Kwatara tə, ba nə twi Davidə con Sikəlagə nə
12
1 Nə̀ń lɩ̀à tə, ba nə vəli Davidə con Sikəlagə nə, máŋá tə wa, ʋ nə səgə yiŋʋnɩ Kiswə bìú Sayulə yáá nə. Ba yà wulə kwatara babɩran tə wa, ba nə san wá kʋ̀ʋ̀ tə máŋá wa. 2 Ba yà yɩ catara, ba nə wàá cɩan ba tɛ, də ba jɩzən, də ba jɩgwiə, ba ga wàá kapadɩlʋ ba ma dɩlɩ kapana, də ba jɩzən, də ba jɩgwiə. Nə̀ń ba tə nə nan Bɛnzwamɛn dwíí wa, ba ga yɩ Sayulə tətə dwíí tɩ̀án: 3 Kʋ yɩn Ahiyezɛrə, ʋ yà nə yɩ ba yáá tíú, də ʋ nubiu Zʋasə, ba nyɩna Swema nə yɩ Gibeya tíú, də Yeziyɛlə də Pelɛtə, ba nə yɩ Azəmavɛtə bɩ̀á, də Beraka, də Zwehu, ʋ nə yɩ Anatɔtə tíú, 4 də Yiswemaya, ʋ nə yɩ Gabawon tíú, ʋ yà yɩ kwatarʋ babɩʋ, kwatara babɩran fɩtwa tə wa, ʋ mʋ̀ ga yà nə yɩ ba yáá tíú, 5 də Zweremi, də Yaziyɛlə, də Yohanan, də Yozabadə, ʋ nə yɩ Gedera tíú, 6 də Eluzayi, də Yerimɔtə, də Beyalɩa, də Swemarɩa, də Swefatɩa, ʋ nə yɩ Harufə tíú, 7 də Ɛləkana, də Yɩswɩya, də Azarəyɛlə, də Yowezɛrə, də Yaswobeyamə, ba nə yɩ Kore dwíí, 8 də Yerohamə bɩ̀á Yowela də Zebadɩa. Yerohamə yɩ Gedɔrə tíú.9 Kwatara babɩran nan Gadə dwíí tə wa, ba va Davidə con, bwálɩ́ tə wa ʋ nə səgə, kasɔɔ lanworu tə wa. Ba yà yɩ kwatara, ba nə ta kʋ̀ʋ̀ ba mɩ̀n. Ba nə jə natanan nəfaran də cwiən. Ba waa yà dà ndə gərən nə, ba nɛɛ ga lɩŋa pɛɛn yuu wa, ndə feli nə. 10 Ezɛrə yà nə yɩ ba yáá tíú, bələ nii lìù yɩ Abədiyasə, batwa nii lìù yɩ Eliyabə, 11 banɩa nii lìù nə yɩ Miswemana, bonu nii lìù nə yɩ Zweremi, 12 bardʋ nii lìù nə yɩ Atayi, barpɛ nii lìù nə yɩ Eliyɛlə, 13 nana nii lìù nə yɩ Yohanan, nʋgʋ nii lìù nə yɩ Ɛləzabadə, 14 fugə nii lìù nə yɩ Zweremi, fugə nədʋ nii lìù nə yɩ Makəbanayi. 15 Ba yà yɩ Gadə dwíí, ba nə yɩ kwatara yáá tɩ̀án. Ba wa nəmaa tətə dɩ̀àn yà yí kwatara bíí, yá lìù tə ʋ nə dwə ba mama dɩ̀àn yà yí kwatara mʋ̀rʋ̀. 16 Mə ba mʋ̀ nə bɩn Zʋrədɛn mʋnaa tə, bɩnɩ tə təntən cànà tə wa, máŋá tə wa, ka nə súə́ ka palɩ, ba ga dɩŋɩ lɩ̀à tə mama, ba yà nə wulə vara tə nii nə, yɩɩ yipɩan con, də yɩɩ yizwɩa con.
