Wʋbʋŋa nə kwɛn lìù nətʋ
2
1 À bìú, jon à kwìə̀ tə,n ga twá yìə̀n tə nə, à nə pɩn nii tə yuu wa.
2 Cʋgʋ wʋbʋŋa sʋ̀ràn zəni,
n ga kə dɩ̀àn, n nì tə də̀ń.
3 Awoo! Pɩ̀à pubʋŋa, n ma san n tɩ̀àn nə,
n ga pɩ̀à pubʋnzəŋu n pa n tɩ̀àn nə.
4 Pɩ̀à tə ndə səbiu nə,
nə à yə̀ə́ ndə jɩjə wiən nə.
5 Kʋ nətʋ wá pa, n lwarɩ nətʋ tə, n nə mɛ,
sə n dəri Ba-Yígúrə́-Jə-Tiu fən.
Yá n dàń wá wànɩ́ n lwarɩ Yɩɩ.
6 Cɩ́gá, Ba-Yígúrə́-Jə-Tiu pɩn wʋbʋŋa.
Ʋ nii sʋ̀ràn pɩn yənu də pubʋnzəŋu lɩ̀à nə.
7 Ʋ jə sáŋʋ́, ʋ ma saŋa cɩ́gá tɩ̀án nə,
ʋ ga yɩ ndə nàtànà nə, ʋ cɩ̀ pùə́ nədʋ tɩ̀án nə.
8 Ʋ fwa kʋ nətʋ,
ʋ ma joŋə lɩ̀à tə nə tì cɩ́gá cwəŋə,
ʋ ga ywàŋá ʋ lɩ̀à tə yuu, ba nə zìlí ʋ nii.
9 N nə cʋgʋ à kwìə̀,
n wá lwarɩ də ka twá cɩ́gá nə,
də ka tʋn kʋ tə nə mɛ, də ka ya cɩ́gá tíú,
tə mama yɩ coŋi, tə nə vəli ywánɩ́ bwálɩ́ nə.
10 Cɩ́gá, wʋbʋŋa wá bà n bɩcan wa,
yá yənu wá pa mʋ́ pupwən.
11 Pubʋŋa wá cɩ̀ n nə,
pubʋnzəŋu ga ywàń n yuu.
12 Tə wá lɩ mʋ́ lwanɩ fwaŋʋ wa,
tə ga jon mʋ́ lìù tə nə swɩ̀n sʋkʋkwɩnan jɩɩn wa,
13 də lɩ̀à tə jɩɩn wa, ba nə pìí ba yá cɩ́gá cwəŋə,
ba ga tì yikunu cwəŋə.
14 Ba mʋ̀ lɩ̀à təntə swə ka tʋn lwanɩ,
ba ga jwɛ yokʋkwɩnan tə yɩrɩ, ba nə tʋŋa.
15 Ba yɩ lɩ̀à tə, ba nə tʋŋa yogugwələn,
ba ba cɩ́gá cwəŋə tì.
16 N nə cʋgʋ à kwìə̀,
kʋ wá pa n cɩ̀ n tɩ̀àn nə, də lìù don kan,
də kavee tə, ʋ sʋ̀ràn nə yɩ gɩgara.
17 Kan yiri təntə yàá vɩ bɛɛ tə, ʋ nə kúrí ʋ tì, ʋ zandʋan wa.
Yá ʋ yàá swɛ̀ɛ́ nimarʋ* tə ʋ nə tún ʋ Yɩɩ tə yáá con.
18 Ʋ yʋa tə wá gʋ ʋ də ʋ dìə̀ lɩ̀à.
Yá ʋ tʋtʋnɛɛ janɩ wá tə vəli ciru*.
19 Lìù ba ʋ con vəli, ʋ ga pìí ʋ twi.
Kʋ tíú ma kʋ́ʋ̀ bá na mɩɩ cwəŋə də.
20 Kʋ mʋ̀ yɩrɩ, n dàń tì ləzwənzəŋə cwəŋə,
n ga twá cɩ́gá tɩ̀án tʋtʋnɛɛ nə.
21 Cɩ́gá, cɩ́gá tɩ̀án nə wá ya lʋʋ nii tə wa.
Pùə́ nədʋ tɩ̀án nə wá tɩnɩ kʋ.
22 Yá Yɩɩ wá dɩŋa wʋlʋnyɩna tə mʋ̀, ʋ lɩ lʋʋ nii tə wa.
Ʋ wá dɩŋa cʋna lɩ̀à tə, ʋ lɩ kʋ wa.