Davidə ken siri, sə ʋ ja Yɩɩ nimarʋ culu daka tə ʋ bà Zwerizalɛmə
13
1 Davidə vʋrɩ də kwatara mʋ̀rʋ̀ yáá tɩ̀án tə, də kwatara bíí yáá tɩ̀án tə, də yáá tɩ̀án tə duən tə mama. 2 Kʋ kwa nə, ʋ swɩ̀n Yɩzərayɛlə lɩ̀à púlí tə mama con, ʋ wʋ́: «Də á nə na də kʋ ziən, kʋ ga yɩ kʋ nan Ba-Yígúrə́-Jə-Tiu con, ʋ nə yɩ nə Yɩɩ, sə nə tʋn lɩ̀à nə nubɩa tə con, Yɩzərayɛlə lʋʋ nii tə bwálɩ́ mama wa, də Yɩɩ joŋwana tə con, də Levi dwíí tə con, ba nə wulə ba tɩan tə nii nə, sə ba bà nə con. 3 Nə dàń wá pìí nə ja nə Yɩɩ nimarʋ culu daka tə nə bà nə con. Cɩ́gá, nə wà ka con tan Sayulə máŋá tə wa.»4 Lalʋʋ tə mama swɩ̀n də kʋ mɛ sə ba tʋn kʋ nətʋ tə. Cɩ́gá, kʋ yoo tə twá lalʋʋ tə mama fɩra nə. 5 Davidə ken Yɩzərayɛlə lɩ̀à tə mama duən yáá, kʋ nə zɩgɩ Ezwipətə sɩswɩan tə nə, jɩgwiə saparʋ yuu, kʋ va kʋ yí Hamatə nii nə, jɩzən saparʋ yuu, sə ʋ pa ba ja Yɩɩ nimarʋ culu daka tə, ba nan Kiriyatə-Yarimə, ba bà. 6 Davidə də Yɩzərayɛlə lɩ̀à tə mama vəli Baala, kʋ yɩrɩ don nə yɩ Kiriyatə-Yarimə, kʋ nə wulə Zwida lʋʋ nii tə wa, sə ba tì Yɩɩ tə ʋ nə yɩ Ba-Yígúrə́-Jə-Tiu nimarʋ culu daka tə. Ʋ mʋ̀ nə jə̀ə́ Yɩɩ sàń wonəŋə nyɩnyɩga* titəŋi wa, daka tə yuu wa. Mə lá nə ba boŋə ba kəni ʋ yɩrɩ tə nə. 7 Ba vəli ba tì Yɩɩ nimarʋ culu daka tə, Abinadabə dìə̀ wa, ba kə nɩan kòrù nədʋn wa. Uza də Ahiyo yà nə kəni nɩan kòrù tə cwəŋə nə. 8 Davidə də Yɩzərayɛlə lɩ̀à tə mama dàń yà ken gwaran də banan, də kwanan, də gungwɛn, də zɩnzɩran, də nabwanan, ba ma bwɩ Yɩɩ nə, də ba dɩ̀àn mama, Yɩɩ nimarʋ culu daka tə yáá con. 9 Máŋá tə, ba nə vəli ba yí Kidon tʋa tə, nɩan tə yà pɩ̀à tə gwìń Yɩɩ nimarʋ culu daka tə, tə dɩ. Uza ma kwé ka də ʋ jɩɩn. 10 Yá Ba-Yígúrə́-Jə-Tiu lɩŋa zàn zənzən Uza yuu wa, ʋ ga mà wá kʋ bwálɩ́ tə wa, ʋ nə dwen Yɩɩ nimarʋ culu daka tə nə yɩrɩ. Yá Uza dàń tʋa ʋ tɩ, Yɩɩ nimarʋ culu daka tə yáá con. 11 Davidə pùə́ cʋ̀gʋ̀ zənzən, Uza mɩɩ tə yɩrɩ, Ba-Yígúrə́-Jə-Tiu nə lɩ. Kʋ mʋ̀ nə pɩn ba boŋə kʋ bwálɩ́ tə Perɛsə-Uzaa, də zə̀n mama.
12 Yɩɩ fən zʋa Davidə kʋ dɩɩn tə nə, ʋ ga swɩ̀n, ʋ wʋ́: «À wàrɩ̀ à pɩn Ba-Yígúrə́-Jə-Tiu nimarʋ culu daka tə zwɩ à dìə̀!» 13 Davidə yà kʋ́ʋ̀ ba swə, sə ʋ ja Ba-Yígúrə́-Jə-Tiu nimarʋ culu daka tə ʋ va ʋ sàń, Davidə sadiyuu tə wa. Yá ʋ dàń pɩn ba ja ka, ba va ba tún Obɛdə-Edomə dìə̀ wa, ʋ nə yɩ Gatə tíú. 14 Ba-Yígúrə́-Jə-Tiu nimarʋ culu daka tə yɩn Obɛdə-Edomə dìə̀, ʋ nə yɩ Gatə tíú, cànɩ̀ batwa. Yá Ba-Yígúrə́-Jə-Tiu fwa zəni Obɛdə-Edomə dìə̀ lɩ̀à tə yɩra, də ʋ jɩjə mama yɩra.