Yɩɩ kàn nii ʋ pa Davidə də ʋ dwíí nə
7
1 Ba-Yígúrə́-Jə-Tiu pɩn pɩ̀ʋ́ Davidə də́ dɩ̀àn ʋ dʋŋa tə mama yuu wa, ba nə kɩkarɩ wá. Yá ʋ dàń yà wulə ʋ də́ ʋ pàrɩ̀ tə, də sìə́. 2 Dɩɩn don nə, pɩ̀ʋ́ Davidə swɩ̀n Yɩɩ nii sʋ̀sʋ̀nʋ̀ Natan con, ʋ wʋ́: «N dàń ywàń n jə́n! À mʋ̀ wulə dìə̀ wa, ba nə lwə̀ də sɩsaban dɛɛ, yá Yɩɩ nimarʋ culu daka tə mʋ̀ ga wulə gansili də̀ń.» 3 Natan ma le pɩ̀ʋ́ Davidə, ʋ wʋ́: «Vəli n tʋn kʋ tə, n nə bʋŋa n waa con, kʋ yoo təntə yuu wa. Cɩ́gá, Ba-Yígúrə́-Jə-Tiu wulə də mʋ́.»4 Yá kʋ tɩtɩn nə, Ba-Yígúrə́-Jə-Tiu swɩ̀n sʋ̀ràn tə tə, Natan con, ʋ wʋ́: 5 «Vəli n swɩ̀n à tʋtʋnʋ Davidə con, də à mʋ̀ Ba-Yígúrə́-Jə-Tiu nə swɩ̀n də, kʋ tà ʋ mʋ̀ nə wá lwà dìə̀ ʋ pa nə, sə à ya ka wa. 6 Cɩ́gá, kʋ nə zɩgɩ dɩɩn tə nə, à nə lɩ Yɩzərayɛlə lɩ̀à tə, Ezwipətə lʋʋ nii tə wa, kʋ bà kʋ yí zə̀n, à tə wà dìə̀ wa yɩn. Gansilə nə yɩn à dìə̀, máŋá tə mama à nə ja ba à vəli. 7 Yá kʋ máŋá təntə mama, à nə ja Yɩzərayɛlə lɩ̀à tə à vəli, à kúrí lɩ̀à ba dwíə́ tə wa, sə ba ywàń Yɩzərayɛlə lɩ̀à tə yuu, ba nə yɩ à mʋ̀ lɩ̀à. Yá à dàń nə wà ba ladʋa tətə nii nə caga, ʋ nə wà sɩsaban dɛɛ dìə̀ lwè, ʋ pa nə yɩrɩ. 8 Kʋ mʋ̀ yɩrɩ, n wá swɩ̀n à tʋtʋnʋ Davidə con də, à mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n də, à mʋ̀ nə lɩ wá vàná yɩrʋ wa, sə ʋ də́ pàrɩ̀ Yɩzərayɛlə lɩ̀à tə yuu wa, ba nə yɩ à mʋ̀ lɩ̀à. 9 À yɩn də wá bwálɩ́ tə mama wa, ʋ nə vəli. À pɩn ʋ də́ dɩ̀àn ʋ dʋŋa tə mama yuu wa, à ga pa ʋ yɩrɩ nan, ndə tɩa yuu pɛ̀gá nəfaran tə yɩrɩ nə nan nətʋ. 10 À wá pa bwálɩ́ Yɩzərayɛlə lɩ̀à tə nə, ba nə yɩ à mʋ̀ lɩ̀à. À wá kə ba bwálɩ́ nədʋ nə, sə kʋ ya ba mʋ̀ nyiən, ba ya lá. Yá wʋwalʋ kʋ́ʋ̀ bá yí ba, wʋlʋnyɩna də ga kʋ́ʋ̀ bá na ba, ba fʋfʋlɩ, ndə fuən