Yɩɩ cʋ̀gʋ̀ Sodɔmə də Gomɔrə tɩan tə
19
1 Malɩkɛ bələ tə vəli ba yí Sodɔmə didəni nii nə. Máŋá tə Lɔtə nə nɩ ba, ʋ zàn, ʋ va ʋ jəri ba. Ʋ tʋa ʋ nadwana yuu, ʋ pú ʋ yáá tɩa. 2 Yá ʋ dàń ga swɩ̀n, ʋ wʋ́: «À yuu-tɩan-ba, à lòrì aba, sə á pìí á bà à sàń nə, á swɛ nɩ́á, á ga jʋ lá, à nə yɩ á tʋtʋnʋ tə yɩrɩ. Á dàń wá zàn jɩjʋ fuən fuən, á lɛ, á va á cwəŋə tə.» Ba le Lɔtə, ba wʋ́: «Ɔn ɔn, nə wá jʋ kanporu tə wa. 3 Yá Lɔtə dàń bɩbarɩ vərə tə də̀ń nə zənzən, kʋ pa ba pìí ba va ʋ sàń, ba zʋrɩ lá. Ʋ pɩn ba fwa wodiu nəzəŋu, ʋ pa ba, ʋ ga pa ba fwa dipɛn də, ʋ pa ba də́. 4 Lɔtə vərə tə yà tə ba tígə́, də Sodɔmə tɩ̀án bara twi, ba kɩkarɩ Lɔtə sàń tə, ba kə. Saniə tə mama lɩ̀à, twi Lɔtə sàń, ba ləzwəndʋn, də ba nəkwɩna mama. 5 Ba bon Lɔtə, ba ga swɩ̀n ʋ con, ba wʋ́: «Bara tə ba nə zʋa n dìə̀ zən tɩtɩn kʋ tə nə, wulə yə̀n nə? Pa ba nan nə con yəbə, nə pɩ̀à ba, sə nə pə̀ń.» 6 Lɔtə nan ba con, mimii tə yáá, ʋ ga sun bòrù tə, ʋ kwa con. 7 Ʋ swɩ̀n ba con, ʋ wʋ́: «À nubɩa ba, à lòrì aba, á dànà ká tʋn yolwan vərə tə yɩra. 8 À nəŋə, à jə bwɩ̀ɩ́ bələ, ba nə tə yəri bɛɛ. À lòrì aba, sə à ja ba, à nan kàrá wa, à pa aba, sə á ma fwa kʋ tə á nə swə. À lòrì aba, á dàná ká fwa yoo mama vərə tə mʋ̀ yɩra, ba nə yɩ ba twi, ba zʋrɩ à dìə̀ wa yɩrɩ. 9 Yá ba swɩ̀n, ba wʋ́: «Vəli kwa.» Ba tə swɩ̀n ba súrí lá, ba wʋ́: «N mʋ̀ vee wà tə, n twá ʋ jə̀ń nə tɩʋ tə wa, n ga pɩ̀à sə n bʋ̀rɩ̀ nə yìə̀n bʋra? Haya, nə dàń wá tʋn lwanɩ n tətə yɩra, nə doni n dìə̀ vərə tə.» Yá ba dàń yigu Lɔtə də dɩ̀àn, ba kə kwa, ba ga lɛ ba va, sə ba kɛ́n bòrù tə. 10 Malɩkɛ tə jɩn Lɔtə, ba kə ba con, dìə̀ tə wa, ba ga sun mimii tə. 11 Malɩkɛ tə pɩn lɩ̀à tə mama, ba yà nə wulə mimii tə yáá, jì lilirən, kʋ nə zɩgɩ ba wa nəmaa nə, kʋ va kʋ yí ba nəkwɩa. Yá ba dàń dí càn, ba ma pɩ̀à mimii tə ba gɛ. 12 Malɩkɛ tə bwe Lɔtə, ba wʋ́: «N tə jə lətiu don yəbə naaa? N nə jə bɩ̀á, nə à yə̀ə́, bwɩ̀ɩ́ duən, nə à yə̀ə́, tɩnbara, nə à yə̀ə́, n dwíí tíú don mama tɩʋ tə wa, sə n pa, ba nan kʋ wa. 13 Cɩ́gá, tʋtʋnkʋkwɩnan tə, ba nə caga tɩʋ kʋ tə tɩ̀án nii nə, tə yɩrɩ, yɩ yìə̀n nəfaran. Kʋ mʋ̀ nə pɩn, Ba-Yígúrə́-Jə-Tiu, tʋn nəba, sə nə cʋ̀gʋ̀ tɩʋ tə. Yá