Davidə pɩ̀à, sə ʋ ja Yɩɩ nimarʋ culu daka tə, ʋ bà Zwerizalɛmə
6
1 Davidə kʋ́ʋ̀ ken Yɩzərayɛlə kwatara babɩran tə mama duən yáá. Ba yɩn kwatara mʋ̀rʋ̀ fɩtwa. 2 Davidə dàń zàn, ʋ va tɩʋ tə, ba nə boŋə Baale-Zwida, ʋ də lalʋʋ təntə mama, ba yà nə wulə də wá. Ʋ vəli sə ʋ tì Yɩɩ nimarʋ culu daka tə lá nə, ʋ ja pìí ʋ bà Zwerizalɛmə. Yɩɩ yɩrɩ tə nə, ba ma boŋə daka təntə. Yɩrɩ təntə nə yɩ Ba-Yígúrə́-Jə-Tiu, ʋ mʋ̀ kwatara Yɩɩ tə, ʋ nə jə̀ə́ Yɩɩ sàń wonəŋə nyɩnyɩga* titəŋi wa, daka tə yuu wa. 3 Ba vəli ba tì Yɩɩ nimarʋ culu daka tə, Abinadabə dìə̀ wa, paan tə yuu wa, ba kə nɩan kòrù nədʋn wa. Abinadabə bɩ̀á Uza də Ahiyo yà nə kəni nɩan kòrù tə cwəŋə nə. 4 Ba dàń ja ka, ba nan Abinadabə dìə̀, paan tə yuu wa, ba cwi. Ahiyo yà wulə daka tə yáá, ʋ vəli. 5 Yá Davidə də Yɩzərayɛlə lɩ̀à tə mama dàń yà ken gwaran də banan, də kwanan, də gungwɛn, də zɩnzɩran, də lulwəŋə, də gwaran zɩla yirə yirə, ba nə sə̀ də dɛɛ, ba ma bwɩ Ba-Yígúrə́-Jə-Tiu nə, Yɩɩ nimarʋ culu daka tə yáá con. 6 Máŋá tə, ba nə vəli ba yí Nakon tʋa tə, nɩan tə yà pɩ̀à tə gwìń Yɩɩ nimarʋ culu daka tə, tə dɩ. Uza ma kwé ka də ʋ jɩɩn. 7 Yá Ba-Yígúrə́-Jə-Tiu lɩŋa zàn zənzən Uza yuu wa, ʋ ga mà wá, kʋ bwálɩ́ tə wa, culu təntə yɩrɩ, ʋ nə cʋ̀gʋ̀. Uza dàń tʋa ʋ tɩ, Yɩɩ nimarʋ culu daka tə səpuni nə. 8 Davidə pùə́ cʋ̀gʋ̀ zənzən, Uza mɩɩ tə yɩrɩ, Ba-Yígúrə́-Jə-Tiu nə lɩ. Yá ba dàń boŋə kʋ bwálɩ́ tə Perɛsə-Uzaa, də zə̀n mama. 9 Ba-Yígúrə́-Jə-Tiu fən zʋa Davidə kʋ dɩɩn tə nə, ʋ ga swɩ̀n, ʋ wʋ́: «À wàrɩ̀ à pɩn Ba-Yígúrə́-Jə-Tiu nimarʋ culu daka tə zwɩ à dìə̀!» 10 Ʋ yà kʋ́ʋ̀ ba swə, sə ʋ ja Ba-Yígúrə́-Jə-Tiu nimarʋ culu daka tə ʋ va ʋ sàń, Davidə sadiyuu tə wa. Yá ʋ dàń pɩn, ba ja ka, ba va ba tún Obɛdə-Edomə dìə̀ wa, ʋ nə yɩ Gatə tíú. 11 Ba-Yígúrə́-Jə-Tiu nimarʋ culu daka tə yɩn Obɛdə-Edomə dìə̀, ʋ nə yɩ Gatə tíú, cànɩ̀ batwa. Yá Ba-Yígúrə́-Jə-Tiu fwa zəni Obɛdə-Edomə, də ʋ dìə̀ lɩ̀à mama yɩra.Yɩɩ nimarʋ culu daka tə twi Zwerizalɛmə
(1 Pɛ̀gá ŋwɛn 15:25—16:3)
12 Lɩ̀à swɩ̀n pɩ̀ʋ́ Davidə con, ba wʋ́: «Ba-Yígúrə́-Jə-Tiu fwa zəni Obɛdə-Edomə, də ʋ won mama yɩra, Yɩɩ nimarʋ culu daka tə yɩrɩ.» Yá Davidə dàń vəli, sə ʋ pa ba lɩ Yɩɩ nimarʋ culu daka tə, Obɛdə-Edomə dìə̀, ba ja bà Davidə sadiyuu tə wa, də pupwən. 13 Máŋá tə, lɩ̀à tə nə zɩŋa Ba-Yígúrə́-Jə-Tiu nimarʋ culu daka tə, nə vəli nagalʋ yiə bardʋ, Davidə gʋa nabɩa də nabiə tə nə jə nʋga, ʋ ma fwa joŋi, ʋ pa Yɩɩ nə. 14 Davidə yà vwə Yɩɩ joŋwana culu ganbʋa ʋ tàŋá nə, ʋ dàń ga sɛ də ʋ dɩ̀àn mama, ʋ ma pɩn dun Ba-Yígúrə́-Jə-Tiu nə. 15 Davidə də Yɩzərayɛlə lɩ̀à tə mama dàń ja Ba-Yígúrə́-Jə-Tiu nimarʋ culu daka tə, ba bɩ̀àn Zwerizalɛmə, də ba mà pupwən cə̀rí, də ba wúrí nabwanan.