17 Bɛnzwamɛn dwíí tə, də Zwida dwíí tə lɩ̀à də vəli Davidə con, ʋ yisəgə bwálɩ́ tə wa. 18 Davidə nan ʋ jəri ba, ʋ ga swɩ̀n ba con, ʋ wʋ́: «Á nə yɩ á bɩ̀àn à con də bɩcan sìə́, sə á san nə, à də wá jon aba, də à bɩcan mama. Yá kʋ dàń nə yɩ á pɩ̀à á gɩgarɩ nə, á ja á pa à jarɩduən nə, à jɩɩn ga wà yolwan tʋn, nə nɩbara-ba Yɩɩ tə na kʋ nətʋ tə, ʋ mʋ̀ ga nə wá bʋ̀rɩ̀ nə bʋra.»
19 Yɩɩ-Siŋu tə dàń ma cú ba yáá tíú Amasayi yuu wa, ʋ ga swɩ̀n, ʋ wʋ́:
«Nə yɩ n mʋ̀ Davidə lɩ̀à,
nə nii wulə n mʋ̀ Yɩzayia bìú tə kwa.
Yɩɩ wá pa mʋ́ sìə́ də sìə́,
ʋ ga pa sìə́ lɩ̀à tə nə, ba nə saŋa
mʋ́! Cɩ́gá, n Yɩɩ tə san mʋ́.»
Davidə ma jon ba, ʋ kə kwatara yáá tɩ̀án tə wa.
20 Manase dwíí tə lɩ̀à nan, ba zʋ Davidə kwatara tə wa, máŋá tə wa, ʋ də Filisi tɩ̀án tə nə vəli, sə ba ta kʋ̀ʋ̀ də Sayulə. Yá Davidə də ʋ kwatara tə dàń nə wà Filisi tɩ̀án tə nə san. Cɩ́gá, Filisi tɩ̀án tə vʋrɩ duən nə, ba ga pa Davidə pìí ba kwa. Ba yà swɩ̀n, ba wʋ́: «Davidə wá goŋə nə yun, sə ʋ də ʋ yuu tíú Sayulə ma pìí ba kə duən yuu! 21 Máŋá tə wa, Davidə nə pìí ʋ vələ Sikəlagə, Manase dwíí tə lɩ̀à duən twá ʋ kwatara púlí tə nə. Ba mʋ̀ nə yɩ Adəna, də Yozabadə, də Yediyayɛlə, də Mikayɛlə, də Yozabadə, də Elihu, də Silətayi, ba nə yɩ Manase kwatara púlə́ tə yáá tɩ̀án. 22 Ba mama yà yɩ kwatara babɩran, ba nə twi ba saŋa Davidə kwatara púlí tə nə. Yá ba dàń jìgə̀ ʋ kwatara púlí tə yáá tɩ̀án.
23 Dɩɩn mama bara yà twi Davidə con, sə ba san wá. Kʋ nətʋ dàń pɩn ʋ kwatara púlí tə pùlì zənzən.b
Kwatara tə nii ba nə twi Davidə con Ebəron nə
24 Nə̀ń kwatara tə nii, ba nə twi Davidə con Ebəron nə, sə ba pa ʋ də́ Sayulə pàrɩ̀ tə, ndə Ba-Yígúrə́-Jə-Tiu nə pɩn nii, sə kʋ tʋn nətʋ.
25 Zwida dwíí kwatara tə, ba nə jə natanan nəfaran də cwiən, yà yɩ bara 6 800, ba nə jə kwatarɩ zɩla. 26 Simeyon dwíí tə wa, kʋ yɩn kwatara babɩran 7 100.
