Elifazə bɩrɩ də wʋlʋnyiən ba càn yáá nə jɛ́n
15
1 Elifazə, ʋ nə nan Teman kʋ́ʋ̀ tì sʋgʋ, yá ʋ swɩ̀n ʋ wʋ́:2 «Wʋbʋnyiən yàá le də pubʋŋa,
ka nə yɩ ndə vʋʋ nə naaa?
Ʋ yàá fʋ̀lɩ́ ʋ tɩ̀àn də yɩɩ yipɩan con vʋʋa naaa?
3 Kʋ yɩ sʋvɛɛ nə ʋ wá swɩ̀n ʋ ma jon ʋ tɩ̀àn naaa?
Kʋ yɩ sʋ̀ràn tə nə ba də̀ń mama jə naaa?
4 N mʋ̀ pɩn lɩ̀à ba Yɩɩ fən dəri,
yá n pɩn lɩ̀à ba Yɩɩ jʋnɩ mɩ́ámɩ́án.
5 Cɩ́gá, n yolwan tə nə bɩrɩ mʋ́
yìə̀n tə n nə mɛ sə n swɩ̀n,
yá n dàń kúrí n tì
sə n swɩ̀n gɩgɩrɩnyɩna sʋ̀ràn.
6 Kʋ tà à mʋ̀ nə swɩ̀n à zɩga n nə,
n tətə nii tə nə wá kə mʋ́ yoo wa.
N tətə nii sʋ̀ràn tə nə zɩga n nə.
7 N mʋ̀ nə yɩ təntən ləzwənə, ba nə lɩrɩ naaa?
N twi lʋʋ də ba tə wà pɛɛn tə fwa naaa?
8 N cʋgʋ yìə̀n tə Yɩɩ nə vʋrɩ sə ʋ tʋn,
kʋ pa n mʋ̀ cɩcɩ nə jə wʋbʋŋa,
n ma fwa n fɩra naaa?
9 Bɛ̀ɛ̀ nə n mʋ̀ yə̀ə́, nə mʋ̀ ga yəri?
Bɛ̀ɛ̀ yoo də̀ń nə n nə̀ń, nə mʋ̀ ga ba nə̀ń?
10 Yukʋpwənə tɩ̀án wulə nə wa,
bazʋnan, ba nə kʋ n nyɩna tətə.
11 N gònì kòrù tə Yɩɩ nə ken nə bɩcanɩ wa,
sə nə ma kòrì mʋ́,
də sʋgʋ tə nə nə swɩ̀n n con
də pubwanʋ* naaa?
12 Nə̀ń n nə fʋrɩ də lɩŋa,
n ga pʋ́pʋ̀nɩ́ n yɩ́á nətʋ!
13 Yá Yɩɩ yuu wa nə n lɩŋa zaŋa,
n ga pɩn sʋ̀ràn tə tə naŋa n nii wa!
14 Ləzwənə yɩ bɛ̀ɛ̀, ʋ ma yanɩ parɩ?
Lìù tə kan nə lɩrɩ yɩ bɛ̀ɛ̀, ʋ ma yanɩ cɩ́gá tíú?
15 Yɩɩ dàń taa nə ba ʋ malɩkɛ tə tətə yuu wa jələ,
lanworu tə tətə ga tà parɩ ʋ yáá con,
16 mə ləzwənə ʋ nə lwara, ʋ ga yɩ cʋnʋ,
ʋ mʋ̀ lìù tə nə tʋŋa kʋ̀nkʋ̀n yìə̀n,
ndə ʋ nə nywɩn nɩ́á nətʋ!
17 Cʋgʋ à con, sə à bɩrɩ mʋ́ yoo!
À wá man kʋ tə à nə nɩ, à bɩrɩ mʋ́!
18 Kʋ yɩ yoo wʋbʋnyɩna nə nɩ ba nɩbara-ba con,
yá ba swɩ̀n kʋ ba bɩrɩ, ba wà kʋ səgə.