tə nə, 11 də máŋá tə wa, à nə tún lɩ̀à, ba nə bʋ̀rɩ̀ bʋra, Yɩzərayɛlə lɩ̀à tə yuu wa, ba nə yɩ à mʋ̀ lɩ̀à. Yá à wá pa ʋ ya sìə́ wa, ʋ dʋŋa tə mama yáá con. Yá à dàń swɩ̀n ʋ con, sə ʋ lwarɩ də, à mʋ̀ Ba-Yígúrə́-Jə-Tiu nə wá lwà dìə̀, à pa ʋ mʋ̀ Davidə nə. 12 Yá máŋá tə, ʋ mɩɩ nə wá bà kʋ zwɛ̀, ba tì ba gùrì, ʋ nyɩna ba con, ba nə dí yáá ba tɩ, à wá tún ʋ tətə kwíə́ də̀ń bìú tə don, sə ʋ də́ pàrɩ̀, ʋ yuu nə. Yá à ga wá pa ʋ pàrɩ̀ tə dəkuu ja dɩ̀àn. 13 Mə ʋ bìú təntə nə wá lwà dìə̀, à yɩrɩ yuu wa. Yá à dàń wá pa ʋ pàrɩ̀ tə dəkuu ja dɩ̀àn, máŋá mama wuuu. 14 À wá ya ʋ nyɩna, ʋ də ga wá ya à bìú. Ʋ nə tʋn yolwan, à wá fɩrɩ wá də kafɩʋ, à kə cwəŋə wa, ndə ləzoni nə fwa nətʋ. 15 Yá à bá lwàń à wʋywaŋʋ* tə mʋ̀, à nə tʋŋa ʋ yɩra, ndə à nə lwàń kʋ Sayulə yɩra nətʋ. À vɩga Sayulə à dʋgʋ, à ga kə Davidə, ʋ yuu nə. 16 À wá tún ʋ dìə̀ tə, sə ka də́ pàrɩ̀, máŋá mama wuuu, yá ʋ padaʋ tə dəkuu wá ja dɩ̀àn, máŋá mama wuuu.» 17 Kʋ tɩpʋrɩ nə, Natan swɩ̀n sʋ̀ràn təntə mama, Yɩɩ nə swɩ̀n ʋ con, nɩʋn təntə wa, ʋ bɩrɩ Davidə nə.
Davidə yɩjʋnɩ tə yoo
18 Pɩ̀ʋ́ Davidə dàń vəli, ʋ tʋ Ba-Yígúrə́-Jə-Tiu yáá con, ʋ swɩ̀n, ʋ wʋ́: «Yuu-Tiu Ba-Yígúrə́-Jə-Tiu, à mʋ̀ nə yɩ wàà? Yá bɛ̀ɛ̀ nə yɩ à dìə̀ tə, n ma tʋn zəni à yɩra, kʋ mɛ nətən? 19 Yá n mʋ̀ Yuu-Tiu Ba-Yígúrə́-Jə-Tiu na də, kʋ tə wà n fɩra yí. N tə swɩ̀n n nə wá pa à dìə̀ tə də ya nətʋ, máŋá wa ka nə bɩ̀àn. Kʋ tə nə dwə, n tə swɩ̀n kʋ n bɩrɩ à mʋ̀ lìù tə nə, à nə yɩ ləzwənə, ndə à dwə à duən, Yuu-Tiu, Ba-Yígúrə́-Jə-Tiu! 20 Bɛ̀ɛ̀ nə à mʋ̀ Davidə kʋ́ʋ̀ wàá à swɩ̀n n con, à súrí lá? N mʋ̀ Yuu-Tiu Ba-Yígúrə́-Jə-Tiu yə̀ə́ à mʋ̀ n tʋtʋnʋ tə! 21 Kʋ yɩ n nikanɩ tə yɩrɩ nə, n tʋn yofaran tə tə mama, kʋ twá n fɩra