nə dàń twi, sə nə cʋ̀gʋ̀ kʋ.» 14 Lɔtə nan, ʋ va, ʋ swɩ̀n bara tə con, ʋ yà nə yə̀ə́ də ba pɩ̀à ʋ bwɩ̀ɩ́ tə sə ba swe con, ʋ wʋ́: «Á zaŋa á nan bwálɩ́ kʋ tə wa. Cɩ́gá, Ba-Yígúrə́-Jə-Tiu wá cʋ̀gʋ̀ tɩʋ tə.» Yá ʋ tɩnbara tə yà bʋŋa də, kʋ yɩ ʋ ma bwanɩ ba. 15 Máŋá tə tɩbɩlakʋnʋ nə yí, malɩkɛ tə bɩbarɩ Lɔtə də̀ń nə, ba swɩ̀n ʋ con, ba wʋ́: «Zàn n ja n kan tə, də n bwɩ̀ɩ́ bələ tə, n ja nan tɩʋ tə wa, sə á dàn ká twá tɩlwan kʋ tə tɩ̀án nə, á tɩ, ba tʋtʋnkʋkwɩnan tə yɩrɩ.» 16 Yá Lɔtə mʋ̀ ga ba bɩbarɩ, sə ʋ nan. Malɩkɛ tə dàń ma ja ʋ də ʋ kan tə, də ʋ bwɩ̀ɩ́ bələ tə jɩɩn nə, ba ja nan, ba dʋgʋ tɩʋ tə nii nə. Cɩ́gá, Ba-Yígúrə́-Jə-Tiu yà pɩ̀à, sə ʋ jon Lɔtə də ʋ dìə̀ lɩ̀à tə, ba dàn ká twá ba tɩ. 17 Malɩkɛ tə nə ja Lɔtə, də ʋ dìə̀ lɩ̀à tə, ba nan ba dʋgʋ tɩʋ tə nii nə kwa nə, malɩka tə don swɩ̀n ba con, ka wʋ́: «Á jana á mɩɩ tə, á dəri á jɛ́n. Á dànà ká pìí á pàlɩ̀ á kwa con, á ywàń tɩʋ tə. Á dànà ká zɩgɩ bwálɩ́ mama nə, á sìí, də á nə wà vara tə wa nan. Á dərə, á va pɛɛn tə con, sə á dàn ká twá tɩʋ kʋ tə tɩ̀án nə, á tɩ.» 18 Yá Lɔtə swɩ̀n malɩka tə con, ʋ wʋ́: «Ooo! ɔn ɔn, à lòrì mʋ́ yuu-tiu! Kʋ ba wànɩ́. 19 À lòrì mʋ́, à mʋ̀ n tʋtʋnʋ tə nə nɩ yuywaŋʋ* n yáá con yɩrɩ. N bɩrɩ nə n wʋywaŋʋ* tə, kʋ twá də n nə jon à mɩɩ, n kə lʋʋ wa. Yá à mʋ̀ dàn nə wàrɩ̀ à dəri, à vəli à yí pɛɛn tə, tə bwálɩ́ nə ŋʋ́ná zənzən nətən, sə à jɛ́n, də n tə wà tɩʋ tə cʋ̀gʋ̀. Kʋ nətʋ dàń ga wá pa, à də tɩ. 20 Ywàń tɩbiə ka tə, lá con. Ka bwə́lə́ də yəbə, nə ga wàá nə dəri, nə vəli, nə səgə ka wa. Ooo! À lòrì mʋ́, sə n yá, sə nə va, nə səgə ka wa. Ka cɩ́gá yɩ tɩbiə, yá nə ga nə yí lá, nə kʋ́ʋ̀ bá twá Sodɔmə tɩ̀án nə, nə tɩ.» 21 Malɩka tə dàń ma swɩ̀n Lɔtə con, ka wʋ́: «Kʋ ziən, à kʋ́ʋ̀ pɩn mʋ́ yuywaŋʋ təntə də. À bá cʋ̀gʋ̀ tɩʋ təntə, n nə swɩ̀n kʋ yoo. 22 Á dərə lala, á va, á səgə lá nə, sə á dàń ká tɩ. Cɩ́gá, à ba wànɩ́ à tʋn yoo mama, də á nə wà lá yí.» Mə kʋ mʋ̀ nə pɩn, ba dɩ tɩʋ təntə yɩrɩ, Sʋarə. 23 Yɩcaʋ twi sə kʋ pɛ́n máŋá tə wa, də Lɔtə də, ʋ dìə̀ lɩ̀à tə zʋa Sʋarə. 