Ribɛn dwíí dəkuu yoo
5
1 Ribɛn yà nə yɩ Yɩzərayɛləa bikwɩa. Yá ʋ dàń nə pə̀ń ʋ nyɩna kan tə pɩn, ʋ kwɩn ʋ bikwɩa tori tə nə. Yá ba dàń pɩn kʋ Yɩzərayɛlə bìú Zʋzɛfə bɩ̀á tə nə. Kʋ mʋ̀ nə pɩn, ba kʋ́ʋ̀ wà Ribɛn yɩrɩ ken bikwɩa tori bwálɩ́ nə. 2 Zwida jɩn dɩ̀àn ʋ doni ʋ nubɩa tə, kʋ pa ba lɩra Yɩzərayɛlə pɩ̀ʋ́ tə ʋ dwíí tə wa. Yá bikwɩa tori tə mʋ̀ yɩn Zʋzɛfə dwíí tə nyiən.3 Yɩzərayɛlə bikwɩa Ribɛn bɩ̀á nə yɩ Enɔkə, də Palu, də Ɛsəron, də Karəmi.
4 Zʋwɛlə dwíí nə yɩ ʋ bìú Swemaya, də Swemaya bìú Gɔgə, də Gɔgə bìú Swimeyi, 5 də Swimeyi bìú Mika, də Mika bìú Reya, də Reya bìú Baalə, 6 də Baalə bìú Bera, Asiiri pɩ̀ʋ́ Tiləgatə-Pilənezɛrə nə jɩn, ʋ ja va yongaʋ. Bera yà yɩ Ribɛn dwíí tə pɩ̀ʋ́.
7 Bera nubɩa tə, ba nə yɩ sànɩ́ tɩ̀án, yɩra yà pʋ́pʋ́nɩ́, ndə ba dwíí dəkuu nə yɩ nətʋ. Təntən lìù nə yɩ Yeyɛlə, kʋ pa Zakari, 8 də Bela, ʋ nə yɩ Azazə bìú, də Azazə, ʋ nə yɩ Swema bìú, də Swema, ʋ nə yɩ Zʋwɛlə bìú. Ba yà yɩ ba jə̀ə́ Aroyɛrə nə, jɩgwiə saparʋ con, ba va ba yí Nebo paan tə, də Baalə-Meyon tə nə wulə jɩzən saparʋ con. 9 Yɩɩ yipɩan con, ba mɛ Əfəratə mʋnaa tə nii nə, ba jə̀ń ba va ba yí kasɔɔ lanworu tə nii. Cɩ́gá, ba vàná tə yà dáá zənzən Galadə lʋʋ nii tə wa. 10 Sayulə máŋá wa, Bera dwíí tə ta Hagarə dwíí tə ba də́, ba ga jon ba gansilə tə ba wulə tə wa, nagwanɛɛ tə mama wa, Galadə yɩɩ yipɩan con.
Gadə dwíí dəkuu yoo
11 Gadə dwíí tə yà jə̀ə́ Baswan lʋʋ nii tə wa, Ribɛn dwíí tə yáá con, ba va ba yí Saləka. 12 Zʋwɛlə dwíí tə yà nə wulə tə mɛ yuu wa, kʋ lʋʋ nii təntə wa. Bələ nii nə, kʋ yɩ Swafan dwíí tə, kʋ dàń súrí Yanayi, də Swafatə dwíə́ tə nə. 13 Ba nubɩa tə nə yɩn ba dìì tɩ̀án nə yɩ Miswɛlə, də Meswulamə, də Sweba, də Yorayi, də Yakan, də Zɩa, də Ebɛrə. Ba mama yɩn lɩ̀à barpɛ. 14 Nə̀ń Abihayilə, ʋ nə yɩ Uri bìú dwíə́ tə nɩbara: Kʋ yɩ Abihayilə, ʋ nə yɩ Uri bìú, də Uri, ʋ nə yɩ Yarʋa bìú, də Yarʋa, ʋ nə yɩ Galadə bìú, də Galadə, ʋ nə yɩ Miswɛlə bìú, də Mikayɛlə, ʋ nə yɩ Yeswiswayi bìú, də Yeswiswayi, ʋ nə yɩ Yado bìú, də Yado, ʋ nə yɩ Buzə bìú. 15 Abədiyɛlə bìú Ahi, ʋ nə yɩ Guni nàʋ́, yà nə yɩ ba sànɩ́ tə yuu tíú. 16 Ba yà yɩ ba wulə Galadə nə, də Baswan nə, də tə nii tibii tə wa, də Swaronə gaʋ tə wa, kʋ va kʋ yí ba sɩswɩan.
17 Kʋ yɩn Zwida pɩ̀ʋ́ Yotamə, də Yɩzərayɛlə pɩ̀ʋ́ Zwerobʋamə máŋá wa nə, ba pʋ́pʋ́nɩ́ dwíí təntə lɩ̀à tə mama yɩra ba tún saga wa.
