Ba twɛ́n dun nʋga* Davidə yuu wa, sə ʋ ya Yɩzərayɛlə pɩ̀ʋ́
11
1 Yìə̀n təntə kwa nə, Yɩzərayɛlə dwíə́ tə mama twi Davidə con, Ebəron nə, ba swɩ̀n, ba wʋ́: «Nə̀ń nəba nə, nə yɩ n dwíí tɩ̀án, nə yɩ n dìə̀ lɩ̀à! 2 Fuən tə nə, də Sayulə yà nə yɩ nə pɩ̀ʋ́ tə mɛ, n mʋ̀ nə yàá ya Yɩzərayɛlə kwatara tə yáá, n ja ba n vəli kʋ̀ʋ̀, də n pìí n twi. Yá Ba-Yígúrə́-Jə-Tiu, ʋ nə yɩ n tíú Yɩɩ swɩ̀n n con, də n mʋ̀ nə wá ywàń Yɩzərayɛlə lɩ̀à tə yuu, ba nə yɩ ʋ mʋ̀ lɩ̀à, n ga wá ya ba pɩ̀ʋ́.» 3 Yɩzərayɛlə lɩ̀à nəkwɩna tə mama dàń twi pɩ̀ʋ́ Davidə con, Ebəron nə. Yá Davidə dàń tún nimarʋ* ʋ də ba pwə́rə́ wa, lá nə, Ba-Yígúrə́-Jə-Tiu yáá con. Yá ba dàń twɛ́n dun nʋga* Davidə yuu wa, ba tún wá, sə ʋ ya Yɩzərayɛlə mama pɩ̀ʋ́, ndə Yɩɩ yà nə twá də Samiyɛlə, ʋ ma swɩ̀n kʋ nətʋ.Davidə jon Zwerizalɛmə, ʋ ma fwa ʋ payuu tɩʋ
4 Pɩ̀ʋ́ Davidə də Yɩzərayɛlə kwatara tə mama vəli, ba pú Zwerizalɛmə, kʋ yɩrɩ yà nə yɩ Yebusə ba kə, ba tɛ Yebusə tɩ̀án tə, ba yà nə wulə kʋ lʋʋ nii tə wa. 5 Yá Yebusə tɩ̀án tə swɩ̀n Davidə con, ba wʋ́: «N ba nə tɩʋ tə wa zwɩ.» Yá də kʋ mɛ, Davidə tə ta tɩʋ tə dɩ̀àn dəkuu bwálɩ́ tə, ba nə boŋə “Siyon”, ʋ jon. Yá ba dàń dɩga kʋ bwálɩ́ təntə yɩrɩ, “Davidə sadiyuu.” 6 Davidə swɩ̀n kʋ dɩɩn tə nə, ʋ wʋ́: «Lìù tə mama, ʋ nə wá ya təntən ʋ ta Yebusə tɩ̀án tə, kʋ tíú nə wá ya kwatara yáá tíú. Zʋabə, ʋ nə yɩ Davidə nakʋa Seruya bìú nə yɩn təntən lìù ʋ ta ba, yá ʋ dàń jìgə̀ kwatara yáá tíú. 7 Davidə dàń jɩn tɩʋ tə dɩ̀àn dəkuu bwálɩ́ tə, ʋ ma fwa ʋ sàń. Kʋ mʋ̀ nə pɩn ba boŋə kʋ “Davidə sadiyuu”. 8 Kʋ kwa nə, ʋ tə pɩn ba lwà sànɩ́ duən, ba ma kɩkarɩ ʋ sàń tə, kʋ nə zɩgɩ Milo dədolu tə nə, kʋ ja zʋ tɩʋ tə wa. Yá Zʋabə dàń pìí ʋ lwà tɩʋ tə gɩganɩ tə. 9 Ba-Yígúrə́-Jə-Tiu, ʋ nə yɩ kwatara Yɩɩ, yà wulə də Davidə, yá ʋ dɩ̀àn dàń súrí wuuu.
