Yɩɩ mɩlʋ Abərahamə
22
1 Tə mʋ̀ yìə̀n təntə kwa nə, Yɩɩ mɩlʋ Abərahamə. Ʋ bon wá, ʋ wʋ́: «Abərahamə!» Ʋ ma le, ʋ wʋ́: «Nə̀ń nə.» 2 Yɩɩ swɩ̀n ʋ con, ʋ wʋ́: «Tí Yɩzakə, n bidʋa tə, n nə swə tə, n ja va Morizwa lʋʋ nii tə wa, n ma fwà joŋi, n sʋ̀rɩ́, n pa nə, paan tə don yuu wa, à nə wá bɩrɩ mʋ́. 3 Kʋ tɩpʋrɩ nə, Abərahamə zàn jɩjʋ fuən fuən, ʋ lwa dɛɛ tə, ʋ nə wá ma sʋ̀rɩ́ joŋi tə. Ʋ tanɩ ʋ bɩna, ʋ bon ʋ bìú Yɩzakə, də balandʋra bələ, ba nə yɩ ʋ tʋtʋnbɩa, ʋ kə ʋ kwa, ʋ ja vələ bwálɩ́ tə, Yɩɩ nə bɩrɩ wá. 4 Dɩan batwa nii dɩɩn tə nə, Abərahamə zɩ̀n ʋ yáá yɩɩ nə, ʋ na bwálɩ́ tə, yiŋʋnɩ. 5 Ʋ dàń ma swɩ̀n ʋ tʋtʋnbɩa tə con, ʋ wʋ́: «Á mʋ̀ zɩga yəbə, də bɩna tə. À mʋ̀ də bisɩmaa tə wá dɩ̀ paan tə yuu, nə fwa joŋi nə pa Yɩɩ nə, nə ga pìí nə bà á con.» 6 Abərahamə dàń tì dɛɛ tə, ʋ nə wá ma sʋ̀rɩ́ joŋi tə, ʋ ma zɩn ʋ bìú Yɩzakə. Ʋ tətə ga tùn mən, ʋ tì sɩ̀ʋ́, ʋ jə ʋ jɩɩn, ba mɛ bələ ga twá duən, ba vìrí. 7 Yɩzakə ma bon ʋ nyɩna Abərahamə, ʋ wʋ́: «Baba,» Abərahamə ma sɛ̀ wá, ʋ wʋ́: «À cʋga n con à bìú, ʋ dàń swɩ̀n, ʋ wʋ́: «Nə̀ń mən, də dɛɛ nə, nʋʋʋ! sə pəbiə tə, nə dàń nə wá ma fwa joŋi tə wa yə̀n?» 8 Abərahamə ma le, ʋ wʋ́: «À bìú, Yɩɩ tətə nə wá pìà pəbiə tə, nə nə wá ma fwa joŋi tə.» Ba mɛ bələ ga twá duən ba vìrí. 9 Máŋá tə, ba nə yí bwálɩ́ tə, Yɩɩ yà nə bɩrɩ wá, Abərahamə lwà Yɩɩ joŋi bwálɩ́ lá nə, ʋ kwɛn dɛɛ tə ʋ tún kʋ yuu wa. Kʋ kwa nə, ʋ vwə ʋ bìú Yɩzakə, ʋ tún dɛɛ tə yuu, tə nə wulə Yɩɩ joŋi bwálɩ́ tə yuu wa. 10 Abərahamə dàń tì sìʋ́ tə, sə ʋ ma goŋə ʋ bìú tə bɩan. 11 Ba-Yígúrə́-Jə-Tiu malɩka dàń ma zɩgɩ lanworu tə wa, ka bon wá, ka wʋ́: «Abərahamə! Abərahamə!» Ʋ ma le, ʋ wʋ́: «Nə̀ń nə!» 12 Malɩka tə swɩ̀n ʋ con, ka wʋ́: «Dàn ká dwen bisɩmaa tə yɩra, dàn ká fwa yoo mama ʋ yɩra. Cɩ́gá, sɩ́ʋ́n nə, à lwarɩ də, n zìlí à mʋ̀ Yɩɩ, n ga wà nə, n bidʋa tə vwəŋi. 13 Abərahamə zɩ̀n ʋ yáá yɩɩ nə, ʋ viviri ʋ ywàń ʋ kwa con, də nə̀ń pabɩʋ nə, kʋ nyʋran nə gɩra tuni wa, kʋ ja zɩga. Abərahamə dàń vəli, ʋ ja pabɩʋ təntə, ʋ ja bà, ʋ ma fwa joŋi tə, ʋ bìú Yɩzakə bʋʋ wa. 14 Abərahamə dɩga bwálɩ́ təntə yɩrɩ, «Ba-Yígúrə́-Jə-Tiu wá pa, kʋ tə nə mùrì.» Kʋ mʋ̀ nə pɩn, də zə̀n mama, lɩ̀à tə swɩ̀n, ba wʋ́: «Ba-Yígúrə́-Jə-Tiu paan tə yuu wa, ʋ wá pa, kʋ tə nə mùrì.» 15 Ba-Yígúrə́-Jə-Tiu malɩka tə kʋ́ʋ̀ zɩgɩ lanworu tə wa, ka bon Abərahamə, nɛɛ bələ nii nə, 16 ka swɩ̀n, ka wʋ́: «À dùə̀ də à tətə, à mʋ̀ Ba-Yígúrə́-Jə-Tiu nə swɩ̀n kʋ. N zìlí à nii, n wà nə, n bidʋa tə vwəŋi. 17 Kʋ mʋ̀ yɩrɩ, à wá fwa zəni, n yɩra zənzən. À wá pa n dwíí pùlì, ndə kacɩlacɛɛ tə nə, lanworu tə wa, nə à yə̀ə́, ndə mʋʋ nii kasɩlʋ nə. N dwíí tə, n nə wá kə lʋʋ wa, wá də́ dɩ̀àn ba dɩ́ŋá yuu wa. 18 Kʋ wá twá də zəni tə, à nə fwa n dwíí tə yɩra, n nə zìlí à nii tə yɩrɩ, dwíə́ tə mama lʋʋ wa, ma lòrì nə, sə à fwa zəni ba də yɩra, ndə n dwíí tə nə. 19 Abərahamə dàń pìí, ʋ bà ʋ tʋtʋnbɩa tə con, ba mɛ ga zàn, ba pɛ̀ duən, ba vələ Bɛrəsweba. Cɩ́gá, Abərahamə yà yɩ ʋ jə̀ə́ Bɛrəsweba nə.20 Tə mʋ̀ yìə̀n təntə kwa nə, ba twi ba swɩ̀n sʋ̀ràn tə tə Abərahamə con, ba wʋ́: «N nubiu Nahɔrə də ʋ kan Miləka də lɩrɩ bɩ̀á duən nə. 21-22 Usə nə yɩ ba bikwɩa. Buzə nə nan Usə yáá. Kemuwɛlə yɩ Aramə, də Kesedə, də Hazo, də Pilədaswə, də Yɩdəlafə, də Betuwɛlə nyɩna. 23 Betuwɛlə lɩrɩ Rebɛka. Mə ba mʋ̀ nə yɩ bɩ̀á nana tə, Abərahamə nubiu Nahɔrə, də ʋ kan Miləka nə lʋrɩ. 24 Nahɔrə də ʋ kabiə Rewuma də lɩrɩ bɩ̀á duən. Ba mʋ̀ nə yɩ Teba, də Gahamə, də Tahaswə, də Maka.