Abəramə ta pɛ̀gá kapʋpʋ, ʋ də́
14
1 Swineyarə pɩ̀ʋ́ Amərafɛlə, də Elazarə pɩ̀ʋ́ Arəyɔkə, də Elamə pɩ̀ʋ́ Kedɔrəlawʋmɛrə, də Goyimə pɩ̀ʋ́ Tideyalə máŋá tə wa, 2 kʋ̀ʋ̀ twi kʋ zàn ba mʋ̀ pɛ̀gá təntə, də Sodɔmə pɩ̀ʋ́ Bera, də Gomɔrə pɩ̀ʋ́ Birəswa, də Adəma pɩ̀ʋ́ Swineyabə, də Seboyimə pɩ̀ʋ́ Swemebɛrə, də Bela pɩ̀ʋ́ pwə́rə́ wa. (Bela yɩrɩ don nə yɩ Sʋarə). 3 Ba mʋ̀ pɛ̀gá bonu təntə twi ba kun duən nə Sidimə vara tə nii nə, ba nə boŋə nakuə mʋʋ. 4 Pɩ̀ʋ́ Kedɔrəlawʋmɛrə dí pàrɩ̀ pɛ̀gá bonu təntə yuu wa bɩna fugə də bələ. Yá kʋ bɩna fugə də batwa tə nii nə, ba zàn ba vɩ ʋ nii, ba zɩga ʋ nə. 5 Yá kʋ bɩna fugə də banɩa nii nə, pɩ̀ʋ́ Kedɔrəlawʋmɛrə də pɛ̀gá tə duən tə, ba yà nə wulə də wá, twi ba ta Rafa dwíí tə ba də́, Aswəterɔtə Karənayimə nə. Ba tà Zuzimə dwíí tə ba də́, Amə nə, ba tà Emimə dwíí tə ba də́, Swave Kirəyatayimə nə. 6 Ba ta Orimə dwíí tə ba də́, ba pɛɛn tə wa, Seyirə nə, ba va ba yí Ɛlə-Paran, kʋ nə wulə kasɔɔ lanworu tə nii nə. 7 Ba mɛ lá nə, ba pìí ba bà En Miswəpatə, kʋ yɩrɩ don nə yɩ Kadɛswə. Ba ta Amalɛkə lʋʋ nii tə mama ba də́, kʋ súrí Amɔrə dwíí tə nə, ba yà nə jə̀ə́ Asason Tamarə nə. 8 Yá Sodɔmə pɩ̀ʋ́, də Gomɔrə pɩ̀ʋ́, də Adəma pɩ̀ʋ́, də Seboyimə pɩ̀ʋ́, də Bela pɩ̀ʋ́ (kʋ yɩrɩ don nə yɩ Sʋarə), dàń nan ba kə nii nədʋ, Sidimə vara tə nii nə, 9 ba wulə ba tɛ Elamə pɩ̀ʋ́ Kedɔrəlawʋmɛrə, də Goyimə pɩ̀ʋ́ Tideyalə də Swineyarə pɩ̀ʋ́ Amərafɛlə də Elazarə pɩ̀ʋ́ Arəyɔkə. Ba mʋ̀ pɛ̀gá banɩa təntə nə tɛ ba zɩga pɛ̀gá bonu tə nə. 10 Sidimə vara tə nii mama yà súə́ də gudəron vɩla. Sodɔmə pɩ̀ʋ́ tə, də Gomɔrə pɩ̀ʋ́ tə dəri ba va, ba tʋ tə vɩla təntə wa. Yá ba gɩganɩ tə ga dəri ba va, pɛɛn tə wa. 11 Pɩ̀ʋ́ Kedɔrəlawʋmɛrə də pɛ̀gá tə duən tə, ba yà nə wulə də wá, ta kʋ̀ʋ̀ tə ba də́. Ba dàń vəli ba pɛ̀ Sodɔmə də Gomɔrə jɩjə wiən tə mama, də ba wodirən tə mama, ba yà nə ken ba tún , ba ja vìí. 12 Ba lɩ Abəramə nyánʋ́ bìú Lɔtə də, ʋ yà nə wulə Sodɔmə nə, də ʋ jɩjə wiən mɛ, ba ja vìí. 13 Yá lìù don ʋ nə dəri ʋ jɛ́n, twi ʋ swɩ̀n kʋ ʋ bɩrɩ Abəramə nə, ʋ nə yɩ Ebərə. Abəramə yà yɩ ʋ wulə Maməre pún tə nii nə. Maməre yà yɩ Amɔrə dwíí lìù. Ʋ yà yɩ Ɛswəkɔlə də Anɛrə nubiu. Ba mɛ batwa yà jə nimarʋ də Abəramə. 