Yɩzakə lɩrɩ yoo
21
1 Ba-Yígúrə́-Jə-Tiu twi, ʋ pa Sara na yuywaŋʋ, ndə ʋ yà nə swɩ̀n kʋ nətʋ. Yá kʋ tə, Yɩɩ yà nə kàn nii, də ʋ wá tʋn, ʋ pa Sara nə, ʋ cɩ́gá tʋn kʋ, ʋ pa kʋ nii sú. 2 Sara jɩn pùə́, ʋ lɩrɩ bìú, ʋ pa Abərahamə nə, ʋ bazʋnɩ tə wa. Kʋ nətʋ tə tʋn máŋá tə tətə wa, Yɩɩ nə lɩ ʋ tún , ʋ ga swɩ̀n ʋ con, də kʋ wá tʋn. 3 Abərahamə dɩga bìú tə, Sara nə lɩrɩ, ʋ pa wá tə yɩrɩ, Yɩzakə. 4 Abərahamə goŋə ʋ bìú Yɩzakə, ʋ lʋrʋ dɩan nana dɩɩn nə, ndə Yɩɩ yà nə pɩn wá nii, sə ʋ tʋn nətʋ. 5 Abərahamə yà jə bɩna bíí, ʋ bìú Yɩzakə lɩrɩ máŋá wa. 6 Sara dàń ma swɩ̀n, ʋ wʋ́: «Yɩɩ tì nə, ʋ ma fwa pupwən lìù. Yá lìù tə mama, ʋ nə wá nì à yoo təntə, kʋ tíú də wá mʋn.» 7 Ʋ tə swɩ̀n ʋ súrí lá, ʋ wʋ́: «Wàà yà nə wàá Abərahamə con, ʋ swɩ̀n, də à mʋ̀ Sara wá lɩrɩ bìú, ʋ ŋʋ̀à à nyʋnɩ nə? Yá nə̀ń kʋ nə, à lɩrɩ bìú, à pa wá, ʋ bazʋnɩ tə wa.Hagarə wulə kasɔɔ lanworu wa
8 Sara bɩsɩma tə bori, ʋ ga lɩ wá yɩlɩ nə. Abərahamə pɩn, ba də́ cànà nəfarʋ, dɩɩn tə nə, ba nə lɩ Yɩzakə yɩlɩ nə. 9 Dɩɩn don nə, Sara nɩ bìú tə, Ezwipətə tɩ̀án bʋ̀á Hagarə nə lɩrɩ, ʋ pa Abərahamə nə, də ʋ wulə ʋ mʋŋa Yɩzakə. 10 Sara ma swɩ̀n Abərahamə con, ʋ wʋ́: «Dɩŋa tʋtʋnbʋa wà tə, də ʋ bìú tə. Cɩ́gá, tʋtʋnbʋa wà tə bìú tə wà mɛ, sə ʋ twá ʋ tì tori, də à bìú Yɩzakə, n jɩjə wiən tə wa, n tɩan kwa nə.» 11 Kʋ sʋgʋ təntə wà ywánɩ́ yɩn, kʋ pa Abərahamə nə, mɩ́ámɩ́án, Yɩsəmayɛlə də yà nə yɩ ʋ mʋ̀ bìú tə yɩrɩ. 12 Yá Yɩɩ dàń swɩ̀n Abərahamə con, ʋ wʋ́: «Dàn ká pa n tʋtʋnbʋa tə, də ʋ bìú tə yoo ja mʋ́. Tʋn kʋ tə mama, Sara nə lòrì n con, n pa wá. Cɩ́gá, kʋ wá twá də Yɩzakə, n ma na dwíí, kʋ bon n yɩrɩ. 13 À wá pa, n tʋtʋnbʋa tə də bìú tə jì dwíí don də nɩbɛɛ. Cɩ́gá, ʋ də yɩ n mʋ̀ nə lʋrɩ.» 14 Abərahamə zàn jɩjʋ fuən fuən, ʋ tì dipɛn, də nɩ́á púrí, ʋ pa Hagarə nə, ʋ pàlɩ̀ ʋ para wa, ʋ pa wá ʋ bìú Yɩsəmayɛlə də, ʋ ga lɩ wá, ʋ pa ʋ vìí. Hagarə nan ʋ vìí. Ʋ vəli ʋ jɛ́n Bɛrəsweba kasɔɔ lanworu tə wa. 15 Máŋá tə, nɩ́á tə nə zwɛ̀ púrí tə wa, ʋ dʋgʋ bìú tə tɩ̀ʋ́ də̀ń nə. 16 Ʋ tətə dàń ga lɛ, ʋ va yáá mancɩn, ndə lìù nə wá tá twan cɩɩn, kʋ va kʋ tʋ lá bwálɩ́, ʋ jə̀ə́ lá, ʋ kwi. Cɩ́gá, ʋ yà swɩ̀n ʋ waa con, ʋ wʋ́: «À ba swə, sə à na à bìú tə, də ʋ wulə ʋ tɩ.» 17 Yɩɩ nì bɩsɩmaa tə kori, yá Yɩɩ malɩka zɩgɩ lwanworu tə wa, ka bon Hagarə, ka swɩ̀n ʋ con, ka wʋ́: «Hagarə, bɛ̀ɛ̀ nə jə mʋ́? Dàn ká pa fən ja mʋ́. Cɩ́gá, Yɩɩ nì bɩsɩmaa tə kori, bwálɩ́ tə nə, ʋ nə jə̀ə́. 18 Zàn, n tì bìú tə, n ga ja wá zəni. Cɩ́gá, à wá pa, ʋ jì dwíí nəfarʋ nɩbɛɛ. 19 Yɩɩ pɩn Hagarə na vɩlɩ də kʋ wa nɩ́á. Ʋ vəli ʋ kə nɩ́á, ʋ sú púrí tə nii, ʋ ja bà, ʋ pa bìú tə nə, ʋ nyʋn. 20 Yɩɩ yɩn də bìú tə, ʋ ya kasɔɔ lanworu tə wa, ʋ bori, ʋ jì twan tárʋ́, ʋ nə jə yii. 21 Ʋ sàń yà wulə Paran kasɔɔ lwanworu tə wa. Ʋ nuu pɩ̀à Ezwipətə tɩ̀án bʋ̀á, ʋ pa wá, ʋ ma fwa ʋ kan.