27 Levi dwíí tə wa, kʋ yɩn kwatara babɩran 4 600. 28 Kʋ dàń súrí Aron dwíí tə kwatara yáá tíú Yehoyada nə, kwatara 3 700 nə kwé wá. 29 Kʋ tə súrí Sadɔkə nə, ʋ nə yɩ ləzwəndʋn, ʋ ga yɩ kwatarʋ babɩʋ, də ʋ tətə dìə̀ tə yáá tɩ̀án sapʋa də bələ.
30 Bɛnzwamɛn dwíí tə wa, kʋ nə yɩ Sayulə dwíí, kʋ yɩn kwatara 3 000, ba zʋnɩ yà nə tə tʋŋa ba pɩn Sayulə dìə̀ tə nə.
31 Efərayimə dwíí tə wa, kʋ yɩn kwatara babɩran 20 800, ba mama yɩrɩ nə nan ba dwíə́ tə wa. 32 Manase dwíí faan tə wa, kʋ yɩn kwatara 18 000, ba nə taa kʋ yɩrɩ ba kúrí, sə ba va ba tún Davidə sə ʋ ya pɩ̀ʋ́.
33 Yɩsakarə dwíí tə wa, kʋ yɩn yun tɩ̀án 200, ba nə ja pwárʋ́ ba ma lwarɩ máŋá tə, də nətʋ tə Yɩzərayɛlə lɩ̀à nə mɛ sə ba tʋn yoo, kʋ dàń súrí ba nubɩa tə mama nə, ba nə zìlí ba nii.
34 Zabulon dwíí tə wa, kʋ yɩn kwatara 50 000, ba nə tanɩ ba tɩ̀án, sə ba ta kʋ̀ʋ̀ də kwatarɩ zɩla tə mama, sə ba ga ja nii nədʋ kʋ̀ʋ̀ wa.
35 Nɛfətali dwíí tə wa, kʋ yɩn yun tɩ̀án 1 000, də kwatara 37 000 ba nə jə natanan nəfaran, də cwiən.
36 Dan dwíí tə wa, kʋ yɩn kwatara 28 600, ba nə tanɩ ba tɩ̀án, sə ba ta kʋ̀ʋ̀.
37 Aswɛrə dwíí tə wa, kʋ yɩn kwatara 40 000, ba nə tanɩ ba tɩ̀àn, sə ba ta kʋ̀ʋ̀.
38 Zʋrədɛn mʋnaa tə kwa con, kʋ yɩn Ribɛn dwíí tə, də Gadə dwíí tə, də Manase dwíí tə faan kwatara 120 000, ba nə jə kwatarɩ zɩla mama, sə ba ma ta kʋ̀ʋ̀.
39 Kwatara təntə mama ba nə tanɩ ba tɩ̀àn, sə ba ta kʋ̀ʋ̀, twi Davidə con Ebəron nə, də bɩcan nədʋ, sə ba tún wá, sə ʋ ya Yɩzərayɛlə payuu pɩ̀ʋ́. Kʋ yɩn də bɩcan nədʋ Yɩzərayɛlə lɩ̀à tə mama ma tún Davidə pàrɩ̀ tə yuu wa. 40 Ba dàń yɩn Davidə con dɩan batwa, ba də́ də ba nywɩn kʋ tə, ba nubɩa Ebəron tɩ̀án tə yà nə tanɩ ba pa ba. 41 Kʋ tə nə súrí lá, Yɩsakarə dwíí tə, də Zabulon dwíí tə, də Nɛfətali dwíí tə, ba nə wulə nagwanaa tə wa ja bɩnɛ, də nyʋgʋmɛ, də bɩnasəsen, də nɩan, ba ma zɩn wodirən ba ja bà. Wodirən təntə yɩn mun, də kapɩra ba nə cili ba kə duən nə, tə kʋ̀, də divɛn tɩ̀án bɩ̀á, ba nə cili ba kə duən nə, tə kʋ̀, də divɛn, də nʋga, də vanfaran, də vanmɩnɩ tə nə dáá. Cɩ́gá, Yɩzərayɛlə lɩ̀à mama yà wulə pupwən wa.