Davidə dí dɩ̀àn dwíə́ nəkaran* tə yuu wa
8
1 Kʋ kwa nə, Davidə ta Filisi tɩ̀án tə ʋ də́, ʋ pa ba sɛ̀ ʋ nii. Ʋ jon lʋʋ nii tə ba jɩɩn wa. 2 Ʋ ta Mʋabə tɩ̀án də ʋ də́, ʋ ga pa ba pə̀ń tɩa, ʋ gàlɩ̀ ba, lɩ̀à batwa batwa. Ʋ yàá gàlɩ̀ lɩ̀à bələ ʋ gʋ, ʋ ga yá batwa nii lìù tə. Yá Mʋabə tɩ̀án dàń jìgə̀ Davidə tʋ̀tʋ̀nà, ba ŋwɩ́n lanpoo, ba pɩn wá. 3 Davidə tə ta Rehɔbə bìú Hadadezɛrə, ʋ nə yɩ Soba pɩ̀ʋ́, ʋ də́, máŋá tə wa Hadadezɛrə nə dídə́n sə ʋ pìí ʋ jon Əfəratə mʋnaa tə. 4 Davidə jon səsədɩra 1 700, də kwatara ba nə vəli de nɛɛ, 20 000, Hadadezɛrə con. Davidə kúrí səsen 100 Hadadezɛrə səsen tə wa, ʋ ga goŋə tə duən tə mʋ̀ mama naŋʋnan, ʋ karɩ. 5 Yá máŋá tə wa, Siiri tɩ̀án nə nan Damasə, ba bà, sə ba san Soba pɩ̀ʋ́ Hadadezɛrə nə, ba ta Davidə, Davidə gʋa ba wa lɩ̀à 22 000. 6 Ʋ tún kwatara púlə́ Damasə nə, Siiri lʋʋ nii tə wa, yá Siiri tɩ̀án dàń jìgə̀ Davidə tʋ̀tʋ̀nà, ba ŋwɩ́n lanpoo, ba pɩn wá. Yá bwálɩ́ tə mama Davidə nə vəli ʋ ta kʋ̀ʋ̀, Ba-Yígúrə́-Jə-Tiu yàá pa ʋ də́ dɩ̀àn. 7 Davidə jon sɩ́án natanan tə, tə yà nə wulə Hadadezɛrə kwatara tə con, ʋ ja va Zwerizalɛmə. 8 Pɩ̀ʋ́ Davidə tə pɛ̀ cɩnɩan kapʋpʋ, Beta də Berotayi nə, tə nə yɩ Hadadezɛrə tɩan.9 Hamatə pɩ̀ʋ́ Toyi nì də Davidə ta Hadadezɛrə kwatara tə mama, ʋ də́. 10 Toyi dàń tʋn ʋ bìú Yoramə, pɩ̀ʋ́ Davidə con, sə ʋ kə ʋ lɛ̀ɛ̀, ʋ ga bʋ ʋ nə, ʋ nə ta Hadadezɛrə, ʋ də́ tə yɩrɩ. Cɩ́gá, Toyi də Hadadezɛrə də yà tɛ duən. Yoramə ja wárʋ́ wiən, də sɩ́án wiən, də cɩnɩan wiən, ʋ bà ʋ pa Davidə nə. 11 Pɩ̀ʋ́ Davidə jon tə də, ʋ tún vàn nə, ʋ pa Ba-Yígúrə́-Jə-Tiu nə*. Ʋ fwa kʋ, ndə ʋ nə dí yáá ʋ tún wárʋ́ tə də sɩ́án tə, ʋ nə ta ʋ jon lʋʋ níə́ tə duən tə mama con, vàn nə, ʋ pa Yɩɩ nə nətʋ. 12 Kʋ yɩ Aramə, də Mʋabə, də Amon dwíí tə, də Filisi tɩ̀án, də Amalɛkə dwíí tə con nə, Davidə ta wiən təntə, ʋ jon. Kʋ dàń súrí wiən tə nə, ʋ nə ta ʋ jon Rehɔbə bìú Hadadezɛrə con, ʋ nə yɩ Soba pɩ̀ʋ́.
13 Davidə nə ta Siiri tɩ̀án ʋ də́ kwa nə, ʋ pìí ʋ bà, ʋ ta Edomə tɩ̀án ʋ də́, nəkuən vara tə wa, ʋ gʋ ba lɩ̀à 18 000. Yá Davidə yɩrɩ dàń kwɛn kʋ nan zənzən. 14 Ʋ tún kwatara yun tɩ̀án Edomə lʋʋ nii tə mama wa, yá Edomə tɩ̀án dàń jìgə̀ Davidə tʋ̀tʋ̀nà. Yá bwálɩ́ tə mama, Davidə nə vəli, ʋ ta kʋ̀ʋ̀, Ba-Yígúrə́-Jə-Tiu yàá pa, ʋ də́ dɩ̀àn.
Davidə tʋ̀tʋ̀nán yun tɩ̀án tə yoo
15 Davidə dí pàrɩ̀ Yɩzərayɛlə lʋʋ nii tə mama yuu wa. Ʋ yà bʋ̀rɩ̀ ʋ lɩ̀à tə mama bʋra, kʋ twá cɩ́gá nə, ndə kʋ nə mɛ nətʋ. 16 Seruya bìú Zʋabə yà nə yɩ Davidə kwatara tə mama yuu tíú. Ahiludə bìú Zozafatə yà nə yɩ pɩ̀ʋ́ Davidə nanzoo. 17 Ahitubə bìú Sadɔkə, də Abɩyatarə bìú Ahimelɛkə yà nə yɩ Yɩɩ joŋwana. Yá Seraya yà nə pʋ́pʋ́nɩ́ pɩ̀ʋ́ yìə̀n. 18 Yehoyada bìú Benaya yà nə yɩ Kərɛtə də Pelɛtə tɩ̀án tə, ba nə cɩ̀ Davidə nə, yáá tíú. Davidə bɩ̀á tə də yà yɩ Yɩɩ joŋwana.