Mɩmɩnʋ tə kʋ nə bɩrɩ Yɩɩ də Abəramə nimarʋ tə
17
1 Máŋá tə Abəramə nə jə bɩna sapwɩnɩa də fugə də nʋgʋ, Ba-Yígúrə́-Jə-Tiu swɩ̀n ʋ con, ʋ wʋ́: «À yɩ Yɩɩ tə, à nə wulə tə mɛ yuu wa. Ya ndə nətʋ tə nə, à nə pɩ̀à, sə n ya à yáá con, sə n ga twá cɩ́gá nə, ndə kʋ nə mɛ nətʋ. 2 À wá tún à nimarʋ tə, à də mʋ́ pwə́rə́ wa, à ga wá pa n dwíí pùlì zənzən, kʋ ja lɛ tɩa nə.» 3 Abəramə tʋa ʋ yáá yuu, yá Yɩɩ dàń swɩ̀n sʋ̀ràn tə tə ʋ con, ʋ wʋ́: 4 «À mʋ̀ con, nə̀ń à nimarʋ tə, à nə tún à də mʋ́ pwə́rə́ wa, nə yɩ nətʋ: N wá jì dwíə́ kapʋpʋ nɩbɛɛ. 5 Ba kʋ́ʋ̀ bá bon mʋ́ Abəramə, n yɩrɩ dàń wá ya Abərahamə. Cɩ́gá, à wá pa n jì dwíə́ kapʋpʋ nɩbɛɛ. 6 À wá pa n dwíí pùlì zənzən, kʋ ja lɛ tɩa nə. À wá pa n dwíí tə lɩrɩ dwíə́ kapʋpʋ, à ga wá pa n dwíí tə lɩrɩ pɛ̀gá də. 7 À wá tún à nimarʋ tə, à də mʋ́, də n dwíí tə, n nə wá kə lʋʋ wa pwə́rə́ wa, də n tɩan kwa mama. Kʋ wá ya nimarʋ tə, kʋ nə ba zwɛ̀, kʋ ja vələ máŋá tə mama, n dwíí tə lɩ̀à nə wá ya lʋʋ wa. Mə kʋ mʋ̀ nə wá pa, à ya n də n dwíí tə, n nə wá kə lʋʋ wa Yɩɩ, də n tɩan kwa mama. 8 À wá pa lʋʋ nii kʋ tə, n nə twi n jə̀ə́ kʋ wa, n də n dwíí tə nə, n nə wá kə lʋʋ wa, də n tɩan kwa mama. N dwíí tə wá tɩnɩ Kanaan lʋʋ nii tə máŋá mama wuuu, yá à ga wá ya ba Yɩɩ.» 9 Yɩɩ kʋ́ʋ̀ swɩ̀n Abərahamə con, ʋ wʋ́: «N mʋ̀ dàń ja à nimarʋ tə. N də n dwíí tə, n nə wá kə lʋʋ wa, á dàń jana à nimarʋ tə, də n tɩan kwa mama, máŋá tə mama á nə wá ya lʋʋ wa. 10 Kʋ nimarʋ təntə tə wá ya à də n dwíí tə də pwə́rə́ wa, n tɩan kwa nə. Á nəŋə nətʋ tə, á nə wá twá kʋ nii nə. Á mɛ, sə á goŋə bara tə mama, ba nə wulə á titəŋi wa. 11 Á mɛ, sə á pa ba goŋə aba, sə kʋ ya mɩmɩnʋ, kʋ nə bɩrɩ à də aba nimarʋ tə. 12 Bibɛɛ mama ba nə wá lɩrɩ á titəŋi wa, mɛ sə ba goŋə wá, ʋ lʋrʋ dɩan nana dɩɩn nə, máŋá tə mama, n də n dwíí tə nə wá ya lʋʋ wa. Kʋ nətʋ tə mɛ, sə kʋ tʋn bibɛɛ mama yɩra. Kʋ nə yɩ yonbɛɛ, ba nə lɩrɩ n dìə̀ wa, nə à yə̀ə́, kʋ nə yɩ lìù don bìú, n jon n yə̀ də səbiu vee con, ʋ nə tà n dwíí tə wa lìù. 13 Kʋ mɛ, sə ba goŋə bɛɛ mama, ba nə lɩrɩ n dìə̀ tə wa, də bɛɛ mama, ʋ nə yɩ n yə̀ də n səbiu. Kʋ wá ya mɩmɩnʋ á yɩra, kʋ bɩrɩ à nimarʋ tə kʋ nə ba zwɛ̀. 