19 Ba mʋ̀ cɩcɩ nə nə, ba yà pɩn lʋʋ nii tə,
yá vee mama tə yà wà ba wa zwɩ.
20 Wʋlʋnyiən wulə wʋwalʋ wa
dɩɩn mama, ʋ lʋʋ wúlú wa,
yá lìù tə nə fɩfɩn lɩ̀à bɩna jə nii máŋá.
21 Ʋ nə̀ń zizigu kʋ nə jə fən ʋ zɩan wa.
Cʋcʋnyiən wá ta wá
kʋ dɩ̀ ʋ yuu, sìə́ máŋá wa.
22 Ʋ ba bʋŋa də ʋ wá wànɩ́
ʋ jon ʋ tɩ̀àn yikunu jɩɩn wa,
ʋ mʋ̀ lìù tə kwatara sɩ̀ʋ́ nə dànɩ̀ wá.
23 Ʋ ywaŋa ʋ ma pɩ̀à wodiu,
ʋ yə̀ə́ də yikunu dɩɩn dànɩ̀ wá.
24 Twara də jɩgwarʋ pɩn fən gən wá,
tə kɩkarɩ wá, ndə pɩ̀ʋ́ nə ken ʋ sírí, sə ʋ ta kʋ̀ʋ̀.
25 Cɩ́gá, ʋ zɩ̀n ʋ jɩɩn ʋ zɩgɩ Yɩɩ nə,
ʋ zàn ʋ zɩgɩ Yɩɩ tə nə,
ʋ nə wulə tə mɛ yuu wa.
26 Ʋ ken ʋ yuu tɩa,
ʋ nàtànɩ̀ lələrən də̀ń,
ʋ ja dəri ʋ bɩ̀àn Yɩɩ nə.
27 Ʋ nuə, ʋ lɩ zɩkulə,
ʋ səpunə nan tə zìə̀.
28 Yá ʋ wá ya tɩ̀án wa, ba nə cʋ̀gʋ̀,
dìì wa, lìù nə wà mɛ sə ʋ zʋ tə wa,
tə nə zìə̀ sə tə buburi duən yuu yɩrɩ.
29 Ʋ kʋ́ʋ̀ bá wànɩ́ ʋ jì wiən tíú,
ʋ jɩjə tə bá mɛn lá,
ʋ jɩjə wiən tə kʋ́ʋ̀ bá sú tɩa yuu mama.
30 Ʋ bá wànɩ́ ʋ jɛ́n yikunu yáá nə.
Ʋ wá ya ndə tɩ̀ʋ́ nə,
mənvuə nə dí kʋ naywalan,
yá Yɩɩ nii vʋʋ wá jàn wá.
31 Ʋ dàn ká jələ kʋ̀nkʋ̀n yìə̀n yuu wa,
kʋ nə tà nətʋ, ʋ wá dwá ʋ tɩ̀àn,
yá kʋ̀nkʋ̀n nə wá ya ʋ ŋwɩ́rán.
32 Kʋ nətʋ tə wá tʋn,
də ʋ dɩan tə wà zwɛ̀ lʋʋ wa,
yá ʋ wá ya ndə tɩ̀ʋ́ nə,
kʋ nə kʋ́ʋ̀ wàrɩ̀ naywalʋ kʋ twè.
33 Ʋ wá ya ndə divɛn tɩ̀ʋ́ nə,
kʋ lənə nə wòrì, də tə tə wà bɩ,
nə à yə̀ə́ ndə olivə* tɩ̀ʋ́ nə,
kʋ pùnə́ nə wòrì.
34 Cɩ́gá, lɩ̀à tə nə ba Yɩɩ fən dəri bá ja dwíí,
yá mən wá də́ lɩ̀à tə dìì, ba nə də́ vwiŋə.
35 Lìù nə jɩn lwanɩ pùə́,
ʋ yàá lɩra lɛɛ,
yá won tə nə wulə ʋ waa,
wá cʋ̀gʋ̀ ʋ pùə́ nə.»