16
1 Ba ja Ba-Yígúrə́-Jə-Tiu nimarʋ culu daka* tə, ba zʋ ba tún ka bwálɩ́ nə, gànsìlí tə wa, Davidə nə tanɩ ka yɩrɩ. Yá ba dàń fwa jwəŋə tə ba nə sʋ̀rɩ́*, də nimarʋ jwəŋə*, ba pa Yɩɩ nə.2 Máŋá tə, Davidə nə fwa jwəŋə tə ba nə sʋ̀rɩ́, də nimarʋ jwəŋə tə, ʋ zwɛ̀, ʋ lòrì sə Ba-Yígúrə́-Jə-Tiu, ʋ nə yɩ kwatara Yɩɩ, fwa zəni lalʋʋ tə yɩra.3 Kʋ kwa nə, Davidə pɩn ba tara wodirən, ba pa Yɩzərayɛlə lalʋʋ tə mama nə. Bara tə də kana tə lìù mama nɩ dipɛn dàlɩ́, də təməru bɩ̀á, ba nə cili ba kə duən nə, tə kʋ̀, kúkúlí, də divɛn tɩ̀án bɩ̀á, ba nə cili ba kə duən nə, tə kʋ̀, kúkúlí.
Levi dwíí tə bwɩ Ba-Yígúrə́-Jə-Tiu nə
4 Davidə lɩ Levi dwíí tə lɩ̀à ʋ tún, sə ba də ba dɩ gwaran, ba ma bwɩ Yɩɩ nə, də ba pɩn wá dun, Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, nimarʋ culu daka tə yáá con. 5 Asafə nə yɩ ba yáá tíú, Zakari ga daa ʋ nə. Yehiyɛlə, də Swemiramɔtə, də Yehiyɛlə, də Matɩtɩa, də Eliyabə, də Benaya, də Obɛdə-Edomə, də Yehiyɛlə yà mà banan, də kwanan, yá Asafə ga zɩzaga zɩnzɩran. 6 Yɩɩ joŋwana Benaya, də Yahazɩyɛlə yà wúrí nabwanan Yɩɩ nimarʋ culu daka tə yáá con, máŋá mama. 7 Kʋ dɩɩn tə yɩn kʋ təntən nə, Davidə nə pɩn Azafə də ʋ nubɩa tə dɩ gwaran, ba ma bʋ Ba-Yígúrə́-Jə-Tiu nə.
8 Ba dɩga gwaran tə tə, ba ma bʋ Ba-Yígúrə́-Jə-Tiu nə, ba wʋ́:
Á bwɩa Ba-Yígúrə́-Jə-Tiu nə,
á boŋə á kə ʋ yɩrɩ tə nə.
Á swɩ̀án ʋ tʋtʋnfaran tə yoo á bɩrɩ, dwíə́ nəkaran* tə titəŋi wa!
9 Á nuŋə á ma bʋ ʋ nə,
á dɩa gwaran á ma siən wá!
Á swɩan ʋ yomɩlan tə mama yoo á bɩrɩ!
10 Á pɩan ʋ yɩrɩ tə nə yɩ parɩ ya á dun won,
á jwɩa, á mʋ̀ lɩ̀à tə nə pɩ̀à Ba-Yígúrə́-Jə-Tiu!
11 Á pɩa Ba-Yígúrə́-Jə-Tiu də ʋ dɩ̀àn tə,
á pɩa wá máŋá mama!
12 Á lìé yomɩlan tə yoo ʋ nə fwa!
Á lìé ʋ yogwaran tə yoo,
də nətʋ tə ʋ nii nə bʋ̀rɩ̀ bʋra!
13 Á mʋ̀ lɩ̀à tə nə yɩ ʋ tʋtʋnʋ Yɩzərayɛlə dwíí,
á mʋ̀ Zwakɔbə bɩ̀á tə Yɩɩ nə kúrí!
14 Ʋ mʋ̀ Ba-Yígúrə́-Jə-Tiu, nə tíú Yɩɩ,
nə bʋ̀rɩ̀ bʋra tɩa yuu mama wa.