nə, n ga pa à mʋ̀ n tʋtʋnʋ tə lwarɩ tə. 22 Yuu-Tiu Ba-Yígúrə́-Jə-Tiu, n cɩ́gá yɩ Yɩɩ tə, n nə dwə tə mɛ! Cɩ́gá, n ba kamandon jə, yá Yɩɩ don tə̀lə́, də kʋ nə tà n mʋ̀, ndə nə nə nì kʋ nətʋ. 23 Dwíí don kʋ́ʋ̀ wulə tɩa yuu wa, ba yɩa nə vəli tə jon ba, tə ma fwa tə lɩ̀à, ndə Yɩzərayɛlə dwíí tə nə, ba nə yɩ n mʋ̀ lɩ̀à naaa? Yɩzərayɛlə dwíí tə cɩcɩ nə, n mʋ̀ Yɩɩ vəli n jon, Ezwipətə tɩ̀án də ba woŋwanan tə jɩɩn wa, n ma fwa n lɩ̀à. N tʋn yofaran də dɩ̀àn tʋ̀tʋ̀nán, n pa ba də ba lʋʋ nii tə nə, kʋ pa ba yɩrɩ nan. 24 N tún Yɩzərayɛlə lɩ̀à tə, n pa ba dəkuu ja dɩ̀àn, sə ba ya n mʋ̀ lɩ̀à, máŋá mama wuuu. Yá n mʋ̀ Ba-Yígúrə́-Jə-Tiu dàń nə jìgə̀ ba Yɩɩ. 25 Sɩ́ʋ́n nə, Yuu-Tiu Ba-Yígúrə́-Jə-Tiu, à dàń lòrì mʋ́, sə n pa sʋgʋ tə, n nə swɩ̀n à mʋ̀ n tʋtʋnʋ tə, də à dìə̀ tə yuu wa, nii sú máŋá mama wuuu, ndə n nə swɩ̀n nətʋ. 26 Pa sə n yɩrɩ tə na dun máŋá mama, sə lɩ̀à ga swɩ̀n də, Ba-Yígúrə́-Jə-Tiu, ʋ nə yɩ kwatara Yɩɩ nə yɩ Yɩzərayɛlə lɩ̀à Yɩɩ! Tún à mʋ̀ n tʋtʋnʋ Davidə dìə̀ tə, n pa ka dəkuu ja dɩ̀àn, n yáá con. 27 Cɩ́gá, n tətə Ba-Yígúrə́-Jə-Tiu, n nə yɩ kwatara Yɩɩ, n ga yɩ Yɩzərayɛlə lɩ̀à Yɩɩ nə bɩrɩ à mʋ̀ n tʋtʋnʋ tə nə, də n wá lwà dìə̀ n pa nə! Kʋ mʋ̀ nə pɩn, à mʋ̀ n tʋtʋnʋ tə ma na wʋdɩʋ, à ma lòrì kʋ yoo təntə, n con. 28 Sɩ́ʋ́n nə, Yuu-Tiu, Ba-Yígúrə́-Jə-Tiu, n mʋ̀ nə yɩ Yɩɩ, n sʋ̀ràn tə ga yɩ cɩ́gá. N swɩ̀n zəni tə yoo, n nə pɩ̀à n tʋn à mʋ̀ n tʋtʋnʋ tə yɩra, n bɩrɩ nə. 29 À dàń lòrì mʋ́ sɩ́ʋ́n nə, sə n tʋn zəni à mʋ̀ n tʋtʋnʋ tə dìə̀ tə yɩra, sə ka na yuywaŋʋ n yáá con, máŋá mama wuuu! Cɩ́gá, n mʋ̀ Yuu-Tiu Ba-Yígúrə́-Jə-Tiu nə swɩ̀n kʋ. Yá kʋ wá twá də sʋgʋ təntə n nə swɩ̀n, n ma tʋn zəni à mʋ̀ n tʋtʋnʋ tə dìə̀ tə yɩra, máŋá mama wuuu.»