Zwansɩsarɩ
Zwansɩsarɩ sagɩ tə yuu wa sʋgʋ
Sagɩ kʋ tə yɩ zwansɩsarɩ kapʋpʋ saga, də saga tə nə pɩn wʋbʋŋa, ba ken duən nə, ba ma fwa kʋ. Tə mama yɩ ba jələ tə, ba pɩn pɩ̀ʋ́ Salʋmʋn nə, ba nə jələ wá Yɩzərayɛlə wa, də ʋ yɩ wʋbʋnyiən tə, ʋ nə ba kamandon jə yɩrɩ. Swansɩsarɩ sagɩ tə, də saga duən nə yɩn Yɩzərayɛlə lʋʋ tə mama wa, tə nə yɩ saga ba nə mɛ, sə ba ma kàrɩ̀ lɩ̀à máŋá mama wa. Saga tə ba nə ken duən nə, ba ma fwa zwansɩsarɩ sagɩ tə, yɩ tə nan bwálá kapʋpʋ. Sagɩ tə wàá kʋ pwɛ̀ bwálá batwa.
Kʋ təntən bwálɩ́ tə yɩ sagɩ tə mama yuu wa sʋgʋ, kʋ nə yɩ ndə kàrà nə, ka nə bɩrɩ zwansɩsarɩ tə tʋtʋŋɩ, də wʋbʋŋa nə jə nywarɩ nətʋ. Kʋ mʋ̀ nə yɩ swapitərə 1, kʋ va kʋ yí swapitərə 9. Swapitərə 8 vɛrəse 12, kʋ va kʋ yí vɛrəse 31 wa, sagɩ tə swɩ̀n wʋbʋŋa yoo, ndə ləzwənə nə, yìə̀n kapʋpʋ wa, tə nə jə fɩra. Bwálá təntə wa, wʋbʋŋa yɩ ndə ka mʋ̀ də Yɩɩ nə tʋŋa də duən.
Bələ nii bwálɩ́ tə yɩ sagɩ tə titəŋi, kʋ nə bɩrɩ kʋ tə sagɩ tə nə yɩ. Kʋ mʋ̀ nə yɩ swapitərə 10, kʋ va kʋ yí swapitərə 29. Kʋ bwálɩ́ təntə yɩ Salʋmʋn zwansɩsarɩ nə wulə kʋ wa. Kʋ mʋ̀ nə yɩ swapitərə 10 vɛrəse 1, kʋ va kʋ yí swapitərə 22, vɛrəse 16, də swapitərə 25 vɛrəse 1, kʋ va kʋ yí swapitərə 29 vɛrəse 27. Wʋbʋnyɩna duən də sagɩ yɩn lá, ba nə súrí Salʋmʋn nyiən tə nə. Tə mʋ̀ nə yɩ swapitərə 22 vɛrəse 17, kʋ va kʋ yí swapitərə 24 vɛrəse 22, də swapitərə 24 vɛrəse 23, kʋ va kʋ yí vɛrəse 34 wa.
Batwa nii bwálɩ́ tə wulə swapitərə 30 də 31 wa. Kʋ bwálɩ́ təntə pwɛ̀ bwálá banɩa, tə nə ba yoo nədʋ swɩ̀n. Tə bwálá bələ bɩrɩ nəba wʋbʋnyɩna tə, ba nə tà Yɩzərayɛlə lɩ̀à wʋbʋŋa nə yɩ nətʋ. Kʋ mʋ̀ nə yɩ swapitərə 30 vɛrəse 1, kʋ va kʋ yí vɛrəse 14, də swapitərə 31 vɛrəse 1, kʋ va kʋ yí vɛrəse 9.
Zwansɩsarɩ sagɩ tə ba bɩrɩ nətʋ, Yɩzərayɛlə lɩ̀à nə yɩn, də kʋ tə, ba nə wá ya, ndə saga duən nə fwa nətʋ, Yɩɩ sagɩ tə wa. Kʋ kàrà tə yɩ lìù mama kʋ kàrɩ̀. Kʋ kwìə̀ tə yɩ tə pɩ̀à sə lìù mama jì ləzwənzəŋu, ʋ ga ya pupwən wa də Yɩɩ. Wʋbʋŋa tə sagɩ tə nə bɩrɩ yɩ yìə̀n, tə nə yɩn ləzoni pwə́rə́ wa fuən nə. Wʋbʋŋa təntə bɩrɩ də wʋlʋnyɩna də ləyirən də jɩjə tɩ̀án duən yàá cʋ̀gʋ̀, càn ga yí ba. Yá cɩ́gá tɩ̀án, də wʋbʋnyɩna, də lɩ̀à tə ba nə ywàŋá zʋra yuu nə, yàá na ŋwɩran. Sagɩ tə titəŋi bwálɩ́ tə bɩrɩ pwɩa tə nə wulə, cɩ́gá tíú də wʋlʋnyiən pwə́rə́ wa. Cɩ́gá tíú yɩ lìù tə, ʋ nə zìlí kʋ tə, ləzwənə nə mɛ sə ʋ ya, ʋ ga zìlí tɩa yuu wiən tə, də lʋʋ ləzoni tə, tə nə yɩ Yɩɩ nə pɩn tə wulə. Wʋlʋnyiən mʋ̀ ba won mama jələ. Zwansɩsarɩ sagɩ tə pɩn nə lwarɩ, Yɩzərayɛlə lɩ̀à tə nə jə wʋbʋŋa nəzəŋu nətʋ. Kʋ tə bɩrɩ nəba, ba wʋbʋnyɩna tə nə jələ ləzwənə yɩra yìə̀n tə nətʋ, máŋá mama wa.