Abərahamə də Abimelɛkə nimarʋ
22 Kʋ máŋá təntə wa, Abimelɛkə, də Pɩkɔlə ʋ nə yɩ Abimelɛkə kwatara tə yuu tíú, twi ba swɩ̀n sʋ̀ràn tə tə, Abərahamə con, ba wʋ́: «Yɩɩ wulə də mʋ́ won tə mama wa, n nə fwa. 23 N dàń tà Yɩɩ yɩrɩ, n ga dù, də n bá tʋn gɩgɩrɩ yoo à yɩra, nə à yə̀ə́ à bɩ̀á yɩra, nə à yə̀ə́ à nɩ̀án yɩra, nə à yə̀ə́ à dwíí tə, à nə wá kə lʋʋ wa yɩra, də à tɩan kwa mama. Yá n wá fwa wʋywaŋʋ*, à də lʋʋ nii tə, n nə yɩn kʋ wa yɩra, ndə à nə di yáá à fwa wʋywaŋʋ n yɩra nətʋ.» 24 Abərahamə swɩ̀n, ʋ wʋ́: «À sɛ̀, à wá dù nətʋ.» 25 Yá Abərahamə nə dùə̀ tə kwa nə, ʋ dàń caga Abimelɛkə nii nə, nɩ́á vɩlɩ don yɩrɩ, Abimelɛkə tʋtʋnbɩa tə nə jon, də dɩ̀àn. 26 Abimelɛkə le, ʋ wʋ́: «À yəri kʋ yoo. Wàà nə tʋn kʋ yoo təntə? N wà kʋ yoo swɩ̀n à con, kʋ ga nə tà zə̀n, à mʋ̀ yà wà kʋ nì.» 27 Abərahamə dàń lɩ pee də nɩan, ʋ pa Abimelɛkə nə, ba dàń ga tún nimarʋ, ba bələ tə pwə́rə́ wa. 28 Abərahamə tə lɩ pekana nəmənbii barpɛ, ʋ vàná tə wa, ʋ zɩgɩ vàn nə. 29 Abimelɛkə ma bwe Abərahamə, ʋ wʋ́: «Bɛ̀ɛ̀ nə n pɩ̀à, sə n fwa də pacɩan barpɛ tə tə, n nə lɩ, n zɩgɩ vàn nə?» 30 Ʋ le, ʋ wʋ́: «Tə pacɩan barpɛ təntə yɩ à kúrí tə, sə à pa mʋ́. N nə sɛ̀, n jon tə, à jɩɩn wa, kʋ wá yà mɩmɩnʋ, kʋ bɩrɩ də, n sɛ̀, də à mʋ̀ cɩ́gá nə kʋa vɩlɩ tə.» 31 Kʋ mʋ̀ nə pɩn, ba boŋə kʋ bwálɩ́ təntə, Bɛrəsweba. Cɩ́gá, mə kʋ bwálɩ́ tə wa nə, ba mɛ bələ dùə̀, də ba bá tʋn gɩgɩrɩ yoo duən yɩra. 32 Ba dàń tún nimarʋ də duən, Bɛrəsweba nə. Kʋ kwa nə, Abimelɛkə, də Pɩkɔlə ʋ nə yɩ Abimelɛkə kwatara tə yuu tíú, dàń pìí ba va Filisi lʋʋ nii wa. 33 Abərahamə cwɛn sʋnʋ, Bɛrəsweba nə, yá ʋ ga bon ʋ kə Ba-Yígúrə́-Jə-Tiu nə, ʋ mʋ̀ Yɩɩ tə, ʋ nə wulə máŋá mama, wuuu. 34 Abərahamə yɩn Filisi lʋʋ nii tə wa, ʋ dán.