Davidə dí dɩ̀àn dwíə́ nəkaran* tə yuu wa
18
1 Kʋ kwa nə, Davidə ta Filisi tɩ̀án tə ʋ də́, ʋ pa ba sɛ̀ ʋ nii. Ʋ jon Gatə tɩʋ tə, də kʋ nii tɩbii tə ba con.2 Ʋ ta Mʋabə tɩ̀án də ʋ də́. Yá Mʋabə tɩ̀án dàń jìgə̀ Davidə tʋ̀tʋ̀nà, ba ŋwɩ́n lanpoo, ba pɩn wá.
3 Davidə tə ta Soba pɩ̀ʋ́ Hadadezɛrə ʋ də́, Hamatə vàn con, máŋá tə wa Hadadezɛrə nə dídə́n sə ʋ pìí ʋ jon Əfəratə mʋnaa tə. 4 Davidə jon səsən kòrə̀n 1 000, də səsədɩra 7 000, də kwatara, ba nə vəli də nɛɛ, 20 000 Hadadezɛrə con. Davidə kúrí səsen 100 Hadadezɛrə səsen tə wa, ʋ ga goŋə tə duən tə mʋ̀ mama naŋʋnan, ʋ karɩ. 5 Yá máŋá tə wa, Siiri tɩ̀án nə nan Damasə, ba bà, sə ba san Soba pɩ̀ʋ́ Hadadezɛrə nə, ba ta Davidə, Davidə gʋa ba wa lɩ̀à 22 000. 6 Ʋ tún kwatara púlə́, Damasə Siiri lʋʋ nii tə wa, yá Siiri tɩ̀án dàń jìgə̀ Davidə tʋ̀tʋ̀nà, ba ŋwɩ́n lanpoo, ba pɩn wá. Yá bwálɩ́ tə mama Davidə nə vəli ʋ ta kʋ̀ʋ̀, Ba-Yígúrə́-Jə-Tiu yàá pa ʋ də́ dɩ̀àn. 7 Davidə jon sɩ́án natanan tə, tə yà nə wulə Hadadezɛrə kwatara tə con, ʋ ja va Zwerizalɛmə. 8 Pɩ̀ʋ́ Davidə tə pɛ̀ cɩnɩan kapʋpʋ Tɩbatə də Kun nə, tə nə yɩ Hadadezɛrə tɩan. Salʋmʋn jɩn cɩnɩan təntə, ʋ ma fwa Yɩɩ dìə̀ tə cɩnɩan kwarɩ nəfarʋ tə, də ywəŋə tə, də cɩnɩan zɩla tə.
9 Hamatə pɩ̀ʋ́ Towu nì də Davidə ta Hadadezɛrə, ʋ nə yɩ Soba pɩ̀ʋ́ kwatara tə mama ʋ də́. 10 Towu dàń tʋn ʋ bìú Hadoramə pɩ̀ʋ́ Davidə con, sə ʋ kə ʋ lɛ̀ɛ̀, ʋ ga bʋ ʋ nə, ʋ nə ta Hadadezɛrə ʋ də́ yɩrɩ. Cɩ́gá, Towu də Hadadezɛrə də yà tɛ duən. Hadoramə ja wárʋ́ wiən, də sɩ́án wiən, də cɩnɩan wiən, ʋ bà ʋ pa Davidə nə. 11 Pɩ̀ʋ́ Davidə jon tə də, ʋ tún vàn nə, ʋ pa Ba-Yígúrə́-Jə-Tiu nə*. Ʋ fwa kʋ, ndə ʋ nə dí yáá ʋ tún wárʋ́ tə də sɩ́án tə, ʋ nə ta ʋ jon, lʋʋ níə́ tə duən tə mama con, tə nə yɩ Edomə tɩ̀án, də Mʋabə tɩ̀án, də Amon dwíí tə, də Filisi tɩ̀án, də Amalɛkə dwíí tə con, ʋ pa Yɩɩ nə.
12 Davidə nakʋa Seruya bìú Abiswayi ta Edomə tɩ̀án tə ʋ də́, nəkuən vara tə wa, ʋ gʋ ba lɩ̀à 18 000. 13 Ʋ tún kwatara púlə́ Edomə lʋʋ nii tə mama wa, yá Edomə tɩ̀án dàń jìgə̀ Davidə tʋ̀tʋ̀nà. Yá bwálɩ́ tə mama Davidə nə vəli ʋ ta kʋ̀ʋ̀, Ba-Yígúrə́-Jə-Tiu yàá pa ʋ də́ dɩ̀àn.
Davidə tʋ̀tʋ̀nán yun tɩ̀án tə yoo
14 Davidə dí pàrɩ̀ Yɩzərayɛlə lʋʋ nii tə mama yuu wa. Ʋ yà bʋ̀rɩ̀ ʋ lɩ̀à tə mama bʋra, kʋ twá cɩ́gá nə, ndə kʋ nə mɛ nətʋ. 15 Davidə nakʋa Seruya bìú Zʋabə yà nə yɩ Davidə kwatara tə mama yáá tíú. Ahiludə bìú Zozafatə yà nə yɩ pɩ̀ʋ́ Davidə nanzoo. 16 Ahitubə bìú Sadɔkə, də Abɩyatarə bìú Abimelɛkə yà nə yɩ Yɩɩ joŋwana. Yá Swavəswa yà nə pʋ́pʋ́nɩ́ pɩ̀ʋ́ yìə̀n. 17 Yehoyada bìú Benaya yà nə yɩ Kərɛtə də Pelɛtə tɩ̀án tə, ba nə cɩ̀ Davidə nə, yáá tíú. Pɩ̀ʋ́ Davidə bɩ̀á tə yà nə yɩ təntən lɩ̀à, ba nə daa ʋ nə.