Yɩɩ tə bwɛ́ ʋ swɩ̀n Yɩzakə lʋrʋ tə yoo
18
1 Ba-Yígúrə́-Jə-Tiu nan Abərahamə nə, Mamərə sɩsanan tə nii nə, də ʋ nan ʋ jə̀ə́ ʋ gansili yáá, máŋá tə wa yɩɩ nə bɩga, tɩa ga lɩŋɩ. 2 Abərahamə zɩ̀n ʋ yáá yɩɩ nə, ʋ ywàń, də nə̀ń bara batwaa nə, ba zɩga ba bwə́lə́ də wá. Máŋá tə ʋ nə nɩ ba, ʋ zàn ʋ gansili tə yáá, ʋ dəri ʋ va ʋ jəri ba. Ʋ tʋa ʋ nadwana yuu, 3 ʋ ga swɩ̀n ba con, ʋ wʋ́: «À Yuu-Tiu, à lòrì yuywaŋʋ kʋ tə n con. Də n nə yə̀ə́ də à yɩ n tʋtʋnʋ, à lòrì mʋ́, á dànà ká zɩgɩ yɩɩ nə, á lɛ, də á wà wodiu dí. 4 Á yaga, sə ba ja nɩ́á mancɩn ba bà, ba ma sɩ̀n á nɛɛ. Á pə̀nə́ tɩ̀ʋ́ kʋ tə də̀ń, á sìí. 5 À wá va à tì wodiu mancɩn, à ja bà, à pa aba, sə á də́. Kʋ kwa nə, á nɛɛ dàń wá ja dɩ̀àn, á cwəŋə tə vəlu wa. Yá kʋ dàń wá pa, á túrí tə, á nə twi á twá á tʋtʋnʋ tə sàń nə, á lɛ, bá ya tʋtʋ.» Ba le wá ba wʋ́: «Awo! fwa ndə n nə swɩ̀n kʋ nətʋ.» 6 Yá Abərahamə dàń pìí lala, ʋ va ʋ zʋ ʋ gansili tə wa, ʋ swɩ̀n Sara con, ʋ wʋ́: «Zàn lala, n fwa mɩna zʋbərə yíə́ batwa, n ma gà mun, n fwa wodiu n pa vərə tə nə.» 7 Abərahamə kɛ̀ń, ʋ dəri ʋ va ʋ najɩrɩ wa, ʋ ja nababiə ka yɩra nə zurə, ka naŋʋ də ga bwànà, ʋ pa ʋ tʋtʋnbiu don nə, ʋ gʋ, ʋ kwɛn ka mama lala, ʋ sàn. 8 Abərahamə tə tì nayɩla də nayɩlɩ nʋga, ʋ súrí nababiə tə nə, ʋ nə pɩn ba sàn, ʋ ja bà ʋ tún vərə tə yáá. Ʋ tətə dàń ga va ʋ jə̀ə́ ba nii nə, tɩ̀ʋ́ tə də̀ń, yá ba ga də́ wodiu tə. 9 Ba dàń ma bwe wá, ba wʋ́: «Sə n kan Sara yɩ ʋ wulə yə̀n nə?» Ʋ le, ʋ wʋ́: «Ʋ wulə gansili tə wa yəbə.» 10 Ba-Yígúrə́-Jə-Tiu ma swɩ̀n, ʋ wʋ́: «Kʋ ba tʋ́tʋ̀ná jə, à wá pìí à bà n con, bɩnɩ nə, máŋá ka tə tətə wá, də n kan Sara lɩrɩ bìú. Sara yà dàà gansili tə mimii nii nə, kʋ nə wulə Abərahamə kwa con, ʋ cʋga sʋgʋ tə. 11 Abərahamə də Sara mɛ yà kwɩn zənzən, yá Sara yà kʋ́ʋ̀ tà kan tə, ʋ nə wàá bìú ʋ lʋrɩ. 12 Sara mʋn ʋ waa con, ʋ ga swɩ̀n, ʋ wʋ́: «Sɩ́ʋ́n nə, à kàzʋ̀nɩ̀ kʋ tə wa, bɛɛ fɩra kʋ́ʋ̀ wàá nə kʋ janɩ naaa? À dìə̀ tíú də nə, ʋ dàń kwɩn zənzən!» 