Davidə jìgə̀ Yɩzərayɛlə də Zwida mɛ pɩ̀ʋ́
5
1 Yìə̀n təntə kwa nə, Yɩzərayɛlə dwíə́ tə mama twi Davidə con, Ebəron nə, ba swɩ̀n, ba wʋ́: «Nə̀ń nəba nə, nə yɩ n dwíí tɩ̀án, nə yɩ n dìə̀ lɩ̀à! 2 Fuən tə nə, də Sayulə yà nə yɩ nə pɩ̀ʋ́ tə mɛ, n mʋ̀ nə yàá ya Yɩzərayɛlə kwatara tə yáá, n ja ba n vəli kʋ̀ʋ̀, də n pìí n twi. Yá Ba-Yígúrə́-Jə-Tiu swɩ̀n n con, də n mʋ̀ nə wá ywàń Yɩzərayɛlə lɩ̀à tə yuu, ba nə yɩ ʋ mʋ̀ lɩ̀à, n ga wá ya ba pɩ̀ʋ́.» 3 Yɩzərayɛlə lɩ̀à nəkwɩna tə mama dàń twi pɩ̀ʋ́ Davidə con, Ebəron nə. Yá Davidə dàń tún nimarʋ* ʋ də ba pwə́rə́ wa, lá nə, Ba-Yígúrə́-Jə-Tiu yáá con. Yá ba dàń twɛ́n dun nʋga* Davidə yuu wa, ba tún wá, sə ʋ ya Yɩzərayɛlə mama pɩ̀ʋ́.4 Davidə jìgə̀ pɩ̀ʋ́, də ʋ jə bɩna fɩtwa. Yá ʋ dí pàrɩ̀ bɩna sapwɩlə. 5 Ebəron nə, ʋ dí pàrɩ̀ Zwida dwíí tə yuu wa, bɩna barpɛ də cànɩ̀ bardʋ. Yá Zwerizalɛmə nə, ʋ dí pàrɩ̀ Yɩzərayɛlə də Zwida dwíí tə mama yuu wa, bɩna fɩtwa də batwa.
Davidə jon Zwerizalɛmə, ʋ ma fwa ʋ payuu tɩʋ
6 Pɩ̀ʋ́ Davidə də ʋ kwatara tə vəli, ba pú Zwerizalɛmə, kʋ yɩrɩ yà nə yɩ Yebusə ba kə, ba tɛ Yebusə tɩ̀án tə, ba yà nə wulə kʋ lʋʋ nii tə wa. Yá Yebusə tɩ̀án tə swɩ̀n Davidə con, ba wʋ́: «N ba nə tɩʋ tə wa zwɩ! Cɩ́gá, lilirən də gwànán də tətə cɩcɩ dɩ̀àn yí, sə ba pa n pìí n kə n kwa!» Ba swɩ̀n kʋ nətʋ tə, sə ba ma bɩrɩ də, Davidə wàrɩ̀ ba tɩʋ tə ʋ tɛ ʋ də́. 7 Yá də kʋ mɛ, Davidə tə ta tɩʋ tə dɩ̀àn dəkuu bwálɩ́ tə, ba nə boŋə “Siyon”, ʋ jon. Yá ba dàń dɩga kʋ bwálɩ́ təntə yɩrɩ, “Davidə sadiyuu”. 8 Davidə swɩ̀n kʋ dɩɩn tə nə, ʋ wʋ́: «Lìù tə mama, ʋ nə pɩ̀à sə ʋ ta Yebusə tɩ̀án tə, ʋ mɛ sə ʋ twá nɩ́á bʋʋ tə wa, ʋ va ʋ yí ba. À mʋ̀ Davidə waa nan gwànán tə, də lilirən təntə!» Kʋ mʋ̀ nə pɩn, ba swɩ̀n, ba wʋ́: «Lilirən də gwànán bá zʋ dìə̀ tə wa.» 9 Davidə dàń jɩn tɩʋ tə dɩ̀àn dəkuu bwálɩ́ tə, ʋ ma fwa ʋ sàń. Ʋ dɩga kʋ yɩrɩ “Davidə sadiyuu”. Kʋ kwa nə, ʋ tə pɩn ba lwà sànɩ́ duən, ba ma kɩkarɩ ʋ sàń tə, kʋ nə zɩgɩ Milo dədolu nə, kʋ ja zʋ tɩʋ tə wa. 10 Ba-Yígúrə́-Jə-Tiu, ʋ nə yɩ kwatara Yɩɩ, yà wulə də Davidə, yá ʋ dɩ̀àn dàń súrí wuuu.
