Nyɩna kwìə̀
4
1 À bɩ̀á-ba, á cʋga nyɩna kwìə̀.Á cʋga zəni, sə á ya pubʋnyɩna.
2 Cɩ́gá, kʋ yɩ kwìə̀ nəzəŋu nə, à pɩn aba,
á dànà ká vɩ à kàrà tə.
3 À də yɩn bisɩmaa à nyɩna yáá nə,
à yɩn bisɩmazəŋu tə, à nuu nə sóní zənzən.
4 À nyɩna yà pɩn nə kwìə̀, ʋ wʋ́:
«Ja à sʋ̀ràn tə, n bɩcan wa zəni.
Twá yìə̀n tə nə, à nə pɩn nii tə yuu wa,
yá n wá na mɩɩ.
5 Pɩ̀à wʋbʋŋa də pubʋŋa n pa n tɩ̀àn nə.
Dàn ká swɛ̀ɛ́ à nii sʋ̀ràn tə,
nə à yə̀ə́ n dʋgʋ tə vàn nə.
6 Dàn ká vɩ wʋbʋŋa n dʋgʋ,
yá ka wá cɩ̀ n nə.
Sóní ka, yá ka wá ywàń n yuu nə.
7 Nə̀ń wʋbʋŋa də̀ń laŋʋ nə yɩ nətʋ:
Dí yáá n pɩ̀à wʋbʋŋa, n pa n tɩ̀àn nə,
n ga tì won tə mama n nə jə,
n ma pɩ̀à pubʋŋa, n pa n tɩ̀àn nə.
8 Bʋ wʋbʋŋa nə, yá ka wá zɩ̀n mʋ́ yɩɩ nə.
N nə sóní ka, ka wá ya n dun.
9 Ka wá pú pubwanʋ yukoli n yuu nə,
ka ga nàn mʋ́ də dun yupuu.
10 À bìú, cʋgʋ à con, n ga jon à sʋ̀ràn tə,
yá kʋ nətʋ wá pa n mɩɩ ya danɩ lʋʋ wa.
11 À bɩrɩ mʋ́ wʋbʋŋa cwəŋə,
à ga kə mʋ́ cɩ́gá coŋi wa.
12 N nə wulə n vəli, won bá cɩ̀ n vəli nə,
yá n nə dəri də, n bá tʋ.
13 Ja kwìə̀ tə n nə nɩ zəni, dàn ká dʋgʋ tə.
Cɩ tə nə zəni, tə yɩ n mɩɩ.
14 Dàn ká zʋ wʋlʋnyɩna cwəŋə wa,
dàn ká twá yolwafwana yofwanɛɛ nə.
15 Dʋgʋ ka vàn nə, dàn ká tì ka.
Kɩkarɩ, n twá kwa, n kɛ̀ń.
16 Cɩ́gá, lɩ̀à təntə yàá wàrɩ̀ ba dwɛ̀,
də ba nə wà yolwan tʋn.
Dwiən yàá ba ba janɩ,
də ba nə wà pɩn lìù tʋ.
17 Cɩ́gá, wʋlʋŋʋ yɩ ndə ba nii wodiu nə,
yá ka tʋn dɩ̀àn lɩ̀à yɩra yɩ ndə ba divɛn nə.
18 Yá cɩ́gá tɩ̀án mʋ̀ cwəŋə yɩ ndə tɩbɩlakʋnʋ poni nə,
kʋ yàá pɩ̀rɩ̀ wuuu, kʋ va kʋ yí yɩcaʋ gùlú.
19 Wʋlʋnyɩna cwəŋə yɩ ndə yikunu nə,
ba yəri won tə, kʋ nə wá pa ba tʋ.
20 À bìú, cʋgʋ à sʋ̀ràn tə zəni,
guni n zɩɩn, n cʋgʋ à kwìə̀ tə.
21 Dàn ká pa tə jɛ́n n yáá nə,
ja tə n bɩcan wa zəni.
22 Cɩ́gá, tə pɩn mɩɩ lɩ̀à tə nə, ba nə pɩ̀à tə ba na,
tə ga kəni yazurə ba yɩra mama wa.
23 Ja n bɩcan tə zəni, n doni won don mama.
Cɩ́gá, kʋ mʋ̀ nə yɩ n mɩɩ tə dɩ̀àn.
24 Cɩ n nii nə də kʋ̀nkʋ̀n yìə̀n,
n ga cɩ̀ n nəndəli nə də gɩgɩra.
25 Zɩ̀n n yɩ́á yɩɩ nə, n ywàń n yáá.
Súrí n yɩ́á, n ywàń n yáá mənəmənə də cɩ́gá.
26 Dí yáá n kwɛn cwəŋə tə, n nə wá tì,
yá kʋ wá pa n coŋi tə mama ya zəni.
27 Dàn ká yori n kə jɩzən, nə à yə̀ə́ jɩgwiə.
Pa n də yolwan ya ŋʋ́nɩ́ də duən.»