Davidə vəli Zwerizalɛmə
14
1 Kʋ máŋá təntə wa, Tirə pɩ̀ʋ́ Yiramə tʋn lɩ̀à pɩ̀ʋ́ Davidə con, də sɩsaban daran, də lɩ̀à ba nə sə̀ dɛɛ, də ba duən, ba nə sə̀ kapana, ʋ pa ba lwà pɩ̀ʋ́ dìə̀, ba pa Davidə nə. 2 Davidə lwarɩ də Ba-Yígúrə́-Jə-Tiu cɩ́gá nə tún wá, sə ʋ ya Yɩzərayɛlə pɩ̀ʋ́, ʋ ga pa ʋ pàrɩ̀ tə jə dun, Yɩzərayɛlə lɩ̀à tə yɩrɩ, ba nə yɩ ʋ mʋ̀ Ba-Yígúrə́-Jə-Tiu lɩ̀à.Davidə bɩ̀á tə, ʋ nə lɩrɩ Zwerizalɛmə nə
3 Davidə swe kana duən Zwerizalɛmə nə. Yá ʋ də kana təntə də kʋ́ʋ̀ lɩrɩ bibara də bikana. 4 Nə̀ń Davidə bɩ̀á tə, ʋ nə lɩrɩ Zwerizalɛmə nə, yɩra. Kʋ yɩ Swamʋa, də Swobabə, də Natan, də Salʋmʋn, 5 də Yibarə, də Eliswʋa, də Eləpelɛtə, 6 də Noga, də Nefɛgə, də Yafɩya, 7 də Eliswama, də Beliyada, də Elifelɛtə.
Davidə ta Filisi tɩ̀án ʋ də́
8 Filisi tɩ̀án tə nì də, Yɩzərayɛlə lɩ̀à twɛ́n dun nʋga* Davidə yuu wa, sə ʋ ya Yɩzərayɛlə pɩ̀ʋ́. Ba də mama dàń nan ba va, sə ba twarɩ wá. Davidə nì kʋ, yá ʋ dàń vəli sə ʋ jəri ba. 9 Filisi tɩ̀án tə twi ba sú Refayimə vara tə. 10 Davidə bwe Ba-Yígúrə́-Jə-Tiu, ʋ wʋ́: «À mɛ sə à va, à ta Filisi tɩ̀án tə naaa? À nə vəli, n wá pa à də́ dɩ̀àn ba yuu wa naaa?» Yá Ba-Yígúrə́-Jə-Tiu le Davidə, ʋ wʋ́: «Vəli n ta ba! Cɩ́gá, kʋ ba tʋ́tʋ̀ná jə, à wá pa n də́ dɩ̀àn ba yuu wa.» 11 Yá Filisi tɩ̀án tə vəli ba yí Davidə Baalə-Perasiməa nə, yá ʋ ta ba ʋ də́ lá nə. Yá ʋ dàń swɩ̀n, ʋ wʋ́: «Ba-Yígúrə́-Jə-Tiu tún cwəŋə à dʋŋa titəŋi wa, ʋ pa nə, ndə navʋa nə kàrɩ́ kàŋʋ́ nətʋ.» Kʋ mʋ̀ nə pɩn, ba dɩ kʋ bwálɩ́ təntə yɩrɩ, Baalə-Perasimə. 12 Filisi tɩ̀án tə dəri ba yá ba woŋwanan lá nə. Yá Davidə dàń pɩn nii sə ba sʋ̀rɩ́ tə.
13 Kʋ kwa nə, Filisi tɩ̀án tə kʋ́ʋ̀ pìí ba nan ba sú Refayimə vara tə. 14 Davidə bwe Ba-Yígúrə́-Jə-Tiu, yá Ba-Yígúrə́-Jə-Tiu le, ʋ wʋ́: «Dàn ká dɩŋa ba kwa, n ma ta ba, n dàń nə vəli n goŋə ba pún tə yáá con. 15 Máŋá tə n nə nì nɛɛ dwana pún tə yuu con, sə n kə n sírí, n ta ba. Cɩ́gá, kʋ máŋá təntə wa, yəni də, à mʋ̀ Yɩɩ nə nan, sə à ya n yáá, à də́ dɩ̀àn Filisi tɩ̀án kwatara tə yuu wa.» 16 Davidə twá kʋ tə nə, Yɩɩ nə pɩn wá nii, sə ʋ tʋn. Yá ʋ dàń zɩgɩ Gabawon nə, ʋ ta Filisi tɩ̀án tə ʋ də́, ʋ va ʋ yí Gezɛrə. 17 Kʋ nə zɩgɩ kʋ máŋá tə nə, Davidə yɩrɩ nan lʋʋ níə́ tə mama wa. Yá Ba-Yígúrə́-Jə-Tiu dàń pɩn, Davidə fən jə lʋʋ níə́ tə mama.