Gwaran
Gwaran sagɩ tə yuu wa sʋgʋ
Sagɩ kʋ tə wa gwaran tə yɩ ba yà nuŋə də gwaran zɩla. Kʋ yɩ Yɩzərayɛlə fuən lɩ̀à tə yɩjʋnɩ 150, ba yà nə ma tʋŋa Yɩɩ tʋtʋŋɩ tə, nə wulə kʋ wa. Ba pwɛ̀ sagɩ tə saga bonu. Saga bonu təntə wa gwaran tə yɩ ba lɩ saga nədwara wa, ba kə duən nə. Kʋ nə zɩgɩ swapitərə 51, kʋ va kʋ yí swapitərə 65; də swapitərə 67, kʋ va kʋ yí swapitərə 71, tə gwaran təntə yɩ ba lɩ Davidə gwaran saga nədwara wa. Kʋ nə zɩgɩ swapitərə 42, kʋ va kʋ yí 49; də swapitərə 84, kʋ va kʋ yí swapitərə 88, tə gwaran təntə yɩ ba lɩ Kore gwaran saga nədwara wa. Kʋ nə zɩgɩ swapitərə 73, kʋ va kʋ yí swapitərə 83, tə gwaran təntə yɩ ba lɩ tə Azafə gwaran saga wa. Kʋ nə zɩgɩ swapitərə 93, kʋ va kʋ yí swapitərə 99, tə gwaran təntə yɩ ba lɩ tə, pàrɩ̀ gwaran saga wa. Kʋ nə zɩgɩ swapitərə 120, kʋ va kʋ yí swapitərə 134, tə gwaran təntə yɩ ba lɩ tə, cwəŋə vəlu gwaran saga wa.
Pʋ́pʋ́ná wulə gwaran 116 yuu con, tə nə bɩrɩ gwaran tə nə nan lá, də gwaran zɩla tə, ba nə ma kwé tə, də tə yiri nə yɩ nətʋ, də nətʋ ba nə nuŋə tə, Yɩɩ tʋtʋŋɩ tə máŋá wa, də kʋ tə yɩrɩ, ba nə dɩga tə. Gwaran duən wulə tə wa, tə nə wà nún tə zwɛ̀, ba ga kə «zɩgɩ sìí bwálɩ́» tə wa.
(1) Swapitərə tə tə yɩ gwaran tə nə pɩn dun Yuu-Tiu nə, ʋ dɩ̀àn tə, də ʋ sonu tə yɩrɩ. Tə mʋ̀ nə yɩ swapitərə 8, də 19, də 33, də 100, də 103, də 105, də 111, də 113, də 114, də 117, də 135, də 136, də 145, də 149.
(2) Swapitərə tə tə yɩ pàrɩ̀ gwaran, tə nə bɩrɩ də Yuu-Tiu yɩ pɩ̀ʋ́. Tə mʋ̀ nə yɩ swapitərə 47, də 93, də 96, də 99.
(3) Swapitərə tə tə yɩ gwaran, tə nə bɩrɩ, lɩ̀à nə jʋnɩ Yɩɩ ba pɩn pɩ̀ʋ́ nə, nə à yə̀ə́ pɩ̀ʋ́ tətə yɩjʋnɩ. Tə mʋ̀ nə yɩ swapitərə 2, də 18, də 20, də 21, də 45, də 72, də 89, də 101, də 110, də 144.
(4) Swapitərə 15, də 24, yɩ gwaran, ba nə ma zwɩ Yɩɩ dìə̀ tə wa.
(5) Swapitərə tə tə yɩ gwaran, Yɩzərayɛlə lɩ̀à tə nə yàá nun máŋá tə wa, ba nə vəli Pakə cànà tə, nə à yə̀ə́ Sə̀lə́ cànà tə. Tə mʋ̀ nə yɩ swapitərə 84, də 91, də 121, də 122.
(6) Swapitərə tə tə yɩ gwaran, tə nə bɩrɩ də Yɩɩ kúrí bwálɩ́ Zwerizalɛmə wa, sə ʋ dìə̀ tə ya lá. Tə mʋ̀ nə yɩ swapitərə 46, də 48, də 76, də 87, də 132.
