Davidə talɩkwa sʋ̀ràn
23
1 À nəŋə Davidə talɩkwa sʋ̀ràn:Á cʋga Yɩzayi bìú Davidə nii sʋgʋ.
Kʋ yɩ bɛɛ tə, Yɩɩ nə ken dun bwálɩ́ nə, nii sʋgʋ.
Kʋ yɩ pɩ̀ʋ́ tə, Zwakɔbə Yɩɩ tə nə kúrí*, nii sʋgʋ.
Ʋ sʋgʋ təntə nə yɩ Yɩzərayɛlə lɩ̀à gwaran, ba nə swə zənzən.
2 Ba-Yígúrə́-Jə-Tiu Siŋu tə twá də nə, kʋ ma swɩ̀n.
Yá ʋ sʋgʋ tə wulə à nii wa.
3 Yɩzərayɛlə lɩ̀à Yɩɩ tə swɩ̀n.
Ʋ mʋ̀ Yɩɩ tə, ʋ nə cɩ̀ Yɩzərayɛlə lɩ̀à nə, ndə pɩ̀ʋ̀ nə tə,
swɩ̀n à con də,
lìù tə nə də́ pàrɩ̀ ləzoni yuu wa,
kʋ twá cɩ́gá nə, ndə kʋ nə mɛ nətʋ,
Ʋ yɩ ndə yɩcaʋ nə pɛ́n jɩjʋ nə,
dɩɩn tə nə, bakwan nə tə̀lə́.
Kʋ yàá twá də yɩcaʋ lɩŋɩ, də dwà nɩ́á,
vʋran ma pɛ́n tɩa yuu wa.
5 Kʋ tà nətʋ nə Yɩɩ tʋŋa à dìə̀ tə yɩra naaa?
Cɩ́gá, Yɩɩ tún nimarʋ à də wá pwə́rə́ wa,
kʋ nə ba zwɛ̀.
Ʋ tún coŋi, sə à twá tə nə,
sə nimarʋ təntə wànɩ́ kʋ ya lá wuuu.
Ʋ pɩn à də́ dɩ̀àn yoo mama yuu wa,
ʋ ga pɩn nə won tə mama, à nə pɩ̀à.
6 Yá wʋlʋnyɩna tə mʋ̀ mama yɩ ndə casʋran nə,
ba nə za ba dʋga.
Lìù mama ba tə yɩra janɩ, də ʋ jɩɩn.
7 Lìù nə pɩ̀à, sə ʋ dwen tə yɩra,
ʋ yàá tì lugu, nə à yə̀ə́ dàʋ̀,
ʋ ma kə tə duən nə, ʋ sʋ̀rɩ́ bwálɩ́ nədʋ wa.
Pɩ̀ʋ́ Davidə kwatara babɩran tə yoo
8 Á nəŋə Davidə kwatara babɩran tə yɩra nə: Yoswɛbə-Baswebɛtə, ʋ nə yɩ Takəmoni bìú, yà yɩ kwatara babɩran batwa yáá tíú. Ʋ yɩrɩ don nə yɩ Adino Ɛsənitə. Mə ʋ mʋ̀ nə gʋa lɩ̀à biənana də ʋ cwiin, dɩɩn nədʋ kʋ̀ʋ̀ wa.
9 Yoswɛbə-Baswebɛtə kwa nə, Eleyazarə ʋ nə yɩ Dodo bìú, ʋ ga yɩ Ahʋa dwíí tíú, nə daa lá. Ʋ yɩn kwatara babɩran batwa tə wa, ba də Davidə nə dí babarɩ Filisi tɩ̀án tə yuu wa, ba nə twi ba kun duən nə, sə ba ta Yɩzərayɛlə lɩ̀à tə. Kʋ máŋá tə wa, Yɩzərayɛlə lɩ̀à tə duən tə mama yà dəri, ba dɩ̀ pɛɛn tə yuu wa. 10 Yá Eleyazarə mʋ̀ zɩgɩ, ʋ gʋ Filisi tɩ̀án tə wuuu, ʋ jɩɩn kori kʋ kʋ̀, kʋ marɩ ʋ sɩ̀ʋ́ tə sɩtəli nə. Yá Ba-Yígúrə́-Jə-Tiu pɩn Yɩzərayɛlə lɩ̀à də́ dɩ̀àn zənzən, kʋ dɩɩn tə nə. Kʋ kwa nə, Yɩzərayɛlə lɩ̀à tə pìí ba bà Eleyazarə con. Yá kʋ dàń nə yɩn dʋŋa tə ʋ nə gʋa, zɩla tə cɩcɩ nə ba twi ba pɛ̀.