14 Bɛɛ tə ʋ nə wà sɛ̀, ʋ pa ba goŋə wá, ʋ mɛ, sə ba lɩ wá, ʋ dwíí wa, ʋ nə cʋ̀gʋ̀ à nimarʋ tə yɩrɩ.» 15 Yɩɩ kʋ́ʋ̀ swɩ̀n Abərahamə con, ʋ wʋ́: «Kʋ nə yɩ n kan Sarayi mʋ̀, n kʋ́ʋ̀ bá bon wá Sarayi. Ʋ yɩrɩ dàń wá ya Sara. 16 À wá fwa zəni ʋ yɩra, à ga wá pa, ʋ də lɩra bìú don, ʋ pa mʋ́. À wá fwa zəni ʋ yɩra, ʋ ga wá lɩrɩ dwíə́ kapʋpʋ. Yá dwíə́ kapʋpʋ təntə pɛ̀gá də ga wá nan ʋ dwíí tə wa, ʋ nə wá lɩra ʋ kə lʋʋ wa.» 17 Abərahamə tʋa ʋ yáá yuu, ʋ ga mʋn ʋ waa con, ʋ wʋ́: «Bɩna bíí bɛɛ wàá bìú ʋ lɩrɩ naaa? Sə Sara mʋ̀, ʋ nə jə bɩna sapwɩnɩa də fugə, ʋ kʋ́ʋ̀ wàá ʋ lɩrɩ naaa?» 18 Abərahamə dàń ma swɩ̀n Yɩɩ con, ʋ wʋ́: «Ooo, yá sə Yɩsəmayɛlə nə ya bìú tə, n nə kàn nii də n wá pa nə.» 19 Yá Yɩɩ dàń swɩ̀n, ʋ wʋ́: «Ɔn ɔn! Kʋ ba tʋ́tʋ̀ná jə. N kan Sara wá lɩra bìú, ʋ pa mʋ́, n ga wá dɩ ʋ yɩrɩ Yɩzakə. À wá tún à nimarʋ tə, kʋ nə ba zwɛ̀, à də wá, də ʋ dwíí tə, ʋ nə wá kə lʋʋ wa pwə́rə́ wa, də ʋ tɩan kwa mama. 20 À nì n kori tə, Yɩsəmayɛlə yoo yuu wa. À wá fwa zəni ʋ yɩra, à ga wá pa ʋ lɩra bɩ̀á. À wá pa ʋ dwíí pùlì zənzən, kʋ ja lɛ tɩa nə. Ʋ wá lɩra pàbɩ̀á fugə də bələ, à ga wá pa, ʋ ya dwíí nəfarʋ nɩbɛɛ. 21 Yá kʋ dàń nə yɩ à nimarʋ tə mʋ̀ yuu wa, kʋ yɩ à wá tún kʋ, à də Yɩzakə pwə́rə́ wa, Sara nə wá lɩra bɩnɩ nə, máŋá ka tə wa.» 22 Máŋá tə Yɩɩ nə swɩ̀n Abərahamə con, ʋ zwɛ̀, ʋ zàn ʋ dɩ yɩɩ nə, ʋ ga yá Abərahamə. 23 Kʋ dɩɩn tə tətə nə, Abərahamə goŋi ʋ bìú Yɩsəmayɛlə, də yonbara tə mama, ba nə lɩrɩ ʋ dìə̀ wa, də ba tə mama, ʋ nə yə̀ də ʋ səbiu. Ʋ goŋi ʋ dìə̀ bara tə mama ndə Yɩɩ nə swɩ̀n ʋ con, sə ʋ tʋn nətʋ. 24 Abərahamə yà jə bɩna sapwɩnɩa də fugə də nʋgʋ, máŋá tə wa ba nə goŋi wá. 25 Ʋ bìú Yɩsəmayɛlə yà jə bɩna fugə də batwa, máŋá tə wa, ba nə goŋi ʋ də. 26 Kʋ dɩɩn təntə tətə nə, ba goŋi Abərahamə də ʋ bìú Yɩsəmayɛlə mɛ. 27 Ba goŋi bara tə də mama, ba nə lɩrɩ ʋ dìə̀ tə wa, də bara tə mama, ʋ nə yə̀ də ʋ səbiu, vərə con.