Amon dwíí tə ken cavɩra pɩ̀ʋ́ Davidə tʋntʋna nə
19
1 Yìə̀n təntə kwa nə, Nahaswə, ʋ nə yɩ Amon dwíí tə pɩ̀ʋ́ tɩga, yá ʋ bìú Hanunə dàń jìgə̀ pɩ̀ʋ́ ʋ yuu nə. 2 Davidə ma swɩ̀n, ʋ wʋ́: «À wá tʋn wʋywaŋʋ* Nahaswə bìú Hanunə yɩra, ndə ʋ nyɩna tə nə tʋn wʋywaŋʋ à yɩra nətʋ.» Yá ʋ dàń tʋn tʋntʋna, sə ba va ba kə Hanunə pupuə, ʋ nyɩna tə nə tɩga yɩrɩ. Máŋá tə Davidə tʋntʋna tə nə vəli ba zʋ Amon lʋʋ nii tə wa, 3 Amon dwíí tə yáá tɩ̀án swɩ̀n ba pɩ̀ʋ́ Hanunə con, ba wʋ́: «N bʋŋa də Davidə yɩ ʋ pɩ̀à, sə ʋ pa dun n nyɩna tə nə, ʋ ma tʋn lɩ̀à, sə ba kə n pupuə naaa? Ʋ yɩ ʋ tʋn ba, sə ba mɩ̀àn nə tɩʋ tə, ba lwarɩ kʋ zəni, sə ʋ bà ʋ ta kʋ dɩɩn don nə.» 4 Hanunə dàń pɩn ba ja Davidə tʋntʋna tə, ba fɩna ba twaŋa, ba ga mɛ ba dəgunə máŋá nə, ba goŋə ba gànàn tə, ba ga kukurən. Kʋ kwa nə, ba dʋgʋ ba, ba pa ba vìí. 5 Lɩ̀à swɩ̀n kʋ ba bɩrɩ Davidə nə. Ʋ ma tʋn lɩ̀à, ʋ pa ba va, ba jəri ba. Cɩ́gá, cavɩra yà jə bara təntə zənzən. Pɩ̀ʋ́ Davidə pɩn lɩ̀à tə swɩ̀n ba con, ba wʋ́: «Á yana Zweriko nə, á twaŋa tə nə pìí tə nan máŋá tə wa, sə á dàń bà.»Pɩ̀ʋ́ Davidə ta Amon dwíí tə də Siiri tɩ̀án ʋ də́
6 Amon dwíí tə lwarɩ də, ba tʋn yolwan Davidə yɩra. Yá ba dàń tʋn lɩ̀à də wárʋ́ tɔnə fɩtwa Siiri tɩ̀án tə con, ba nə wulə mʋnɛɛ bələ tə pwə́rə́ wa, də Siiri tɩ̀án tə con, ba nə wulə Maaka də Soba tɩan tə wa, sə ba ma pɩ̀à səsen kòrə̀n, də səsədɩra. 7 Ba nɩ səsen kòrə̀n 32 000, ba ga tì Maaka pɩ̀ʋ́ də ʋ kwatara tə, sə ba san ba. Ba mʋ̀ kwatara təntə twi, ba kə ba dəkuu Medəba nii nə. Amon dwíí tə də nan ba tɩan tə wa, ba kun duən nə, sə ba ta kʋ̀ʋ̀ tə. 8 Máŋá tə Davidə nə nì kʋ, ʋ tʋn Zʋabə də ʋ kwatara babɩran tə mama kʋ bwálɩ́ tə wa. 9 Amon dwíí tə nan ba tɩɩn duən nə, sə ba ta kʋ̀ʋ̀ tə, ba tɩʋ tə yáá con. Pɛ̀gá tə yà nə twi, sə ba san ba, yà wulə ba cɩcɩ, kasɔɔ con.
10 Zʋabə nɩ də kʋ̀ʋ̀ tə wá ya ʋ yáá con də ʋ kwa con. Ʋ dàń kúrí kwatara babɩran Yɩzərayɛlə kwatara tə wa, ʋ tɩɩn duən nə, sə ba ta Siiri tɩ̀án kwatara tə. 11 Ʋ yá kwatara tə gɩganɩ tə, ʋ pa ʋ nyánʋ́ Abiswayi nə, sə ba də tɩɩn duən nə, ba ta Amon dwíí tə. 12 Zʋabə swɩ̀n Abiswayi con, ʋ wʋ́: «N nə nɩ də, Siiri tɩ̀án kwatara tə dɩ̀àn dwə nə, sə n bà n san nə. À də kʋ́ʋ̀ nə nɩ də, Amon dwíí tə dɩ̀àn dwə mʋ́, à wá bà à san mʋ́. 13 Pa sə n jɩɩn ja dɩ̀àn! Nə tɛga kʋ̀ʋ̀ tə də babarɩ, nə lʋʋ lɩ̀à tə, də tɩan tə yɩrɩ, tə nə yɩ nə Yɩɩ tə nyiən! Yá Ba-Yígúrə́-Jə-Tiu nə wá tʋn kʋ tə nə ywán də wá!» 14 Zʋabə də kwatara púlí tə, kʋ yà nə wulə də wá, dàń vəli sə ba ta Siiri tɩ̀án kwatara tə. Yá Siiri tɩ̀án kwatara tə dəri Zʋabə yáá nə. 15 Amon dwíí tə nə nɩ də, Siiri tɩ̀án kwatara tə dəri, ba də dəri Zʋabə nyánʋ́ Abiswayi yáá nə, ba zʋ tɩʋ tə wa. Yá Zʋabə dàń pìí ʋ bà Zwerizalɛmə.
16 Siiri tɩ̀án tə nə nɩ də Yɩzərayɛlə lɩ̀à tə ta ba ba də́, ba tʋn tʋntʋna, sə ba va ba kə ba nubɩa tə nə wulə mʋnaa tə kwa con duən yáá nə. Swofakə, ʋ nə yɩ Hadadezɛrə kwatara yáá tíú, yà nə wulə ba yáá. 17 Lɩ̀à swɩ̀n kʋ, ba bɩrɩ Davidə nə. Yá Davidə dàń ken Yɩzərayɛlə kwatara tə mama duən yáá, ʋ ja bɩn Zʋrədɛn mʋnaa tə, ʋ va ʋ yí ba. Ʋ tɩɩn ʋ kwatara tə Siiri tɩ̀án tə yáá con, ʋ pa ba ta kʋ̀ʋ̀ tə. 18 Yá Siiri tɩ̀án tə dəri Yɩzərayɛlə lɩ̀à tə yáá nə. Davidə gʋa ba səsen kòrə̀n 7 000 kwatara, də ba səsədɩra 40 000. Ʋ ta ba kwatara yuu tíú Swofakə də, yá ʋ tɩga kʋ bwálɩ́ tə wa. 19 Pɛ̀gá tə mama, ba yà nə yɩ Hadadezɛrə tʋ̀tʋ̀nà nɩ də, Yɩzərayɛlə lɩ̀à dí dɩ̀àn ba yuu wa. Yá ba dàń sɛ̀, sə sìə́ ya ba də Davidə pwə́rə́ wa, ba ga tʋŋa ba pɩn wá. Yá fən dàń yà jə Siiri tɩ̀án tə, sə ba pìí ba san Amon dwíí tə nə, ba ta kʋ̀ʋ̀.