13 Ba-Yígúrə́-Jə-Tiu swɩ̀n Abərahamə con, ʋ wʋ́: «Bɛ̀ɛ̀ nə pɩn Sara ma mʋn, ʋ waa con, ʋ ga bwe, ʋ tɩ̀àn sə ʋ jə́ń də cɩ́gá mama, ʋ mʋ̀ lìù tə ʋ nə yɩ kazʋnʋ, də kʋ́ʋ̀ wàá bìú ʋ lɩrɩ naaa? 14 Yoo wulə kʋ nə gwárɩ́ Ba-Yígúrə́-Jə-Tiu naaa? Bɩnɩ nə, máŋá ka tə tətə wa, à wá pìí à bà n con, də Sara lɩrɩ bìú.» 15 Fən dàń zʋa Sara, kʋ pa, ʋ kʋna kʋ̀nkʋ̀n ʋ wʋ́: «À wà mʋn.» Yá Ba-Yígúrə́-Jə-Tiu pìí ʋ swɩ̀n, ʋ wʋ́: «Kʋ yɩ cɩ́gá, n mʋn!» 16 Bara batwa təntə nyɩn ba zàn, ba vìrí, ba ga ywàŋá Sodɔmə vàn con. Abərahamə yà kwé ba, ʋ ja va, sə ʋ zɩgɩ. 17 Yá Ba-Yígúrə́-Jə-Tiu yà swɩ̀n ʋ waa con, ʋ wʋ́: «Kʋ mɛ, sə à səgə kʋ tə à nə pɩ̀à, sə à tʋn, Abərahamə yáá nə naaa? 18 Kʋ ba tʋ́tʋ̀ná jə, Abərahamə cɩ́gá wá jì dwíí nəfarʋ, kʋ nə jə dɩ̀àn nɩbɛɛ. Yá à wá fwa zəni tɩa yuu dwíə́ tə mama yɩra, ʋ mʋ̀ yɩrɩ nə. 19 Cɩ́gá, Abərahamə yɩ à kúrí wá, sə ʋ pa nii ʋ bɩ̀á tə, də ʋ dwíí tə mama nə, ʋ nə wá kə lʋʋ wa, sə ba twá à mʋ̀ Ba-Yígúrə́-Jə-Tiu cwəŋə tə nə zəni, də ʋ tɩan kwa mama. Sə ba ga tʋn yoo mama, kʋ twá cɩ́gá nə, ndə kʋ nə mɛ nətʋ. Yá kʋ nətʋ dàń wá pa, à tʋn kʋ tə, à nə kan nii də à wá tʋn à pa Abərahamə nə, ʋ pa kʋ nii sú, kʋ pa wá.» 20 Ba-Yígúrə́-Jə-Tiu swɩ̀n, ʋ wʋ́: «Tʋtʋnkʋkwɩnan tə ba nə caga Sodɔmə də Gomɔrə tɩ̀án nii nə, tə yɩrɩ, yɩ yìə̀n nəfaran. Ba cʋna tə də ga yɩ yìə̀n tə nə lwara zənzən. 21 Yá à dàń vələ, sə à jə́n, ba cɩ́gá tʋn yìə̀n təntə, ndə à nə nì də ba swɩ̀n nətʋ. Yá kʋ dàń nə tà nətʋ də, à wá yəni.»Abərahamə lòrì Yɩɩ cɩ́gá tɩ̀án tə yɩrɩ Sodɔmə wa