24 Ba-Yígúrə́-Jə-Tiu dàń pɩn, mən də jiribu nan yɩɩ nə, ʋ con, tə nɩ Sodɔmə də Gomɔrə wa, ndə dwà nə. 25 Ʋ cʋ̀gʋ̀ tɩan təntə, də tə wa lɩ̀à tə mama, də tə vara tə mama, də tɩ̀án tə mama, tə nə wulə tɩa tə yuu wa. 26 Lɔtə kan tə, ʋ yà nə wulə ʋ kwa, pìí ʋ ywàń ʋ kwa con, yá ʋ ga lwàń ʋ jì nəkundalɩ, kʋ nə yɩ ndə, ba sárɩ́, ba ma nyɩn də wá. 27 Abərahamə zàn jɩjʋ fuən fuən, ʋ va bwálɩ́ tə nə, ʋ yà nə zɩgɩ Ba-Yígúrə́-Jə-Tiu yáá con. 28 Ʋ nə viviri ʋ ywàń Sodɔmə də Gomɔrə vàn con, də vara tə lʋʋ nii tə mama con, ʋ nɩ ŋwɩ̀n də tə zaŋa tə dɩ yɩɩ nə, kuləlululu, ndə ba nə dɩga mən gaʋ nə. 29 Máŋá tə Yɩɩ nə cʋ̀gʋ̀ vara tə wa tɩan tə, Lɔtə yà nə wulə tə wa, ʋ lìí Abərahamə yoo. Yá Yɩɩ dàń tà Abərahamə yɩrɩ, ʋ lɩ Lɔtə, ʋ pa ʋ dəri, ʋ jɛ́n, ʋ dàn ká twá ʋ tɩ.Lɔtə də ʋ bwɩ̀ɩ́ tə yoo
30 Lɔtə də ʋ bwɩ̀ɩ́ bələ tə nan Sʋarə nə, sə ba va ba jə̀ń paan tə yuu. Cɩ́gá, fən yà jə Lɔtə, sə ʋ jə̀ń Sʋarə nə. Ʋ də ʋ bwɩ̀ɩ́ bələ tə dàń vəli, ba wulə paan bʋʋ wa. 31 Dɩɩn don nə, Lɔtə bʋ̀á nəkwɩa tə swɩ̀n ʋ nyánʋ́ tə con, ʋ wʋ́: «Nə nyɩna tə yɩ bazʋnʋ, bɛɛ də ga tə̀lə́ lʋʋ nii tə wa, ʋ nə wá bà, ʋ pɩ̀à nəba, ndə kʋ nə tʋŋa nətʋ. 32 Bà, sə nə pa, nə nyɩna tə nyʋn sana, ʋ bʋbʋnɩ, sə nə dàń ga pə̀ń də wá. Kʋ nətʋ wá pa, nə wànɩ́ nə tún dwíí, nə pa nə nyɩna tə nə.» 33 Kʋ tɩtɩn təntə nə, ba cɩ́gá pɩn, ba nyɩna tə nyʋn sana, ʋ bʋbʋnɩ, bʋ̀á nəkwɩa tə ga zʋ, ʋ pə̀ń də wá. Lɔtə wà máŋá tə lwarɩ, ʋ bʋ̀á tə nə twi ʋ pə̀ń də wá, nə à yə̀ə́, máŋá tə, ʋ nə zàn ʋ nan. 34 Kʋ tɩa nə pʋrɩ, bʋ̀á nəkwɩa tə swɩ̀n ʋ nyánʋ́ tə con, ʋ wʋ́: «À pə̀ń də à nyɩna tə, dɩ̀àn tɩtɩn tə nə. Nə kʋ́ʋ̀ pɩan, ʋ nyʋn sana, ʋ bʋbʋnɩ, zən tɩtɩn kʋ tə, də nə. N də kʋ́ʋ̀ wá zʋ, n pə̀ń də wá, sə nə wànɩ́ nə tún dwíí, nə pa nə nyɩna tə nə» 35 Kʋ tɩtɩn təntə də nə, ba kʋ́ʋ̀ pɩn, ba nyɩna tə nyʋn sana, ʋ bʋbʋnɩ, yá ʋ bʋ̀á nəmaa tə də ga kʋ́ʋ̀ zàn, ʋ zʋ, ʋ pə̀ń də wá. Lɔtə wà máŋá tə lwarɩ, ʋ bʋ̀á tə nə twi, ʋ pə̀ń də wá, nə à yə̀ə́, máŋá tə, ʋ nə zàn ʋ nan. 36 Yá Lɔtə bwɩ̀ɩ́ bələ tə dàń jɩn pwìí, tə nə yɩ ba nyɩna tə nə ken. 37 Lɔtə bʋ̀á nəkwɩa tə lɩrɩ bìú, ʋ dɩ ʋ yɩrɩ Mʋabə. Mə ʋ mʋ̀ bìú təntə nə yɩ Mʋabə tɩ̀án tə, ba tə nə wulə zə̀n kʋ tə, nɩbɛɛ. 38 Lɔtə bʋ̀á nəmaa tə də lɩrɩ bìú, ʋ dɩ ʋ yɩrɩ Bɛn-Ami. Mə ʋ mʋ̀ bìú təntə də nə yɩ Amon dwíí tə, ba tə nə wulə zə̀n kʋ tə, nɩbɛɛ.