15 Á lìə́ ʋ nimarʋ tə yoo máŋá mama wuuu,
kʋ mʋ̀ nə yɩ ʋ sʋgʋ tə,
ʋ nə pɩn dwíə́ dəkurən mʋ̀rʋ̀ nə.
16 Kʋ yɩ nimarʋ, ʋ nə tún də Abərahamə,
ʋ ga dù, ʋ ma lìí kʋ yoo Yɩzakə con.
17 Ʋ pʋ́pʋ́nɩ́ nimarʋ təntə,
ʋ tún ʋ pa Zwakɔbə nə, sə kʋ ya nii.
Kʋ yɩ Ba-Yígúrə́-Jə-Tiu də Yɩzərayɛlə
dwíí tə nimarʋ, máŋá mama wuuu.
18 Ba-Yígúrə́-Jə-Tiu nə tún nimarʋ tə, ʋ swɩ̀n, ʋ wʋ́:
«À pɩn aba Kanaan lʋʋ nii tə, sə kʋ ya á tori!»
19 Á nɩbara-ba yà ba dáá,
ba yà yɩ lɩ̀à mancɩn, ba twá ba jə̀ə́ lʋʋ nii tə wa.
20 Ba yàá zàn lʋʋ nii don wa, ba va kʋ don wa,
ba zàn payuu don wa, ba va kʋ don wa.
21 Yá Ba-Yígúrə́-Jə-Tiu wà yá,
sə lìù mama fɩfɩn ba.
Ʋ ken càn pɛ̀gá nə ba yɩrɩ.
22 Ʋ swɩ̀n, ʋ wʋ́: «Dànà ká dwen lɩ̀à tə yɩra, à nə kúrí,
dànà ká tʋn lwanɩ à nii sʋ̀sʋ̀nà tə yɩra.»
23 Á mʋ̀ lʋʋ ləzoni tə mama,
á nuŋə á ma bʋ Ba-Yígúrə́-Jə-Tiu nə.
Á swɩ̀án sʋywáŋʋ́ tə nə bɩrɩ
də ʋ yɩ jonu, á bɩrɩ dɩɩn mama.
24 Á swɩ̀án ʋ dun tə yoo, á bɩrɩ lʋʋ níə́ tə mama wa.
Á maŋa ʋ tʋtʋnzəŋə tə, á bɩrɩ dwíə́ tə mama nə.
25 Cɩ́gá, Ba-Yígúrə́-Jə-Tiu wulə tə mɛ yuu wa,
yá ʋ mɛ də bʋra.
Ʋ mɛ sə ba dəri ʋ fən,
ba doni yɩa tə duən tə mama.
26 Cɩ́gá, dwíə́ nəkaran tə yɩa tə mama yɩ kʋ̀nkʋ̀n yɩa,
yá Ba-Yígúrə́-Jə-Tiu nə fwa lanworu tə.
27 Pàrɩ̀ də dun wulə ʋ yáá con.
Dɩ̀àn də pupwən súə́ ʋ wúlú bwálɩ́ tə.
28 Dwíə́ tə mama lʋʋ wa, á pɩan dun Ba-Yígúrə́-Jə-Tiu nə!
Á swɩ̀án ʋ dun tə də ʋ dɩ̀àn tə yoo á bɩrɩ.
29 Á pɩan dun Ba-Yígúrə́-Jə-Tiu nə!
Á jana á pupwən jwəŋə, á bà ʋ yáá con.
Á twɩa á nadwana yuu ʋ yáá con,
á pa wá dun, máŋá tə wa ʋ nə bɩrɩ ʋ dun tə.
30 Á vɩvaga ʋ yáá con,
á mʋ̀ lʋʋ ləzoni tə mama!
Cɩ́gá, ʋ pɩn tɩa tə zɩga zəni, ka ba vɩvaga.
31 Lanworu tə fwàá pupwən,
sə tɩa tə ga jwɛ!
Swɩ̀án dwíə́ nəkaran tə lʋʋ níə́ tə wa,
də Ba-Yígúrə́-Jə-Tiu yɩ pɩ̀ʋ́!