(7) Swapitərə tə tə yɩ Yɩɩ joŋwana, də Yɩɩ nii sʋ̀sʋ̀nà gwaran, tə nə dwì suu Yɩɩ lɩ̀à tə nii nə, tə ga bɩrɩ ba, kʋ tə Yɩɩ nə pɩn nii, sə ba tʋn. Tə mʋ̀ nə yɩ swapitərə 14, də 50, də 53, də 75, də 81, də 95.
(8) Swapitərə tə tə yɩ gwaran, tə nə kàrɩ̀ Yɩɩ lɩ̀à tə. Tə mʋ̀ nə yɩ swapitərə 1, də 37, də 49, də 73, də 78, də 112, də 127, də 119, də 133.
(9) Swapitərə tə tə yɩ lalʋʋ tə gwaran, ba nə ma boŋə ba kəni Yɩɩ nə, càn máŋá wa. Tə mʋ̀ nə yɩ swapitərə 12, də 44, də 58, də 60, də 74, də 79, də 80, də 83, də 85, də 90, də 94, də 106, də 108, də 123, də 126, də 137.
(10) Swapitərə tə tə yɩ gwaran, Yɩɩ lìù nə wàá ʋ ma lòrì Yɩɩ, fɩfɩan, də tɩjaŋa, də yayɩgʋ yɩrɩ. Tə mʋ̀ nə yɩ swapitərə 5, də 6, də 7, də 13, də 17, də 22, də 25, də 26, də 28, də 31, də 35, də 38, də 39, də 41, də 43, də 51, də 54, də 57, də 59, də 61, də 63, də 64, də 69, də 71, də 86, də 88, də 102, də 109, də 120, də 130, də 140, də 143.
(11) Swapitərə tə tə yɩ gwaran, Yɩɩ lìù nə ma kəni Yɩɩ lɛ̀ɛ̀, ʋ nə jon wá, nə à yə̀ə́ ʋ nə kwɛn ʋ cʋna ʋ lɩ yɩrɩ. Tə mʋ̀ nə yɩ swapitərə 1, kʋ va kʋ yí 12, də 30, də 32, də 34, də 40, də 92, də 107, də 116, də 118.
(12) Swapitərə tə tə yɩ gwaran, Yɩɩ lìù nə ma bɩrɩ ʋ pupwən, də ʋ bɩcan sìə́ Yɩɩ yáá con. Tə mʋ̀ nə yɩ swapitərə 3, də 4, də 11, də 16, də 23, də 62, də 131, də 139.
Zwezi tətə nun gwaran sagɩ tə wa gwaran tə (Marəkə 14:26). Ʋ yà swɩ̀n tə yoo ʋ kàrɩ̀ duən wa (Marəkə 12:10, 36, də Gwaran 110, də 118). Ʋ yà ja tə ʋ fwa ʋ yɩjʋnɩ (Marəkə 15:34, də Likə 23:46, də Gwaran 22, də 31). Yɩɩ sagɩ nədʋn tə bɩrɩ də Kərisə càn tə yoo yà dí yáá kʋ swɩ̀n Gwaran sagɩ tə wa (Gwaran 22, də 69, də Matiə 27:34-48). Gwaran swapitərə 16, də 110, də 118 wa, kʋ yà dí yáá kʋ bɩrɩ də Zwezi wá pìí ʋ bwin ʋ nan, də dun. Piyɛrə pìí ʋ lìí sʋ̀ràn təntə (Tʋ̀tʋ̀nán 2:4).
Gwaran tə yà yɩ Yɩzərayɛlə lɩ̀à tə, də Zwezi, də təntən Kərisə lɩ̀à tə yɩjʋnɩ (Tʋ̀tʋ̀nán 4:24-26). Gwaran sagɩ tə tə wulə də zə̀n mama, sə lìù mama ywàń kʋ wa, ʋ pɩ̀à sʋ̀ràn tə, ʋ nə wá ma swɩ̀n Yɩɩ con.