunə yɩra, ndə ʋ nyɩna tə nə tʋn wʋywaŋʋ à yɩra nətʋ.» Yá ʋ dàń tʋn tʋntʋna, sə ba va ba kə Hanunə pupuə, ʋ nyɩna tə nə tɩga yɩrɩ. Máŋá tə Davidə tʋntʋna tə nə vəli ba zʋ Amon lʋʋ nii tə wa, 3 Amon dwíí tə yáá tɩ̀án swɩ̀n ba pɩ̀ʋ́ Hanunə con, ba wʋ́: «N bʋŋa də Davidə yɩ ʋ pɩ̀à, sə ʋ pa dun n nyɩna tə nə, ʋ ma tʋn lɩ̀à, sə ba kə n pupuə naaa? Ʋ yɩ ʋ tʋn ba, sə ba mɩ̀àn nə tɩʋ tə, ba lwarɩ kʋ zəni, sə ʋ bà ʋ ta kʋ dɩɩn don nə.» 4 Hanunə dàń pɩn ba ja Davidə tʋntʋna tə, ba fɩna ba twaŋa vàn don, ba ga mɛ ba dəgunə máŋá nə, ba goŋə ba gànàn tə, ba ga kukurən. Kʋ kwa nə, ba dʋgʋ ba, ba pa ba vìí. 5 Lɩ̀à swɩ̀n kʋ ba bɩrɩ Davidə nə. Ʋ ma tʋn lɩ̀à, ʋ pa ba va, ba jəri ba. Cɩ́gá, cavɩra yà jə bara təntə zənzən. Pɩ̀ʋ́ Davidə pɩn lɩ̀à tə swɩ̀n ba con, ba wʋ́: «Á yana Zweriko nə, á twaŋa tə nə pìí tə nan máŋá tə wa, sə á dàń bà.»Pɩ̀ʋ́ Davidə ta Amon dwíí tə də Siiri tɩ̀án ʋ də́
6 Amon dwíí tə lwarɩ də, ba tʋn yolwan Davidə yɩra. Ba dàń vəli Siiri tɩ̀án tə con, ba nə wulə Bɛtə-Rehɔbə də Soba tɩan tə wa, ba pɩ̀à kwatara 20 000, ba nə vəli də nɛɛ. Maaka pɩ̀ʋ́ con, ba pɩ̀à kwatara 1 000. Yá Tobə tɩ̀án con, ba pɩ̀à kwatara 12 000. 7 Davidə nì kʋ, yá ʋ dàń tʋn Zʋabə də kwatara babɩran tə mama, sə ba va ba ta ba. 8 Amon dwíí tə nan, ba tɩɩn duən nə, ba tɩʋ tə mimii nə, sə ba ma ta kʋ̀ʋ̀ tə. Siiri tɩ̀án kwatara tə nə nan Soba də Bɛtə-Rehɔbə, də Tobə də Maaka kwatara tə də yà wulə ba cɩcɩ, kasɔɔ con. 9 Zʋabə nɩ də kʋ̀ʋ̀ tə wá ya ʋ yáá con, də ʋ kwa con. Ʋ dàń kúrí kwatara babɩran Yɩzərayɛlə kwatara tə wa, ʋ tɩɩn duən nə, sə ba ta Siiri tɩ̀án kwatara tə. 10 Ʋ yá kwatara tə gɩganɩ tə, ʋ pa ʋ nyánʋ́ Abiswayi nə, sə ba də tɩɩn duən nə, ba ta Amon dwíí tə. 11 Zʋabə swɩ̀n Abiswayi con, ʋ wʋ́: «N nə nɩ də, Siiri tɩ̀án kwatara tə dɩ̀àn dwə nə, sə n bà n san nə. À də kʋ́ʋ̀ nə nɩ də, Amon dwíí tə dɩ̀àn dwə mʋ́, à wá bà à san mʋ́. 12 Pa sə n jɩɩn ja dɩ̀àn! Nə tɛga kʋ̀ʋ̀ tə də babarɩ, nə lʋʋ lɩ̀à tə, də tɩan tə yɩrɩ, tə nə yɩ nə Yɩɩ tə nyiən! Yá Ba-Yígúrə́-Jə-Tiu nə wá tʋn kʋ tə nə ywán də wá!» 13 Zʋabə də kwatara púlí tə, kʋ yà nə wulə də wá, dàń vəli sə ba ta Siiri tɩ̀án kwatara tə. Yá Siiri tɩ̀án kwatara tə dəri Zʋabə yáá nə. 14 Amon dwíí tə nə nɩ də, Siiri tɩ̀án kwatara tə dəri, ba də dəri Abiswayi yáá nə, ba zʋ tɩʋ tə wa. Zʋabə dàń pìí ʋ yá Amon dwíí tə tɛgʋ nə, ʋ də ʋ kwatara tə ga pìí ba bà Zwerizalɛmə. 15 Siiri tɩ̀án tə nə nɩ də, Yɩzərayɛlə lɩ̀à tə ta ba, ba də́, ba ken ba kwatara tə mama duən yáá. 16 Adadezɛrə tʋn lɩ̀à, ʋ pa ba kə Siiri tɩ̀án tə, ba yà nə wulə mʋnaa tə vàn tə don nə, duən yáá. Yá Swobakə, ʋ nə yɩ Adadezɛrə kwatara tə yuu tíú, dàń yɩn ba yáá, ʋ ja bà Elamə. 17 Lɩ̀à swɩ̀n kʋ, ba bɩrɩ Davidə nə. Yá Davidə dàń ken Yɩzərayɛlə kwatara tə mama duən yáá, ʋ ja va ʋ bɩn Zʋrədɛn mʋnaa tə, ʋ nan ʋ va Elamə. Siiri tɩ̀án nan ba tɩɩn duən nə, ba ta kʋ̀ʋ̀ də Davidə. 18 Yá Siiri tɩ̀án dəri Yɩzərayɛlə lɩ̀à tə yáá nə. Davidə gʋa ba səsen kòrə̀n 700 kwatara, də ba səsədɩra 40 000. Ʋ ta ba kwatara yuu tíú Swobakə də, yá ʋ tɩga kʋ bwálɩ́ tə wa. 19 Pɛ̀gá tə mama, ba yà nə yɩ Adadezɛrə tʋ̀tʋ̀nà nɩ də, Yɩzərayɛlə lɩ̀à dí dɩ̀àn ba yuu wa. Yá ba dàń sɛ̀, sə sìə́ ya ba də Yɩzərayɛlə lɩ̀à pwə́rə́ wa, ba ga tʋŋa ba pɩn Yɩzərayɛlə lɩ̀à nə. Yá fən dàń yà jə Siiri tɩ̀án, sə ba pìí ba san Amon dwíí tə nə, ba ta kʋ̀ʋ̀.