18 Ribɛn dwíí tə, də Gadə dwíí tə, də Manase dwíí tə faan don, yà jə babɩran 44 760, ba nə ja natana, də kwatara sɩ̀ʋ́, də twan ba ma ta kʋ̀ʋ̀ ba mɩ̀n. 19 Ba ta kʋ̀ʋ̀ də Hagarə dwíí tə, də Yeturə dwíí tə, də Nafiswə dwíí tə, də Nodabə dwíí tə. 20 Kʋ̀ʋ̀ tə máŋá wa, ba bon ba kə Yɩɩ nə, ba yà nə jələ ʋ yuu wa yɩrɩ. Yá Yɩɩ dàń le ba yɩjʋnɩ tə, ʋ pa ba də́ dɩ̀àn Hagarə dwíí tə, də lɩ̀à tə mama yà nə wulə də ba, yuu wa. 21 Ba jɩn Hagarə dwíí vàná tə nə yɩ nyʋgʋmɛ 50 000, də vanmɩnɩ 250 000, də bɩnɛ 2 000, də ba lɩ̀à 100 000. 22 Ba gʋa dʋŋa tə lɩ̀à kapʋpʋ. Cɩ́gá, kʋ̀ʋ̀ tə yà yɩ Yɩɩ nə tɛ. Ba dàń jon Hagarə dwíí lʋʋ nii tə, ba jə̀ń kʋ wa, kʋ va kʋ yí ba yongaʋb tə vəlu máŋá.
Manase dwíí faan tə nə wulə Zʋrədɛn mʋnaa tə kwa con yoo
23 Manase dwíí tə faan yà jə̀ə́ Baswan nə, ba va ba yí, Baalə-Ɛrəmon, də Senirə, də Ɛrəmon paan tə. Ba dwíí tə yà dáá zənzən. 24 Nə̀ń ba dìì tɩ̀án yɩra: Kʋ yɩ Efɛrə, də Yisweyi, də Eliyɛlə, də Azəriyɛlə, də Zweremi, də Hodavɩa, də Yadɩyɛlə. Ba mama yà yɩ kwatara babɩran, ba nə jə dun, ba yɩrɩ ga nan ba dwíí tə wa.
25 Yá ba dàń cʋ̀gʋ̀ culu, ba zɩgɩ ba nyɩna-ba Yɩɩ tə nə. Ba vɩga Yɩɩ ba dʋgʋ, ba ga pìí ba jʋnɩ dwíə́ nəkaran* tə woŋwanan tə. Yɩɩ yà ga cʋ̀gʋ̀ dwíə́ təntə ba yáá con. 26 Yɩzərayɛlə lɩ̀à Yɩɩ tə dàń ma sugu Asiiri pɛ̀gá Pulə, də Tiləgatə-Pilənezɛrə, ʋ kə ba nə. Yá Asiiri pɩ̀ʋ́ Tiləgatə-Pilənezɛrə jɩn Ribɛn dwíí tə, də Gadə dwíí tə, də Manase dwíí faan tə, ʋ ja va yongaʋ. Ʋ ja ba ʋ va Hala, də Habɔrə, də Hara, də Gozan mʋnaa tə nii nə. Yá də zə̀n mama, ba tə wulə bwálá təntə wa.
Levi dwíí tə yoo
27 Levi bɩ̀á nə yɩ Gɛrəswomə, də Kehatə, də Merari. 28 Kehatə bɩ̀á nə yɩ Aməramə, də Yɩsarə, də Ebəron, də Uziyɛlə. 29 Aməramə bɩ̀á yɩn bibara bələ də bʋ̀á. Ba mʋ̀ nə yɩ Aron də Moyizə, də ba nakʋa Miriyamə. Aron bɩ̀á nə yɩ Nadabə, də Abihu, də Eleyazarə, də Yɩtamarə. 30 Eleyazarə lɩrɩ Fineyasə, Fineyasə lɩrɩ Abiswua, 31 Abiswua lɩrɩ Buki, Buki lɩrɩ Uzi, 32 Uzi lɩrɩ Zeraya, Zeraya lɩrɩ Merayɔtə, 33 Merayɔtə lɩrɩ Amarɩya, Amarɩya lɩrɩ Ahitubə, 34 Ahitubə lɩrɩ Sadɔkə, Sadɔkə lɩrɩ Ahimasə, 35 Ahimasə lɩrɩ Azarɩya, Azarɩya lɩrɩ Yohanan, 36 Yohanan lɩrɩ Azarɩya. Azarɩya təntə yɩn Yɩɩ joŋwanʋ Yɩɩ dìə̀ tə wa Salʋmʋn nə lwà Zwerizalɛmə nə. 37 Azarɩya lɩrɩ Amarɩya, Amarɩya lɩrɩ Ahitubə, 38 Ahitubə lɩrɩ Sadɔkə, Sadɔkə lɩrɩ Swalumə, 39 Swalumə lɩrɩ Hiləkiya, Hiləkiya lɩrɩ Azarɩya, 40 Azarɩya lɩrɩ Seraya, Seraya lɩrɩ Yehosadakə. 41 Nebukadənezarə jɩn Yehosadakə ʋ ja va yongaʋ, máŋá tə wa Ba-Yígúrə́-Jə-Tiu nə pɩn Nebukadənezarə ja Zwerizalɛmə tɩ̀án, də Zwida lʋʋ lɩ̀à tə ʋ va yongaʋ.