16 Máŋá tə, ba nə ja Ba-Yígúrə́-Jə-Tiu nimarʋ culu daka tə, ba zʋ Davidə sadiyuu tə wa, Sayulə bʋ̀á Mikaləb twá təkurə, ʋ na pɩ̀ʋ́ Davidə, də ʋ wulə ʋ sɛ, də ʋ faŋa, ʋ ma pɩn dun Ba-Yígúrə́-Jə-Tiu nə. Yá kʋ nətʋ tə pɩn, Mikalə gwìə̀n Davidə, ʋ waa con.
17 Ba ja Ba-Yígúrə́-Jə-Tiu nimarʋ culu daka tə, ba zʋ ba tún ka bwálɩ́ nə, gansili tə wa, Davidə nə tanɩ ka yɩrɩ. Yá Davidə dàń fwa jwəŋə, ʋ pa Ba-Yígúrə́-Jə-Tiu nə. Tə duən yɩ ʋ sʋ̀rɩ́*, tə duən də ga ya nimarʋ jwəŋə*. 18 Máŋá tə, Davidə nə fwa jwəŋə tə ba nə sʋ̀rɩ́, də nimarʋ jwəŋə tə, ʋ zwɛ̀, ʋ lòrì sə Ba-Yígúrə́-Jə-Tiu, ʋ nə yɩ kwatara Yɩɩ, fwa zəni lalʋʋ tə yɩra. 19 Davidə pɩn, ba tara wodirən, ba pa Yɩzərayɛlə lalʋʋ tə mama nə. Bara tə də kana tə lìù mama nɩ dipɛn dàlɩ́, də təməru bɩ̀á, ba nə cili ba kə duən nə, tə kʋ̀, kúkúlí, də divɛn tɩ̀án bɩ̀á, ba nə cili ba kə duən nə, tə kʋ̀, kúkúlí. Kʋ kwa nə, lalʋʋ tə lìù mama dàń pìí ʋ va ʋ sàń.
20 Davidə pìí ʋ va ʋ sàń, sə ʋ lòrì sə Yɩɩ fwa zəni ʋ dìə̀ lɩ̀à yɩra. Yá Sayulə bʋ̀á Mikalə dàń nan ʋ jəri wá, ʋ ga swɩ̀n, ʋ wʋ́: «Bɛ̀ɛ̀ dun nə Yɩzərayɛlə pɩ̀ʋ́ tə nɩ zə̀n nətən, kʋ ma yí sə ʋ kʋ̀rɩ̀ ʋ gànàn, ʋ tʋ̀tʋ̀nà tʋtʋnbwɩɩ yáá con, ndə ləzwənywaŋʋ nə!» 21 Davidə le Mikalə, ʋ wʋ́: «Kʋ yɩ pupwən nə à fwa, à ma pa dun Ba-Yígúrə́-Jə-Tiu nə. Ʋ vɩga n nyɩna də ʋ dìə̀ tə mama ʋ dʋgʋ, ʋ ga kúrí nə, ʋ tún, sə à ya pɩ̀ʋ́ Yɩzərayɛlə lɩ̀à tə yuu wa, ba nə yɩ ʋ mʋ̀ Ba-Yígúrə́-Jə-Tiu lɩ̀à. Yá à tə wá fwa pupwən, à ma pa dun Ba-Yígúrə́-Jə-Tiu nə. 22 À tə wá kwɛn à mun à tɩ̀àn, à tətə yɩ́á yuu, sə lɩ̀à gwìə̀n nə. Yá də kʋ nətʋ mɛ, tʋtʋnbwɩɩ təntə n nə swɩ̀n ba yoo, tə wá pa nə dun.» 23 Yá Sayulə bʋ̀á Mikalə kori ʋ tɩ, də ʋ wà bìú lɩrɩ.