Sara tɩga, ba gùrì wá paan bʋʋ wa, Makəpela nə
23
1 Sara mɩɩ danɩ yɩn bɩna bíí də sapʋa də barpɛ. Mə ʋ bɩna nii nə, ʋ nə fwa lʋʋ wa. 2 Sara tɩga Kiriyatə-Arəba nə, kʋ yɩrɩ don nə yɩ Ebəron, Kanaan lʋʋ nii tə wa. Yá Abərahamə dàń zàn, sə ʋ fwa Sara lúə́, sə ʋ kwi ʋ nə. 3 Abərahamə nyɩ́ ʋ zàn, ʋ yá ʋ kan tə tɩgɩ tə, ʋ ga va ʋ yí Ɛtə dwíí tə, ba nə yɩ tɩʋ tɩ̀án, ʋ swɩ̀n sʋ̀ràn tə tə, ba con, ʋ wʋ́: 4 «À yɩ vee, à twá à jə̀ə́ á con, à ga yɩ lìù tə, à nə wulə yəbə, máŋá mancɩn wa. Á dàń pɩan nə bwálɩ́ ba nə gùrì tɩga lá, sə ba tì à kan tə tɩgɩ tə, à yáá con, bà gùrì lá.» 5 Ɛtə dwíí tə ma le wá, ba wʋ́: 6 «Nə yuu-tiu, cʋgʋ nə sʋgʋ. N yɩ Yɩɩ pabiu n wulə nə titəŋi wa. Vəli n kúrí ləbəri, nə libərə tə wa, n tì n kan tə tɩgɩ tə, n gùrì lá. Nə wa lìù mama bá vɩ, sə ʋ pa mʋ́ ʋ ləbəri, sə n ma gùrì n kan tə tɩgɩ tə.» 7 Abərahamə zàn, ʋ tʋ ʋ nadwana yuu, Ɛtə dwíí lɩ̀à tə yáá con, ba nə yɩ lʋʋ nii tə tɩ̀án. 8 Ʋ swɩ̀n sʋgʋ kʋ tə ba con, ʋ wʋ́: «Də á cɩ́gá nə sɛ̀, sə ba tì à kan tə tɩgɩ tə, à yáá con, ba gùrì, á cʋga à sʋgʋ, sə á pa à lòrí tə yí Efəron, ʋ nə yɩ Sʋarə bìú. 9 À lòrì wá, sə ʋ pa nə paan bʋʋ tə, kʋ nə wulə Makəpela nə, ʋ kárá tə yuu nə, kʋ nə yɩ ʋ mʋ̀ nə tɩ. À lòrì, sə ʋ pa à ŋwɩ́n kʋ kwənə, à pa wá, á yáá con, yəbə. Yá à dàń wá tɩnɩ kʋ, à ma fwa à tɩga yikənə bwálɩ́.» 10 Efəron, də tətə yɩ Ititə. Ʋ də yà jə̀ə́ Ɛtə dwíí lɩ̀à púlí tə wa. Ʋ dàń le Abərahamə, Ɛtə dwíí tɩ̀án tə mama, də lìà tə mama yáá con, ba nə twi ba jə̀ə́ púlí tə wa, tɩʋ tə mimii* nə, ʋ wʋ́: 11 «Ɔn ɔn, à yuu-tiu! Cʋgʋ à sʋgʋ! À pɩn mʋ́ kárá tə, də paan bʋʋ tə mɛ, kʋ nə wulə lá. À pɩn ka mʋ́, à lʋʋ lìà tə mama yáá con. Tì n kan tə tɩgɩ tə, n gùrì lá.» 12 Abərahamə kʋ́ʋ̀ tʋa ʋ nadwana yuu, lʋʋ nii tə tɩ̀án yáá con. 13 Ʋ swɩ̀n sʋ̀ràn tə tə Efəron con, lʋʋ nii tə tɩ̀án yáá con, ʋ wʋ́: «N də dàń cʋgʋ à sʋgʋ. À wá ŋwɩ́n kárá tə kwənə, à pa mʋ́. Sɛ̀, n jon tə, à jɩɩn wa, yá à dàń wá tì à kan tə tɩgɩ tə, à ja va, à gùrì lá nə.» 14 Yá Efəron dàń pìí, ʋ le Abərahamə, ʋ wʋ́: 15 «À yuu-tiu, cʋgʋ à sʋgʋ! Bwálɩ́ kʋ kwənə nə yɩ wárʋ́ səbilurən* biənɩa yoo wá fwa bɛ̀, à mʋ̀ də mʋ́ pwə́rə́ wa? Tì n kan tə tɩgɩ tə, n ja va, n gùrì lá.» 16 Abərahamə nì Efəron sʋgʋ tə. Ʋ dàń jələ səbiu tə, Efəron nə man kʋ nii, Ɛtə dwíí tɩ̀án tə yáá con, ʋ pa wá. Kʋ yɩ wárʋ́ səbilurən biənɩa, kʋ nə yɩ yolu səbiu baywələ con.17-18 Kʋ zɩgɩ nətʋ, Efəron kárá tə, ka nə wulə Makəpela nə, Maməre yáá con, də paan bʋʋ tə, də tɩ̀án tə mama, tə nə wulə kárá tə wa, ma jì Abərahamə nyiən. Kʋ yɩn Ɛtə dwíí tɩ̀án tə, də lɩ̀à tə mama yáá con, ba nə twi, ba jə̀ń púlí tə wa, tɩʋ tə mimii nə.a 19 Kʋ kwa nə, Abərahamə dàń gùrì ʋ kan Sara, kárá tə paan bʋʋ tə wa, kʋ nə wulə Makəpela nə, Maməre yɩɩ yipɩan con. Kʋ mʋ̀ nə yɩ Ebəron, kʋ nə wulə Kanaan lʋʋ nii tə wa. 20 Kárá tə, də paan bʋʋ tə, kʋ nə wulə ka wa, dàń yɩ Abərahamə nə tɩ, ʋ ma kəni ʋ tɩga. Kʋ yɩ ʋ yə̀ ka Ɛtə dwíí tə con.