Pɩ̀ʋ́ Davidə kwatara babɩran tə yoo
10 Á nəŋə Davidə kwatara babɩran tə, də Yɩzərayɛlə lɩ̀à tə mama, ba nə san wá ʋ pàrɩ̀ tə máŋá wa. Ba tún wá, sə ʋ ya pɩ̀ʋ́ ndə Ba-Yígúrə́-Jə-Tiu yà nə kàn nii nətʋ, ʋ pa Yɩzərayɛlə lɩ̀à tə nə. 11 Á nəŋə Davidə kwatara babɩran tə yɩra nə: Kʋ yɩ Yaswobeyamə, ʋ nə yɩ Hakəmoni bìú. Ʋ yà yɩ kwatara babɩran batwa yáá tíú. Mə ʋ mʋ̀ nə gʋa lɩ̀à biətwa də ʋ cwiin, dɩɩn nədʋ kʋ̀ʋ̀ wa. 12 Yaswobeyamə kwa nə, Eleyazarə ʋ nə yɩ Dodo bìú, ʋ ga yɩ Ahʋa dwíí tíú, nə daa lá. Ʋ yɩn kwatara babɩran batwa tə wa. 13 Ʋ yɩn də Davidə Pasə-Damimə nə, máŋá tə wa, Filisi tɩ̀án tə nə twi ba kun duən nə, sə ba ta Yɩzərayɛlə lɩ̀à tə. Kʋ máŋá tə wa, Yɩzərayɛlə lɩ̀à tə duən tə mama yà dəri Filisi tɩ̀án tə yáá nə. Dipɛn mɩna yiri don kárá yà wulə là. 14 Ba zɩgɩ yɩɩ nə kárá tə titəŋi wa, ba jon ka, ba ga gʋ Filisi tɩ̀án tə. Yá Ba-Yígúrə́-Jə-Tiu pɩn Yɩzərayɛlə lɩ̀à də́ dɩ̀àn zənzən.
15 Dɩɩn don nə, Davidə kwatara babɩran fɩtwa tə wa lɩ̀à batwa twá duən, ba bà ʋ con, Adulamə paan bʋʋ tə wa. Yá Filisi tɩ̀án púlí don yà kun duən nə, Refayimə vara tə wa. 16 Davidə dàń yà wulə dɩ̀àn dəkuu bwálɩ́ təntə wa. Kʋ máŋá tə wa, də Filisi tɩ̀án púlí don də yà wulə Bɛtəleyɛmə nə. 17 Davidə dàń swɩ̀n won don yoo, kʋ fɩra nə jə wá, ʋ wʋ́: «Wàà nə wá va ʋ tan nɩ́á, nɩ́á gwàlʋ́* tə wa, kʋ də̀ń nə lu, kʋ nə wulə Bɛtəleyɛmə mimii tə yáá nə, ʋ ja bà, ʋ pa nə, sə à nyʋn?» 18 Kwatara babɩran batwa tə ma zàn, ba va ba tʋn dɩ̀àn Filisi tɩ̀án púlí tə yɩra, ba ga tan nɩ́á tə, nɩ́á gwàlʋ́ tə wa, kʋ də̀ń nə lu, kʋ nə wulə Bɛtəleyɛmə mimii tə yáá nə, ba ja bà, ba pa Davidə nə. Yá ʋ vɩga sə ʋ nyʋn nɩ́á tə. Ʋ tì tə ʋ lwá tɩa, ʋ pa Ba-Yígúrə́-Jə-Tiu nə. 19 Ʋ swɩ̀n, ʋ wʋ́: «À tíú Yɩɩ wá cɩ̀, sə à nyʋn nɩ́á tə tə! Tə yɩ ndə bara batwa ba tə jana nə. Kʋ yɩ ba mɩɩ nə ba dʋgʋ, ba ma va ba tan tə.» Yá Davidə dàń vɩga sə ʋ nyʋn nɩ́á təntə. Mə yoo təntə nə, kwatara babɩran batwa təntə tʋn. 20 Abiswayi, ʋ nə yɩ Zʋabə nubiu, yà nə yɩ kwatara babɩran batwa tə yáá tíú. Mə ʋ mʋ̀ nə ja ʋ cwiin, ʋ ma gʋ lɩ̀à biətwa, dɩɩn nədʋ kʋ̀ʋ̀ wa. Yá kʋ dàń pɩn, ʋ yɩrɩ nan kwatara babɩran batwa tə wa. 21 Ba kwatara babɩran batwa tə wa, Abiswayi nɩ dun zənzən, ʋ doni ba duən tə, kʋ pa ʋ mʋ̀ nə jì ba yuu tíú. Yá ʋ dun dàń nə wà kwatara babɩran batwa tə yí.
