Wʋbʋŋa də ka dəri Yɩɩ fən
3
1 À bìú, dàn ká swɛ̀ɛ́ kàrà tə, à nə bɩrɩ mʋ́.Ja yìə̀n tə, à nə pɩn nii tə yuu wa, n bɩcan wa.
2 Cɩ́gá, tə wá pa n mɩɩ ya danɩ lʋʋ wa,
n ga wá ya sìə́ wa.
3 Dàn ká pa wʋywaŋʋ də cɩ́gá ya ŋʋ́nɩ́ də mʋ́.
Vwa tə n bɩan nə,
n ga pʋ́pʋ́nɩ́ tə, n bɩcan wa.
4 Kʋ nətʋ wá pa n yəni n tɩ̀àn janʋ,
yá Yɩɩ də ləzoni wá fwa pubwanʋ n yɩra.
5 Vwa n tɩ̀àn Ba-Yígúrə́-Jə-Tiu yɩra, də n bɩcan mama.
Dàn ká jələ n tətə pubʋŋa yuu wa.
6 Lìí ʋ yoo, n tʋtʋŋɩ mama wa,
yá ʋ wá kwɛn n coŋi, ʋ pa mʋ́.
7 Dàn ká bʋ́n n waa con, də n yɩ wʋbʋnyiən.
Dəri Ba-Yígúrə́-Jə-Tiu fən,
n ga lɩ n tɩ̀àn lwanɩ wa.
8 Kʋ wá pa yazurə n yatana nə,
kʋ ga pa n nandaran ja dɩ̀àn.
9 Tì n jɩjə tə, də n vanan, də n kʋna təntən bɩ̀á,
n ma pa dun Ba-Yígúrə́-Jə-Tiu nə.
10 Yá n pulən dàń wá sú də mɩna,
n divɛn gwàlán ga sú, tə pàlɩ̀, də divɛn nədʋn.
11 À bìú, dàn ká gwìə̀n kàrà tə, Ba-Yígúrə́-Jə-Tiu nə kàrɩ̀ mʋ́.
Dàn ká pa n pùə́ cʋ̀gʋ̀, də ʋ nə caga n nii nə.
12 Cɩ́gá, Ba-Yígúrə́-Jə-Tiu yàá caga lìù tə ʋ nə swə, nii nə,
ndə nyɩna nə yàá caga bìú tə ʋ nə swə, nii nə nətʋ.
13 Pupwən lìù nə yɩ lìù tə nə jə wʋbʋŋa,
də lìù tə nə jə pubʋnzəŋu!
14 Cɩ́gá, wʋbʋŋa jə sáŋʋ́, ka doni səbiu.
Ka jə nywarɩ ka doni sɩ́án.
15 Ka jə funə ka doni bwanzɩla.
Yá won tə̀lə́, kʋ nə jə fɩra, ndə wʋbʋŋa nə.
16 Ka vàn don yɩ mɩdarɩ,
kʋ don ga yɩ jɩjə də dun.
17 Ka tʋ̀tʋ̀nán jə fɩra,
yá ka coŋi tə mama vəli sìə́ bwálɩ́ nə.
18 Wʋbʋŋa yɩ ndə tɩ̀ʋ́ nə,
kʋ lənə nə pɩn mɩɩ lɩ̀à tə nə, ba nə tʋŋa də ka.
Yá lɩ̀à tə nə jə ka yɩ pupwən lɩ̀à.
19 Wʋbʋŋa nə, Ba-Yígúrə́-Jə-Tiu ma dɩ lʋʋ.
Pubʋŋa nə, ʋ ma fwa lanworu.
20 Kʋ twá də ʋ yənu dɩ̀àn, bʋʋ nəfarʋ* tə nabuliyɩa tə ma súrí,
yá bakwan ga pɩn dwà nɩ̀.
21 À bìú, kə dɩ̀àn n ja pubʋŋa də pubʋnzəŋu,
dàn ká pa tə jɛ́n n yáá nə.
22 Tə wá pa mɩɩ n jə̀rə́ nə,
tə ga ya ndə zàŋʋ́ nə, n bɩan nə.
23 N dàń wá va n cwəŋə wa də bɩcan sìə́,
yá n naa bá mà won nə.
24 N nə tígə́, fən bá ja mʋ́,
yá n nə dwɛ̀, n dwiən wá ya ywánɩ́.
25 Dàn ká pa fən ja mʋ́, də yobɩbɩlʋ nə dɩ̀gà n yuu,
nə à yə̀ə́ wʋlʋnyɩna nə zàn ba zɩga n nə.
26 Cɩ́gá, Ba-Yígúrə́-Jə-Tiu nə wá ya n sáŋʋ́,
yá ʋ wá cɩ̀ n nə, də yojanʋ yiri mama.
Wʋbʋnyiən nə mɛ, sə ʋ ja ʋ jəndon nətʋ
27 Dàn ká vɩ, sə n tʋn zəni lìù yɩra, ʋ nə pɩ̀à sáŋʋ́,
də n nə jə kʋ dɩ̀àn.
28 Dàn ká swɩ̀n n jəndon con, n wʋ́:
«Vəli sə pìí bà jwɩan nə,
à wá pa mʋ́ kʋ tə n nə pɩ̀à!»
Yá n yà wàá kʋ wá n pɩn sɩ́ʋ́n sɩ́ʋ́n.
29 Dàn ká bʋ́n yolwan n kə n jəndon yuu wa,
ʋ nə wulə də mʋ́ də pùə́ nədʋ.
30 Dàn ká dɩ jara də lìù tʋtʋ,
yá ʋ ga wà yolwan mama tʋn n yɩra.
31 Dàn ká pa lìù tə nə tʋŋa dɩ̀àn lɩ̀à yɩra wiən yimən ja mʋ́.
Dàn ká twá ʋ tʋtʋnɛɛ nə.
32 Cɩ́gá, Ba-Yígúrə́-Jə-Tiu culi lìù tə nə tʋŋa yogugwələn,
yá ʋ yɩ cɩ́gá tɩ̀án mʋ̀ dabɛɛ.
33 Ba-Yígúrə́-Jə-Tiu yàá cʋ̀gʋ̀ wʋlʋnyiən dìə̀,
yá ʋ fwa zəni cɩ́gá tɩ̀án mʋ̀ yɩra, bwálɩ́ tə nə, ba nə wulə.
34 Ʋ yàá də́ bɩyɩrɩ, bɩyɩrɩ də́rə́ yɩra,
yá ʋ tʋŋa pubwanʋ lɩ̀à tə yɩra, ba nə muŋə ba tɩ̀àn.
35 Dun nə wá ya wʋbʋnyɩna tori,
yá ləyirən mʋ̀ wá də́ cavɩra zənzən.