Yɩɩ tún nimarʋ, də Abəramə də ʋ dwíí tə
15
1 Tə mʋ̀ yìə̀n təntə kwa nə, Ba-Yígúrə́-Jə-Tiu twá Abəramə nɩʋn wa, ʋ swɩ̀n ʋ con, ʋ wʋ́: «Abəramə, dàn ká pa fən ja mʋ́. Cɩ́gá, à mʋ̀ tətə nə yɩ n cɩ̀rʋ́, yá à ga wá tʋn zìlə́ wiən zənzən, à pa mʋ́.» 2 Abəramə le, ʋ wʋ́: «Yuu-Tiu, Ba-Yígúrə́-Jə-Tiu, n pɩn nə wiən, sə à ma fwa bɛ̀? Ywàń, à wá tɩ, də à tə ba bìú jə. Yá Eliezɛrə, ʋ nə yɩ Damasə tíú, nə wá də́ à dìə̀ tə.» 3 Abəramə tə swɩ̀n ʋ súrí lá, ʋ wʋ́: «N wà nə dwíí pɩn. Yá kʋ dàń yɩ à dìə̀ yoŋu təntə, nə wá də́ à dìə̀ tə. 4 Yá Ba-Yígúrə́-Jə-Tiu dàń swɩ̀n Abəramə con, ʋ wʋ́: «Kʋ tà ʋ mʋ̀, nə wá də́ n dìə̀ tə. Kʋ yɩ n kwíə́ də̀ń bìú tə, n tətə nə wá lɩra, nə wá də́ n dìə̀ tə.» 5 Yɩɩ jɩn Abəramə, ʋ nan kàrá wa, ʋ ga swɩ̀n ʋ con, ʋ wʋ́: «Zɩ̀n n yáá, n ywàń lanworu tə wa, n gàlɩ̀ kacɩlacɛɛ tə, n jə́n, n wàá tə n gàlɩ̀ naaa. Ʋ swɩ̀n ʋ súrí lá, ʋ wʋ́: «Mə n dwíí tə wá ya dánɩ́ nətʋ.» 6 Abəramə ken ʋ waa Ba-Yígúrə́-Jə-Tiu nə. Kʋ mʋ̀ nə pɩn, Ba-Yígúrə́-Jə-Tiu dàń jələ wá, də ʋ yɩ cɩ́gá tíú, ʋ mʋ̀ Yɩɩ yáá con. 7 Ba-Yígúrə́-Jə-Tiu kʋ́ʋ̀ swɩ̀n Abəramə con, ʋ wʋ́: «À mʋ̀ nə yɩ Ba-Yígúrə́-Jə-Tiu, à nə pɩn n nan Kaləde-ba tɩʋ tə wa, ba nə boŋə Urə, sə à pa mʋ́ lʋʋ nii kʋ tə, sə n tɩnɩ kʋ.» 8 Yá Abəramə bwe, ʋ wʋ́: «Yuu-Tiu, Ba-Yígúrə́-Jə-Tiu, bɛ̀ɛ̀ mɩmɩnʋ nə, nə à wá twá, à ma lwarɩ də, à wá tɩnɩ kʋ?» 9 Yɩɩ le wá, ʋ wʋ́: «Ja nacɩn kʋ nə jə bɩna batwa, də bʋkan kʋ nə jə bɩna batwa, də pabɩʋ kʋ nə jə bɩna batwa, də gunpwənə, də nasara gunpwəbiə n ja bà n gʋ n pa nə. 10 Abəramə jɩn vàná təntə mama ʋ ja bà ʋ gʋ ʋ pa Yɩɩ nə. Ʋ goŋi tə wa bələ bələ, ʋ tì kɩkɔɔ mama ʋ tún kɩkɔɔ tə don yáá con. Yá ʋ wà zuŋi tə mʋ́ goŋi duən wa. 11 Dələn twi tə tʋ vàná tə naŋa tə yuu nə, Abəramə ma dɩŋɩ tə. 12 Máŋá tə, yɩɩ nə wulə kʋ zwɩ̀, Abəramə dwɛ̀ lɩgɩ. Yá fən dàń twi tə zʋ wá zənzən, yikunu tə yà nə dáá zənzən yɩrɩ. 13 Ba-Yígúrə́-Jə-Tiu swɩ̀n Abəramə con, ʋ wʋ́: «À pɩ̀à sə n yəni cɩ́gá mama, də n dwíí tə, n nə wá kə lʋʋ wa, wá va ba twá ba jə̀ń lʋʋ nii don wa, kʋ nə tà ba mʋ̀ nə tɩ kʋ. Yá ba wá jì ywə́ŋə́ kʋ lʋʋ nii təntə wa. Yá lʋʋ nii təntə tɩ̀án ga wá fɩfɩn ba, bɩna biənɩa. 14 Yá à dàń wá bʋ̀rɩ̀ lʋʋ nii təntə ba nə wá ya kʋ tɩ̀án ywə́ŋə́ bʋra, à kə ba càn wa. Kʋ kwa nə, ba dàń wá nan lá də jɩjə zənzən. 15 N mʋ̀ dàń wá kwɩn zəni, yá n wá nì ywánɩ́ n bwànɩ̀ tə wa, n ga zɩgɩ lá n tɩ, də bɩcan sìə́, ba tì ba gùrì. 16 N dwíí tə dəkurən banɩa nii nyiən wá pìí ba bà bwálɩ́ kʋ tə wa, yəbə. Cɩ́gá, kʋ máŋá tə wa, də Amɔrə dwíí tə dàń zʋa ba tʋtʋnkwɩnan tə wa, ba yí tə yígúrə́. 17 Máŋá tə yɩɩ nə zʋa, yikunu tə yɩn dánɩ́ zənzən. Kurəpotu də kʋ mən, də tə ŋwɩ̀n, də mənvoo twi tə twá vàná tə titəŋi wa, tə yà nə pwɛ̀ duən wa. 18 Kʋ dɩɩn təntə nə, Ba-Yígúrə́-Jə-Tiu tún nimarʋ də Abəramə, ʋ ga swɩ̀n, ʋ wʋ́: «Lʋʋ nii kʋ tə, kʋ nə zɩgɩ Ezwipətə mʋnaa tə nə, kʋ va kʋ yí mʋnaa nəfarʋ tə, ba nə boŋə Əfəratə, kʋ yɩ à pɩn kʋ, n dwíí tə nə, n nə wá kə lʋʋ wa. 19 Kʋ lʋʋ nii təntə yɩ yàrá dwíí, də Kenazə dwíí, də Kɛdɛmə tɩ̀án, 20 də Ɛtə dwíí, də Perizi dwíí, də Rafa dwíí, 21 də Amɔrə dwíí, də Kanaan tɩ̀án, də Girəgasə tɩ̀án, də Yebusə tɩ̀án lʋʋ nii.»