Babɛlə tɩʋ tə də kʋ dəyuu dìə̀ nədarʋ tə yoo
11
1 Máŋá don yɩn lá, lʋʋ ləzoni mama yà yɩ nəndəli sʋgʋ nədʋ nə ba swɩ̀n. 2 Ba dàń zàn ba va yɩɩ yipɩan con, ba na vara Swineyarə lʋʋ nii tə wa. Yá ba dàń jə̀ń lá nə. 3 Ba swɩ̀n duən con ba wʋ́: «Á bɩ̀án nə mà wárá nə wà, nə pa tə kʋ̀.» Wárá təntə dàń nə yɩn ba kapana, kʋ súrí gudəron nə, ba na ken tɩran kʋ wa, ba ma lwà. 4 Ba kʋ́ʋ̀ swɩ̀n, ba wʋ́: «Á bɩ̀án sə nə lwà tɩʋ, nə ga lwà dəyuu dìə̀ nədarʋ, kʋ yuu nə wá dɩ̀ kʋ dwə yɩɩ nə. Kʋ nətʋ tə wá pa nə yɩrɩ nan, yá nə bá laga duən yáá nə, tɩa tə yuu mama wa.» 5 Yá Ba-Yígúrə́-Jə-Tiu cuə, sə ʋ ywàń tɩʋ tə, də dəyuu dìə̀ nədarʋ tə, ləzoni bɩ̀á tə yà nə wulə ba lwə̀. 6 Ba-Yígúrə́-Jə-Tiu swɩ̀n, ʋ wʋ́: «Nə̀ń dwíí nədʋ ləzoni. Ba mama swɩ̀n nəndəli sʋgʋ nədʋ. Yá dàń nə̀ń won tə, ba nə kúrí ba tì, sə ba tʋn. Sɩ́ʋ́n nə, won kʋ́ʋ̀ ba ya lá, kʋ nə wá cɩ̀ kʋ tə yáá nə, ba nə ken sírí sə ba tʋn. 7 Á bɩ̀án nə cú nə gugurə ba nəndəli sʋgʋ tə, sə ba kʋ́ʋ̀ dàn ká nì duən sʋgʋ də̀ń.» 8 Ba-Yígúrə́-Jə-Tiu dàń pɩn, ba laga duən yáá nə, kʋ bwálɩ́ tə wa, ba va yiŋʋnɩ tɩa tə yuu mama wa. Kʋ nətʋ tə dàń pɩn, ba yá tɩʋ tə lwiu nə. 9 Kʋ mʋ̀ nə pɩn, ba ma dɩ kʋ bwálɩ́ tə yɩrɩ Babɛlə. Cɩ́gá, mə kʋ bwálɩ́ təntə wa nə, Ba-Yígúrə́-Jə-Tiu gugurə lʋʋ ləzoni nəndəli sʋgʋ tə mama. Yá mə kʋ zɩgɩ kʋ bwálɩ́ təntə nə, Ba-Yígúrə́-Jə-Tiu ma pa, lʋʋ ləzoni laga duən yáá nə, ba sú tɩa yuu mama.Nɩbara tə kʋ nə zɩgɩ Abəramə, kʋ va kʋ yí Sɛmə
10 Nə̀ń Sɛmə dwíí dəkuu. Sɛmə nə twi ʋ jə bɩna bíí, ʋ lɩrɩ Arəpakəswadə, dwafarʋ tə nə lɛ bɩna bələ kwa nə. 11 Ba nə lɩrɩ Arəpakəswadə kwa nə, Sɛmə tə fwa bɩna biənu, ʋ ga lɩrɩ bibara də bɩkana. 12 Máŋá tə wa Arəpakəswadə nə twi ʋ jə bɩna fɩtwa də bonu, ʋ lɩrɩ Swela. 13 Ba nə lɩrɩ Swela kwa nə, Arəpakəswadə tə fwa bɩna biənɩa də batwa, ʋ ga lɩrɩ bibara də bɩkana. 14 Máŋá tə wa Swela nə twi ʋ jə bɩna fɩtwa, ʋ lɩrɩ Ebɛrə. 15 Ba nə lɩrɩ Ebɛrə kwa nə, Swela tə fwa bɩna biənɩa də batwa, ʋ ga lɩrɩ bibara də bɩkana. 16 Ebɛrə nə twi ʋ jə bɩna fɩtwa də banɩa ʋ lɩrɩ Pelɛgə.
17 Ba nə lɩrɩ Pelɛgə kwa nə, Ebɛrə tə fwa bɩna biənɩa də fɩtwa, ʋ ga lɩrɩ bibara də bɩkana. 18 Pelɛgə nə twi ʋ jə bɩna fɩtwa, ʋ lɩrɩ Rewu. 19 Ba nə lɩrɩ Rewu kwa nə, Pelɛgə tə fwa bɩna biələ də nʋgʋ, ʋ ga lɩrɩ bibara də bɩkana. 20 Rewu nə twi ʋ jə bɩna fɩtwa də bələ, ʋ lɩrɩ Serugə. 21 Ba nə lɩrɩ Serugə kwa nə, Rewu tə fwa bɩna biələ də barpɛ, ʋ ga lɩrɩ bibara də bɩkana. 22 Serugə nə twi ʋ jə bɩna fɩtwa, ʋ lɩrɩ Nahɔrə. 23 Ba nə lɩrɩ Nahɔrə kwa nə, Serugə tə fwa bɩna biələ, ʋ ga lɩrɩ bibara də bɩkana. 24 Nahɔrə nə twi ʋ jə bɩna sapʋa də nʋgʋ ʋ lɩrɩ Tera. 25 Ba nə lɩrɩ Tera kwa nə, Nahɔrə tə fwa bɩna bíí də fugə də nʋgʋ, ʋ ga lɩrɩ bibara də bɩkana. 26 Tera nə twi ʋ jə bɩna sapwɩtwa də fugə, ʋ lɩrɩ Abəramə, də Nahɔrə, də Aran.
27 Nə̀ń Tera dwíí dəkuu. Tera lɩrɩ Abəramə də, Nahɔrə, də Aran. Haran lɩrɩ Lɔtə. 28 Haran tɩga ʋ nyɩna Tera yɩ́á wa, lʋʋ nii tə wa, ba nə lɩrɩ wá, Kaləde tɩ̀án ba tɩʋ tə wa, ba nə boŋə Urə. 29 Abəramə də Nahɔrə swe kana. Abəramə kan tə yɩrɩ nə yɩ Sarayi, Nahɔrə kan tə yɩrɩ ga yɩ Miləka. Miləka yɩ Nahɔrə nubiu Haran bʋ̀á Haran bʋ̀á don də yɩrɩ nə yɩ Yisəka. 30 Sarayi yà ba bìú jə, ʋ yà nə yɩ kadɩŋʋ yɩrɩ. 31 Tera lɩ ʋ bìú Abəramə, də ʋ nàʋ́ Lotə ʋ nə yɩ Haran bìú, də ʋ bìú Abəramə kan Sarayi, ʋ ja nan Urə, Kaləde lʋʋ nii wa, sə ʋ ja va Kanaan lʋʋ nii wa. Yá ba nə vəli ba yí tɩʋ tə ba nə boŋə Aran, ba mɛ lá nə ba jə̀ə́. 32 Tera bɩna tə mama ʋ nə fwa lʋʋ wa yɩ bɩna biələ də bonu. Yá Tera tɩga Haran nə.