11 Eleyazarə kwa nə, Swama, ʋ nə yɩ Age bìú, nə daa lá. Age yɩ Ararə tíú. Filisi tɩ̀án tə yà kʋ́ʋ̀ kun duən nə, Lehi nə. Swə̀nə̀ kárá yà wulə kʋ bwálɩ́ tə wa. Yɩzərayɛlə lɩ̀à tə yà dəri Filisi tɩ̀án tə yáá nə. 12 Yá Swama mʋ̀ zàn, ʋ zɩgɩ yɩɩ nə swə̀nə̀ kárá tə titəŋi wa, ʋ jon ka, ʋ ga gʋ Filisi tɩ̀án tə. Yá Ba-Yígúrə́-Jə-Tiu pɩn Yɩzərayɛlə lɩ̀à də́ dɩ̀àn zənzən.
13 Dɩɩn don nə, Davidə kwatara babɩran fɩtwa tə wa lɩ̀à batwa twá duən, ba bà ʋ con, Adulamə paan bʋʋ tə wa. Kʋ yɩn woceri máŋá wa. Yá Filisi tɩ̀án púlí don yà kun duən nə, Refayimə vara tə wa. 14 Davidə dàń yà wulə dɩ̀àn dəkuu bwálɩ́ təntə wa. Kʋ máŋá tə wa, də Filisi tɩ̀án púlí don də yà wulə Bɛtəleyɛmə nə.
15 Davidə dàń swɩ̀n won don yoo, kʋ fɩra nə jə wá, ʋ wʋ́: «Wàà nə wá va, ʋ tan nɩ́á, nɩ́á gwàlʋ́* tə wa, kʋ də̀ń nə lu, kʋ nə wulə Bɛtəleyɛmə mimii tə yáá nə, ʋ ja bà, ʋ pa nə, sə à nyʋn?» 16 Kwatara babɩran batwa tə ma zàn, ba va ba tʋn dɩ̀àn Filisi tɩ̀án púlí tə yɩra, ba ga tan nɩ́á tə, nɩ́á gwàlʋ́ tə wa, kʋ nə wulə Bɛtəleyɛmə mimii tə yáá nə, ba ja bà, ba pa Davidə nə. Yá ʋ vɩga sə ʋ nyʋn nɩ́á tə. Ʋ tì tə ʋ lwa tɩa, ʋ pa Ba-Yígúrə́-Jə-Tiu nə. 17 Ʋ swɩ̀n, ʋ wʋ́: «Yɩɩ wá cɩ̀, sə à nyʋn nɩ́á tə tə! Tə yɩ ndə bara batwa ba tə jana nə. Kʋ yɩ ba mɩɩ nə ba dʋgʋ, ba ma va ba tan tə.» Yá Davidə dàń vɩga, sə ʋ nyʋn nɩ́á təntə. Mə yoo təntə nə, kwatara babɩran batwa təntə tʋn.
18 Seruya bìú Abiswayi, ʋ nə yɩ Zʋabə nubiu, yà nə yɩ kwatara babɩran batwa təntə yáá tíú. Mə ʋ mʋ̀ nə ja ʋ cwiin, ʋ ma gʋ lɩ̀à biətwa, dɩɩn nədʋ kʋ̀ʋ̀ wa. Yá kʋ dàń pɩn, ʋ yɩrɩ nan kwatara babɩran batwa tə wa. 19 Ba kwatara babɩran batwa tə wa, Abiswayi nɩ dun, ʋ doni ba duən tə, kʋ pa ʋ mʋ̀ nə jì ba yuu tíú. Yá ʋ dun dàń nə wà kwatara babɩran batwa tə duən tə yí.
