Yɩɩ yɩ pùə́ nədʋ tíú
105
1 Á bwɩa Ba-Yígúrə́-Jə-Tiu nə,á boŋə á kə ʋ yɩrɩ tə nə!
Á swɩ̀án ʋ tʋtʋnfaran tə yoo á bɩrɩ,
dwíə́ nəkaran* tə titəŋi wa!
2 Á nuŋə á ma bʋ ʋ nə,
á dɩa gwaran á ma siən wá!
Á swɩan ʋ yomɩlan tə mama yoo á bɩrɩ!
3 Á pɩan ʋ yɩrɩ tə nə yɩ parɩ ya á dun won,
á jwɩa, á mʋ̀ lɩ̀à tə nə pɩ̀à Ba-Yígúrə́-Jə-Tiu!
4 Á pɩa Ba-Yígúrə́-Jə-Tiu də ʋ dɩ̀àn tə,
á pɩa wá máŋá mama!
5-6 Á mʋ̀ lɩ̀à tə nə yɩ ʋ tʋtʋnʋ Abərahamə dwíí,
á mʋ̀ Zwakɔbə bɩ̀á tə Yɩɩ nə kúrí,
á lìé yomɩlan tə yoo ʋ nə fwa!
Á lìé ʋ yogwaran tə yoo,
də nətʋ tə ʋ nii nə bʋ̀rɩ̀ bʋra!
7 Ʋ mʋ̀ Ba-Yígúrə́-Jə-Tiu, nə tíú Yɩɩ,
nə bʋ̀rɩ̀ bʋra tɩa yuu mama wa.
8 Ʋ lìí ʋ nimarʋ tə yoo máŋá mama wuuu,
kʋ mʋ̀ nə yɩ ʋ sʋgʋ tə, ʋ nə pɩn dwíə́ dəkurən mʋ̀rʋ̀ nə.
9 Kʋ yɩ nimarʋ, ʋ nə tún də Abərahamə,
ʋ ga dù, ʋ ma lìí kʋ yoo Yɩzakə con.
10 Ʋ pʋ́pʋ́nɩ́ nimarʋ təntə,
ʋ tún ʋ pa Zwakɔbə nə, sə kʋ ya nii.
Kʋ yɩ Ba-Yígúrə́-Jə-Tiu də Yɩzərayɛlə
dwíí tə nimarʋ, máŋá mama wuuu.
11 Ba-Yígúrə́-Jə-Tiu nə tún nimarʋ tə, ʋ swɩ̀n, ʋ wʋ́:
«À pɩn aba Kanaan lʋʋ nii tə, sə kʋ ya á tori!»
12 Nə nɩbara-ba yà ba dáá,
ba yà yɩ lɩ̀à mancɩn,
ba twá ba jə̀ə́ lʋʋ nii tə wa.
13 Ba yàá zàn lʋʋ nii don wa,
ba va kʋ don wa,
ba zàn payuu don wa,
ba va kʋ don wa.
14 Yá Ba-Yígúrə́-Jə-Tiu wà yá,
sə lìù mama fɩfɩn ba.
Ʋ ken càn pɛ̀gá nə ba yɩrɩ.
15 Ʋ swɩ̀n, ʋ wʋ́:
«Dànà ká dwen lɩ̀à tə yɩra, à nə kúrí,
dànà ká tʋn lwanɩ à nii sʋ̀sʋ̀nà tə yɩra!»
16 Ba-Yígúrə́-Jə-Tiu pɩn niən bà lʋʋ nii tə wa,
ʋ ga pa wodiu mama nyʋn lá.
17 Ʋ tʋn bɛɛ, sə ʋ ya nə nɩbara-ba yáá,
ʋ mʋ̀ nə yɩn Zʋzɛfəa, ba nə yoli ndə yoŋu nə.
18 Ba ken dalɩ ʋ nɛɛ nə,
ba ga kə banzala ʋ bɩan nə,
19 kʋ va kʋ yí máŋá tə, ʋ sʋgʋ tə nii nə súə́,
yá Ba-Yígúrə́-Jə-Tiu sʋgʋ tə dàń bɩrɩ
də Zʋzɛfə yɩ cɩ́gá tíú.
20 Ezwipətə pɩ̀ʋ́ tə pɩn nii sə ba kʋ̀rɩ̀ wá,
dwíə́ tə yuu tíú pɩn ba dʋgʋ wá.
21 Yá ʋ tún Zʋzɛfə, sə ʋ ya ʋ dìə̀ tə yuu tíú,
ʋ ywàń ʋ jɩjə tə mama yuu nə,
22 sə ʋ kàrɩ̀ tʋ̀tʋ̀nán yun tɩ̀án tə, ndə ʋ nə swə nətʋ,
ʋ ga san nəkwɩna tə nə, sə ba jì wʋbʋnyɩna.
