Abərahamə wulə Gerarə nə
20
1 Abərahamə kʋ́ʋ̀ zàn Mamərə pún tə nii nə, ʋ vələ Nəgɛbə nagwanaa con. ʋ vəli, ʋ twá ʋ jə̀ə́ Gerarə nə, Kadɛswə də Swurə pwə́rə́ wa. 2 Abərahamə yàá swɩ̀n də, ʋ kan Sara yɩ ʋ nakʋa. Gerarə pɩ̀ʋ́ Abimelɛkə ma pa, ba lɩ Sara, ba ja bà, ba pa wá, sə ʋ ma fwa ʋ kan. 3 Yɩɩ dàń twi Abimelɛkə con, tɩtɩn nə, ʋ twá pandwɩa nə, ʋ swɩ̀n ʋ con, ʋ wʋ́: «N wá tɩ, kan tə yɩrɩ, n nə lɩ. Cɩ́gá, kan tə jə barɩ.» 4 Abimelɛkə yà tə wà kan tə yɩra jɩn. Yá ʋ dàń swɩ̀n, ʋ wʋ́: «Yuu-Tiu, n wá sɛ̀, n gʋ lʋʋ pə́rɩ́ lɩ̀à, də ba nə swə, ba yɩ cɩ́gá tɩ̀án naaa? 5 Bɛɛ tə tətə nə wà à con swɩ̀n, də kan tə yɩ ʋ nakʋa naaa? Kan tə də tətə yà wà swɩ̀n, də bɛɛ tə yɩ ʋ nabʋa naaa? À mʋ̀ yà ba pubʋnlwan jə à bɩcan wa, də bɛɛ tə. Kʋ ga tà yoo tə, à nə yə̀ə́, à ga sɩnɩ à fwa.» 6 Yɩɩ pìí ʋ le wá, pandwɩa tə wa, ʋ wʋ́: «À də tətə yə̀ə́ də, pʋbʋnlwan wà n bɩcan wa yɩn, n ma tʋn kʋ yoo təntə. Yá kʋ yɩ à mʋ̀ nə cɩ̀gà n nə, sə n dàn ká tʋn lwanɩ n zɩgɩ à nə. Kʋ mʋ̀ dàń nə pɩn, à wà yá, sə n ja kan tə yɩra. 7 Sɩ́ʋ́n nə, pìí n pa kan tə, ʋ barɩ nə. Cɩ́gá, bɛɛ tə yɩ à nii sʋ̀sʋ̀nʋ̀. Ʋ wá lòrì nə, ʋ pa mʋ́, yá n kʋ́ʋ̀ bá tɩ. Yá n dàń nə, nə wà kan tə pɩn, lwarɩ də, n cɩ́gá wá tɩ, n mʋ̀ də n dìə̀ lɩ̀à mama.» 8 Abimelɛkə zàn jɩjʋ fuən fuən, ʋ bon ʋ tʋ̀tʋ̀nà tə mama, ʋ kun duən nə, ʋ ga swɩ̀n yìə̀n təntə mama, Yɩɩ nə swɩ̀n ʋ con, ʋ pandwɩa tə wa, ʋ bɩrɩ ba. Yá fən dàń zʋa ʋ tʋ̀tʋ̀nà tə zənzən. 9 Kʋ kwa nə, Abimelɛkə bon Abərahamə də, ʋ swɩ̀n ʋ con, ʋ wʋ́: «Bɛ̀ɛ̀ yoo nə, n tʋn nə yɩra nətən? Bɛ̀ɛ̀ yolwan nə, à ma fwa mʋ́, n ma pa, à də à payuu tə mɛ tʋn yolwan nəfarʋ kʋ tə? N tʋn yìə̀n à yɩra, lìù mama nə wà mɛ, sə ʋ tʋn ʋ don yɩra.» 10 Yá Abimelɛkə kʋ́ʋ̀ swɩ̀n Abərahamə con, ʋ wʋ́: «Bɛ̀ɛ̀ pubʋŋa nə, n yà jə, kʋ ma pa, n tʋn yoo kʋ tə?» 11 Abərahamə le, ʋ wʋ́: «À bʋ́n à waa con, də dɩɩn don, bwálɩ́ kʋ tə wa lɩ̀à tə, ba Yɩɩ fən dəri. Yá ba dàń wá gʋ nə, ba ga jon à kan tə. 12 Kʋ tə nə súrí lá, ʋ cɩ́gá yɩ à nakʋa. Nə mɛ yɩ nyɩna nədʋ, nə dàń nə tà nuu nədʋ. Kʋ mʋ̀ nə pɩn, ʋ ma wànɩ́ ʋ ji à kan. 13 Máŋá tə Yɩɩ nə lɩ nə, ʋ yá à nyɩna dìə̀ tə nə, ʋ pa à va, à ywaŋa yiŋʋnɩ, à swɩ̀n Sara con, à wʋ́: «Pa nə yuywagʋ kʋ tə, bwálɩ́ tə mama nə nə vəli, sə n swɩ̀n də, à yɩ n nabʋa.» 14 Abimelɛkə lɩ vanmɩnan, də vanfaran, də tʋtʋnbɩa, də tʋtʋnbwɩɩ, ʋ pa Abərahamə nə, ʋ ga tì ʋ kan Sara də, ʋ pa wá. 15 Abimelɛkə swɩ̀n Abərahamə con, ʋ wʋ́: «Nə̀ń à lʋʋ nii tə nə, kʋ wulə n yáá con. Vəli n jə̀ń bwálɩ́ tə mama, n nə swə.» 16 Ʋ swɩ̀n Sara də con, ʋ wʋ́: «À pɩn səbilurən mʋ̀rʋ̀, n nabʋa tə nə. Kʋ səbiu təntə wá ya mɩmɩnʋ, kʋ bɩrɩ n lɩ̀à tə mama nə, n də ba nə wulə, də n wà yolwan tʋn, sə kʋ ga zɩ̀n n yuu yɩɩ nə. 17 Abərahamə lòrì Yɩɩ, ʋ pa Abimelɛkə nə, yá Yɩɩ dàń pɩn yazurə Abimelɛkə, də ʋ kan, də ʋ tʋtʋnbwɩɩ nə, yá ba dàń wànɩ́ ba lɩrɩ bɩ̀á. 18 Cɩ́gá, Ba-Yígúrə́-Jə-Tiu yà ken, sə Abimelɛkə dìə̀ tə wa, lìù mama dàń ká wànɩ́ bìú ʋ lɩra, Abərahamə kan Sara yɩrɩ.