32 Mʋʋ tə pupwin, də kʋ wa wiən tə mama!
Kasɔɔ tə làrɩ̀, də kʋ wa wiən tə mama!
33 Pún tɩ̀án tə maga pupwən cə̀rí, Ba-Yígúrə́-Jə-Tiu yáá con!
Cɩ́gá, ʋ bɩ̀àn sə ʋ bʋ̀rɩ̀ tɩa tə bʋra.
34 Á bwɩa Ba-Yígúrə́-Jə-Tiu nə,
ʋ nə yɩ sonu tíú yɩrɩ!
Cɩ́gá, ʋ wʋywaŋʋ* tə wulə wuuu, kʋ ba zwɛ̀!
35 Á swɩ̀án, á wʋ́: «Jon nəba, Yɩɩ tə n nə yɩ nə jonu!
Jon nəba dwíə́ nəkaran* tə jɩɩn wa,
n ga ja nəba n kə duən yáá,
sə nə bʋ n yɩrɩ tə nə, kʋ nə yɩ parɩ.
Yá bʋra tə nə nə pɩn mʋ́ dàń wá ya nə dun won.
36 Nə bwɩa Ba-Yígúrə́-Jə-Tiu,
ʋ nə yɩ Yɩzərayɛlə lɩ̀à Yɩɩ,
máŋá də máŋá mama wuuu!»
Yá lalʋʋ tə mama swɩan, ba wʋ́: «Amɩɩna!
Nə bwɩa Ba-Yígúrə́-Jə-Tiu nə!»
37 Kʋ kwa nə, Davidə pɩn nii Asafə də ʋ nubɩa tə nə, sə ba ya Ba-Yígúrə́-Jə-Tiu nimarʋ culu daka tə nii nə, ba tʋn ka tʋ̀tʋ̀nán tə, ndə kʋ nə mɛ nətʋ, dɩɩn mama wa. 38 Davidə kúrí Yedutunə bìú Obɛdə-Edomə, də Hoza, də ba dwíí lɩ̀à sapwɩtwa də fugə ʋ tún, sə ba ya mimii nicɩra.
39 Davidə lɩ Yɩɩ joŋwanʋ Sadɔkə, də Yɩɩ joŋwana tə duən tə nə yɩ ʋ nubɩa ʋ tún, sə ba tʋn Yɩɩ wúlú bwálɩ́ tə tʋ̀tʋ̀nán tə, joŋi dədolu* tə yuu, kʋ yà nə wulə Gabawon nə. 40 Ba yà mɛ sə ba fwa jwəŋə tə ba nə sʋ̀rɩ́*, Yɩɩ joŋi bwálɩ́ tə yuu wa, ba pa Ba-Yígúrə́-Jə-Tiu nə máŋá mama, jɩjʋ də didəni. Ba mɛ sə ba tʋn kʋ tə mama nə pʋ́pʋ́nɩ́ Yɩɩ nii* sagɩ tə wa, Ba-Yígúrə́-Jə-Tiu nə pɩn Yɩzərayɛlə lɩ̀à tə nə. 41 Lɩ̀à tə nə kwé ba yà nə yɩ Eman, də Yedutunə, də bara duən ba nə bon ba yɩra ba ma kúrí ba, sə ba bʋ Ba-Yígúrə́-Jə-Tiu nə, ʋ wʋywaŋʋ tə nə wulə máŋá mama wuuu yɩrɩ. 42 Eman də Yedutunə yà nə ywàŋá gwàgá tə nabwanan tə, də zɩnzɩran tə yuu nə, kʋ súrí gwaran zɩla tə duən tə nə, ba nə ma nuŋə Yɩɩ gwaran tə. Yedutunə bɩ̀á tə yà yɩ mimii nicɩra. 43 Kʋ kwa nə, lalʋʋ tə lìù mama dàń pìí, ʋ va ʋ sàń. Yá Davidə də vəli ʋ sàń, sə ʋ lòrì sə Yɩɩ fwa zəni ʋ dìə̀ lɩ̀à yɩra.