Zwansɩsarɩ
KWIƏ TƏ NƏ BƖRƖ LƏZWƏNƏ NƏ MƐ, SƏ Ʋ JA WƲBƲŊA NƏTƲ
Won tə yɩrɩ, zwansɩsarɩ sagɩ tə nə pʋ́pʋ́nɩ́
1
1 Zwansɩsarɩ tə tə yɩ Davidə bìú Salʋmʋn, ʋ nə yɩn Yɩzərayɛlə pɩ̀ʋ́, nə swɩ̀n tə.2 Zwansɩsarɩ təntə pɩn wʋbʋŋa lɩ̀à nə, tə ga kàrɩ̀ ba, tə pɩn ba lwarɩ pubʋŋa sʋ̀ràn də̀ń.
3 Tə pori lɩ̀à yɩ́á,
tə pɩn ba twá cɩ́gá nə,
ba tʋŋa kʋ tə nə mɛ,
ba ga yɩ cɩ́gá tɩ̀án Yɩɩ yáá con.
4 Tə pɩn ləyirən cɩ̀ ba tɩ̀àn nə.
Tə pɩn yənu də pubʋŋa ləzwəndʋn nə.
5 Wʋbʋnyiən tətə wá cʋgʋ tə,
ʋ ma súrí ʋ wʋbʋŋa.
Yá swɩan tíú də wá na kwìə̀ tə wa,
tə nə wá kə wá cwəŋə nə.
6 Tə wá pa ba lwarɩ zwansɩsarɩ, də sɩsalwarɩ də̀ń,
ba ga lwarɩ yosəgu tə nə wulə wʋbʋnyɩna sʋ̀ràn wa.
7 Ká dəri Ba-Yígúrə́-Jə-Tiu fən,
nə yɩ wʋbʋŋa də̀ń laŋʋ.
Ləyirən cɩcɩ nə gònì wʋbʋŋa də kàrà.
WƲBƲNYIƏN KWIƏ
Ka cɩ̀ tɩ̀àn nə də dabakʋkwɩnan
8 À bìú, jon kwìə̀ tə, n nyɩna nə pɩn mʋ́.
Yá dàn ká vɩ kàrà tə, n nuu nə kàrɩ̀ mʋ́.
9 Cɩ́gá, tə yɩ ndə pubwanʋ yukoli nə, n yuu nə,
tə ga yɩ ndə zànán nə, n bɩan nə.
10 À bìú, cʋna lɩ̀à nə pɩ̀à ba gɩgarɩ mʋ́,
ba pa n twá tʋn cʋna,
dàn ká sɛ̀.
11 Ba nə swɩ̀n n con, ba wʋ́:
«Bà n twá nə nə,
sə nə và vɩnvan, nə ma gʋ lɩ̀à.
Nə səgə nə ta lɩ̀à tə də tətə,
ba nə wà yoo cʋ̀gʋ̀.
12 Nə pùrə̀ ba ndə tɩan nə, də ba nəŋə,
nə kalɩ nə gʋ.
Nə wá gʋ ba, də ba yɩra tə zurə,
ndə lɩ̀à nə, ba nə kɛ́n ba tʋ.
13 Nə wá na wozəŋə yiri mama,
nə ja bà nə sú nə dìì.
14 N wá na n tori nə con.
Nə mama jɩjə púrí wá ya nədʋ!»
15 À bìú, dàn ká twá ləzwənyirə təntə nə.
Lɩ n nɛɛ ba nɛɛ wa.
16 Cɩ́gá, ba nɛɛ lɩŋa tɩa,
ba ma tʋŋa lwanɩ.
Yá ba yàá bɩbarɩ ba lwɛ́ jana.
17 Cɩ́gá, ba ba zunjanʋ kəni zuŋi yɩ́á yuu,
sə ba ma ja tə.
18 Yá ba mʋ̀ lɩ̀à təntə yɩ ba tətə jana nə, ba vɩnvan tə wá lwá.
Ba tətə mɩɩ nə, ba nyala tə wá pìí tə lɩ.
19 Mə lìù tə nə swə gɩgɩrɩ wiən yígúrə́ wá ya nətʋ.
Kʋ yàá lɩ lɩ̀à tə nə tʋŋa kʋ nətʋ tə mɩɩ.
Wʋbʋŋa bwə̀rə́
20 Wʋbʋŋa bòrì coŋi yuu,
ka zɩ̀n ka kori yɩɩ nə, kanpwərən wa.
21 Ka bòrì kunə wa,
ka swɩ̀n sʋ̀ràn tə tə tɩʋ tə mimien nə, ka wʋ́:
22 «Ləyirən-ba, á wá sóní ləyiri, á mɛ nətə?
Bɩyɩrɩ də́rə́-ba, á wá sóní bɩyɩrɩ diŋə, á mɛ nətə?
Sə á mʋ̀ Ləbibənən-ba, á wá culi yənu, kʋ mɛ nətə?
23 Á cʋga à kwìə̀ tə!
Á nəŋə, à wá pa à siŋu* tə cú á yuu wa,
à ga wá pa á yəni à sʋ̀ràn tə.
24 À bon aba, yá á vɩga.
À larɩ à jɩɩn á con,
yá lìù mama wà à con tan.
25 Á vɩga à kwìə̀ tə mama,
yá á wà sɛ̀, sə à caga á nii nə.
26 Kʋ mʋ̀ yɩrɩ, à də wá mʋn aba,
dɩɩn tə nə, yobɩbɩlʋ nə wá yí aba.
À wá də́ bɩyɩrɩ á yɩra,
dɩɩn tə nə, fən nə wá zʋ aba.
27 Dɩɩn don nə, fən wá zʋ aba, ndə dwavʋʋ nə zàn,
yá yobɩbɩlʋ ga dɩ̀ á yuu, ndə kùlì nə.
Pucʋnɩ də wʋwalʋ wá yí aba.
28 Yá kʋ máŋá təntə wa,
á dàń wá bon nə, yá à bá le aba.
Á wá pɩ̀à nə, yá á bá na nə.
29 Kʋ wá ya nətʋ, á nə vɩga yənu,
á ga wà kúrí á tì,
sə á dəri Ba-Yígúrə́-Jə-Tiu fən yɩrɩ.
30 Kʋ wá ya nətʋ, á nə vɩga à kwìə̀ tə,
á ga vɩ, sə à caga á nii nə tə yɩrɩ.
31 Kʋ mʋ̀ yɩrɩ, á wá də́ á yʋa tə lənə,
yá á kwìə̀ tə dàń wá sú aba.
32 Cɩ́gá, ləyirən nə ba kwìə̀ joŋə tə, nə gwɩ ba.
Yá ləbibənən nə ba pubʋŋa jə tə, nə cʋ̀gà ba.
33 Yá lìù tə, ʋ nə cʋga à kwìə̀,
kʋ tíú wá na sìə́ ʋ dìə̀ wa.
Ʋ wá ya sìə́ wa, yobɩbɩlʋ fən bá ja wá.»