Yoo tə nə wá yí lìù tə nə cwàrɩ̀
5
1 À bìú, cʋgʋ à wʋbʋŋa sʋ̀ràn tə,n ga guni n zɩɩn, n cʋgʋ à pubʋŋa sʋ̀ràn tə zəni.
2 Kʋ wá pa n ja pubʋŋa,
n nii ga swɩ̀n yənu sʋ̀ràn.
3 Cɩ́gá, lìù don kan nii sʋ̀ràn ywán ndə tʋ̀ràn nə,
tə ga bwànà tə doni nʋga.
4 Yá kʋ yígúrə́ wa, tə yàá cà kwalʋkwalʋ, ndə kala nə,
tə ga cʋ̀gà ndə sɩ̀ʋ́ nə, kʋ nə jə níə́ bələ.
5 Ʋ tʋtʋnɛɛ yɩ tə ja wá tə vələ tɩan wa.
Ʋ nɛɛ yɩ tə tì ciru* cwəŋə mənəmənə.
6 Ʋ ba cwəŋə tə nə pɩn mɩɩ yoo bʋŋa.
Ʋ coŋi tə yàá gugurə, tə jɛ́n ʋ yáá nə, yá ʋ yəri.
7 Yá sɩ́ʋ́n nə, à bìú, cʋgʋ à con,
dàn ká dʋgʋ à nii sʋ̀ràn tə vàn nə.
8 Cɩ n tɩ̀àn nə də kan yiri təntə,
dàn ká bólí ʋ dìə̀ mimii yɩra də tətə.
9 Kʋ nə tà nətʋ, n wá pa n dun lɩ̀à duən nə,
yá kanbarɩ tə də bá dəri n yinəgə, ʋ ma gʋ mʋ́.
10 Kʋ nə kʋ́ʋ̀ tà nətʋ, vərə nə wá də́ n jɩjə tə,
yá n yacara tə ŋwɩ́rán dàń wá zʋ lìù don dìə̀.
11 Yá n mɩɩ tə yígúrə́ wa,
máŋá tə, n dɩ̀àn nə wá zwɛ̀,
n wá kwi, n sisigi.
12 N dàń wá swɩ̀n, n wʋ́: «Bɛ̀ɛ̀ nə pɩn à ma vɩ kwìə̀?
Bɛ̀ɛ̀ nə pɩn à ma vɩ, sə ba caga à nii nə?
13 Bɛ̀ɛ̀ nə pɩn à wà à karnyɩna-ba sʋgʋ jon?
Bɛ̀ɛ̀ nə pɩn à wà lɩ̀à tə yà nə kàrɩ̀ nə, cʋgʋ zəni?
14 Kʋ yà ga mancɩn, sə yobɩbɩlan tə mama yí nə,
lalʋʋ tə mama púlí tə titəŋi wa.»
Bɛɛ mɛ sə ʋ sóní ʋ zandʋan kan
15 Nyʋn n tətə nɩ́á gwàlʋ́ kʋ də̀ń nə lu wa nɩ́á,
tə tə nə bùlì tə naŋa n tətə vɩlɩ wa.
16 N nabuliyɩa mɛ sə tə pàlɩ̀ coŋi yuu wa naaa?
N nacoŋi mɛ sə tə dəri kanporu wa naaa?
17 Tə mɛ sə tə ya n cɩcɩ nyiən,
dàn ká tara tə də vərə.
18 Yɩɩ wá fwa zəni n nabuliyii tə yɩra,
n ga fwa pupwən də n zandʋan kan tə.
19 Ʋ jə sonu ndə naŋa nə,
ʋ ga jə fɩra, ndə felə nə.
Salɩ ʋ yɩla titəŋi wa máŋá mama, n ga sóní wá zənzən máŋá mama wuuu.
20 À bìú, bɛ̀ɛ̀ dàń nə wá pa lìù don kan fɩra ja mʋ́,
sə n ma pìí n janɩ kavee yɩlɩ nə?
21 Cɩ́gá, Ba-Yígúrə́-Jə-Tiu yə̀ə́ ləzwənə tʋtʋnɛɛ,
ʋ ga na kʋ tə mama ləzwənə nə tʋŋa.
22 Wʋlʋnyiən yolwana tə yàá pìí tə yí ʋ tətə,
yá ʋ cʋna tə dàń yàá ja wá, ndə nyalɩ nə.
23 Ʋ wá tɩ, ʋ nə wà kwìə̀ jon yɩrɩ,
yá ʋ wá jɛ́n, ʋ ləyiri tə nə dáá tə ja lɛ yɩrɩ.