Hagarə lɩrɩ Yɩsəmayɛlə
16
1 Abəramə kan Sarayi yà wà bìú lɩrɩ, ʋ pa wá. Sarayi yà ga jə tʋtʋnbʋa, ʋ nə yɩ Ezwipətə tíú, ʋ yɩrɩ nə yɩ Hagarə. 2 Sarayi dàń ma swɩ̀n Abəramə con, ʋ wʋ́: «Ba-Yígúrə́-Jə-Tiu nə cɩ̀gà, sə à lɩrɩ bìú tə yɩrɩ, n dàń tì à tʋtʋnbʋa tə, dɩɩn don, à wá twá ʋ nə, à na bìú.» Abəramə ma sɛ̀ Sarayi nii. 3 Abəramə kan Sarayi dàń tì ʋ tʋtʋnbʋa Hagarə, ʋ nə yɩ Ezwipətə tíú, ʋ pa ʋ barɩ Abəramə nə, sə ʋ ya ʋ kan. Kʋ nətʋ tə tʋn, də ba nə wulə Kanaan lʋʋ nii tə wa, kʋ jə bɩna fugə. 4 Abəramə dàń tì Hagarə, ʋ ma fwa ʋ kan, yá ʋ jɩn pùə́. Yá máŋá tə Hagarə nə nɩ də ʋ jə pùə́, ʋ dàń yà gònì Sarayi, ʋ nə tɩ wá. 5 Sarayi dàń ma swɩ̀n Abəramə con, ʋ wʋ́: «Yɩgwənə tə tə Hagarə nə fwa à yáá con, yɩ tə twá də n mʋ̀. Kʋ yɩ à mʋ̀ tətə nə jɩn à tʋtʋnbʋa tə, à pa mʋ́. Yá sɩ́ʋ́n nə, ʋ nə nɩ də ʋ jə pùə́, ʋ dàń gwəni nə. Ba-Yígúrə́-Jə-Tiu nə wá bʋ̀rɩ̀ à mʋ̀ də mʋ́ bʋra!» 6 Abəramə pìí ʋ le Sarayi, ʋ wʋ́: «N tʋtʋnbʋa tə wulə n jɩɩn wa. Ja wá n ma fwa kʋ tə, n nə swə. Sarayi dàń fɩfɩn Hagarə, kʋ pa Hagarə dəri ʋ va yiŋʋnɩ, ʋ jɛ́n ʋ yáá nə. 7 Ba-Yígúrə́-Jə-Tiu malɩka* twi, ka na Hagarə, də ʋ jə̀ə́ nabuliyii nii nə, kasɔɔ lwanworu wa. Nɩ́á təntə bwálɩ́ yà yɩ kʋ wulə Swurə cwəŋə tə nii nə. 8 Malɩka tə swɩ̀n, ka wʋ́: «Sarayi tʋtʋnbʋa Hagarə, yə̀n nə n nan? Sə yə̀n nə n vələ?» Ʋ le, ʋ wʋ́: «À yɩ à dəri, sə à va yiŋʋnɩ, à jɛ́n Sarayi yáá nə, ʋ nə tɩ nə.» 9 Ba-Yígúrə́-Jə-Tiu malɩka tə ma swɩ̀n ʋ con, ka wʋ́: «Pìí n va Sarayi con, ʋ nə tɩ mʋ́, sə n ga cú n tɩ̀àn tɩa, ʋ yáá con.» 10 Ba-Yígúrə́-Jə-Tiu malɩka tə, tə swɩ̀n ʋ con, ka súrí lá, ka wʋ́: «À wá pa n dwíí tə pùlì zənzən, yá ba ga bá wànɩ́ kʋ lɩ̀à tə ba gàlà, ba nə dáá zənzən yɩrɩ.» 11 Ba-Yígúrə́-Jə-Tiu malɩka tə kʋ́ʋ̀ swɩ̀n Hagarə con, ka wʋ́: «Nə̀ń n nə, n jə pùə́. N wá lɩrɩ bìú, n ga wá dɩ ʋ yɩrɩ Yɩsəmayɛlə. Cɩ́gá, Ba-Yígúrə́-Jə-Tiu nì n kori, n yinəgə tə wa. 12 N bìú tə wá ya ndə bɩ̀nà cɩ́rʋ́ nə. Ʋ wá ta ʋ zɩgɩ lɩ̀à mama nə, lɩ̀à mama də ga wá ta, ba zɩgɩ ʋ nə. Ʋ nyɩnabɩa tə mama wá vɩ wá, ba dʋgʋ, ʋ ya ʋ cɩcɩ.» 13 Yá Hagarə dàń bwe ʋ tɩ̀àn, ʋ wʋ́: «À cɩ́gá nɩ Yɩɩ, yá à tə ga wulə mɩɩ wa, ʋ nə nɩ nə tə kwa nə?» Kʋ mʋ̀ nə pɩn ʋ pa yɩrɩ Ba-Yígúrə́-Jə-Tiu nə, ʋ wʋ́: «N yɩ Ɛlə-Royi.» Kʋ də̀ń nə yɩ: «Yɩɩ tə, n nə na tə mɛ.» 14 Kʋ mʋ̀ nə pɩn, ba boŋə vɩlɩ təntə «Lahayi Royi vɩlɩ.» Kʋ vɩlɩ təntə yɩ kʋ wulə Kadɛswə də Berɛdə pwə́rə́ wa. 15 Kʋ kwa nə, Hagarə lɩrɩ bìú, ʋ pa Abəramə nə, Abəramə ga dɩ bìú tə yɩrɩ Yɩsəmayɛlə. 16 Abəramə yà jə bɩna sapwɩnɩa də bardʋ, máŋá tə wa Hagarə nə lɩrɩ Yɩsəmayɛlə, ʋ pa wá.