11 Kʋ máŋá təntə wa, Tirə pɩ̀ʋ́ Yiramə tʋn lɩ̀à pɩ̀ʋ́ Davidə con, də sɩsaban daran, də lɩ̀à ba nə sə̀ dɛɛ, də ba duən, ba nə sə̀ kapana, ʋ pa ba lwà pɩ̀ʋ́ dìə̀, ba pa Davidə nə. 12 Davidə lwarɩ də Ba-Yígúrə́-Jə-Tiu cɩ́gá nə tún wá, sə ʋ ya Yɩzərayɛlə pɩ̀ʋ́, ʋ ga pa ʋ pàrɩ̀ tə jə dun, Yɩzərayɛlə lɩ̀à tə yɩrɩ, ba nə yɩ ʋ mʋ̀ Ba-Yígúrə́-Jə-Tiu lɩ̀à.
Davidə bɩ̀á tə, ʋ nə lɩrɩ Zwerizalɛmə nə
13 Davidə nə nan Ebəron ʋ bà Zwerizalɛmə, ʋ kʋ́ʋ̀ swe kana duən, ʋ ga tì kacəŋə, ʋ súrí lá. Yá ʋ də kana təntə də kʋ́ʋ̀ lɩrɩ bibara də bikana. 14 Nə̀ń Davidə bɩ̀á tə, ʋ nə lɩrɩ Zwerizalɛmə nə, yɩra: Kʋ yɩ Swamʋa, də Swobabə, də Natan, də Salʋmʋn, 15 də Yibəharə, də Eliswʋa, də Nefɛgə, də Yafɩya, 16 də Eliswama, də Eliyada, də Elifelɛtə.
Davidə ta Filisi tɩ̀án ʋ də́
17 Filisi tɩ̀án tə nì də, Yɩzərayɛlə lɩ̀à twɛ́n dun nʋga* Davidə yuu wa, sə ʋ ya Yɩzərayɛlə pɩ̀ʋ́. Ba də mama dàń nan ba va, sə ba twarɩ wá. Davidə nì kʋ, yá ʋ dàń dəri ʋ zʋ dɩ̀àn dəkuu bwálɩ́ tə wa. 18 Filisi tɩ̀án tə twi ba sú Refayimə vara tə. 19 Davidə bwe Ba-Yígúrə́-Jə-Tiu, ʋ wʋ́: «À mɛ sə à va, à ta Filisi tɩ̀án tə naaa? À nə vəli, n wá pa à də́ dɩ̀àn ba yuu wa naaa?» Yá Ba-Yígúrə́-Jə-Tiu le Davidə, ʋ wʋ́: «Vəli n ta ba! Cɩ́gá, kʋ ba tʋ́tʋ̀ná jə, à wá pa n də́ dɩ̀àn ba yuu wa.» 20 Yá Davidə dàń nan ʋ va, ʋ ta Filisi tɩ̀án tə ʋ də́, Baalə-Perasiməa nə. Yá ʋ dàń swɩ̀n, ʋ wʋ́: «Ba-Yígúrə́-Jə-Tiu tún cwəŋə à dʋŋa titəŋi wa, ʋ pa nə, ndə navʋa nə kàrɩ́ kàŋʋ́ nətʋ.» Kʋ mʋ̀ nə pɩn, ba dɩ kʋ bwálɩ́ təntə yɩrɩ, Baalə-Perasimə. 21 Filisi tɩ̀án tə dəri, ba yá ba woŋwanan nə lá, Davidə də ʋ kwatara tə ma tì tə, ba ja vìí.
22 Kʋ kwa nə, Filisi tɩ̀án tə kʋ́ʋ̀ pìí ba nan ba sú Refayimə vara tə. 23 Davidə bwe Ba-Yígúrə́-Jə-Tiu, yá Ba-Yígúrə́-Jə-Tiu le, ʋ wʋ́: «Dàn ká va n jəri ba yáá wa, n ma ta ba. Vəli n kɩkarɩ, n twá ba kwa con, n va n ta ba, pún tə yáá con. 24 Máŋá tə, n nə nì nɛɛ dwana pún tə yuu con, sə n kə n sírí, n ta ba. Cɩ́gá, kʋ máŋá təntə wa, yəni də, à mʋ̀ Ba-Yígúrə́-Jə-Tiu nə nan, sə à ya n yáá, à də́ dɩ̀àn Filisi tɩ̀án kwatara tə yuu wa.» 25 Davidə twá kʋ tə nə, Ba-Yígúrə́-Jə-Tiu nə pɩn wá nii, sə ʋ tʋn. Yá ʋ dàń zɩgɩ Geba nə, ʋ ta Filisi tɩ̀án tə ʋ də́, ʋ va ʋ yí Gezɛrə.