Abəramə pìí ʋ va Kanaan lʋʋ nii ʋ də Lɔtə ga pwɛ̀ duən nə
13
1 Abəramə kʋ́ʋ̀ pìí ʋ nan Ezwipətə ʋ va Negɛbə con, ʋ də ʋ kan, də won tə mama kʋ nə yɩ ʋ nyiən. Lɔtə yà kwé wá. 2 Abəramə yà jə vàná, də wárʋ́, də sɩ́án zənzən. 3 Ʋ dàń zɩgɩ Negɛbə, ʋ vəli də ʋ jəni, ʋ va ʋ yí Betɛlə, bwálɩ́ tə ʋ nə dí yáá ʋ pú ʋ gansili tə, Betɛlə də Ayi pwə́rə́ wa. 4 Kʋ bwálɩ́ təntə wa nə, ʋ dí yáá ʋ lwà Yɩɩ joŋi bwálɩ́ tə. Yá lá nə, Abəramə kʋ́ʋ̀ bon ʋ kə Ba-Yígúrə́-Jə-Tiu nə. 5 Lɔtə, ʋ yà nə kwé Abəramə, də yà jə vanmɩnɩ, də vanfaran, də gansilə də. 6 Ba vàná tə yà dáá zənzən, kʋ pa nagwanaa tə dánɩ́ yà wà yí, sə ba mama jə̀ń duən nə. 7 Yá máŋá mama, jara dàń yàá zaŋa Abəramə nayɩra tə, də Lɔtə nayɩra tə pwə́rə́ wa. Kʋ máŋá tə wa, Kanaan tɩ̀án, də Perizi dwíí tə yà nə wulə kʋ lʋʋ nii tə wa. 8 Abəramə swɩ̀n Lɔtə con, ʋ wʋ́: «À lòrì mʋ́, jara wà mɛ, sə tə ya à mʋ̀ də mʋ́ pwə́rə́ wa, nə à yə̀ə́ à nayɩra tə, də n nayɩra tə pwə́rə́ wa. Cɩ́gá, nə yɩ dwíí nədʋ lɩ̀à. 9 N dàń nə̀ń lʋʋ nii tə mama nə kʋ wulə n yáá con. Nə dàń pwɩa duən nə, sə lìù mama va ʋ gayaa. N dàń kúrí n tì. N nə vəli jɩgwiə, à wá va jɩzən. N nə kʋ́ʋ̀ vəli jɩzən, à wá va jɩgwiə. 10 Lɔtə zɩ̀n ʋ yáá ʋ ywàń, ʋ ga na Zʋrədɛn mʋnaa tə nii gaʋ tə, nɩ́á nə dəri kʋ mama wa. Də Ba-Yígúrə́-Jə-Tiu yà tə nə wà Sodɔmə də Gomɔrə cʋ̀gʋ̀, kʋ bwálɩ́ tə yà yɩ ndə Ba-Yígúrə́-Jə-Tiu tɩan kárá nə, kʋ va kʋ yí Sʋarə. Kʋ ga yɩ ndə Ezwipətə lʋʋ nii tə də nə. 11 Lɔtə dàń kúrí Zʋrədɛn mʋnaa tə nii gaʋ tə ʋ tì, ʋ ga nan, ʋ va yɩɩ yipɩan con. Mə kʋ zɩgɩ nətʋ, ba ma pwɛ̀ duən nə. 12 Abəramə mʋ̀ jə̀ń Kanaan lʋʋ nii tə wa, yá Lɔtə ga va ʋ jə̀ə́ Zʋrədɛn mʋnaa tə nii tɩ̀án tə wa. Ʋ ga pú ʋ gansilə kʋ daa Sodɔmə con. 13 Sodɔmə tɩ̀án yà yɩ wʋlʋnyɩna, ba ga yɩ cʋna lɩ̀à cɩ́gá cɩ́gá Yɩɩ yáá con.Yɩɩ nikanɩ tə
14 Abəramə də Lɔtə nə pwɛ̀ duən nə kwa nə, Ba-Yígúrə́-Jə-Tiu swɩ̀n Abəramə con, ʋ wʋ́: «Zɩgɩ bwálɩ́ tə nə n nə wulə, n ga zɩ̀n n yáá, n ywàń jɩzən saparʋ də jɩgwiə saparʋ con, də yɩɩ yipɩan də yɩɩ yizʋa con. 15 Cɩ́gá, lʋʋ nii təntə mama n nə na, à wá pa kʋ n mʋ́ də n dwíí tə nə, n nə wá kə lʋʋ wa, sə á tɩnɩ kʋ máŋá mama wuuu. 16 À wá pa n dwíí tə, n nə wá kə lʋʋ wa, pùlì, ndə tɩa yuu pùrú nə. Lìù mama bá wànɩ́ n dwíí tə, ʋ gàlà, ndə lìù nə wàrɩ̀ tɩa yuu pùrú tə, ʋ gàlɩ̀ nətʋ. 17 Zàn n jírí n na lʋʋ nii tə danɩ də kʋ wanɩ nə yɩ nətʋ. Cɩ́gá, à wá pa kʋ mʋ́. 18 Abəramə gwɩrɩ ʋ gansilə tə, ʋ ja bà ʋ pú, Maməre sɩsanan tə nii nə, tə nə wulə Ebəron nə. Yá ʋ kʋ́ʋ̀ lwə̀ Yɩɩ joŋi bwálɩ́ lá nə, ʋ pa Ba-Yígúrə́-Jə-Tiu nə.