Zɔbə
Zɔbə sagɩ tə yuu wa sʋgʋ
Zɔbə sagɩ tə yɩ bɛɛ tə ʋ yɩrɩ nə yɩ Zɔbə mɩɩ yìə̀n nə kʋ swɩ̀n, yá kʋ dàń nə tà ʋ mʋ̀ tətə nə pʋ́pʋ́nɩ́ kʋ. Yɩɩ sagɩ tə saga tə mama wa, Zɔbə sagɩ tə fwa ndə təntən sagɩ nə, ba nə pʋ́pʋ́nɩ́. Ba wà Yɩzərayɛlə lɩ̀à nɩbara-ba tə yoo swɩ̀n kʋ wa, ba ma wà Yɩɩ nii tə ʋ nə pɩn Moyizə nə də yoo swɩ̀n kʋ wa. Kʋ nətʋ tə pɩn yənu tɩ̀án duən bʋŋa də Zɔbə dí Abərahamə yáá ʋ ya lʋʋ wa (Lʋʋ Dəkuu 11). Yənu tɩ̀án kapʋpʋ bʋŋa də Moyizə nə pʋ́pʋ́nɩ́ Zɔbə sagɩ tə, máŋá tə wa ʋ də Yɩzərayɛlə lɩ̀à tə nə yɩn Sinayi kasɔɔ lanworu tə wa, bɩna sapwɩlə.
Lʋʋ nii tə Zɔbə nə yɩn kʋ wa yɩrɩ nə Usə (1.1). Kʋ yà yɩ kʋ wulə Arabi lʋʋ nii jɩzən saparʋ con, Kanaan lʋʋ nii jɩgwiə saparʋ də kʋ yɩɩ yipɩan con. Teman də Buzə tɩan tə, də yɩɩ yipɩan con dwíə́ tə, ba nə swɩ̀n tə yoo Zɔbə sagɩ tə wa (1.3; 2.11; 32.2), pɩn nə wàá nə swɩ̀n də Zɔbə mɩɩ yìə̀n tə yɩ tə tʋn Edomə lʋʋ nii wa, kʋ nə zɩgɩ Zʋrədɛn mʋnaa tə jɩgwiə saparʋ con, kʋ ja pìí kʋ bɩ̀àn ka yɩɩ yipɩan con. Gayaa təntə tɩa tə yà ywán zənzən, kʋ pa dwíə́ duən yà bʋlɩ ka nə, ndə Saba tɩ̀án də Kaləde tɩ̀án tə nə, ba nə twi ba vɩrɩ Zɔbə wiən təntən swapitərə tə wa.
Sagɩ tə swapitərə 42 tə mama yɩ sʋyuu nədʋ yoo nə tə swɩ̀n: «Bɛ̀ɛ̀ nə pɩn ləzwənə də́ càn?». Zɔbə dabara tə mʋ̀ pubʋŋa wá, Zɔbə yɩ ʋ tʋn cʋna, kʋ mʋ̀ nə pɩn Yɩɩ ma pa ʋ də́ càn. Ba mʋ̀ con nə, Yɩɩ bá sɛ̀ ʋ pa lìù tə nə yɩ təgətəgə də́ càn. Yá sagɩ tə yígúrə́ wa, Yɩɩ bɩrɩ də Zɔbə dabara tə dwá ba tɩ̀àn yoo təntə yuu wa. Zɔbə tətə ʋ nə də́ càn təntə duən də̀ń nə, də ʋ dabara tə, ʋ nə swɩ̀n də ba yɩ «kwenə tə nə ba yɩra zuri» (16.2), yà yəri də Yɩɩ wàá càn nə ʋ twá ʋ ma kàrɩ̀ ləzwənə. Zɔbə dí càn zənzən, kʋ pa ʋ kan tətə swɩ̀n ʋ con sə ʋ twɩn Yɩɩ ʋ ga tɩ (2.9-10), yá Zɔbə wà sɛ̀ ʋ tʋn kʋ nətʋ tə. Də ʋ də́ càn tə mɛ, ʋ tə ken ʋ waa Yɩɩ nə wuuu, kʋ va kʋ yí ʋ càn tə yígúrə́. Ʋ dídə́n sə ʋ bɩrɩ ʋ dabara tə nə də ʋ wà yoo cʋ̀gʋ̀, yá kʋ nətʋ tə pɩn ʋ swɩ̀n ʋ zɩgɩ Yɩɩ tətə nə. Elihu, Zɔbə banɩa nii dabɛɛ tə mʋ̀ bɩrɩ də càn wàá won kʋ yanɩ, Yɩɩ nə twá kʋ nə, ʋ ma boŋə ʋ kəni ləzwənə nə, sə ʋ lwàń napɩrɩ vəli.
Sagɩ tə yígúrə́ wa, Yɩɩ bwe Zɔbə bwie kapʋpʋ ʋ mʋ̀ Yɩɩ dɩ̀àn tʋ̀tʋ̀nán tə yuu wa, yá Zɔbə dàń mun ʋ tɩ̀àn, ʋ ga sɛ̀ də ʋ tà kaka Yɩɩ yáá con. Kʋ kwa nə, Yɩɩ dàń pìí ʋ pa yazurə də dwíí Zɔbə nə, də jɩjə wiən tə nə dwə ʋ təntən jɩjə wiən tə dəkurən bələ bələ.
Sagɩ tə sʋyun
Zɔbə kwɩ̀n ʋ won mama nə (1—2)
Zɔbə ŋʋŋwɩn lɛɛ tə yɩrɩ tə nə yí wá (3)
Zɔbə dabara batwa pɩn wá kwìə̀:
Təntən viə (4—14)
Bələ nii viə (15—21)
Batwa nii viə (22—26)
Zɔbə swɩ̀n ʋ talɩkwa sʋ̀ràn (27—31)
Elihu nii sʋgʋ (32—37)
Yɩɩ fwa zəni Zɔbə yɩra (42.7-17).