23 Kʋ kwa nə, Yɩzərayɛlə twi Ezwipətə wa,
yá Zwakɔbə twá ʋ jə̀ń Swamə lʋʋ nii tə wa.
24 Ba-Yígúrə́-Jə-Tiu pɩn ʋ lɩ̀à tə púlí zənzən,
ba dɩ̀àn ga dwə ba jarɩduən tə.
25 Ʋ lwàń Ezwipətə tɩ̀án pubʋŋa,
ʋ pa ba culi ʋ lɩ̀à tə,
ʋ pa Ezwipətə tɩ̀án tʋŋa sʋsʋn ʋ tʋ̀tʋ̀nà tə yɩra.
26 Ʋ tʋn ʋ tʋtʋnʋ Moyizə
də Aron ʋ yà nə kúrí.
27 Ba ja ʋ dɩ̀àn tə
ba ma tʋn dɩ̀àn mɩmɩnan Ezwipətə wa,
də yogwaran Swamə lʋʋ nii tə wa.
28 Ba-Yígúrə́-Jə-Tiu pɩn yikunu bà, tɩa ga yì,
yá ba wà ʋ sʋgʋ tə tʋ́tʋ̀nɩ́.
29 Ʋ lwàń ba nɩ́á ʋ pa tə jì jana,
ʋ pa tə wa filə tɩ.
30 Ʋ pɩn nyankaswərən sú ba lʋʋ nii tə,
tə zʋ tə yí ba pɩ̀ʋ́ tə dibɩa wa.
31 Ʋ swɩ̀n, yá nanjwɩ tə nə jə cwan,
də bʋnbʋnɩ twi tə sú Ezwipətə lʋʋ nii tə mama wa.
32 Ʋ pɩn dwakafɩna tʋ,
ʋ ga pa dwà baa də ka pɩpɩlɩ,
Ezwipətə lʋʋ nii tə wa.
33 Ʋ cʋ̀gʋ̀ ba divɛn tɩ̀án kárɩ́, də ba kapɩran,
ʋ ga kɛ́n ba lʋʋ nii tɩ̀án tə.
34 Ʋ pɩn nii, yá jə̀rə̀n də kayɩra,
tə nə wàrɩ̀ tə gàlɩ̀ twi.
35 Tə dí ba lʋʋ nii gaʋ tə mama,
də won tə mama nə pɛ́n, ba tɩa tə yuu wa.
36 Ʋ pɩn Ezwipətə tɩ̀án bikwɩna tə mama,
ba nə yɩ ba zandʋan bɩ̀á tɩ lʋʋ nii tə wa.
37 Ʋ pɩn ʋ lɩ̀à tə nan də sɩ́án də wárʋ́,
yá ba dwíə́ tə wa, won wà ba lìù mama fwa.
38 Ezwipətə tɩ̀án sóní ba viru tə.
Cɩ́gá, fən yà gən ba.
39 Ba-Yígúrə́-Jə-Tiu pɩn bakwan kùlì bà
kʋ pú ba yuu nə,
ʋ ga pa mən, sə tə pɩ̀rɩ̀ ba tɩtɩn nə.
40 Ba lòrì wodiu, yá ʋ pɩn lwíí bà,
ʋ ga pa ba də́ lanworu wodiu ba sú.
41 Ʋ lwə pɩ̀ʋ̀, yá nɩ́á pwin tə nan,
tə dəri tɩkʋrʋ wa, ndə mʋnaa nə.
42 Cɩ́gá, ʋ lìí ʋ nikanɩ nəzəŋu tə yoo,
ʋ nə kàn də ʋ tʋtʋnʋ Abərahamə.
43 Ʋ pɩn ʋ lɩ̀à tə nan də ba làrɩ̀,
ʋ lɩ̀à tə ʋ nə kúrí nan də pupwən cə̀rí.
44 Ʋ pɩn ba dwíə́ nəkaran lʋʋ níə́,
ba ga də́ dwíə́ duən tʋ̀tʋ̀nán nywarɩ.
45 Ʋ tʋn kʋ nətʋ tə,
sə kʋ pa Yɩzərayɛlə lɩ̀à zìlí yìə̀n tə,
ʋ nə pɩn tə pʋ́pʋ́nɩ́ tə tún,
sə ba twá tə nə,
ba ga twá ʋ nii yìə̀n tə də nə.
Á bwɩa Ba-Yígúrə́-Jə-Tiu nə!