Nikanɩ yuu wa kwìə̀
6
1 À bìú, n nə zɩgɩ n jəndon jɩŋɩ jɩrɩmʋ,n nə kàn nii də lìù,
2 n nii sʋ̀ràn nə ken mʋ́ yoo wa,
n nə swɩ̀n n ja n tɩ̀àn,
3 à bìú, nə̀ń kʋ tə, n nə mɛ sə n fwa, n ma jon n tɩ̀àn.
N nə jɩn n tɩ̀àn n pa n jəndon tə nə yɩrɩ,
vəli n yí wá, n cú n tɩ̀àn tɩa,
n ga lòrì wá pwəpwə, sə ʋ yá.
4 Dàn ká dwɛ̀ də mama,
dàn ká zílí də tətə.
5 Vʋvʋgʋ n tɩ̀àn n jon,
ndə felə nə gwɩ̀n twanbɛɛ jɩɩn wa,
nə à yə̀ə́ ndə zuŋə nə gwɩ̀n lìù jɩɩn wa.
Yayɩa yuu wa kwìə̀
6 Yayɩnyiən, vəli n ywàń mɩ̀mɩ̀nà nə tʋŋa nətʋ,
n ma pɩ̀à wʋbʋŋa, n pa n tɩ̀àn nə.
7 Mɩ̀mɩ̀nà ba pɩ̀ʋ́ jə, ka ba yáá tíú,
ka ma ba tʋ̀tʋ̀nán yuu-tiu jə.
8 Yá ka yàá tanɩ ka wodirən ka tún tɩpuri wa.
Woceri wa nə, ka yàá pɩ̀à ka wodirən ka tún.
9 Yayɩnyiən, n wá pə̀ń kʋ dán kʋ mɛ nətə?
Máŋá kwà wa nə, n wá zàn n dwiən tə nə?
10 Mancɩn, n mʋ̀ wulə n zílí,
mancɩn, n kʋkwalɩ n jɩ̀àn n nyʋnɩ nə, n ja tígə́,
mancɩn, n dwɛ̀!
11 Kʋ mʋ̀ nə wá pa zʋrɩ ja mʋ́, kʋ dɩ̀ n yuu, ndə ŋwɩ̀àn nə,
yá yinəgə ga yí mʋ́, ndə ladɩa nə vɩrɩ mʋ́.
Yoo tə nə wá yí kʋ̀nkʋ̀nʋ
12 Ləzwənyalʋ, wʋlʋnyiən nə yɩ lìù tə,
ʋ nə twá lá ʋ kʋ̀nɩ̀ kʋ̀nkʋ̀n tɩa mama.
13 Ʋ yàá swɩ̀n də ʋ jɩjɩga ʋ yɩ́á,
də ʋ fɛn ʋ nɛɛ tɩa, ʋ ga maŋa də ʋ jɩfwɩ.
14 Pubʋnkʋkwɩnan cɩcɩ nə súə́ ʋ bɩcan.
Ʋ bʋŋa lwanɩ yoo máŋá mama,
ʋ ga vwe lɩ̀à yun duən nə.
15 Kʋ mʋ̀ nə pɩn, ʋ tɩan də ba dɩɩn jə.
Ʋ wá kɛ́n ʋ tʋ naa nədʋ, ʋ ga bá na sáŋʋ́.
Kʋ tə Ba-Yígúrə́-Jə-Tiu nə culi
16 Wiən bardʋ nə wulə, Ba-Yígúrə́-Jə-Tiu nə culi.
Tə yí barpɛ də tətə, tə nə yɩ yobalwaran ʋ yáá con.
17 Kʋ yɩ yigwənə, də nii tə nə ba cɩ́gá swɩ̀n,
də jɩ̀àn tə nə lɩ lɩ̀à mɩan tʋtʋ,
18 də bɩcan tə nə bʋŋa yolwana,
də nɛɛ tə nə dəri lala, tə vəli tə tʋŋa lwanɩ,
19 də dansɩa lìù tə nə kʋ̀nɩ̀ kʋ̀nkʋ̀n,
də lìù tə nə vwe nubɩa yun duən nə.
Bacwaan yuu wa kwìə̀
20 À bìú, ja yìə̀n tə, n nyɩna nə pɩn mʋ́ nii tə yuu wa, n bɩcan wa.
Dàn ká vɩ kàrà tə, n nuu nə kàrɩ̀ mʋ́.
21 Ja tə n bɩcan wa máŋá mama,
vwa tə n bɩan nə.
22 Tə mʋ̀ nə wá bɩrɩ mʋ́ cwəŋə, n vəli wa.
Tə wá ywàń n yuu nə, n sapaa wa,
tə ga ve də mʋ́, n zaŋʋ wa.
23 Cɩ́gá, yoo tə, nii nə pɩn kʋ yuu wa, yɩ ndə cànʋ́ nə,
kàrà yɩ ndə poni nə,
yá kwìə̀ tə nə caga nii nə, yɩ mɩɩ cwəŋə.
24 Tə wá cɩ̀ n nə də kakʋkwɩʋn,
də kavee gɩgara sʋ̀ràn.
25 Dàn ká pa ʋ fɩra ja mʋ́, ʋ nə yɩ kabwaŋʋ yɩrɩ.
Dàn ká pa ʋ gɩgarɩ mʋ́ ʋ ja, də ʋ bwanyɩa tə.
26 Cɩ́gá, kacwarʋ mʋ̀ yɩ dipɛn səbiu cɩcɩ nə ʋ pɩ̀à,
yá n nə pɩ̀à kan tíú mʋ̀,
kʋ yɩ n mɩɩ tə mama nə n dʋgʋ.
27 Lìù wàá mən ʋ kəni ʋ ganjɩgɩ wa,
yá tə ba ʋ gànàn nə kwé naaa?
28 Lìù wàá məncala yuu ʋ vəli,
yá tə ba ʋ nɛɛ nə də́ naaa?
29 Mə kʋ yɩ nətʋ, kʋ pa lìù tə də nə, ʋ nə pɩ̀à ʋ don kan.
Lìù tə mama ʋ nə dwen ʋ don kan yɩra, ʋ bá jɛ́n càn yáá nə.
30 Ŋwɩ̀àn nə ŋʋan ʋ də́, niən nə jə wá yɩrɩ,
ba ba wá fʋfʋlɩ.
31 Yá ba nə jɩn wá, ʋ mɛ̀ sə ʋ ŋwɩ́n won tə ʋ nə ŋʋan tə, dəkurən barpɛ.
Ʋ wá pa ʋ dìə̀ wiən mama kʋ yɩrɩ.
32 Yá lìù tə mʋ̀ nə tʋŋa bacwaan də kan tíú ba pubʋŋa jə.
Ʋ nə tʋŋa kʋ nətʋ tə, kʋ yɩ ʋ tətə mɩɩ nə ʋ cʋ̀gà.
33 Ba wá tún nʋran ʋ yɩra, ba pa ʋ də́ cavɩra,
yá ʋ yalʋ tə bá zwɛ̀.
34 Cɩ́gá, badoli yàá pa bɛɛ lɩŋa zàn zənzən,
yá dɩɩn tə ʋ nə wá fwi ʋ lɩŋa, ʋ bá dəri lìù yinəgə.
35 Ʋ bá sɛ̀ ʋ jon bwaan wiən kʋ yɩrɩ.
N nə swə n pa zìlə́ wiən kapʋpʋ də tətə, ʋ tə bá sɛ̀.