Davidə kʋ́ʋ̀ tanɩ sə ʋ ja Yɩɩ nimarʋ culu daka tə ʋ bà Zwerizalɛmə
15
1 Davidə pɩn ba lwà dìì Davidə sadiyuu tə wa, ʋ ga tanɩ bwálɩ́, ʋ kə gansili lá, sə Yɩɩ nimarʋ culu daka tə ya lá. 2 Mə kʋ máŋá tə wa nə, Davidə swɩ̀n, ʋ wʋ́: «Yɩɩ nimarʋ culu daka tə yɩ Levi dwíí tə nə mɛ, sə ba zɩn ka. Cɩ́gá, mə ba mʋ̀ nə Ba-Yígúrə́-Jə-Tiu kúrí, sə ba zɩn ʋ nimarʋ culu daka tə, ba ga tʋn ba pa ka, máŋá mama. 3 Davidə ken Yɩzərayɛlə lɩ̀à tə mama duən yáá, Zwerizalɛmə nə, sə ʋ pa ba ja Yɩɩ nimarʋ culu daka tə ba bà, bwálɩ́ tə wa, ʋ nə tanɩ ʋ tún ka yɩrɩ. 4 Ʋ ken Aron dwíí Yɩɩ joŋwana tə, də Levi dwíí tə duən yáá. 5 Kehatə dwíí tə wa, kʋ yɩn Uriyɛlə də ʋ nubɩa tə. Ba yɩn lɩ̀à 120. Uriyɛlə yà nə yɩ ba yáá tíú. 6 Merari dwíí tə wa, kʋ yɩn Asaya də ʋ nubɩa tə. Ba yɩn lɩ̀à 220. Asaya yà nə yɩ ba yáá tíú. 7 Gɛrəswomə dwíí tə wa, kʋ yɩn Zʋwɛlə də ʋ nubɩa tə. Ba yɩn lɩ̀à 130. Zʋwɛlə yà nə yɩ ba yáá tíú. 8 Elisafan dwíí tə wa, kʋ yɩn Swemaya də ʋ nubɩa tə. Ba yɩn lɩ̀à 200. Swemaya yà nə yɩ ba yáá tíú. 9 Ebəron dwíí tə wa, kʋ yɩn Eliyɛlə tə ʋ nubɩa tə. Ba yɩn lɩ̀à 80. Eliyɛlə yà nə yɩ ba yáá tíú.10 Uziyɛlə dwíí tə wa, kʋ yɩn Aminadabə də ʋ nubɩa tə. Ba yɩn lɩ̀à 112. Aminadabə yà nə yɩ ba yáá tíú.
11 Davidə bon Yɩɩ joŋwana Sadɔkə, də Abɩyatarə, də Levi dwíí lɩ̀à tə, ba nə yɩ Uriyɛlə, də Asaya, də Zʋwɛlə, də Swemaya, də Eliyɛlə, də Aminadabə.
12 Ʋ swɩ̀n ba con, ʋ wʋ́: «Á yɩ Levi dwíí tə yáá tɩ̀án. Á mʋ̀ də á dwíí tə lɩ̀à tə kwɩan á tɩ̀àn, á lɩ durən yìə̀n wa, sə á va á zɩn Yɩɩ nimarʋ culu daka tə, á ja bà bwálɩ́ tə wa, à nə tanɩ à tún ka yɩrɩ. 13 Á wà lá yɩn təntən dɩɩn tə nə, kʋ pa Ba-Yígúrə́-Jə-Tiu, ʋ nə yɩ nə Yɩɩ mà nə lìù don ʋ gʋ, nə nə wà wá pɩ̀à kʋ cwəŋə wa yɩrɩ.»
14 Yɩɩ joŋwana tə, də Levi dwíí tə kwɛn ba tɩ̀án, ba lɩ durən yìə̀n wa, sə ba zɩn Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nimarʋ culu daka tə. 15 Levi dwíí tə zɩn Yɩɩ nimarʋ culu daka tə ba pàrà wa, də ka səpunə dɛɛ, ba nə ma zɩŋa ka, ndə Moyizə nə bɩrɩ də Ba-Yígúrə́-Jə-Tiu pɩn nii, sə kʋ tʋn nətʋ.