20 Yehoyada bìú Benaya nɩbɛɛ yɩn kwatarʋ babɩʋ, ʋ ga də́ dɩ̀àn zənzən. Benaya yà yɩ Kabəseyɛlə tíú. Mə ʋ mʋ̀ nə gʋa Mʋabə tɩ̀án kwatara babɩran bələ tə. Mə ʋ mʋ̀ dɩɩn nə cúə́ nɩ́á gwàlʋ́, kʋ də̀ń nə lu wa, ʋ gʋ gəru, waran fìú máŋá wa. 21 Yá ʋ mʋ̀ tə nə gʋa Ezwipətə tɩ̀án badarʋ don, ʋ yà nə yɩ kwatarʋ babɩʋ cɩ́gá cɩ́gá. Ezwipətə tíú təntə yà jə cwiin ʋ jɩɩn wa, Benaya ga va ʋ nə də dàʋ̀. Ʋ jon Ezwipətə tíú tə cwiin tə, ʋ viviri ʋ ma zwa wá ʋ gʋ. 22 Mə yìə̀n təntə nə, Yehoyada bìú Benaya tʋn, kʋ pa ʋ yɩrɩ nan kwatara babɩran batwa tə wa. 23 Ʋ nɩ dun zənzən, ʋ doni ʋ duən tə mama, kwatara babɩran fɩtwa tə wa. Yá ʋ dun tə wà kwatara babɩran batwa tə duən tə yí. Yá Davidə dàń tún wá, sə ʋ ya púlí tə, kʋ nə cɩ̀ ʋ nə tə yuu tíú.
24 Zʋabə nubiu Asayɛlə də yà wulə kwatara babɩran fɩtwa tə wa, kʋ dàń súrí Dodo bìú Eləhanan nə, ʋ nə yɩ Bɛtəleyɛmə tíú, 25 də Swama, də Elika, ba nə yɩ Harɔdə tɩ̀án, 26 də Elɛsə, ʋ nə yɩ Pelɛtə tíú, də Yikɛswə bìú Yira, ʋ nə yɩ Tekʋa tíú, 27 də Abiyezɛrə, ʋ nə yɩ Anatɔtə tíú, də Mebunayi, ʋ nə yɩ Uswa tíú, 28 də Saləmon, ʋ nə yɩ Ahʋa tíú, də Maharayi, ʋ nə yɩ Netofa tíú, 29 də Bana bìú Elɛbə, ʋ də nə yɩ Netofa tíú, də Ribayi bìú Yitayi, ʋ nə yɩ Gibeya tíú, Bɛnzwamɛn nagwanaa tə wa, 30 də Benayahu, ʋ nə yɩ Piraton tíú, də Hidayi, ʋ nə nan Gaswə nacorən tə vàn con, 31 də Abi-Aləbon, ʋ nə yɩ Araba tíú, də Azəmavɛtə, ʋ nə yɩ Bahurimə tíú, 32 də Eliyaba, ʋ nə yɩ Swaləbon tíú, də Yaswɛnə bɩ̀á tə, də Zonatan, 33 də Swama, ʋ nə yɩ Hararə tíú, də Swararə bìú Ahɩyamə, ʋ nə yɩ Ararə tíú, 34 də Ahasəbayi bìú Elifelɛtə, ʋ nə yɩ Maaka tɩ̀án bɛɛ don nàʋ́, də Ahitofɛlə bìú Eliyamə, ʋ nə yɩ Gilo tíú, 35 də Ɛsərayi, ʋ nə yɩ Karəmɛlə tíú, də Parayi ʋ nə yɩ Arabə tíú, 36 də Natan bìú Yigeyalə, ʋ nə yɩ Soba tíú, də Bani, ʋ nə yɩ Gadə dwíí, 37 də Selɛkə, ʋ nə yɩ Amon dwíí, də Narayi, ʋ nə yɩ Berɔtə tíú, ʋ yà nə zɩŋa Davidə nakʋa Seruya bìú Zʋabə kwatarɩ zɩla, 38 də Yira, də Garɛbə, ba nə yɩ Yetɛrə dwíí tɩ̀án, 39 də Uri, ʋ nə yɩ Ɛtə dwíí. Ba mama yà yɩ lɩ̀à fɩtwa də barpɛ.