22 Yehoyada bìú Benaya nɩbɛɛ yɩn kwatarʋ babɩʋ, ʋ ga də́ dɩ̀àn zənzən. Benaya yà yɩ Kabəseyɛlə tíú. Mə ʋ mʋ̀ nə gʋa Mʋabə tɩ̀án kwatara babɩran bələ tə. Mə ʋ mʋ̀ dɩɩn nə cúə́ nɩ́á gwàlʋ́ kʋ də̀ń nə lu wa, ʋ gʋ gəru, waran fìú máŋá wa. 23 Yá ʋ mʋ̀ tə nə gʋa Ezwipətə tɩ̀án badarʋ don, ʋ danɩ nə yí jɩvaŋɩ yíə́ bonu, ʋ yà nə yɩ kwatarʋ babɩʋ cɩ́gá cɩ́gá. Ezwipətə tíú təntə yà jə cwiin ʋ jɩɩn wa, kʋ cuni nə yí gantwasʋra kʋnkwalɩ, Benaya ga va ʋ nə də dàʋ̀. Ʋ jon Ezwipətə tíú tə cwiin tə, ʋ viviri ʋ ma zwa wá ʋ gʋ. 24 Mə yìə̀n təntə nə, Yehoyada bìú Benaya tʋn, kʋ pa ʋ yɩrɩ nan kwatara babɩran batwa tə wa. 25 Ʋ nɩ dun zənzən, ʋ doni ʋ duən tə mama, kwatara babɩran fɩtwa tə wa. Yá ʋ dun dàń nə wà kwatara babɩran batwa tə yí. Yá Davidə dàń tún wá, sə ʋ ya púlí tə, kʋ nə cɩ̀ ʋ nə tə yuu tíú. 26 Nə̀ń kwatara babɩran tə duən tə yɩra: Kʋ yɩ Zʋabə nubiu Asayɛlə, də Dodo bìú Eləhanan ʋ yɩ Bɛtəleyɛmə tíú, 27 Də Swamɔtə, ʋ nə yɩ Harɔrə tíú, də Elɛsə, ʋ nə yɩ Palon tíú. 28 Də Yikɛswə bìú Yira, ʋ nə yɩ Tekʋa tíú, də Abiyezɛrə, ʋ nə yɩ Anatɔtə tíú, 29 də Sibekayi, ʋ nə yɩ Uswa tíú, də Yilayi, ʋ nə yɩ Ahʋa tíú, 30 də Maharayi, ʋ nə yɩ Netofa tíú, də Bana bìú Elɛdə, ʋ də nə yɩ Netofa tíú, 31 də Ribayi bìú Yitayi, ʋ nə yɩ Gibeya tíú, Bɛnzwamɛn nagwanaa tə wa, də Benaya, ʋ nə yɩ Piraton tíú, 32 də Urayi, ʋ nə nan Gaswə nacorən tə vàn con, də Abɩyɛlə, ʋ nə yɩ Araba tíú, 33 də Azəmavɛtə, ʋ nə yɩ Bahurimə tíú, də Eliyaba, ʋ nə yɩ Swaləbon tíú, 34 də Haswɛmə bɩ̀á tə, ba nə yɩ Gizon tɩ̀án, də Swage bìú Zonatan, ʋ nə yɩ Hararə tíú, 35 də Sakarə bìú Ahɩyamə, ʋ nə yɩ Hararə tíú, də Urə bìú Elifalə, 36 də Efɛrə, ʋ nə yɩ Mekera tíú, də Ahɩya, ʋ nə yɩ Palon tíú, 37 də Ɛsəro, ʋ nə yɩ Karəmɛlə tíú, də Ɛzəbayi bìú Narayi, 38 də Natan nubiu Zʋwɛlə, də Hagəri bìú Mibəharə, 39 də Selɛkə, ʋ nə yɩ Amon dwíí, də Narayi, ʋ nə yɩ Berɔtə tíú, ʋ yà nə zɩŋa Davidə nakʋa Seruya bìú Zʋabə kwatarɩ zɩla, 40 də Yɩra ʋ nə yɩ Yetɛrə dwíí, də Garɛbə, ʋ də nə yɩ Yetɛrə dwíí, 41 də Uri, ʋ nə yɩ Ɛtə dwíí, də Alayi bìú Zabadə, 42 də Swiza bìú Adɩna, ʋ nə yɩ Ribɛn dwíí tə yáá tíú, də kwatara fɩtwa ba nə kwé wá, 43 də Maaka bìú Hanan, də Zʋzafatə, ʋ nə yɩ Metɛnə tíú, 44 də Uzɩa, ʋ nə yɩ Aswətarɔtə tíú, də Hotamə bɩ̀á Swama də Yehiyɛlə, ba nə yɩ Aroyɛrə tɩ̀án, 45 də Swiməri bìú Yediyayɛlə, də ʋ nubiu Yoha, ʋ nə yɩ Tisə tíú, 46 də Eliyɛlə, ʋ nə yɩ Mahava tíú, də Yeribayi, də Ɛlənamə bìú Yoswavɩa, də Yitəma, ʋ nə yɩ Mʋabə lʋʋ nii lìù, 47 də Eliyɛlə, də Obɛdə, də Yasɩyɛlə, ba nə yɩ Soba tɩ̀án.