16 Davidə swɩ̀n Levi dwíí yáá tɩ̀án tə con, sə ba kə ba nubɩa gwàgá tə duən yáá nə, sə ba dɩ gwaran də gwaran zɩla, tə nə yɩ banan, də kwanan, də zɩnzɩran ba ma fwa pupwən. 17 Levi dwíí tə ma lɩ Zʋwɛlə bìú Eman ʋ nubɩa tə wa, də Berekɩa bìú Asafə, də Kuswaya bìú Etan Merari dwíí tə wa, ba zɩgɩ. 18 Ba nubɩa tə nə yɩ mimii nəcɩra, ba daa ba nə, nə yɩ Zakari, də Bɛnə, də Yaziyɛlə, də Swemiramɔtə, də Yehiyɛlə, də Uni, də Eliyabə, də Benaya, də Maseya, də Matɩtɩa, də Elifəlehu, də Mikəneya, də Obɛdə-Edomə, də Yehiyɛlə. 19 Gwàgá Eman, də Asafə, də Etan yà jə cɩnɩan zɩnzɩran, ba zɩzaga. 20 Gwàgá Zakari, də Azɩyɛlə, də Swemiramɔtə, də Yehiyɛlə, də Uni, də Eliyabə, də Maseya, də Benaya yà dwí banan tə nə jə komɩnɩ. 21 Gwàgá Matɩtɩa, də Elifəlehu, də Mikəneya, də Obɛdə-Edomə, də Yeyɛlə, də Azazɩa yà dwí banan tə kwərə nə dáá, ba ma kəni nuŋə tə cwəŋə nə. 22 Kenanɩa, ʋ nə yɩ Levi dwíí tə yáá tíú yà nə ywàŋá Yɩɩ nimarʋ culu daka tə zɩŋʋ yoo. Cɩ́gá, ʋ yà jə kʋ yənu. 23 Levi dwíí lɩ̀à tə nə ywàŋá Yɩɩ nimarʋ culu daka tə yuu nə, nə yɩ Berekɩa, də Ɛləkana, 24 də Obɛdə-Edomə, də Yehiya. Yɩɩ joŋwana Swebanɩa, də Zozafatə, də Netaneyɛlə, də Amasayi, də Zakari, də Benaya, də Eliyezɛrə yà wúrí nabwanan Yɩɩ nimarʋ culu daka tə yáá con.
Yɩɩ nimarʋ culu daka tə twi Zwerizalɛmə
25 Davidə də Yɩzərayɛlə lɩ̀à nəkwɩna tə, də kwatara mʋ̀rʋ̀ yáá tɩ̀án tə dàń vəli, sə ba lɩ Yɩɩ nimarʋ culu daka tə, Obɛdə-Edomə dìə̀ tə wa, də pupwən. 26 Yɩɩ yà wulə də Levi dwíí tə, ba nə zɩŋa ʋ nimarʋ culu daka tə. Ba dàń gʋa nabɩran barpɛ, də pabɩran barpɛ, ba ma fwa joŋi. 27 Davidə yà zʋa ganbʋa. Levi dwíí tə mama ba nə zɩŋa Yɩɩ nimarʋ culu daka tə, də gwàgá tə, də Kenanɩa, ʋ nə ywàŋá daka tə zɩŋʋ yoo, yà zʋa ganbʋa. Davidə yà zʋa Yɩɩ joŋwana yun tɩ̀án nəkwɩa culu gànʋ̀ də. 28 Yɩzərayɛlə lɩ̀à tə mama dàń ja Ba-Yígúrə́-Jə-Tiu nimarʋ culu daka tə, ba bà Zwerizalɛmə, də ba mà pupwən cə̀rí, də ba wúrí nabwanpɩan, də nabwanan, də ba zɩzaga zɩnzɩran, də ba dwí banan də kwanan.
29 Máŋá tə, ba nə ja Ba-Yígúrə́-Jə-Tiu nimarʋ culu daka tə, ba zʋ Davidə sadiyuu tə wa, Sayulə bʋ̀á Mikaləa twá təkurə, ʋ na pɩ̀ʋ́ Davidə, də ʋ wulə ʋ sɛ, də ʋ faŋa. Yá kʋ nətʋ tə pɩn, Mikalə gwìə̀n Davidə, ʋ waa con.