14 Máŋá tə wa, Abəramə nə zə́n ʋ nì də ba jɩn ʋ nyánʋ́ bìú tə, ʋ tarɩ kɔtarɩzɩla ʋ pa ʋ tʋ̀tʋ̀nà tə wa babara biətwa də fugə də nana nə, ba nə yɩ ba lɩrɩ ba, ʋ dìə̀ wa. Yá ʋ dàń nan də ba mʋ̀ lɩ̀à təntə, ʋ dɩŋɩ pɛ̀gá tə kwa, ʋ va ʋ yí tɩʋ tə, ba nə boŋə Dan. 15 Ʋ pwɛ̀ ʋ lɩ̀à tə wa, sə ʋ də ʋ tʋ̀tʋ̀nà tə ma ta pɛ̀gá tə tɩtɩn nə. Ʋ ta ba ʋ də́, ʋ ga pú ba kwa ʋ dɩŋɩ ba, ʋ ja va ʋ yí tɩʋ tə, ba nə boŋə Oba, kʋ nə wulə Damasə jɩgwiə con. 16 Ʋ pìí ʋ pɛ̀ jɩjə wiən tə mama, ʋ ja bà. Ʋ jɩn ʋ nyánʋ́ bìú Lɔtə də, də ʋ jɩjə wiən tə, kʋ súrí kana tə nə, də lalʋʋ tə nə, ʋ ja pìí ʋ bà.Mɛləkisedɛkə lòrì, sə Yɩɩ fwa zəni Abəramə yɩra
17 Máŋá tə Abəramə nə ta Kedɔrəlawʋmɛrə, də pɛ̀gá tə duən tə, ba yà nə wulə də wá, ʋ də́, ʋ pìí ʋ bɩ̀àn, Sodɔmə pɩ̀ʋ́ nan ʋ jəri wá Kave vara tə wa, ka nə yɩ pɩ̀ʋ́ vara. 18 Salɛmə pɩ̀ʋ́ Mɛləkisedɛkə, ʋ yà nə yɩ Baan Yɩɩ joŋwanʋ, pɩn ba ja wodiu də divɛn, ba nan, ba jəri Abəramə. 19 Yá Mɛləkisedɛkə lòrì, sə Yɩɩ fwa zəni Abəramə yɩra. Ʋ swɩ̀n, ʋ wʋ́:
«Baan Yɩɩ fwa zəni Abəramə yɩra.
Ʋ mʋ̀ Yɩɩ nə fwa lanworu, də tɩa.
20 À bwɩ Baan Yɩɩ nə,
ʋ mʋ̀ nə jɩn dʋŋa tə,
ʋ kə n jɩɩn wa.»
Yá Abəramə dàń pɩn, won tə mama ʋ nə ta ʋ jon, fugə nii nyiən Mɛləkisedɛkə nə.
21 Sodɔmə pɩ̀ʋ́ tə dàń swɩ̀n Abəramə con, ʋ wʋ́: «Pa nə ləzoni tə, sə n ga tì jɩjə wiən tə, n ja.» 22 Abəramə le Sodɔmə pɩ̀ʋ́ tə, ʋ wʋ́: «À zɩ̀n à jɩɩn, à te Ba-Yígúrə́-Jə-Tiu con, ʋ nə yɩ Baan Yɩɩ. Ʋ mʋ̀ nə fwa lanworu də tɩa. 23 À bá tì won mama, kʋ nə yɩ n mʋ̀ nyiən, kʋ nə swə kʋ yɩ gànŋwənə, nə à yə̀ə́ natɩrɩ ŋwənə, tətə, sə n dàn ká wànɩ́ n swɩ̀n də, n mʋ̀ nə pɩn, à mʋ̀ Abəramə jì jɩjə tíú. 24 À mʋ̀ ba won mama pɩ̀à, kʋ nə tà kʋ tə cɩcɩ, ləzwəndʋn tə nə dí. Pa lɩ̀à tə də, ba nə kwé nə, ba ja va kʋ̀ʋ̀ tə wa, tori. Ba mʋ̀ nə yɩ Anɛrə, də Ɛswəkɔlə, də Maməre.»