Zɔbə bɩrɩ də ləzwənə tà won mama
14
1 Zɔbə tə swɩ̀n ʋ súrí lá, ʋ wʋ́:«Ləzwənə mama yɩ kan nə lɩrɩ!
Ʋ mɩɩ ba dara lʋʋ wa,
kʋ ga sú də wʋwalʋ.
2 Ʋ nan ndə tɩ̀ʋ́ pùní nə, yá ʋ pɩ̀nɩ̀.
Ʋ dəri ʋ vìrí ndə ywárɩ́ nə, ʋ ba zɩga.
3 Yá ʋ mʋ̀ yuu wa nə n mʋ̀ Yɩɩ fin n yɩ́á!
Yá n dàń bon à mʋ̀ bʋra bwálɩ́ nə!
4 Wàà nə wàá won tə nə tà durən won,
ʋ lɩ won wa, kʋ nə yɩ durən won?
Kʋ tíú tə̀lə́!
5 Dɩan tə də cànɩ̀ tə nii,
ləzwənə nə wá fwa lʋʋ wa,
yɩ n mʋ̀ nə lɩ tə n tún.
N lɩ máŋá n tún,
ləzwənə nə wàrɩ̀ ʋ kɛ̀ń.
6 Vəvəri n yáá n kə kwa,
n ga yá wá sə ʋ yɩra zuri,
ʋ ga nì ʋ ywánɩ́,
ndə tʋtʋnʋ nə jon máŋá sə ʋ sìí.
7 Cɩ́gá, lìù wàá yala ʋ kəni tɩ̀ʋ́ də tətə nə,
də ba nə goŋi kʋ, kʋ wá pìí kʋ twà,
yá kʋ ba kwɩ̀n kʋ naywalan nə.
8 Kʋ ŋʋnan tə nə swə tə kwɩn tɩa,
kʋ dəkuu tə nə swə kʋ tɩ pùrú wa,
9 nɩ́á nə bólí kʋ yɩra,
kʋ yàá pìí kʋ twà naywalan ndə tapoo nə.
10 Yá ləzwənə mʋ̀ nə tɩga, kʋ zwɛ̀,
ləzwənə siŋu nə zwɛ̀,
bɛ̀ɛ̀ nə ʋ kʋ́ʋ̀ wàá ʋ fwa?
11 Mʋʋ nɩ́á wàá tə wɩɩ,
mʋnɛɛ tə wɩɩ tə ga kwɩ.
12 Mə nətʋ nə ləzwənə pə̀ní,
yá ʋ kʋ́ʋ̀ ba pìí ʋ zaŋa.
Ʋ bá pìí ʋ zàn dwiən nə,
də lanworu tə nə wà jɛ́n.
13 Ooo! N yà nə sɛ̀ n səgə nə ciru nə,
sə à ya yisəgə bwálɩ́ təntə wa,
kʋ ja vələ máŋá tə n lɩŋa tə nə wá tʋ,
n ga lɩ máŋá n tún n pa nə,
n nə wá pìí n bʋ́n à yoo!
14 Ləzwənə yà nə tɩ, ʋ ga pìí ʋ twi,
à tʋtʋŋɩ máŋá tə mama ciru nə,
à yà wá ja yala, kʋ va kʋ yí máŋá tə,
lìù don nə wá bà ʋ jon à yuu nə.
15 N dàń wá bon nə, yá à wá sɛ̀,
n wá twarɩ à mʋ̀ lìù tə n jɩ̀àn nə fwa.
16 Sɩ́ʋ́n nə, n dàń wá gàlà à nagalan tə,
yá n kʋ́ʋ̀ bá jələ à lwanɩ tə.
17 N wá kə à cʋna tə lɔ̀ɔ̀ wa,
n sun kʋ nii zəni,
n ga ja pɩra n pú à yolwan tə yuu nə.
18 Pɛɛn twɩ tə mumuni,
pɩ̀ràn zaŋa tə yá tə dəkurən bwálɩ́,
19 nɩ́á də́ kapana,
nacorən ga pɛ̀ tɩa pùrú:
Mə nətʋ nə n yàá pa
ləzwənə kwɩ̀n ʋ yala nə.
20 N də́ dɩ̀àn ʋ yuu wa wuuu,
yá ʋ kwɩn ʋ vìrí.
N cʋ̀gʋ̀ ʋ yapɩrɩdiə,
n ga dɩŋa wá n dʋgʋ.
21 Ba nə pɩn dun ʋ bɩ̀á nə, ʋ yəri.
Ba nə kʋ́ʋ̀ fʋfʋlɩ ba, ʋ yəri.
22 Ʋ mʋ̀ yɩ ʋ yatanaŋʋ tə càn tə cɩcɩ nə ʋ na,
yá ʋ jə̀rə́ tə wulə lúə́ pucʋnɩ wa, ʋ tətə yɩrɩ.»