ABƏRAMƏ YOO
Yɩɩ swɩ̀n Abəramə con, sə ʋ nan ʋ yá ʋ lʋʋ nii
12
1 Ba-Yígúrə́-Jə-Tiu swɩ̀n Abəramə con, ʋ wʋ́: Nan n yá n lʋʋ nii tə, n yá n dwíí tɩ̀án, n yá n nyɩna dìə̀, sə n ga va lʋʋ nii tə wa, à nə wá bɩrɩ mʋ́. 2 À wá pa n dwíí pùlì zənzən, kʋ jì lʋʋ nii nəfarʋ, yá à ga wá fwa zəni n yɩra. À wá pa n yɩrɩ nan. À ga wá zɩgɩ n yɩra, à fwa zəni lɩ̀à duən də yɩra.3 À wá fwa zəni lɩ̀à tə yɩra,
ba nə wá lòrì nə,
sə à fwa zəni n yɩra.
Yá à ga wá yàlà ba tə,
ba nə wá zɩrɩ ba kə n nə.
À wá fwa zəni tɩa yuu dwíə́ tə mama yɩra,
n mʋ̀ yɩrɩ.»
4 Yá Abəramə nan ʋ vìí, ndə Ba-Yígúrə́-Jə-Tiu nə swɩ̀n ʋ con nətʋ. Yá Lɔtə də zàn, ʋ twá ʋ nə. Abəramə yà jə bɩna sapwɩtwa də fugə də bonu, máŋá tə wa, ʋ nə nan Haran nə. 5 Abəramə lɩ ʋ kan Sarayi, də ʋ nyánʋ́ bìú Lɔtə, də wiən tə mama ʋ nə jə, də tʋ̀tʋ̀nà tə mama, ʋ nə nɩ Haran nə. Ba dàń ga nan, sə ba va Kanaan lʋʋ nii. Ba nə vəli ba yí Kanaan lʋʋ nii, 6 Abəramə twá kʋ lʋʋ nii təntə titəŋi wa ʋ lɛ. Ʋ vəli ʋ yí bwálɩ́ don ba nə boŋə Siswɛmə. Sɩsanʋ don, ba nə boŋə More sɩsanʋ, yà zɩga lá. Kanaan tɩ̀án yà nə wulə lʋʋ nii təntə wa. 7 Ba-Yígúrə́-Jə-Tiu nan Abəramə nə, ʋ ga swɩ̀n ʋ con, ʋ wʋ́: «À wá pa lʋʋ nii kʋ tə, n dwíí nə. Abəramə lwə̀ Yɩɩ joŋi bwálɩ́, kʋ bwálɩ́ təntə wa, ʋ pa Ba-Yígúrə́-Jə-Tiu nə, ʋ nə nan ʋ nə. 8 Kʋ kwa nə, Abəramə kʋ́ʋ̀ zàn kʋ bwálɩ́ təntə wa, ʋ va pɛɛn tə wa, Betɛlə yɩɩ yipɩan con. Ʋ púə́ ʋ gansili Betɛlə də Ayi pwə́rə́ wa. Ʋ ken Betɛlə yɩɩ yizwɩa con, ʋ ga kə Ayi yɩɩ yipɩan con. Abəramə kʋ́ʋ̀ lwə̀ (Yɩɩ joŋi bwálɩ́) lá nə, ʋ pa Ba-Yígúrə́-Jə-Tiu nə. Yá ʋ bon ʋ kə, ʋ mʋ̀ Ba-Yígúrə́-Jə-Tiu nə. 9 Abəramə kʋ́ʋ̀ zàn lá nə, ʋ vəli də ʋ jəni, ʋ ma vələ Negɛbə nagwanaa con.
Abəramə vəli ʋ jə̀ə́ Ezwipətə nə
10 Niən twi tə zʋ kʋ lʋʋ nii təntə wa. Abəramə dàń ma zàn ʋ va Ezwipətə, sə ʋ ya lá. Cɩ́gá, niən tə yà cà kʋ lʋʋ nii tə wa. 11 Máŋá tə ʋ nə vəli ʋ bwə́lə́ Ezwipətə, ʋ swɩ̀n ʋ kan Sarayi con ʋ wʋ́: «Nə vʋra duən nə. À yə̀ə́ də n yɩ kan tə n nə ziən. 12 Kʋ nətʋ wá pa, máŋá tə Ezwipətə tɩ̀án nə wá na mʋ́, ba wá swɩ̀n ba wʋ́: “Kʋ yɩ ʋ kan nə!” Yá ba dàń wá gʋ nə ba yá mʋ́. 13 Kʋ mʋ̀ yɩrɩ, n dàń wá swɩ̀n də n yɩ à nakʋa, sə ba ja nə zəni n mʋ̀ yɩrɩ. Yá ba dàń wá tà n yɩrɩ ba yá nə.» 14 Máŋá tə Abəramə nə yí Ezwipətə, Ezwipətə tɩ̀án nɩ də ʋ kan tə ziən zənzən. 15 Ezwipətə pɩ̀ʋ́ tə ba nə boŋə Farawon tʋ̀tʋ̀nán yun tɩ̀án də nɩ Sarayi, ba ga va ba man ʋ zəni tə yoo, ba bɩrɩ pɩ̀ʋ́ Farawon nə. Ba dàń vəli ba ja Sarayi, ba ja bà pɩ̀ʋ́ Farawon sàń. 16 Ba dàń ga ja Abəramə mʋ̀ zəni, Sarayi yɩrɩ. Yá pɩ̀ʋ́ Farawon dàń pɩn pee, də bʋ̀nɩ́, də nɩan, də bɩnɛ, də nyʋgʋma, də tʋtʋnbɩa, də tʋtʋnbwɩɩ Abəramə nə. 17 Yá Ba-Yígúrə́-Jə-Tiu dɩga yayɩran pɩ̀ʋ́ Farawon də ʋ dìə̀ lɩ̀à nə, Abəramə kan Sarayi yɩrɩ. 18 Pɩ̀ʋ́ Farawon dàń bon Abəramə, ʋ ga swɩ̀n ʋ con, ʋ wʋ́: «Bɛ̀ɛ̀ yoo nə n tʋn à yɩra nətən? Bɛ̀ɛ̀ nə pɩn, n ma wà à con swɩ̀n, də kan tə yɩ n kan? 19 Bɛ̀ɛ̀ nə pɩn, n ma swɩ̀n də ʋ yɩ n nakʋa, kʋ pa à də tì wá à ma fwa à kan? Sɩ́ʋ́n nə, nə̀ń n kan tə nə. Ja wá n ja jɛ́n à yáá nə. 20 Pɩ̀ʋ́ Farawon pɩn nii ʋ lɩ̀à tə nə, sə ba yá Abəramə sə ʋ vìí də ʋ kan tə, də wiən tə mama tə nə yɩ ʋ nyiən.