22 Bara batwa tə wa, bara bələ lɛ ba vələ Sodɔmə. Yá Abərahamə yà tə zɩga Ba-Yígúrə́-Jə-Tiu yáá con. 23 Abərahamə fàrɩ́ ʋ yí lá, ʋ ga swɩ̀n ʋ wʋ́: «N wá pa cɩ́gá tíú twá wʋlʋnyɩan nə ʋ tɩ naaa? 24 Dɩɩn don, kʋ wàá kʋ yí, də cɩ́gá tɩ̀án yí finu tɩʋ tə wa. N wá pa ba də twá ba tɩ naaa? N bá tà cɩ́gá tɩ̀án finu təntə yɩrɩ, ba nə wulə kʋ wa, n yá tɩʋ tə mama, n ba kʋ cʋ̀gà naaa? 25 N wá sɛ̀ n pa, cɩ́gá tíú twá wʋlʋnyɩan nə, ʋ tɩ, sə kʋ ya ndə, ba yɩ won nədʋ naaa? À yə̀ə́ də n ba sɛ̀, n tʋn kʋ yoo təntə yiri. N ba sɛ̀, n tʋn kʋ də mama. N mʋ̀ lìù tə, n nə bʋ̀rɩ̀ lʋʋ tə mama bʋra, n bá bʋ̀rɩ̀ bʋra təntən də cɩ́gá?» 26 Ba-Yígúrə́-Jə-Tiu swɩ̀n, ʋ wʋ́: «Də à nə nɩ cɩ́gá tɩ̀án finu Sodɔmə tɩʋ tə wa, à wá tà ba yɩrɩ, à yá tɩʋ tə mama, à ba kʋ cʋ̀gà.» 27 Abərahamə kʋ́ʋ̀ pìí ʋ swɩ̀n, ʋ wʋ́: «Nə̀ń kʋ nə, à wànɩ́ à swɩ̀n Yuu-Tiu con, à mʋ̀ lìù tə à nə yɩ pùrú də tʋnʋ. 28 Dɩɩn don, kʋ wàá kʋ yí, də cɩ́gá tɩ̀án finu tə wa, lɩ̀à bonu tə̀lə́. Ba lɩ̀à bonu tə nə tə̀lə́ tə yɩrɩ, n wá cʋ̀gʋ̀ tɩʋ tə mama naaa?» Ba-Yígúrə́-Jə-Tiu ma le, ʋ wʋ́: «À bá cʋ̀gʋ̀ kʋ, də à nə nɩ ba sapwɩlə də bonu tə.» 29 Abərahamə tə swɩ̀n ʋ con, ʋ wʋ́: Dɩɩn don, kʋ wàá kʋ yí, də cɩ́gá tɩ̀án sapwɩlə nə wulə tɩʋ tə wa.» Ba-Yígúrə́-Jə-Tiu ma swɩ̀n, ʋ wʋ́: «À bá tʋn yoo mama, ba mʋ̀ lɩ̀à sapwɩlə tə yɩrɩ.» 30 Abərahamə kʋ́ʋ̀ swɩ̀n ʋ wʋ́: «Yuu-Tiu, dàń ká pa, sə n lɩŋa zàn à yuu wa. Yá sə à tə swɩ̀n à súrí lá. Dɩɩn don, kʋ wàá kʋ yí, də cɩ́gá tɩ̀án fɩtwa nə wulə tɩʋ tə wa.» Ba-Yígúrə́-Jə-Tiu ma swɩ̀n, ʋ wʋ́: «À bá tʋn yoo mama, də à nə nɩ ba fɩtwa tə.» 31 Abərahamə kʋ́ʋ̀ swɩ̀n, ʋ wʋ́: «Nə̀ń kʋ nə, à wànɩ́ à swɩ̀n Yuu-Tiu con. Dɩɩn don, kʋ wàá kʋ yí, də cɩ́gá tɩ̀án sapʋa nə wulə tɩʋ tə wa.» Ba-Yígúrə́-Jə-Tiu ma swɩ̀n, ʋ wʋ́: «À bá cʋ̀gʋ̀ kʋ, ba lɩ̀à sapʋa tə yɩrɩ.» 32 Abərahamə kʋ́ʋ̀ pìí ʋ swɩ̀n, ʋ wʋ́: «Yuu-Tiu, dàn ká pa, sə n lɩŋa zàn à yuu wa. À tə lòrì, sə à swɩ̀n talɩkwa sʋgʋ. Dɩɩn don kʋ wàá kʋ yí, də cɩ́gá tɩ̀án fugə nə wulə tɩʋ tə wa.» Ba-Yígúrə́-Jə-Tiu ma swɩ̀n, ʋ wʋ́: «À bá cʋ̀gʋ̀ kʋ, ba lɩ̀à fugə tə yɩrɩ.» 33 Máŋá tə Ba-Yígúrə́-Jə-Tiu nə swɩ̀n də Abərahamə ʋ zwɛ̀, ʋ vìí, Abərahamə də ga pìí ʋ va ʋ sàń.